CANI RINABADIIDXAʼ BINNI DE BIBLIA
Xiñee runi binni cosa malu
Ñee nannuʼ tu gucalaʼdxiʼ nucaa Jesús ñuni cosa malu la? (Mateo 4:8-10)
Guirutiʼ riuulaʼdxiʼ gaca malu, gusiguii o qué guiaʼ binni, sínuque riuulaʼdxiʼ gacané. Peru, xiñee nuu stale tu ruxhii binni, runi cosa malu ne runi ni cadi jneza yaʼ. Triste guininu ni, peru guiráʼ dxi ridúʼyanu noticia ni ruchibi binni. Tu rucaa binni guni cosa malu yaʼ. (Biindaʼ 1 Juan 5:19.)
Ñee maca bizáʼ Dios laanu para chuuláʼdxinu gúninu cosa malu la? Coʼ. Laabe bizaʼbe laanu casi laabe. Bizaʼbe laanu para gusihuínninu nadxiinu binni cásica rúnibe (Génesis 1:27; Job 34:10). Peru laaca bizaʼbe laanu para cuinu xi gúninu. Adán ne Eva qué ninacaʼ ñúnicaʼ casi runi Dios ne gulicaʼ gúnicaʼ ni cadi jneza. De raqué beeda gácacabe binni napa donda. Ne ora gúpacabe xiiñicabe laaca bíʼnicaʼ cosa malu, purtiʼ maʼ beeda gácacaʼ binni ruchee. (Biindaʼ Deuteronomio 32:4, 5.)
Ñee ziuu dxi guiree guiráʼ cosa malu la?
Racalaʼdxiʼ Dios gusaananu guiráʼ cosa ni cadi jneza rúninu (Proverbios 27:11). Ne ruluiʼbe laanu ximodo gácanu binni nachaʼhuiʼ. Pa gúninu ni gábibe laanu ne gápanu ca guenda stibe la? zanda guibáninu nayecheʼ. Dxandíʼ, qué zanda gusihuínninu guiráʼ ca guenda nápabe cásipeʼ modo rúnibe. Peru, ñee zadxiña dxi gusihuínninu guiráʼ cani la? (Biindaʼ Salmo 32:8.)
Cudii Dios lugar gaca stale cosa malu ti guidúʼyanu pabiáʼ runiná cani binni. Peru zadxiña dxi zabeebe cani (2 Pedro 3:7-9). Maʼ cadi candaa zadxá guidxilayú riʼ de binni nachaʼhuiʼ, ni zabani nayecheʼ ne ni zapa ca guenda stiʼ Dios. (Biindaʼ Salmo 37:9-11.)