«Runibiáʼ [Jiobá] uná nga ni dxandí xpinni»
«Peru ni nadxii Dios la? runibiáʼ Dios laa.» (1 COR. 8:3)
1. Bizeeteʼ ti ejemplu ni rusihuinni cadi jneza modo guníʼ ique caadxi xpinni Dios de dxiqué. (Biiyaʼ dibuju ni zeeda ra ruzulú tema riʼ.)
TI SIADÓʼ, zuhuaa Aarón, xaíque stiʼ cani ruzaaquiʼ guʼxhuʼ, ra puertaʼ tabernáculo stiʼ Jiobá naaze ti braseru dxaʼ guʼxhuʼ ndaaniʼ. Gaxha de ra nuube que zuhuaa Coré ne 250 hombre, ne laaca cuzaaquicaʼ guʼxhuʼ para Jiobá, cada tobi naaze braseru stiʼ (Núm. 16:16-18). Ruluíʼ guirácabe cayuni adorárcabe Jiobá modo riuulaʼdxiʼ. Peru Coré ne ca xpinni ruchacaʼ bi yánnicaʼ, qué ruzuubacaʼ diidxaʼ ne nuucaʼ gácacaʼ sacerdote lugar stiʼ Aarón (Núm. 16:1-11). Guníʼ íquecabe ziuulaʼdxiʼ Dios modo cayuni adorárcabe laa. Peru laga bininácabe ladxidóʼ Jiobá, purtiʼ laa ruuyaʼ ni nuu ndaaniʼ ladxidóʼcabe ne nanna cadi jneza ni cayúnicabe (Jer. 17:10).
2. 1) Xi maca guníʼ Moisés. 2) Ne ximodo guca ni guníʼ Moisés.
2 Biáʼsipeʼ sti dxi que, maca guníʼ Moisés: «Siadoʼroʼ zusihuinni Jiobá tuu nga ca xpinni» (Núm. 16:5). Ne casi guníʼ Moisés que, bihuinni tuu nga cani dxandíʼ xpínnibe ne tuu nga cani cadi cayuni ni jneza. Ximodo yaʼ. «Biree ti bele ra nuu Jiobá ne biiti ni [Coré ne] chupa gayuaa cincuenta hombre ni cuzaaquiʼ guʼxhuʼ» (Núm. 16:35; 26:10.) Peru qué ñuuti Jiobá Aarón, ne zacá bihuinni laabe nga sacerdote ni gulí ne ni runi adorar laabe de guidubi ladxidóʼ (biindaʼ 1 Corintios 8:3).
3. 1) Xi bizaaca lade ca xpinni Cristu tiempu stiʼ Pablu. 2) Xi rusiidiʼ ni bizaaca Coré ne ca xpinni de Jiobá.
3 Zacaca nga bizaaca jma de ti mil gaayuʼ gayuaa iza despué, ca dxi bibani apóstol Pablu. Caadxi hombre ni nacaʼ nácacaʼ xpinni Cristu bisiidicaʼ caadxi cosa ni cadi jneza; peru qué nusaana de nidagulisaacaʼ. Neca ruluíʼ dxandíʼ xpinni Cristu laacaʼ, peru cumu apóstata laacaʼ la? zándaca cueechucaʼ xcaadxi xpinni Cristu. Racaláʼdxicabe guluíʼcabe nadóʼcabe casi dendxuʼ, peru ndaaniʼ ladxidóʼcabe nácacabe casi gueuʼ, ne zacá bicaacabe caadxi xpinni Cristu gusaana de gapa fe Dios (2 Tim. 2:16-18). Pablu nanna ruuyaʼ Jiobá ni nuu ndaaniʼ ladxidóʼ binni pur ni bizaaca Coré ne ca xpinni. Guidúʼndanu xi gudxi Pablu Timoteu ne guidúʼyanu xi rusiidiʼ ni laanu.
«NAA NGA JIOBÁ; NE QUÉ HUACHAADIÁʼ MODO NAA»
4. 1) Xi nanna Pablu zazaaca. 2) Xi bicaa Pablu ra nuu Timoteu.
4 Pablu nanna runibiáʼ Jiobá tuu nga cani dxandíʼ xpinni ne tuu nga cani riniʼsi xpínnibe laacaʼ. Rihuinni zacá ni pur ca diidxaʼ ni gudxi Dios laabe gucaabe ra nuu Timoteu. Despué de guniʼbe ximodo maʼ bininá ca apóstata chupa chonna xpinni Cristu, guniʼbe sicaríʼ: «Cimientu naguidxi stiʼ Dios zuhuaa dxiichiʼ, ne nápani sellu riʼ: “Runibiáʼ Jiobá tuu nga ca xpinni”, ne: “Guiráʼ cani guiníʼ lá Jiobá naquiiñeʼ guixélecaʼ de guiráʼ ni cadi jneza”» (2 Tim. 2:18, 19, TNM).
5, 6. 1) Xiñee biquiiñeʼ Pablu ca diidxaʼ «cimientu naguidxi stiʼ Dios». 2) Ximodo gucané ca diidxaʼ ni guníʼ Pablu que Timoteu.
5 Biblia riquiiñeʼ diidxaʼ «cimientu» para guiníʼ de gadxé gadxé cosa, casi ora ruzeeteni de Jerusalén, capital stiʼ Israel, ne ni chiguni Jesús para gaca ni maʼ gudixhe ique Dios (Sal. 87:1, 2; 1 Cor. 3:11; 1 Ped. 2:6). Peru ca diidxaʼ «cimientu naguidxi stiʼ Dios» ti biaje si rieeteʼ ni ndaaniʼ Biblia. Yanna, xii nga gucalaʼdxiʼ Pablu niníʼ né ca diidxaʼ riʼ yaʼ.
6 Pablu guníʼ ca diidxaʼ riʼ despué de bizeeteʼ ni gudxi Moisés Coré ne ca xpinni ni rieeteʼ lu Números 16:5. Sicaríʼ nga bisietenalaʼdxiʼ Pablu Timoteu, runibiáʼ Jiobá ca binni ni qué ruzuubaʼ diidxaʼ ne qué rudii lugar gúnicabe ni racaláʼdxicabe. Cásica qué ñanda nucueeza Coré de ñaca ni na Jiobá dxiqué, zaqueca qué zanda guni ca apóstata ni racaláʼdxicaʼ lade ca binni ridagulisaa. Qué nusiene chaahuiʼ Pablu xi riníʼ ca diidxaʼ «cimientu naguidxi stiʼ Dios». Peru ca diidxaʼ ni biquiiñeʼ Pablu riʼ, biquidxi cani fe stiʼ Timoteu ne gucané cani laa gapa confianza Jiobá ne ganna rúnibe ni jneza.
7. Xiñee nanna dxíchinu zuni Jiobá ni jneza ne qué ziuu dxi gusiguii.
7 Qué riuu dxi guchaa ca principiu stiʼ Jiobá. Salmo 33:11 na: «Qué ziuu dxi gusaana de iquiiñeʼ ca conseju stiʼ Jiobá; ne guiráʼ ni nuu ndaaniʼ ladxidoʼbe qué zusaana de gácacani». Xcaadxi textu stiʼ Biblia ruzeetecaʼ qué ziuu dxi gusaana Jiobá de guni mandar, qué zusaana de gannaxhii, qué zusaana de guni ni jneza ne qué ziuu dxi gusiguii (Éx. 15:18; Sal. 106:1; 112:9; 117:2). Malaquías 3:6 na: «Naa nga Jiobá; ne qué huachaadiáʼ modo naa». Ne Santiago 1:17 cayabi laanu «qué ziuu dxi uchaa be tu naca be, nin ti guisi».
TI «SELLU» NI RUQUIDXI FE NI NÁPANU JIOBÁ
8, 9. Xi rizíʼdinu de «sellu» ni bizeeteʼ Pablu.
8 Lu 2 Timoteo 2:19 bizeeteʼ Pablu de ti cimientu ra cá caadxi diidxaʼ ne casi ora bicaanécabe ni ti sellu. Dxiqué, nabé nga rucaacabe sellu cimientu stiʼ xiixa yoo, zándaca para gánnacabe tu bicuí yoo ca o tu stini. Pablu nga primé hombre ni bizeeteʼ de ejemplu riʼ ndaaniʼ Biblia.a Sellu ni cá lu «cimientu naguidxi stiʼ Dios» cá chupa cosa luni. Primé, «Runibiáʼ Jiobá tuu nga ca xpinni». Ne guiropa, «Guiráʼ cani guiníʼ lá Jiobá naquiiñeʼ guixélecaʼ de guiráʼ ni cadi jneza». Ndiʼ rusietenalaʼdxiʼ laanu ca diidxaʼ riʼ: «De raqué gúdxibe Coré ne ca binni ni nanda laa sicaríʼ: “Siadoʼroʼ zusihuinni Jiobá tuu nga ca xpinni ne tuu nga cani nayá ne tuu nga cani naquiiñeʼ guidxiña laabe, ne tutiica cuibe la? nga nga ni zadxiña laabe”» (Números 16:5).
9 Xi rizíʼdinu de «sellu» ni bizeeteʼ Pablu riʼ yaʼ. Ca xpinni Dios naquiiñeʼ gánnacaʼ nuu chupa cosa risaca lu ca principiu stiʼ Dios: 1) nadxii Jiobá cani qué rusaana laa ne 2) nanalaʼdxiʼ Jiobá ca cosa ni qué raca jneza. Ximodo zanda guchaaganu ejemplu riʼ né ca apóstata ni riuu lade ca binni ridagulisaa yaʼ.
10. Ximodo biiyaʼ ca xpinni Cristu ca apóstata ni guyuu ca dxi stiʼ Pablu.
10 Nanna dxíchinu nabé guyuu Timoteu ne xcaadxi xpinni Cristu xizaa pur ni runi ca apóstata. Chupa chonna de ca xpinni Cristu zándaca qué ñénecaʼ xiñee nuu ca apóstata lade ca binni ridagulisaa. Ne dede zándaca guníʼ íquecabe pa ruuyaʼ Jiobá gadxé ca apóstata que de ca xpinni Cristu ni ruzuubaʼ diidxaʼ (Hech. 20:29, 30).
Qué nicá xpiaʼ ca apóstata que Timoteu (Biiyaʼ párrafo 10 dede 12)
11, 12. Xiñee biguidxi fe stiʼ Timoteu pur carta ni bicaa Pablu ra nuu.
11 Nanna dxíchinu biguidxi fe stiʼ Timoteu pur carta ni bicaa Pablu ra nuu. Xiñee yaʼ. Purtiʼ bisietenalaʼdxiʼ ni Timoteu biiti Jiobá Coré ne ca xpinni purtiʼ rucaachicaʼ cani rúnicaʼ. Zacá bisihuinni Jiobá maʼ bidxiideche laacabe. Peru bisihuínnibe guyuuláʼdxibe cani biʼniʼ Aarón. Ngue runi, apóstol Pablu guníʼ neca guyuu guníʼ xpinni Cristu laa la? runibiáʼ Jiobá tuu nga cani dxandíʼ xpinni, cásica bíʼnibe ca dxi bibani Moisés.
12 Jiobá qué ruchaa; nga runi zanda gápanu confianza laabe. Laabe nanaláʼdxibe ca cosa ni qué raca jneza, ne rulídxebe cani qué raca arrepentir. Ne cumu nabé guníʼ Timoteu «lá Jiobá» la? bisietenalaʼdxiʼ Pablu Timoteu naquiiñeʼ guixeleʼ de ca cosa ni cadi jneza ni runi cani na naca xpinni Cristu, purtiʼ guiráʼ cani guiníʼ lá Jiobá naquiiñeʼ guixélecaʼ de cani cadi jneza.b
JIOBÁ RIGUU NDAAYAʼ CANI RUNI ADORAR LAA DE GUIDUBI LADXIDÓʼ
13. Xii nga ni naquiiñeʼ gánnanu.
13 Laaca riguidxi fe stinu ora ridúʼndanu ca diidxaʼ ni bicaa Pablu. Primé, riuʼnu gana ora gánnanu qué rusiaandaʼ Jiobá ca xpinni ni qué rusaana laa. Cadi ruuyaʼ si Jiobá cani rúninu, sínuque rizaaláʼdxibe cani runi ni nabe. Biblia na: «Guielú Jiobá cayuuyaʼ guiráʼ ni cayaca lu guidxilayú para guluiʼbe stipa stibe luguiáʼ cani runi cré laabe de guidubi ladxidóʼ» (2 Crón. 16:9). Nga runi, naquiiñeʼ gánnanu qué ziuu dxi gusiaandaʼ Jiobá guiráʼ stipa rúninu pur guni adorarnu laa de guidubi ladxidoʼno, laa qué rusaana de uguu ndaayaʼ laanu (1 Tim. 1:5; 1 Cor. 15:58).
14. Xii nga ni qué riuulaʼdxiʼ Jiobá guni binni.
14 Laaca galán gánnanu nanalaʼdxiʼ Jiobá cani qué runi adorar laa de guidubi ladxidóʼ. Cumu «guielú Jiobá cayuuyaʼ guiráʼ ni cayaca lu guidxilayú» la? ngue runi ruuyabe tuu nga cani qué runi ni nabe de guidubi ladxidóʼ. Lu Proverbios 3:32 rieeteʼ nanalaʼdxiʼ Jiobá ca «binni ni rucaachiʼ tu naca», o cani rusihuinni cayuni ni na Jiobá, peru runi guendaquéiquiiñeʼ ora guirutiʼ cayuuyaʼ laa. Ca binni ni cadi cayuni ni jneza riʼ, zanda gusiguiicaʼ ca xpinni Cristu ti tiempu, peru qué zanda gusiguiicabe Jiobá. Biblia na: «Tu rucaachiʼ ca donda stiʼ la? qué zabeendú diʼ gastiʼ» (Prov. 28:13; biindaʼ 1 Timoteo 5:24 ne Hebreos 4:13).
15. Xi cadi naquiiñeʼ gúninu, ne xiñee.
15 Jma stale de ca xpinni Jiobá runi adorarcaʼ laabe de guidubi ladxidoʼcaʼ. Nagabaʼ si nga chuʼ tuuxa gusihuinni cayuni adorar Jiobá, peru cadi dxandíʼ ni. Peru cásica guyuucabe dxi bibani Moisés ne lade ca xpinni Cristu ni bibani lu primé siglu, tiempu riʼ laaca zándaca chúʼcabe ládenu (2 Tim. 3:1, 5). Peru, ñee riníʼ nga naquiiñeʼ guiníʼ íquenu mal de ca hermanu stinu ne guininu maʼ cudxiidéchecabe Jiobá la? ¡Coʼ njaʼ! Cadi galán diʼ guiníʼ íquenu mal de laacabe pa gastiʼ razón para gúninu ni (biindaʼ Romanos 14:10-12 ne 1 Corintios 13:7). Pa guiníʼ íquenu mal de ca xpinni Cristu, zuxheleʼ ni laanu de Jiobá.
16. 1) Xi naquiiñeʼ gúninu ti guni adorarnu Jiobá modo riuulaʼdxiʼ. 2) Xi rizíʼdinu lu cuadru ni láʼ «Laguuya chaahui ximodo nuu tu».
16 Cada xpinni Cristu nga naquiiñeʼ «guʼya chaahui ni cayuni» (Gál. 6:4). Cumu nácanu binni ruchee la? zándaca tutiica de laanu cadi jneza modo guzulú guni adorarnu Jiobá sin gudii cuenta (Heb. 3:12, 13). Nga runi, naquiiñeʼ guidúʼyanu ximodo cayuni adorarnu Dios gatigá. Zanda guinabadiidxanu laca laanu: «Ñee cayuneʼ adorar Jiobá purtiʼ nadxieeʼ laa ne racaladxeʼ guni mandar naa la? O jma nga ricá iqueʼ de ca ndaayaʼ ni chigudiibe naa ndaaniʼ Paraísu» (Apoc. 4:11). Pa guiníʼ íquenu ca guendarinabadiidxaʼ riʼ, zanda cueenu de ndaaniʼ ladxidoʼno xiixa ni gucaa laanu cadi guni adorarnu Jiobá modo riuulaʼdxiʼ.
RIUʼNU NAYECHEʼ ORA QUÉ RUSAANANU JIOBÁ
17, 18. Xiñee cadi naquiiñeʼ gucáʼchinu tu nácanu ora guni adorarnu Jiobá.
17 Stale nga ni ribeendunu ora runi adorarnu Dios de guidubi ladxidoʼno. Lu Salmo 32:2 ridúʼndanu ca diidxaʼ riʼ: «Nayecheʼ nga ribani hombre ni qué ugaaniʼ Jiobá donda ique, ne nayecheʼ riuu hombre ni qué rusiguii». Zacá nga laani, jma nayecheʼ ribani ca binni ni qué rucaachiʼ tu laa ne zanda guibánicaʼ nayecheʼ lu guidxilayú cubi stiʼ Dios.
18 Maʼ cadi candaa, zusihuinni Jiobá guiráʼ ca binni ni qué runi ni jneza o cani rucaachiʼ tu laa. Óraca zahuinni «tuu nga runi ni jneza ne tuu nga runi ni qué iquiiñeʼ, tuu nga runi ni na Dios ne ni qué huayuni ni nabe» (Mal. 3:18). Nga runi, riéchenu ora gánnanu «rapa [Jiobá] cani runi jneza, ne rucaa diaga be laaca ora iníʼ né ca laabe» (1 Ped. 3:12).
a Lu Apocalipsis 21:14, ni gucuá chupa chonna iza despué de bicaa Pablu carta stiʼ ra nuu Timoteu, bizeeteʼ ni de 12 «guie» ra cá lá ca 12 apóstol.
b Lu sti tema ca zadúʼyanu ximodo gucáʼnanu ni cadi jneza casi runi Jiobá ni.