CANI RINABADIIDXAʼ BINNI DE BIBLIA
Ñee zadxiña dxi guibáninu jma galán la?
Ñee nannuʼ ximodo zanda gacané guendaguti stiʼ Jesús binni para gusaana de guiníʼ ique puru si para laa la?
Guiráʼ dxi cayuni ca científicu xiixa cosa nacubi. Peru, ñee zadxiña dxi gusiidicabe guiráʼ binni ganna pabiáʼ risaca guizaalaʼdxiʼ stobi la? Nin gaxha. Ndaaniʼ Guidxilayú riʼ nuu stale binni ni ruyubi puru si para laa. Peru Dios huaxa racalaʼdxiʼ guibani binni galán. (Biindaʼ 2 Pedro 3:13.)
Biblia na zadxiña dxi gannaxhiisaa guiráʼ binni guibani lu Guidxilayú. Maʼ qué ziuu tu guchibi binni, ne qué ziuu tu guniná stobi. (Biindaʼ Miqueas 4:3, 4.)
Xiñee nabé riníʼ ique binni puru si para laa
Dxi bizáʼ Dios Adán, primé hombre que la? qué ñácadibe ti binni ni riuulaʼdxiʼ guyubi puru si para laa, purtiʼ nácabe ti binni sin donda. Peru beeda gácabe ti binni napa donda, dxi maʼ qué ninabe nuzuubabe stiidxaʼ Dios. Pur laabe nga beeda gácanu binni napa donda, nga runi riuuláʼdxinu guyúbinu puru si para laanu. Peru zaquiiñeʼ Dios Jesús para gacané laanu gácanu binni sin donda. (Biindaʼ Romanos 7:21, 24-25.)
Dios nga gudixhe gueeda gati Jesús lu Guidxilayú para guixiá donda bisaanané Adán laanu dxi bichee (Romanos 5:19). Zacá nga bixheleʼ Jesús ti neza para ganda guibani binni ndaaniʼ ti paraísu ra maʼ qué ziuu tu guyubi puru si para laa ne laaca maʼ qué ziuu binni ruchee. (Biindaʼ Salmo 37:9-11.)