«Rihuinni dxichi tu naca be pur irá ni biʼni be»

Ñee raʼbuʼ dxandíʼ nuu Dios la? Pa zacá ni, ximodo ñanda nusihuínniluʼ ni yaʼ. Guiráʼ ladu ridúʼyanu stale cosa ni rusihuinni nuu ti Dios ni bizáʼ guiráʼ cosa, nuu xpiaanibe, nápabe poder ne nabé nadxiibe binni. Xii nga ca cosa ni rusihuinni dxandíʼ nuu ti Dios yaʼ. Ñee zanda gacanécani laanu guni crenu nuu Dios la? Para guicábinu ca guendarinabadiidxaʼ riʼ, guidúʼyanu xi bicaa apóstol Pablu ra nuu ca xpinni Cristu de Roma.

Laabe guniʼbe: «Neca qué zanda guʼya cabe enda nandxóʼ [stiʼ Dios] ni qué ziuu dxi iluxe, ne qué zanda guʼya cabe ximodo laabe, peru dede dxi bizáʼ be guidxilayú rihuinni dxichi tu naca be pur irá ni biʼni be, para cadi iníʼ cabe qué ganna cabe» (Romanos 1:20). Casi guníʼ Pablu ca, guiráʼ cosa ni guyáʼ ziné cani sellu stiʼ Dios ni bizáʼ cani. Yanna, guiene chaahuinu ca diidxaʼ riʼ.

Pablu guníʼ «dede dxi bizáʼ be guidxilayú» rihuinni dxichi tu nácabe. Diidxaʼ griegu ni biquiiñecabe para «guidxilayú» lu textu riʼ caniʼni de binni ne cadi de Guidxilayú ra nabézanu riʼ.a Ni caníʼ Pablu raríʼ nga dede dxi guyáʼ binni huayuuyacaʼ tu naca Dios pur guiráʼ ni bizáʼ.

Guiráʼ ladu guyadxinu «rihuinni dxichi» nuu Dios. Guiráʼ xixé ni bizáʼ Dios, dede ni jma nahuiiniʼ hasta ni jma naroʼbaʼ, rusihuinni cani dxandíʼ nuu tu bizáʼ cani ne nápabe stale guenda sicarú. Guiníʼ íquenu guiráʼ ni bizaʼbe. Ñee qué rusihuinni cani nabé nuu xpiaaniʼ Dios la? Ñee qué rihuinni napa Dios stale poder ora guidúʼyanu guiráʼ beleguí nuu guibáʼ ne pabiáʼ nadipaʼ ca ola nisadóʼ la? Laga ca guendaró nanixe ni ridoʼno, ne ora guidúʼyanu pabiáʼ sicarú maʼ zirá gueelaʼ o maʼ ziyaaziʼ gubidxa yaʼ. Ñee cadi dxandíʼ rusihuinni cani nadxii Dios binni guidxilayú la? (Salmo 104:24; Isaías 40:26.)

Guiráʼ ladu rihuinni dxichi cani bizáʼ Dios, nga runi qué zanda diʼ guiníʼ binni qué runi cré Dios purtiʼ qué gánnacaʼ de laabe. Sicaríʼ cusiene ti erudito ni guninu ca. Bixuiʼlú biiyaʼ ti hombre zigusá carru ti letretu ni na: «Gucuaa ladu bigaʼ» peru qué nulábibe ni. Ne ora bicueeza puliciá laabe para quíxebe ti multa pur ni bíʼnibe que guniʼbe qué ñuuyabe letreru que. Qué ñuni cré diʼ puliciá que laabe purtiʼ rihuinni dxichi letreru que ne cadi nacheepaʼ diʼ lube. Ne guiráʼ binni ni zigusá carru napa xidé guʼyaʼ guiráʼ letreru zuhuaa ruaa carretera ne guni ni nácani. Zacaca nga zanda guininu né cani bizáʼ Dios, purtiʼ guiráʼ ladu rihuinni dxichi cani. Ne cumu nácanu binni ni riníʼ ique la? zanda guidúʼyanu cani. Gastiʼ diʼ razón para guininu qué ridúʼyanu cani bizáʼ Dios.

Dxandíʼ, guiráʼ xixé cosa ni guyáʼ rusihuinni cani ximodo nga Dios ni bizáʼ cani. Peru nuu ti libru ni rusihuinni ximódopeʼ laabe: laani nga Biblia. Ne laani cacabi ni ti guendarinabadiidxaʼ nabé risaca: Xi naguixhe ique Dios guni lu Guidxilayú ne ca binni ni nabani luni. Ora gánnanu ximodo ricabi Biblia guendarinabadiidxaʼ ca zacaneni laanu chuʼnu jma gaxha de Dios, ne «rihuinni dxichi tu naca be pur irá ni biʼni be» lu Guidxilayú ra nabézanu riʼ.