Bietenalaʼdxiʼ de Dios ni bizáʼ lii
«Bietenalaʼdxiʼ yanna de [Dios] Ni Jma Nandxóʼ ni bizáʼ lii, ca dxi nahuiiniluʼ.» (ECL. 12:1.)
1. Ximodo nánnanu runi cré Jiobá zanda guni ca hombrehuiiniʼ ne ca dxaapahuiiniʼ ca ni nabe.
GUIRÁʼ ca hombrehuiiniʼ ne ca dxaapahuiiniʼ xpinni Cristu la? nabé risácacabe para Jiobá, ne laabe ruuyabe laacaʼ casi gupa riaba guiráʼ siadóʼ. Laabe guniʼbe ziuu stale de laacaʼ dxi tindené Xiiñibe ca guidxi ca. Ca hombrehuiiniʼ ne ca dxaapahuiiniʼ riʼ zúnicaʼ guiráʼ ni guni mandar Cristu laacaʼ ne stale gana (Sal. 110:3). Zaca ni na ca diidxaʼ riguixhená ca dxi maʼ guixiéʼ fe napa binni Dios, ora chuʼ stale binni qué iquiiñeʼ ne zacá ique ca binni ca gápacaʼ stale bidxichi ne zuyúbicaʼ puru si ni racaláʼdxicaʼ. Peru maca nanna Jiobá cadi zacá diʼ nga zaca guiráʼ ca hombrehuiiniʼ ne ca dxaapahuiiniʼ ni guni adorar laabe. ¡Dxandíʼ nanna Jiobá zanda guni adorárcabe laa jneza!
2. Ximodo nga guietenaláʼdxinu Jiobá.
2 Guiníʼ íquesinu yanna pabiáʼ nayecheʼ riuu Jiobá ora guʼyaʼ rietenalaʼdxiʼ guiráʼ ca hombrehuiiniʼ ne ca dxaapahuiiniʼ ca laabe, casi Dios Ni Jma nandxóʼ ni bizáʼ laacaʼ (Ecl. 12:1). Peru guietenaláʼdxinu Jiobá la? qué riníʼ diʼ nga guiníʼ íquesinu de laabe, sínuque naquiiñeʼ gúninu ni riuuláʼdxibe, chinándanu ni na ca ley stibe ne gúninu guiráʼ ni rusiidiʼ ca conseju stibe guiráʼ dxi. Laaca naquiiñeʼ guni crenu de guidubi ladxidoʼno dxandíʼ racaláʼdxibe ni jma galán para laanu (Sal. 37:3; Isa. 48:17, 18). Yanna lii, ñee zacá nga ruuyaluʼ Dios ni bizáʼ lii la?
«Gulaʼquiʼ guidubi ladxidoʼloʼ lu naʼ Jiobá»
3, 4. Ximodo bisihuinni Jesús biʼniʼ cré Jiobá, ne xiñee risaca guni crenu Jiobá zacaca.
3 Ejemplu stiʼ tuuxa ni biʼniʼ cré Dios de guidubi ladxidóʼ nga Jesucristu. Laabe bíʼnibe ni na ca diidxaʼ zeeda lu Proverbios 3:5, 6 ra na: «Gulaʼquiʼ guidubi ladxidoʼloʼ lu naʼ Jiobá, ne cadi gúniluʼ ni na si xpiaaniluʼ. Lu guiráʼ ni gúniluʼ guníʼ ique laabe, ne laabe zúnibe ca neza stiluʼ derechu». Guyuunisa si Jesús que la? gucalaʼdxiʼ Binidxabaʼ nucaa laabe nucheenebe Dios, ora gudxi laabe zanda guni mandarbe guidxilayú riʼ ne gusisaca binni laabe (Luc. 4:3-13). Peru qué nudii diʼ Jesús lugar niguite Binidxabaʼ laa. Xiñee yaʼ. Purtiʼ nánnabe naquiiñeʼ guidxibi binni Jiobá ne cadi gudxiibaʼ laca laa, ti zacá gaca ricu, gusisácacabe laa ne gapa guendanabani (Pro. 22:4).
4 Yanna riʼ nabé nga rachelú binni gapa ni napa stobi ne ruyubi puru si para laa. Cumu lade ca binni ca nga nabáninu la? caquiiñeʼ chinándanu ejemplu stiʼ Jesús. Bietenalaʼdxiʼ ndiʼ hombrehuiiniʼ ne dxaapahuiiniʼ, Binidxabaʼ cayuni stale cosa para cuee ca xpinni Jiobá lu neza nabéʼ ra zacaacaʼ guendanabani. Guizáʼ nga ñuuláʼdxibe ñe guiráʼ binni lu neza xilaga ra guinitilucaʼ. ¡Cadi gudiiluʼ lugar quítebe lii! Ni jma galán gúniluʼ nga guietenaláʼdxiluʼ de Dios ni bizáʼ lii. Biʼniʼ cré laabe de guidubi ladxidoʼloʼ ne biʼniʼ stipa para guicaaluʼ «guendanabani ni qué zaluxe». Cadi guiaandaʼ lii dxandíʼ zaca nga, ne maʼ cadi candaa diʼ para gácani (1 Tim. 6:19).
Guca binni nuu xpiaaniʼ
5. Xi riníʼ íqueluʼ de ni chiguizaaca guidxilayú riʼ.
5 Ca hombrehuiiniʼ ne ca dxaapahuiiniʼ ni rietenaláʼdxicaʼ de Dios ni bizáʼ laacaʼ la? jma nuu xpiaanicaʼ que xcaadxi baʼduʼ biaʼca laacaʼ (biindaʼ Salmo 119:99, 100). Cumu maʼ biziidicabe xi naguixhe ique Jiobá guni la? nánnacabe maʼ cadi candaa diʼ zanitilú guidxilayú riʼ. Nécapeʼ huaxiéʼ iza nga maʼ bibániluʼ la? zándaca maʼ rudiiluʼ cuenta nisi cadxibi binni yanna ne nuucaʼ xizaa pur stale cosa. Ne pa canazaluʼ scuela la? zándaca huayunadiágaluʼ racá pabiáʼ cayaca biidiʼ Guidxilayú riʼ, jma maʼ nandáʼ cayaca yanna, cusábacabe stale yaga ne cayaca xcaadxi cosa casi ca nga. Ca cosa ni cayaca riʼ nabé caguucani xizaa stale binni. Peru laanu, ca testigu stiʼ Jiobá, nánnanu laacani nga seña ni cusihuinni mayaca guinitilú guidxilayú ni runi mandar Binidxabaʼ riʼ (Apo. 11:18).
6. Xi huayaca stale hombrehuiiniʼ ne dxaapahuiiniʼ.
6 Triste nga guzéʼtenu ni, peru caadxi hombrehuiiniʼ ne dxaapahuiiniʼ xpinni Cristu maʼ cadi zuhuaacaʼ dxiichiʼ lu Stiidxaʼ Dios purtiʼ maʼ biaandaʼ laacaʼ mayaca guinitilú guidxilayú ni runi mandar Binidxabaʼ riʼ (2 Ped. 3:3, 4). Xcaadxi maʼ bíʼnicaʼ xiixa cosa malu purtiʼ ridxaagacaʼ binni ni qué runi ni jneza o pur ruuyacaʼ película ra ridiʼdiʼ cosa dxabaʼ (Pro. 13:20). ¡Guizáʼ triste nga guixeleʼ binni de Dios yanna ra mayaca guinitilú guiráʼ ca cosa malu riʼ! Para cadi guizaacanu nga la? naquiiñeʼ guizíʼdinu xi bizaaca ca israelita dxi guyuucaʼ Moab. Guiníʼ íquenu mayaca guiuu guidxi Israel lu layú bizabiruaa Dios gudii laacabe lu iza 1473 ante de ca dxi stiʼ Jesús. Xi gúcacabe raqué yaʼ.
Bicheecabe órapeʼ mayaca chindácabe
7, 8. 1) Xi trampa biquiiñeʼ Binidxabaʼ guidxi Moab. 2) Xi trampa caquiiñebe yanna.
7 Binidxabaʼ gudixhe ique guni intiisi cosa para cadi guicaa guidxi Israel herencia ni chigudii Dios laacabe. Primé la? bicaabe ti ni riguixhená ni láʼ Balaam guinabaʼ mal para guidxi que, peru qué ñanda diʼ ñaca ngue. Ngue runi biquiiñebe sti trampa: bicaabe ca gunaa sicarú de guidxi Moab que quítecaʼ ique ca israelita ti gucheenecaʼ Jiobá. Ne trampa riʼ huaxa gunda bisaba Binidxabaʼ stale de laacabe, purtiʼ stale de laacabe guyuunécabe ca gunaa xiiñiʼ ca binni de Moab que ne bizuxícabe xañee Baal ni guyuu lu dani láʼ Peor. Nécapeʼ guizáʼ maʼ gaxha ngue nuucabe de guicaacabe herencia sicarú que la? guti biaʼ veinticuatro mil israelita raqué. ¡Triste nga ni bizaaca ca binni ca! (Núm. 25:1-3, 9.)
8 Laanu laaca mayaca guicaanu ti herencia ni jma galán que layú ni gucuaa ca israelita que, laani nga guidxilayú cubi stiʼ Dios. Cásica dxiqué la? Binidxabaʼ laaca racalaʼdxiʼ gucaa xquidxi Dios guchee, ne rúnibe ni ora rucaabe laacaʼ guiníʼ íquecaʼ cadi malu diʼ nga chuʼné tuuxa ni cadi xheelaʼ. Maʼ qué risaca para stale binni guibani jneza, nga runi nácabe cadi malu diʼ gapa binni jnadxii, ne laaca riníʼcabe zanda gaca tuuxa muxeʼ pa gapa gana. Ti gunaa xpinni Cristu guníʼ: «Ralídxisidu ne ndaaniʼ Yoo stiʼ Reinu nga ra riziidiʼ ca xiiñidu cadi jneza ruuyaʼ Dios gatané tuuxa sti binni ni cadi xheelaʼ ne gaca muxeʼ».
9. Xi guendanagana ridxaagalú ca hombrehuiiniʼ ne ca dxaapahuiiniʼ ora maʼ ziniisicaʼ, ne xi zanda gúnicaʼ para gudxiilucaʼ ni.
9 Ca hombrehuiiniʼ ne ca dxaapahuiiniʼ ni rietenaláʼdxicaʼ Dios ni bizáʼ laacaʼ la? nánnacaʼ xheelaʼ si binni nga ni zanda gatané purtiʼ zacá nga gudixhestí Dios ni para gapa binni xiiñiʼ. Nga runi zinándacabe ni maʼ gudixhe Jiobá: xheelaʼ si binni nga ni naquiiñeʼ gatané (Heb. 13:4). Peru cadi guiaandaʼ ndiʼ laanu, ora maʼ ziniisi ca hombrehuiiniʼ ne dxaapahuiiniʼ ca la? riníʼ íquecaʼ pa ñanda maʼ ñuba nichaganacaʼ, nga runi raca nagana para laacaʼ gúnicaʼ ni jneza (1 Cor. 7:36, NM). Xi zanda gúniluʼ ora málasi guzulú guiníʼ íqueluʼ xiixa ni cadi jneza yaʼ. Gunabaʼ Jiobá gacané lii para guiníʼ íqueluʼ puru si ni jneza. Jiobá rucaadiaga guiráʼ ca binni ni ruyubi laabe de guidubi ladxidóʼ (biindaʼ Lucas 11:9-13). Laaca galán guiníʼneluʼ sti binni ni caziidiluʼ de Dios.
Gulí ne guendabiaaniʼ ni rapuʼ gana gúniluʼ
10. Xi cadi naquiiñeʼ gúniluʼ, ne xi conseju naquiiñeʼ guiníʼ íqueluʼ.
10 Stale hombrehuiiniʼ ne dxaapahuiiniʼ nuu yanna riʼ nabánicaʼ modo na íquecaʼ, ne nisi maʼ cuyúbicaʼ xi gúnicaʼ para chuʼcaʼ nayecheʼ, neca cadi jneza ni gúnicaʼ. Nuucabe zacá purtiʼ cadi cudiicabe lugar gabi Dios laacabe xi naquiiñeʼ gúnicabe ne purtiʼ qué gánnacabe pa zadxiña dxi guinitilú ca cosa malu cayaca yanna (Pro. 29:18). Nabánicabe casi bibani caadxi israelita ni qué nuzuubaʼ diidxaʼ ca dxi stiʼ Isaías, ca binni que bibánicaʼ para gósicaʼ ne xhúdxicaʼ purtiʼ nacaʼ zaqué nga ziuucaʼ nayecheʼ (Isa. 22:13). Lugar de guiníʼ íqueluʼ gúniluʼ casi runi ca binni ca, cadi jma galán nga guiníʼ íqueluʼ ni cabézanu gudii Jiobá ca binni ni ruzuubaʼ stiidxaʼ la? Zanda guiníʼ íqueluʼ sicaríʼ: Ñee dxandíʼ racalaʼdxeʼ gueeda guidxilayú cubi stiʼ Dios la? Ñee runeʼ stipa para guibaneʼ modo na Jiobá «laga cabeza [...] enda nayeche uníʼ be udii be laanu» la? (Tito 2:12, 13). Ni guicábiluʼ de cani gunabadiidxanu ca zacanécani lii para gúʼyaluʼ xi quixhe íqueluʼ gúniluʼ ne xquendanabániluʼ.
11. Xiñee riquiiñeʼ gucaa ique ca xpinni Cristu ni canazá scuela guiziidiʼ chaahuicaʼ.
11 Ca binni nabani yanna riʼ rucaacaʼ guiráʼ ca hombrehuiiniʼ ne ca dxaapahuiiniʼ guicá íquecaʼ checaʼ scuela roʼ para gácacaʼ tuuxa ni risaca. Peru pa canazaluʼ scuela nagasi la? naquiiñeʼ gúniluʼ stipa para guiziidiluʼ biaʼ gándatiʼ cani jma zaquiiñeluʼ. Purtiʼ cadi zacané si scuela ca lii para guidxeʼluʼ dxiiñaʼ, sínuque laaca zanda gacaneni lii gúniluʼ xiixa dxiiñaʼ lade ca binni ridagulisaa ne ora gucheecheluʼ diidxaʼ. Para ganda gúniluʼ ca nga la? naquiiñeʼ guiziidiluʼ guiníʼ íqueluʼ jneza, guiniʼluʼ jneza ti guiene binni lii ne guiníʼneluʼ laacaʼ ne respetu. Peru ni jma zanda gusiidiʼ lii gúniluʼ ni jneza nga guiráʼ ni gúʼndaluʼ lu Biblia. Pa gúniluʼ stipa para chinándaluʼ guiráʼ ni rusiidini lu xquendanabániluʼ la? zabeenduluʼ ni galán ne zudii Jiobá lii guendanabani ni qué zaluxe (biindaʼ Salmo 1:1-3).a
12. Xi ejemplu nga naquiiñeʼ chinanda ca familia ni runi ni na Dios yanna.
12 Nabé bisaca para ca binni de guidxi Israel guiziidiʼ ca xiiñicaʼ. Bixhózecabe ne jñaacabe nga cani bisiidiʼ laacabe, ne biziidiʼ ca baʼduʼ que guiráʼ ni naquiiñeʼ gánnacaʼ para guibánicaʼ, peru laaca biziidicabe guni adorárcabe Dios ne gúnicabe ni na ca ley stiʼ (Deu. 6:6, 7). Ca baʼduʼ de Israel que biziidicaʼ ni caquiiñeʼ gánnacaʼ purtiʼ bicaadiágacaʼ bixhózecaʼ ne jñaacaʼ ne purtiʼ bicaadiágacaʼ xcaadxi binni ni ridxibi Dios. Guiráʼ ni biziidicabe de Jiobá gucanécani laacabe para gúcacabe binni nuu xpiaaniʼ, binni runi ni jneza, binni riene ne ni riníʼ ique jneza, ne huaxiéʼ si binni zacá laa yanna (Pro. 1:2-4; 2:1-5, 11-15). Guiráʼ ca familia ni zinanda Cristu la? laaca risaca nga gusiidicaʼ xiiñicaʼ.
Bicaadiaga ca binni ni nadxii lii
13. Tu rudii conseju ca hombrehuiiniʼ ne ca dxaapahuiiniʼ ca yanna riʼ, ne xiñee naquiiñeʼ gúʼyacabe pa jneza cani.
13 Ca hombrehuiiniʼ ne ca dxaapahuiiniʼ ca runadiágacaʼ conseju stiʼ stale binni, dede ne stiʼ ca maestru ni rusiidiʼ laacabe ra scuela. Stale de ca binni ca ruzeetecaʼ jma galán nga gaca binni tuuxa ni risaca ndaaniʼ guidxilayú riʼ. Nga runi gunabaʼ Jiobá gusiidiʼ lii ne bichaaga ca conseju stiʼ ca binni ca ne ca conseju ni cá lu Biblia ne ni zeeda lu ca guiʼchiʼ ni rudii mozo ni nuu xpiaaniʼ. Lii maʼ biziidiluʼ lu Biblia jma racalaʼdxiʼ Binidxabaʼ gusaba cani nahuiiniʼ ca purtiʼ huaxiéʼ nánnacaʼ. Bietenalaʼdxiʼ xi bizaaca ndaaniʼ jardín ni guyuu Edén que. Cumu huaxiéʼ ngue nanna Eva la? ngue runi bíʼnibe ni na Binidxabaʼ, ti binni ni qué runibiaʼbe ne qué liica nizaalaʼdxiʼ laabe. ¡Gadxé si ñácani pa nuzuubabe stiidxaʼ Jiobá! Jiobá huaxa gunnaxhii laabe ne bizaalaʼdxiʼ laabe, ne bisihuinni dxandíʼ ni pur stale cosa ni biʼniʼ para laabe (Gén. 3:1-6).
14. Xiñee riquiiñeʼ gucaadiágaluʼ Jiobá ne bixhózeluʼ ne jñaaluʼ.
14 Laaca nadxii Dios ni bizáʼ guiráʼ xixé cosa lii, ne cadi nadxiibe lii pur cani zanda gudiiluʼ laabe. Laabe racaláʼdxibe guibániluʼ nayecheʼ, cadi yanna si, sínuque stale iza. Nga runi, cayabi Jiobá lii ca diidxaʼ riʼ, ne laaca cayábibe ni guiráʼ ca xpínnibe purtiʼ nadxiibe laacaʼ: «Ndiʼ nga neza ca. Lasá luni» (Isa. 30:21). Pa runi bixhózeluʼ ne jñaaluʼ ni na Jiobá la? laaca sti ndaayaʼ nga para lii. Bicaadiaga laacabe ne stale respetu ne gucuaa ca conseju stícabe ora maʼ chitixhe íqueluʼ xi gúniluʼ (Pro. 1:8, 9). Laacabe racaláʼdxicabe guibániluʼ sin gátiluʼ, ne nga nga ti cosa ni jma risaca que gápaluʼ bidxichi o gácaluʼ tuuxa ni risaca ndaaniʼ guidxilayú riʼ (Mat. 16:26).
15, 16. 1) Xi nánnanu zuni Jiobá para laanu. 2) Xi zanda guizíʼdinu de ni bizaaca Baruc.
15 Ca binni ni rietenalaʼdxiʼ de Dios ni bizáʼ laacaʼ la? cadi cá lúdicaʼ gápacaʼ stale cosa risaca, purtiʼ runi crecaʼ zuni Jiobá ni na ca diidxaʼ riʼ para laacaʼ: «Qué zusaana laatu ne qué ziaana dxie de acaniá laatu» (biindaʼ Hebreos 13:5). Peru ca binni ni nabani yanna riʼ gadxé modo riníʼ íquecaʼ, nga runi naquiiñeʼ gatananu ti cadi guicá modo riníʼ íquecabe laanu (Efe. 2:2). Guiníʼ íquenu xi bizaaca Baruc, secretariu stiʼ Jeremías que. Baruc biʼniʼ ni na Dios ne bibánibe Jerusalén lu ca dxi jma nagana ante guinitilú guidxi que lu iza 607 ante de ca dxi stiʼ Jesús.
16 Ruluíʼ si nabé gucalaʼdxiʼ Baruc nibani dxilaʼdxiʼ ne ñapa stale cosa. Ora biiyaʼ Jiobá xii ngue racaláʼdxibe la? bidii conseju laabe para gusaana de guyúbibe cosa risaca para laabe. Bidiibe lugar guluu jneza Jiobá laabe ne gúcabe binni nuu xpiaaniʼ purtiʼ bicaadiágabe ni gudxi Jiobá laabe, ngue runi bilabe ora binitilú guidxi Jerusalén (Jer. 45:2-5). Ca binni ni bibani ca dxi stibe que gucuá íquecaʼ gápacaʼ stale cosa ni risaca ne bisiaandacaʼ Jiobá. Peru biniti ca binni que guiráʼ ni gúpacaʼ, dede guti stale de laacaʼ ora binitilú ca babilonio guidxi que (2 Cró. 36:15-18). Ni bizaaca Baruc ca rusiidiʼ laanu jma risaca nga chuʼnu galán ne Dios que gácanu ricu o gácanu tuuxa binni ni risaca ndaaniʼ guidxilayú riʼ.
Ca ejemplu galán ni zanda chinándanu
17. Xiñee galán ejemplu bisaana Jesús, Pablu ne Timoteu para ca xpinni Dios ni nabani yanna riʼ.
17 Para ganda sanu lu neza ni ziné laanu lu guendanabani ni qué zaluxe la? Stiidxaʼ Dios rudii stale ejemplu galán ni naquiiñeʼ chinándanu. Guzéʼtenu ejemplu stiʼ Jesús. Laasibe nga binni ni jma nuu xpiaaniʼ ne jma napa poder ni huabani ndaaniʼ Guidxilayú riʼ, peru gucuá íquebe gúnibe ti dxiiñaʼ ni gacané binni stale iza: gusiidibe «binni modo runi mandar Dios» (Luc. 4:43). Yanna, xi biʼniʼ apóstol Pablu para biquiiñeʼ xquendanabani ti ganda guni ni na Jiobá yaʼ. Bisaanabe dxiiñaʼ gúpabe ra ñanda ñuni ganarbe stale bueltu, ne biquiiñebe guiráʼ stipa ne tiempu stibe para gucheechebe ca diidxaʼ nacubi ne galán stiʼ Reinu. Ne Timoteu ni beeda gaca casi ti xiiñiʼ Pablu «neza Jesucristu» la? yenanda ejemplu stibe (1 Tim. 1:2). Ñee guníʼ ique Jesús, Pablu ne Timoteu cadi jneza modo biquiiñecaʼ guendanabani sticaʼ la? Coʼ, qué niníʼ iquedícabe zacá. Dede guníʼ Pablu beeda gaca guiráʼ ni ñanda ñápabe dxiqué «casi guixi», ora bichaagabe cani ne dxiiñaʼ bidii Dios laabe gúnibe (Fili. 3:8-11).
18. Xi biʼniʼ ti hombrehuiiniʼ xpinni Cristu, ne xiñee qué riuube triste pur gudixhe íquebe gúnibe zacá.
18 Ca dxi stinu riʼ la? stale hombrehuiiniʼ ne dxaapahuiiniʼ nápacaʼ fe cásica ni gupa Jesús, Pablu ne Timoteu. Guidúʼyanu xi guníʼ ti hombrehuiiniʼ ni gupa ti dxiiñaʼ ra biʼniʼ ganar stale bueltu, nabe: «Cumu ruuyacabe runeʼ ni rusiidiʼ ca conseju stiʼ Biblia la? nagueenda bidiicabe naa stale dxiiñaʼ ni risaca. Peru, neca cayuneʼ ganar stale bidxichi, bidiéʼ cuenta cadi cayunediáʼ xiixa ni dxandíʼ risaca lu guendanabani stinneʼ. Ora gudxeʼ ca binni ni naca xaíque stiʼ lugar ra runeʼ dxiiñaʼ que rapaʼ gana gacaʼ precursor regular la? oraqueca guníʼcabe zaguíxecabe naa jma, purtiʼ nácabe zaqué zuchaa modo caníʼ iqueʼ. Peru naa maca gudixhe iqueʼ xi guneʼ. Stale binni qué ñene diʼ xiñee cusaanaʼ dxiiñaʼ ra runeʼ ganar stale que para gacaʼ precursor. Naa bisaana ni purtiʼ rapaʼ gana guneʼ ni na Dios casi bidiéʼ stiidxaʼ laabe. Nayecheʼ nuaa yanna ne ridxá tipa ladxiduáʼ, purtiʼ jma riquiiñeʼ guendanabani stinneʼ para guneʼ ni na Jiobá. Qué liica nugaandaʼ ca ndiʼ pa ñacaʼ tuuxa ni risaca ndaaniʼ guidxilayú o pa ñacaʼ ricu».
19. Xii nga ni jma galán guni ca hombrehuiiniʼ ne ca dxaapahuiiniʼ.
19 Stale hombrehuiiniʼ ne dxaapahuiiniʼ ni nuu lu guidubi naca Guidxilayú maʼ bisihuínnicaʼ nuu xpiaanicaʼ purtiʼ riguixhe íquecaʼ gúnicaʼ zacaca. Nga runi, ora maʼ chitixhe íqueluʼ xi gunineluʼ guendanabani stiluʼ la? cadi guiaandaʼ lii maʼ gaxha nuu dxi stiʼ Jiobá (2 Ped. 3:11, 12). Cadi gacaláʼdxiluʼ gápaluʼ stale cosa ni risaca casi cayuni stale binni ndaaniʼ guidxilayú riʼ. Jma galán nga gucaadiágaluʼ cani dxandíʼ nadxii lii. Bicaa ique gápaluʼ cosa «ni risaca ibáʼ», ca ndaayaʼ ni rudiicani qué ziuu dxi guiracaʼ (Mat. 6:19, 20; biindaʼ 1 Juan 2:15-17). Bietenalaʼdxiʼ de Dios ni bizáʼ lii ne zuuyuʼ ximodo uguube ndaayaʼ lii.
[Cani cá ñee yaza]
a Para gannuʼ jma pa jneza nga cheʼ binni scuela roʼ ne xi dxiiñaʼ guni la? biiyaʼ La Atalaya 1 stiʼ octubre 2005, yaza 26-31.
Rietenalaʼdxuʼ la?
• Ximodo rusihuínninu runi crenu Dios.
• Tu laasi nga zanda gusiidiʼ laanu para cueendunu ni galán.
• Xi rizíʼdinu de ni bizaaca Baruc.
• Tuu nga cani bisaana ti ejemplu galán para laanu, ne xiñee.
[Ca dibuju/foto ni zeeda lu yaza 13]
Jiobá si nga ni jma zanda gusiidiʼ laanu para cueendunu ni galán
[Dibuju/foto ni zeeda lu yaza 15]
Bicaadiaga Baruc ni gudxi Jiobá laa, ngue runi bilá ora binitilú guidxi Jerusalén. Xi zanda guiziidiluʼ de ejemplu ca