Ca xpinni Jiobá rixélecaʼ de guiráʼ ni cadi jneza
«Guiráʼ cani guiníʼ lá Jiobá naquiiñeʼ guixélecaʼ de guiráʼ ni cadi jneza.» (2 TIM. 2:19, TNM)
1. Xii nga ni nabé risaca para laanu ora runi adorarnu Dios.
LU STALE edificiu ni nuu lu guidubi naca Guidxilayú cá lá Jiobá ne zaqueca lu stale cosa ni nuu ndaaniʼ museu. Pa huayuudxí huayuuyaluʼ ni zándaca nabé bidxagayaaluʼ. Cumu nácanu testigu stiʼ Jiobá la? nabé risaca lá Dios para laanu ora runi adorarnu laa. Ninruʼ sti binni qué riquiiñeʼ lá Dios casi rúninu ni. Peru para ganda chinenu lá Jiobá naquiiñeʼ guibáninu modo riuulaʼdxiʼ.
2. Xi naquiiñeʼ gúninu para ganda chinenu lá Dios.
2 Para chuulaʼdxiʼ Jiobá ni rúninu la? cadi naquiiñeʼ si guininu labe o xlabe, sínuque naquiiñeʼ guibáninu jneza. Nga runi, Biblia rusietenalaʼdxiʼ cada tobi de ca xpinni Dios: «Bixeleʼ de cosa malu» (Sal. 34:14). Apóstol Pablu bizeeteʼ nápanu ti dxiiñaʼ nabé risaca ora guníʼ: «Guiráʼ cani guiníʼ lá Jiobá naquiiñeʼ guixélecaʼ de guiráʼ ni cadi jneza» (2 Tim. 2:19, TNM). Nabé runibiáʼcabe ca Testigu, purtiʼ nabé rininu lá Jiobá. Peru, ximodo nga rucáʼnanu ni cadi jneza o ca cosa malu ca yaʼ.
«LAGUIXELEʼ» DE COSA MALU
3, 4. Xi textu stiʼ Biblia raca nagana para chupa chonna binni guiene, ne xiñee.
3 Biblia na: «Neca zacá, cimientu naguidxi stiʼ Dios zuhuaa dxiichiʼ, ne nápani sellu riʼ: “Runibáʼ Jiobá tuu nga ca xpinni”, ne: “Guiráʼ cani guiníʼ lá Jiobá naquiiñeʼ guixélecaʼ de guiráʼ ni cadi jneza”» (2 Timoteo 2:19, TNM). Lu textu riʼ Pablu bizeeteʼ de «cimientu naguidxi stiʼ Dios» ne óraque guniʼbe de chupa cosa ni cá luni. Primé, «Runibiáʼ Jiobá tuu nga ca xpinni», zacaca zeedani ndaaniʼ libru stiʼ Números 16:5 (biiyaʼ tema gudiʼdiʼ ca). Peru raca nagana para chupa chonna binni guiene guiropa cosa ni guníʼ Pablu: «Guiráʼ cani guiníʼ lá Jiobá naquiiñeʼ guixélecaʼ de guiráʼ ni cadi jneza». Xiñee yaʼ.
4 Pur ca diidxaʼ ni guníʼ Pablu riʼ, nuu tu riníʼ zándaca biquiiñebe sti textu lu Stiidxaʼ Dios ni gucuá hebreu. Peru gastiʼ nin ti textu ni caníʼ de ca diidxaʼ ni bicaa Pablu riʼ. Yanna, xi gucalaʼdxiʼ Pablu niníʼ né ca diidxaʼ: «Guiráʼ cani guiníʼ lá Jiobá naquiiñeʼ guixélecaʼ de guiráʼ ni cadi jneza» yaʼ. Maca bizeeteʼ Pablu de capítulo 16 stiʼ Números ra zeeda relatu stiʼ Coré dxi bidxiideche Dios. Ñee laaca lu Números nga zeeda guiropa cosa ni bizeetebe la?
5-7. Xi bizeeteʼ Pablu lu 2 Timoteo 2:19 de cani bizaaca ca dxi bibani Moisés. (Biiyaʼ dibuju ni zeeda ra ruzulú tema riʼ.)
5 Biblia na guyuu Datán ne Abiram, ca xiiñiʼ Eliab, tobi si né Coré para bicaalucaʼ Moisés ne Aarón (Núm. 16:1-5). Qué ñuni respetárcabe Moisés ne qué ninácabe ñuuyacabe laabe casi binni gulí Jiobá para sániruʼ lúcabe. Ca hombre riʼ guyuurucaʼ lade ca xpinni Jiobá ne biyúbicaʼ modo cueechucaʼ ca binni ni ruzuubaʼ diidxaʼ. Peru ora bedandá dxi guihuinni tuu nga ca xpinni Jiobá ne tuu nga cani qué ruzuubaʼ diidxaʼ, gudxi Jiobá laacabe gúnicabe ti cosa ni cadi nagana.
6 Relatu riʼ na: «Guniʼné Jiobá Moisés, ne gúdxibe laa: “Guniʼné guidxi ca ne gudxi laacaʼ: «¡Laguixeleʼ guidubi buelta ra nuu tabernáculo stiʼ Coré, Datán ne Abiram!»”. Óraque biasa Moisés ne guyé ra nuu Datán ne Abiram ne yené ca binnigola stiʼ Israel laabe. Despué guníʼnebe guidxi que, ne nabe: “Laguixeleʼ de ca tienda stiʼ ca binni malu riʼ, ne cadi cánatu nin ti cosa stícabe, ti cadi gátitu pur donda stícabe”. Oraqueca bixélecabe de tabernáculo stiʼ Coré, Datán ne Abiram, guiráʼ ladu» (Núm. 16:23-27). Óraque biiti Jiobá guiráʼ cani qué ruzuubaʼ diidxaʼ. Peru bilá ca binni ni dxandíʼ runi adorar Jiobá, purtiʼ ora bixélecabe de cani qué ruzuubaʼ diidxaʼ, bisihuínnicabe bixélecabe de guiráʼ ni cadi jneza.
7 Neca nanna Jiobá xi nuu ndaaniʼ ladxidóʼ ca xpinni ne rudiibe cuenta pa dxandíʼ runi adorarcaʼ laabe la? ca xpínnibe gupa xidé bixélecaʼ de ca binni ni qué runi ni jneza. Nga runi, zándaca cuzeeteʼ Pablu de relatu ni zeeda lu Números 16:5, 23-27 ora bicaa: «Guiráʼ cani guiníʼ lá Jiobá naquiiñeʼ guixélecaʼ de guiráʼ ni cadi jneza». Nánnanu zacá ni, purtiʼ ante maca bicaa Pablu ca diidxaʼ riʼ: «Runibiáʼ Jiobá tuu nga ca xpinni», ne zándaca laaca relatu riʼ nga cuzeeteʼ Pablu (2 Tim. 2:19).
«CADI ULABI LU DIIDXA HUATI SI NI QUÉ RINÍʼ GASTIʼ»
8. Xiruʼ naquiiñeʼ gúninu aparte de iquiiñenu lá Dios ne chuʼnu lade ca binni ridagulisaa.
8 Ora bizeeteʼ Pablu ni bizaaca ca dxi bibani Moisés, bisietenaláʼdxibe Timoteu cadi naquiiñeʼ gusaana de chuʼ gaxha de Jiobá. Cadi naquiiñeʼ si chuʼbe lade ca binni ridagulisaa, cásica Coré ne ca xpinni neca biquiiñecaʼ lá Dios qué nibeenducaʼ gastiʼ. Nga runi, guiráʼ ca xpinni Dios cadi naquiiñeʼ gúnicaʼ ni «cadi jneza». Xi biziidiʼ Timoteu de ca diidxaʼ riʼ yaʼ. Ne xi zanda guizíʼdinu de conseju stiʼ Pablu ca dxi riʼ yaʼ.
9. Ximodo bininá ca «diidxa huati si ni qué riníʼ gastiʼ» ca xpinni Cristu de primé siglu.
9 Lu carta ni bicaa Pablu ra nuu Timoteu zeeda stale conseju ni cusiene xipeʼ nga ca cosa malu ni cadi naquiiñeʼ gúninu. Casi lu 2 Timoteo 2:19, Pablu gudxi Timoteu «cadi icaa yu [...] xiixa diidxa huati si» ne «diidxa ni cadi zeeda de Dios» (biindaʼ 2 Timoteo 2:14, 16, 23). Chupa chonna de ca binni ridagulisaa bisiidicaʼ gadxé de ni na Biblia. Ne guyuu xcaadxi ni ruyubi tinde pur intiica si cosa, neca qué ridíndecabe pur cani rusiidiʼ Biblia, peru cuxhéleni ca binni ridagulisaa. Nga runi gudxi Pablu Timoteu cadi gulabi ca «diidxa huati si ni qué riníʼ gastiʼ».
10. Xi naquiiñeʼ gúninu né cani rusiidiʼ ca apóstata.
10 Ca dxi riʼ, qué rihuínnipeʼ apóstata lade ca binni ridagulisaa. Peru ora guidxaaganu tuuxa ni cusiidiʼ ni cadi zeeda lu Biblia, neca tutiica laa, cadi lica naquiiñeʼ gucaʼdiáganu cani caníʼ. Cadi jneza diʼ tinde diidxanenu ca binni ca, o gábinu laacaʼ xiixa pur Internet o gúninu ni de sti modo. Neca racaláʼdxinu gacanenu laacabe, pa gúninu ni la? cusihuínninu cadi zinándanu conseju ni bidúʼndanu ca. Ca xpinni Jiobá qué lica rucaadiáganu ni rusiidiʼ ca apóstata.
Cadi tinde diidxanenu ca apóstata ca (Biiyaʼ párrafo 10)
11. 1) Xi zándaca gutinde ca xpinni Cristu. 2) Xi ejemplu galán naquiiñeʼ gudii ca binnigola.
11 Nuu xcaadxi cosa ni zanda guxheleʼ ca binni ridagulisaa. Guiníʼ íquenu cani runi binni para chuʼ nayecheʼ. Nuu xpinni Cristu ridíndecaʼ purtiʼ nuu tu na cadi jneza guni binni ti cosa peru nuu tu na jneza ni. Ca nga laaca zanda gueeda gácacani «diidxa huati si ni qué riníʼ gastiʼ». Peru pa chuʼ tuuxa gucaa xcaadxi guni cosa dxabaʼ, ca binnigola ca cadi naquiiñeʼ gudiicaʼ lugar laabe gúnibe ni racaláʼdxibe para si cadi chuʼdíndecabe (Sal. 11:5; Efes. 5:3-5). Peru naquiiñeʼ gápacabe cuidadu para cadi gusiidicabe ni na si íquecabe. Ni jma jneza nga chinándacabe conseju ni zeeda ndaaniʼ Biblia para ca binnigola ra na: «Lagapa ca xpinni Dios, cani bisaana be lu ná tu. [...] Cadi guni mandar tu laacabe casi ñaca laatu nga xpixuaana cabe, sínuque lasá jneza ti guʼya cabe ximodo ibani cabe» (1 Ped. 5:2, 3; biindaʼ 2 Corintios 1:24).
12, 13. 1) Xi runi ca testigu stiʼ Jiobá ora quixhe íquecaʼ chuʼcaʼ nayecheʼ. 2) Xi principiu stiʼ Biblia zanda gacané laanu ora cuinu xi gúninu para chuʼnu nayecheʼ. 3) Ximodo zanda gacané principiu ni zeeda lu párrafo 12 laanu lu xcaadxi cosa ni rúninu.
12 Xquidxi Dios qué rabi laanu xi película, videojuego, libru o canción cadi naquiiñeʼ gúʼyanu o gucaʼdiáganu. Xiñee yaʼ. Purtiʼ Biblia riguu gana cada tobi de ca xpinni Cristu guiziidiʼ ganna «uná nga jneza ne uná nga ni cadi jneza» (Heb. 5:14). Lu stiidxaʼ Dios zeeda stale principiu ni zanda gacané laanu gánnanu xii nga cani zanda gúninu para chuʼnu nayecheʼ. Intiica quixhe íquenu gúninu lu xquendanabáninu naquiiñeʼ gúninu ni na Pablu ora guníʼ: «Lauyubi ganna tu xii nga riulaʼdxi Señor» (Efes. 5:10). Biblia laaca rusiidiʼ hombre nga xaíque ndaaniʼ lidxi, nga runi laabe nga naquiiñeʼ gúʼyabe cadi guni binnilídxibe ni cadi jneza ora cuicaʼ xi gúnicaʼ para chuʼcaʼ nayecheʼ (1 Cor. 11:3; Efes. 6:1-4).
13 Ca principiu stiʼ Biblia ni maʼ bizéʼtenu riʼ, zanda gacané cani laanu gánnanu xi gúninu lu xcaadxi cosa. Cumu gadxé gadxé nga ni riníʼ ique binni de modo gacu lari, modo guzuchaahuiʼ, xi tratamientu guicaa para xiixa guendahuará, xi gó para chuʼ nazaaca ne xcaadxi cosa la? zándaca gutinde ni ca xpinni Cristu. Peru pa cadi cucheené tuuxa ti principiu stiʼ Biblia la? qué gápanu nin ti razón para tindenenu laa, purtiʼ «cani cayuni xhiiña Señor», cadi naquiiñeʼ guyubi diidxaʼ, «sínuque [gaca] nachaʼhui ne irá binni» (2 Tim. 2:24).
CADI GUIDXAAGANU CANI ZANDA GUXHELEʼ LAANU DE DIOS
14. Xi ejemplu biquiiñeʼ Pablu para bisiene cadi guidxaaganu cani zanda guxheleʼ laanu de Dios.
14 Xi sti modo zanda guixeleʼ «guiráʼ cani guiníʼ lá Jiobá» de ca cosa ni cadi jneza yaʼ. Cadi guidxaaganu cani runi cosa malu. Galán gánnanu despué de bisiene Pablu de «cimientu naguidxi stiʼ Dios», bizeetebe de sti ejemplu. Guniʼbe de «ti yoo roʼ» ra nuu «traste de oro ne de plata», ne laaca nuu «de yaga ne de yu, caadxi para ora aca xiixa risaca ne xcaadxi para irá dxi» (2 Tim. 2:20, 21). Despué guniʼbe naquiiñeʼ guixélenu de ca traste ni riquiiñeʼ «irá dxi».
15, 16. Xi rizíʼdinu de ejemplu biquiiñeʼ Pablu de ti «yoo roʼ».
15 Xi zanda guizíʼdinu de ejemplu riʼ yaʼ. «Yoo roʼ» riʼ zeeda gácani ca neza binni ridagulisaa, ne ca «traste» ca zeeda gácacani ca xpinni Cristu ni ridagulisaa. Ndaaniʼ ti yoo, zándaca gaca biidiʼ ti traste pur xiixa ni guchácabe ndaaniʼ ni. Ngue runi ribeechúcabe cani de ca traste ni nayá, ni riquiiñeʼ para guninécabe guendaró.
16 Zacaca nga ca xpinni Jiobá ni cayuni stipa para guibani modo riuuláʼdxibe, cadi naquiiñeʼ guidxaagacaʼ ca xpinni Cristu ni qué rinanda ca principiu stiʼ Biblia (biindaʼ 1 Corintios 15:33). Yanna, pa cadi naquiiñeʼ guidxaaganu tuuxa ni cadi cayuni ni jneza neca nuu ndaaniʼ xquidxi Dios, jmaruʼ si cadi naquiiñeʼ guidxaaganu cani nuu fuera, purtiʼ Stiidxaʼ Dios cayabi laanu «nisi bidxichi zacá ique caʼ, [...] ma qué zuzuuba ca stiidxa jñaa ca ne bixhoze caʼ, [...] nin zanna ca pa nuu Dios, [...] ne nisi zazá ca zaníʼ ca binni, [...] zuniná cabe binni ne zaca nanalaʼdxi cabe irá ni jneza, zutoo cabe xhamigu cabe, [...] zuyubi cabe ni chuʼlaʼdxi cabe lugar de nuyubi cabe Dios» (2 Tim. 3:1-5).
RIGUU JIOBÁ NDAAYAʼ CA XPINNI NI QUÉ RUSAANA LAA
17. Ximodo bisihuinni ca israelita bixélecaʼ de ca cosa ni cadi cayaca jneza.
17 Ora biʼniʼ mandar Jiobá ca israelita ni ruzuubaʼ diidxaʼ que guixélecaʼ de ca tienda stiʼ Coré, Datán ne Abiram la? relatu que na «oraqueca bixélecabe» (Núm. 16:24, 27). Ne bihuinni pabiáʼ bizuubacabe diidxaʼ ora «bixélecabe [...] guiráʼ ladu». Ca xpinni Jiobá bizuubacaʼ diidxaʼ de guidubi ladxidoʼcaʼ. Zacá bisihuínnicabe nuucabe pur Jiobá ne bixélecabe de ca cosa ni cadi cayaca jneza. Xi rusiidiʼ ejemplu riʼ laanu yaʼ.
18. Xii nga gucalaʼdxiʼ Pablu niníʼ ora gudxi Timoteu guixeleʼ de «ni cadi jneza riguba yu cani nahuiini ruʼ».
18 Cumu risaca nga gaca xhamígunu Jiobá la? nga runi nagueendaca naquiiñeʼ guixélenu de ca cosa ni cadi cayaca jneza. Ndiʼ nga ni gucalaʼdxiʼ Pablu niníʼ ora gudxi Timoteu naquiiñeʼ guixeleʼ de «ni cadi jneza riguba yu cani nahuiini ruʼ» (2 Tim. 2:22). Cumu maʼ huaniisi Timoteu dxi gucuá ca diidxaʼ riʼ, zándaca maʼ nápabe jma de 30 iza, xiñee bidii Pablu laabe conseju riʼ yaʼ. Purtiʼ cani «cadi jneza riguba yu cani nahuiini ruʼ» laaca zanda cubayúcani cani maʼ huaniisi. Ngue runi naquiiñeʼ guixeleʼ Timoteu de ca cosa dxabaʼ ca. Zacagá nga ni bisiidiʼ Jesús ora guníʼ: «Zaqueca pa nuu xiixa cayuuya luʼ cuchiiña lii guʼnu ni cadi jneza la? bixele zitu de laani» (Mat. 18:9). Ca dxi riʼ, ca xpinni Cristu ni rinanda conseju riʼ nagueendaca rixélecaʼ de ca cosa ni zanda guxheleʼ laacaʼ de Dios.
19. Xi huayuni chupa chonna xpinni Cristu ti cadi guixélecaʼ de Dios.
19 Chupa chonna xpinni Cristu ni guca binni güeʼ ante gaca Testigu maʼ gudixhe íquecaʼ cadi lica guecaʼ nisadxuʼniʼ. Xcaadxi qué riná guni xiixa para chuʼ nayecheʼ neca cadi malu ni purtiʼ zanda guibiguetaʼ guni xiixa cosa malu ni biʼniʼ dxiqué (Sal. 101:3). Guzéʼtenu ejemplu stiʼ ti hombre ante gaca Testigu, laa nabé guyuulaʼdxiʼ cheʼ saa ra ruyaacabe ne rúnicabe cosa dxabaʼ. Ngue runi, dede dxi biziidibe de Dios qué lica ruyaabe, neca puru Testigu nuu ra chebe, qué rúnibe ni purtiʼ ridxíbibe guibiguetaʼ chuuláʼdxibe ca cosa dxabaʼ ni bíʼnibe dxiqué o guiníʼ íquebe gúnibe ni. Dxandíʼ, guirutiʼ rabi laanu cadi lica guideʼnu nisadxuʼniʼ, guyaanu o gúninu xcaadxi cosa ni cadi malu. Peru guiranu naquiiñeʼ gápanu cuidadu ne cadi gudiʼnu lugar chuʼ xiixa ni guxheleʼ laanu de Jiobá.
20. Neca gaca nagana para laanu guixélenu «de guiráʼ ni cadi jneza», xi riguixhedxí ladxidoʼno yaʼ.
20 Ti ndaayaʼ nga gácanu testigu stiʼ Jiobá. Peru para chinenu lá Dios naquiiñeʼ guibáninu modo riuulaʼdxiʼ. Naquiiñeʼ guixélenu «de guiráʼ ni cadi jneza» ne cadi gúninu cosa malu (Sal. 34:14). Ni dxandíʼ nga cadi guiráʼ diʼ biaje zanda gúninu ni. Peru ratadxí ladxidoʼno gánnanu qué zusaana Jiobá de gannaxhii ca xpinni ne cani qué rixeleʼ de ca neza stibe. Biblia na: «Guielú Jiobá cayuuyaʼ guiráʼ ni cayaca lu guidxilayú para guluiʼbe stipa stibe luguiáʼ cani runi cré laabe de guidubi ladxidóʼ» (2 Crónicas 16:9a; 2 Tim. 2:19).