CANI RINABADIIDXAʼ BINNI DE BIBLIA
Ñee zadxiña dxi chuʼ ti gobiernu si lu Guidxilayú la?
Ximodo zanda gacané ti gobiernu guiráʼ binni guidxilayú para chuʼcaʼ tobi si (Isaías 32:1, 17; 54:13)
Guníʼ ique si xi guiráʼ nibeendú binni pa ñaca ni zacá. Yanna riʼ nuu chupa chonna binni ricu, peru jma nga nuu binni pobre ne laacaʼ nga cani jma racanacaʼ. Pa ñuu ti gobiernu lu Guidxilayú ni ñanna xi guiráʼ caquiiñeʼ binni la? ñanda ñacané guirácabe. Ñee raʼbuʼ zadxiña dxi gapa binni ti gobiernu zacá la? (Biindaʼ Jeremías 10:23.)
Nabé maʼ xadxí nga de caguite stale gobiernu binni, peru jma runinácabe binni pobre. Dede nuu gobiernu nabé ruquiichináʼ binni (Eclesiastés 4:1; 8:9). Peru Dios ni jma nandxóʼ maʼ guníʼ zedané ti gobiernu ni guiaana lugar stiʼ cani nuu yanna ne maʼ gulibe ti binni ni gaca xaíque stini, laa huaxa zanda gudii ni caquiiñeʼ guiráʼ binni. (Biindaʼ Isaías 11:4 ne Daniel 2: 44.)
Xi chiguni Reinu stiʼ Dios
Jesucristu nga Xiiñiʼ Jiobá, ne maʼ gulí Dios laabe para gácabe Rey lu Reinu stiʼ. Jesús si nga binni ni zanda gaca ti rey (Lucas 1:31-33). Nabé bizaaláʼdxibe binni dxi guyuube lu Guidxilayú. Yanna, cumu maʼ Rey laabe la? zanda gacanebe binni chuʼ tobi si ne zabeebe guiráʼ yuubaʼ sticaʼ. (Biindaʼ Salmo 72:8, 12-14.)
Peru cadi guiráʼ diʼ binni cudii lugar gaca Jesús rey stiʼ. Neca zacá, cayapa Jiobá paciencia laacabe (2 Pedro 3:9). Nga runi, cudiiruʼ Dios tiempu laacabe para ganda guchaacabe modo riníʼ íquecabe. Maʼ cadi candaa diʼ zabee Jesús guiráʼ binni malu, zacané binni guibani nayecheʼ ne guirutiʼ qué zuchiiñaʼ laacaʼ lu guidubi Guidxilayú. (Biindaʼ Miqueas 4:3, 4.)