Ximodo cueenduluʼ ni galán

NABÉ sicarú nga gábicabe tuuxa binni zanda cueendú ni galán. Cani riníʼ ique naquiiñeʼ gácacaʼ tuuxa ndaaniʼ guidxilayú riʼ para cueenducaʼ ni galán la? rúnicaʼ stale stipa para tiidicaʼ lu stobi ra rúnicaʼ dxiiñaʼ dede gácacaʼ ricu ne gusisaca binni laacaʼ. Neca ricá ique stale binni guni zacá, huaxiéʼ si de laacaʼ randa rúnicaʼ ni.

Zanda guininu caquiiñeʼ guni binni chonna cosa para guihuinni dxandíʼ zabeendú ni galán: quixhe ique binni guni ni jneza lu xquendanabani, ganna binni iquiiñeʼ tiempu ne stipa stiʼ ne gusihuinni de laa riale guni xiixa.

Stale xpinni Cristu maʼ bidiicaʼ cuenta pabiáʼ ridxá tipa ladxidoʼcaʼ ora rucheechecaʼ diidxaʼ né stale gana. Dxandíʼ, cásica ni nahuiiniʼ ne cani huaniisi ribeenducaʼ ni galán ora rúnicaʼ jma lu xhiiñaʼ Dios. Peru nuu tu riníʼ ique nabé riree gana ora maʼ cayuni xhiiñaʼ Reinu, nga runi jma ricá íquecaʼ ugaandacaʼ sti cosa ne rusaanacaʼ xhiiñaʼ Dios para despué. Xi rucaa laacabe guiníʼ íquecabe zacá yaʼ. Hombrehuiiniʼ ne dxaapahuiiniʼ, xi zanda gúnitu para cadi guiaandaʼ laatu xii nga ni jma risaca yaʼ. Xi zanda gacané laatu para cueendutu ni galán lu guiráʼ ni gúnitu yaʼ (Jos. 1:8).

Cani ruʼnuʼ ora maʼ biluxe clase

Ca hombrehuiiniʼ ne ca dxaapahuiiniʼ ni naca xpinni Cristu cadi naquiiñeʼ gudiicaʼ lugar chuʼ xiixa ni cueechú laacaʼ de gúnicaʼ xhiiñaʼ Dios. Ñee maʼ nannuʼ xi naquiiñeʼ guʼnuʼ para cadi gandagaaluʼ lu ti cosa si la? Pa zacá ni, nabé sicarú nga ni cayúniluʼ, zabeenduluʼ ni galán lu xquendanabániluʼ.

Peru nuu tu laa jma ricá ique guni ca cosa ni raca despué de guiluxe clase sticaʼ, zándaca laaca ra scuela o sti lugar. Nécapeʼ cadi malu nga ni chigúnicabe la? naquiiñeʼ guinabadiidxacabe: «Pabiáʼ tiempu stinneʼ rié luni pue. Tu binni rucaani naa guidxaagaʼ, ximodo xpiaʼ ca binni ca ne xi zucaacabe naa guneʼ. Ñee jma zacá iqueʼ guneʼ cani raca despué de guiluxe clase stinneʼ la?». Zanda gueeda guicá ique binni guni xiixa ni jma riuulaʼdxiʼ ne pur laani guiaana sin gana ne sin stipa para guni xhiiñaʼ Dios. Nga runi, nabé risaca ganna binni xii nga ni jma naquiiñeʼ guni lu xquendanabani (Efe. 5:15-17).

Guiníʼ íquenu de Stefan.a Laabe guniʼbe: «Dxi napaʼ 12 iza guyuaaʼ lu ti equipu de voleibol. Bineʼ ganar stale premiu ne medalla, ne ñanda ñeeda gaca tuuxa ni nabé risaca ra riguiteʼ que». Peru bidiibe cuenta nabé cuxheleʼ ngue laabe de Dios. Cumu guizáʼ ridxágabe la? rásibe ora maʼ cayuundabe Biblia. Ne laaca sin gana rucheechebe diidxaʼ. Laabe bizeeterube: «Nabé ridxagaʼ ora chichiteʼ, ne pur laani bizulú bisaanaʼ de gannaxhieeʼ cani maʼ biziideʼ lu Biblia. Bidieeʼ cuenta cadi cayuneʼ biaʼ naquiiñeʼ guneʼ».

Ñee naquiiñeʼ cheluʼ scuela roʼ la?

Biblia rusihuinni naquiiñeʼ guʼyaʼ ti xpinni Cristu binnilidxi ne gudii ni caquiiñecabe (1 Tim. 5:8). Yanna, ñee caquiiñepeʼ cheluʼ scuela roʼ para ganda guʼnuʼ ni bizéʼtenu ca la?

Galán guiníʼ íqueluʼ pa qué zaxéleluʼ de Jiobá ora cheluʼ scuela roʼ. Ne lu Biblia zeeda ejemplu stiʼ tuuxa ni zanda gacané lii gúʼyaluʼ ni.

Baruc gupa ti dxiiñaʼ nabé risaca dxi cayuni xhiiñaʼ Dios: gúcabe secretariu stiʼ Jeremías ni riguixhená. Peru guyuu ti tiempu bisaana de gusisácabe dxiiñaʼ que ne guchelube gápabe cosa risaca. Biiyaʼ Jiobá xi racaláʼdxibe gúnibe, ne biquiiñeʼ Jeremías para gudixhená laabe: «Lii [dede yanna cuyúbiluʼ] cosa risaca para lii. Maʼ cadi guyúbiluʼ cani» (Jer. 45:5).

Xi «cosa risaca» ngue cuyubi Baruc yaʼ. Zándaca racaláʼdxibe gácabe ti binni risaca lade ca judíu. O zándaca racaláʼdxibe gápacabe jma bidxichi. Pa zacá ni o pa coʼ la? biaandaʼ laabe gunáʼ ca cosa ni jma risaca lu xquendanabani binni: chuʼ binni gaxha de Dios (Fili. 1:10). Peru bicaadiágabe conseju bidii Jiobá laabe, ngue runi gunda bilabe dxi binitilú Jerusalén (Jer. 43:6).

Xi zanda guizíʼdinu de conseju bidii Jiobá laabe. Guietenaláʼdxinu cadi jneza ni biʼniʼ Baruc ora gucuá ique guyubi cosa risaca para laa. Nga runi, galán guinabadiidxaluʼ laca lii: «Pa maʼ biziideʼ biaʼ caquiiñeʼ para ganda guibaneʼ, ñee dxandíʼ caquiiñeʼ cueeʼ jma tiempu, iquiiñeʼ jma bueltu ne stipa stinneʼ para chaaʼ scuela roʼ la? Ñee jneza guneʼ ni para si ugaandaʼ xiixa ni racaladxeʼ o para guneʼ ni racalaʼdxiʼ bixhozeʼ o xcaadxi binnilidxeʼ la?».

Guidúʼyanu ni bizaaca Aleksander, laa runi programa ni riquiiñeʼ computadora. Cani rizanebe scuela gúdxicaʼ laabe guicaabe ti cursu ra guiziidibe jma. Ora bidiibe cuenta la? maʼ qué gápabe tiempu para gúnibe xhiiñaʼ Dios. Laabe cusiénebe: «Beeda gacaʼ ti binni ni nuu xhiiñaʼ guidubi dxi ne qué gapa paraa guiluxe, ne ruchiiñaʼ xquendabiaaneʼ naa purtiʼ qué ganda guneʼ cani gudixhe ique ndaaniʼ xquidxi Dios».

Cani cá ique puru si dxiiñaʼ

Stiidxaʼ Dios riguu gana cani runi dxiiñaʼ gúnicaʼ xhiiñacaʼ jneza ne rábini ca patrón cadi ganinacaʼ binni. Apóstol Pablu peʼ bicaa ca diidxaʼ riʼ: «Irá ni guni tu la? laguni ni de idubi ladxidó to, casi ñaca xhiiña Señor cayuni tu, cadi xhiiña binni» (Col. 3:22, 23). Peru, neca naquiiñeʼ gúninu xhiiñanu jneza, ni jma risaca para laanu nga chuʼnu gaxha de Jiobá, Dios ni bizáʼ laanu (Ecl. 12:13). Pa jma guicá íquenu gúninu puru si dxiiñaʼ la? nagueenda zusaananu xhiiñaʼ Dios para despué.

Ne laaca zándaca gueeda guiaananu sin stipa para gúninu dxiiñaʼ lade ca binni ridagulisaa ne ralídxinu. Bietenalaʼdxiʼ gudxi rey Salomón laanu cadi galán diʼ gúninu «doble de biaʼ dxiiñaʼ» rúninu, purtiʼ zeeda gácani casi ora ñúninu «stipa pur [nináʼzenu] bi». Pa gandagaa ti xpinni Cristu jma lu dxiiñaʼ stiʼ la? zándaca gueeda gácabe casi tuuxa ni maʼ qué rasi purtiʼ nabé nuu xizaa pur guiráʼ dxiiñaʼ stiʼ. Dede zándapeca gueeda gácabe esclavu stiʼ dxiiñaʼ stibe ne pur laani guiaanabe sin stipa ne guidxaga xquendabiaanibe. Ora rizaaca binni zacá la? nabé nagana para guiecheʼ «ne guʼyaʼ ni galán guleendú dxiiñaʼ nadipaʼ biʼniʼ» (Ecl. 3:12, 13; 4:6). Peru ndiʼ nga ni jma triste: qué zápabe stipa ne gana ni caquiiñeʼ para gúʼyabe binnilídxibe ne para ganda chuʼbe gaxha de Dios.

Guzéʼtenu ejemplu stiʼ Janusz, ti hombre ni nabani Europa oriental. Laabe gudíxhebe ti negocio de yaga huiiniʼ ne nabé gucuá íquebe dxiiñaʼ que. Laabe guniʼbe sicaríʼ: «Nabé ridxagayaa binni naa purtiʼ runeʼ xhiiñaʼ jneza ne riuuladxeʼ guyubeʼ xcaadxi modo gaca ni, peru nabé zitu nuaaʼ de Dios. Primé la? bisaanaʼ de gucheecheʼ diidxaʼ, ne despué bisaanaʼ de chaaʼ guendaridagulisaa. Nécapeʼ bidii ca binnigola conseju naa la? qué nulabe laacaʼ purtiʼ nabé maʼ rudxiibaʼ laca naa. Ne despué maʼ bixeleʼ de xquidxi Dios».

Zanda cueenduluʼ ni galán

Maʼ bidúʼyanu chonna clase guendanagana ni zanda gueeda guchenda laanu ne guxheleʼ laanu de Dios. Ñee cayuniná tobi de laacani lii la? Pa zacá ni, rinábadu lii gúʼndaluʼ ca textu, ca guendarinabadiidxaʼ ne cani guníʼ caadxi xpinni Cristu ni zeeda raríʼ, purtiʼ zacanécani lii gúʼyaluʼ pa zeluʼ lu neza ra zabeenduluʼ ni galán.

Cani raca guiluxe si clase. Ñee jma cá íqueluʼ cani la? Ñee maʼ riquiiñeluʼ tiempu bíʼniluʼ xhiiñaʼ Dios dxiqué para gúniluʼ cani la? Ñee maʼ huaxiéʼ riuuláʼdxiluʼ chuʼluʼ lade ca xpinni Cristu la? Pa zacá ni la? galán chinanduʼ ejemplu stiʼ rey David, laa biʼniʼ orar Jiobá sicaríʼ: «Biluíʼ naa neza ra naquiiñeʼ sayaʼ» (Sal. 143:8).

Xi bizaaca Stefan, hombre bizéʼtenu primé que yaʼ. Ti binnigola ni riganna ca binni ridagulisaa gudxi laabe ca diidxaʼ riʼ: «De guidubi ladxidoʼloʼ nga riniʼluʼ de guiráʼ ni cá íqueluʼ ugaandaluʼ lu voleibol, njaʼ». Stefan rietenalaʼdxiʼ: «Nabé bicaa ca diidxaʼ que naa guiníʼ iqueʼ. Bidieeʼ cuenta maʼ cadi jneza canazayaʼ. Oraqueca bixeleʼ de ca hombrehuiiniʼ ni nuaaniáʼ lu equipu que ne biyubeʼ xhamiguaʼ lade ca binni ridagulisaa». Yanna jma ricá íquebe gúnibe xhiiñaʼ Jiobá né stale gana. Xi conseju rudiibe ca hombrehuiiniʼ ne ca dxaapahuiiniʼ yaʼ. «Gunabadiidxaʼ ca xhamíguluʼ, bixhózeluʼ ne jñaaluʼ ne ca binnigola pa maʼ biiyacaʼ cayuʼnuʼ xiixa ni cuxheleʼ lii de Jiobá purtiʼ jma ricá íqueluʼ chichíteluʼ o pur ruʼnuʼ xcaadxi cosa.»

Xiñee qué gábiluʼ ca binnigola ni nuu ra ridagulisaaluʼ nápaluʼ gana gacaneluʼ ca xpinni Cristu ni caquiiñecaʼ xiixa yaʼ. Ñee zanda gacaneluʼ ca binni ni maʼ huaniisi ni caquiiñecaʼ tu chuʼ ra nuucaʼ o caquiiñecaʼ sti cosa, casi tu chisiʼ xiixa sticaʼ o gacané laacaʼ gaca xiixa dxiiñaʼ ndaaniʼ lídxicaʼ la? Ne zanda guʼnuʼ jma lu xhiiñaʼ Dios laga nahuiiniluʼ casi gácaluʼ precursor ne zacá chuʼluʼ nayecheʼ ora gusiidiluʼ binni de Dios.

Scuela roʼ. Jesús na cadi jneza runi tuuxa «ni ruyubi usisaca» binni laa (Juan 7:18). Ante quixhe íqueluʼ pa naquiiñeruʼ cheluʼ scuela la? bietenalaʼdxiʼ ribeza Dios ganna ca xpinni cuicaʼ «ni dxandí risaca» (Fili. 1:9, 10). Ñee maʼ biʼnuʼ nga la?

Aleksander, hombrehuiiniʼ runi programa ni riquiiñeʼ computadora ni maca bizéʼtenu que, cusiene gupa xidé bichaa modo cayuni caadxi cosa lu xquendanabani: «Bicaadiagaʼ conseju bidii ca binnigola naa ne bisaanaʼ de guneʼ caadxi cosa ni huaxiéʼ risaca. Bieneʼ cadi caquiiñeʼ diʼ guundaʼ jma ra scuela roʼ. Nibaʼnaʼ siʼ ngue tiempu ne stipa stinneʼ». Dede dxiqué jma bizulú cayacanebe né stale gana lu ca dxiiñaʼ raca lade ca binni ridagulisaa. Despué binduuxebe ti cursu ni runibiáʼcabe yanna casi Scuela ra riziidiʼ ca Solteru gúnicaʼ Xhiiñaʼ Dios. Dxandíʼ gudixhe íquebe guiziidibe ximodo gúnibe xhiiñaʼ Dios jma jneza «laga zanda» (Efe. 5:16).

Dxiiñaʼ ruʼnuʼ. Ñee nisi dxiiñaʼ stiluʼ ricá íqueluʼ guʼnuʼ la? Ñee maʼ huaxiéʼ riníʼneluʼ familia stiluʼ pur laani la? Ñee rudiini lugar guʼnuʼ jma lu xhiiñaʼ Dios la? Ñee cayuʼnuʼ stipa pur gutiidiluʼ ca libana stiluʼ jma jneza ndaaniʼ Yoo stiʼ Reinu la? Ñee racaneluʼ ca xpinni Cristu ora güíneluʼ laacaʼ diidxaʼ la? Qué chuʼ dxi guiaandaʼ conseju ni zeeda lu Biblia riʼ lii: «Bidxibi Dios ni dxandíʼ ne biʼniʼ guiráʼ ni na ca mandamientu stiʼ». Pa guʼnuʼ ni na cani la? zudii Jiobá lii stale ndaayaʼ ne zuuyuʼ «ni galán guleendú dxiiñaʼ nadipaʼ» biʼnuʼ (Ecl. 2:24; 12:13).

Ximodo guyeni Janusz lu negocio stiʼ yaʼ. Huaxiéʼ galán guyeni laabe. Lugar de nireendú xhiiñabe la? birá xpuéltube ne bizaabibe binni. Peru óraque gudixhe íquebe guyúbibe Jiobá. Gudixhe chaahuibe cani rúnibe ne yanna maʼ nácabe precursor regular ne binnigola. Laabe cusiénebe: «Cumu nuaaʼ nayecheʼ né ni caquiiñesiaʼ ne runeʼ stipa pur gacaniáʼ xcaadxi binni chuʼ gaxha de Dios la? gastiʼ qué ruchiiñaʼ naa ne nuudxí ladxiduáʼ» (Fili. 4:6, 7).

Hombrehuiiniʼ o dxaapahuiiniʼ, gulee tiempu para guiníʼ íqueluʼ xipeʼ nga racaláʼdxiluʼ gúniluʼ ne xii nga ni jma risaca para lii. Bietenalaʼdxiʼ gunáʼ nga neza ra zabeenduluʼ ni galán. Ni jma naquiiñeʼ guisaca para lii nga guʼnuʼ ni na Jiobá lu xquendanabániluʼ.

Zándaca naquiiñeʼ guchaaluʼ modo ruʼnuʼ caadxi cosa o gusiaandaluʼ cani huaxiéʼ risaca. Peru zacatiʼ nga zanda gúʼyaluʼ pabiáʼ ndaayaʼ ricaa binni ora runi «ni nachaʼhui ne ni chuʼlaʼdxiʼ [Dios] ne ni jneza peʼ» (Rom. 12:2). Dxandíʼ, pa guʼnuʼ ni na Jiobá de guidubi ladxidoʼloʼ la? zabeenduluʼ ni galán.

[Ni cá ñee yaza]

[Dibuju/foto ni zeeda lu yaza 30]

Gudxi Jiobá Baruc cadi gachelú gapa cosa ni risaca

[Cuadru ni zeeda lu yaza 31]

Modo zanda cueenduluʼ ni galán lu xquendanabániluʼ

Né guiráʼ dxiiñaʼ raca yanna, xi zanda guʼnuʼ para cadi gucueeza cani lii de guʼnuʼ ca cosa ni dxandíʼ risaca yaʼ. Cueeluʼ tiempu para guiníʼ íqueluʼ xii nga ni racaláʼdxiluʼ gúniluʼ ne xii nga ni jma risaca para lii. Zanda iquiiñeʼ ca guendarinabadiidxaʼ riʼ lii:

CANI RUʼNUʼ ORA MAʼ BILUXE CLASE

▪ Xi zanda gucaacani naa guneʼ.

▪ Pabiáʼ tiempu zuniteʼ lu cani.

▪ Ñee maʼ puru laacani ricá iqueʼ guneʼ la?

▪ Ñee riquiiñeʼ tiempu bineʼ xhiiñaʼ Dios dxiqué para laacani la?

▪ Ñee rucaacani naa guidxaagaʼ binni ni qué runibiáʼ Dios la?

▪ Ñee jma riuuladxeʼ guidxaagaʼ cani cadi naca xpinni Cristu la? o jma riuuladxeʼ guidxaagaʼ ca binni ridagulisaa.

SCUELA ROʼ

▪ Pa maʼ biziideʼ biaʼ caquiiñeʼ para ganda guibaneʼ, ñee dxandíʼ caquiiñeʼ cueeʼ jma tiempu, iquiiñeʼ jma bueltu ne stipa stinneʼ para chaaʼ scuela roʼ la?

▪ Ñee dxandíʼ caquiiñeʼ ti título ni rudii ti scuela roʼ para ganda guneʼ dxiiñaʼ ti gapa ni guibaneniáʼ la?

▪ Ñee zusaanaʼ de chaaʼ ca guendaridagulisaa pa chaaʼ scuela roʼ la?

▪ Ñee maʼ nannaʼ xii nga «ni dxandí risaca» la?

▪ Ñee caquiiñeruʼ guneʼ cré dxandíʼ nga qué zusaana Jiobá de gacané laanu la?

DXIIÑAʼ RUʼNUʼ

▪ Ñee rudii dxiiñaʼ stinneʼ lugar naa para guiecheʼ ne guuyaʼ «ni galán guleendú dxiiñaʼ nadipaʼ» bineʼ la?

▪ Ñee rusirani stipa stinneʼ ne rusidxagani xquendabiaaneʼ ne pur nga raca nagana para naa gudieeʼ ni caquiiñeʼ binnilidxeʼ ne gusiideʼ laacaʼ de Dios la?

▪ Ñee jma riquiiñeʼ tiempu stinneʼ para laani ne maʼ qué randa rinieniáʼ familia stinneʼ la?

▪ Ñee jma ricá iqueʼ dxiiñaʼ stinneʼ ne pur laani rusaanaʼ de guneʼ xhiiñaʼ Dios la?

▪ Ñee maʼ huaxiéʼ galán modo rudieeʼ ca libana stinneʼ ndaaniʼ Yoo stiʼ Reinu la?