Xiñee caquiiñeʼ gúʼyaluʼ pa jneza cani runi religión stiluʼ

Xi ñúniluʼ pa ñápaluʼ ti guendahuará nabé malu ne caquiiñeʼ guni operárcabe lii. Cadi dxandíʼ nuyúbiluʼ ti doctor ni nanna para ñuni operar lii la? Ne ñúniluʼ zacá purtiʼ chitíxheluʼ xquendanabániluʼ lu nabe. Laaca galán ñuuyaluʼ pa nánnabe guni operación ca ne panda iza zinebe de rúnibe ni.

Zacaca nga rizaaca né religión stiʼ binni: naquiiñeʼ guʼyaʼ chaahuiʼ xi guiráʼ raca ndaaniʼ ni. Pa nápaluʼ religión stiluʼ, nabé risaca guʼyaʼ chaahuiluʼ pa jneza cani raca ndaaniʼ ni purtiʼ laani nga chigacaneni lii guilaluʼ.

Jesús bizeeteʼ ti ejemplu ni zanda gacané laanu guʼyaʼ chaahuinu pa jneza guiráʼ ni raca ndaaniʼ religión stinu, laabe guniʼbe: «Irá yaga rihuinni xi yaga laa pur ca cuananaxhi stiʼ» (Lucas 6:44). Yanna guníʼ ique ti religión ne gunabadiidxaʼ laca lii: Ñee jma rusisaca ca xaíque stiʼ religión ca bueltu la? Ñee rinanda ca binni ni nuu ndaaniʼ ni ca conseju ni zeeda lu Biblia, casi ra na cadi chuʼ binni lu guerra ne ra na guibani binni casi na Dios la? Despué de maʼ guníʼ íqueluʼ cani bizéʼtenu ca, galán guinabadiidxaluʼ xi religión zanda guni creluʼ. Rinábadu lii gúʼndaluʼ xcaadxi tema ni zeeda raríʼ.