Xi religión zanda guni creluʼ

Pa nuu xiixa ni qué ñuuláʼdxiluʼ de ti religión la? zándaca guiníʼ íqueluʼ zacá guiráʼ religión. Peru caquiiñeʼ gánnaluʼ nuu ti religión ni zanda guni creluʼ. Dxi guyuu Jesús lu Guidxilayú biyúbibe caadxi binni para gaca discípulo stibe ne bisiidibe laacaʼ guibánicaʼ casi na Dios. Ca dxi riʼ, nuuruʼ binni ni dxandíʼ naca xpinni Cristu, ne de guidubi ladxidóʼcabe rúnicabe stipa pur guibánicabe casi naquiiñeʼ guibani ti xpinni Cristu. Tu laacabe yaʼ.

Estelle, gunaa ni maca bizéʼtenu que guníʼ: «Dxi bizulú cayuundané ca testigu stiʼ Jiobá naa Biblia, dxiqueruʼ nga bieneʼ xi rusiidiʼ ni. ¡Bieneʼ dxandíʼ ni na ca diidxaʼ zeeda lu Juan 8:32 ra na: “Zanna tu ni dxandíʼ, ne zaladi tu ra cá tu yaga purti ma nanna tu ni”!».

Ray, hombre ni maca bizéʼtenu que laaca guníʼ: «Ca testigu stiʼ Jiobá biquiiñecaʼ Biblia para bisiidicaʼ naa cadi Dios diʼ napa donda pur ca guendananá ridiʼdiʼ binni. Ne neca nápabe razón para gudiibe lugar chuʼ guendaquéiquiiñeʼ, peru maʼ bidii stiidxabe mayaca cueebe guirani».

Nagana nga para guibani binni modo na Dios lu Guidxilayú riʼ, purtiʼ nabé nuu binni qué iquiiñeʼ. Dxandíʼ nagana ni, peru zanda guni binni ni jneza. Stale binni racalaʼdxiʼ gacanécabe laa guiene cani rusiidiʼ Biblia ne guni cani lu xquendanabani. Nga runi cayuni ca testigu stiʼ Jiobá ti dxiiñaʼ lu guidubi naca Guidxilayú, cayuundanécabe millón de binni Biblia guiráʼ semana dede ra lidxi sin quixe. Stale binni caziidiʼ xipeʼ nga rusiidiʼ Biblia, cadxíñacaʼ Dios ni bizáʼ laanu ne nabé nayecheʼ nabánicaʼ.a

Ora guiníʼneluʼ laacabe sti biaje, galán guinábaluʼ laacabe gusiénecabe lii xi razón nápacabe para guni crécabe religión stícabe. Biiyaʼ chaahuiʼ cani rusiidicabe ne modo nabánicabe ne biiyaʼ pa nuu ti religión ni zanda guni creluʼ.