Gusíʼdinu conciencia stinu

1, 2. 1) Tu bidii laanu conciencia. 2) Xiñee riuʼnu nayecheʼ pur nápanu ni.

JIOBÁ bizáʼ laanu né ti guenda. Xi laani yaʼ. Cuinu xi gúninu né xquendanabáninu. Bidiibe laanu ti conciencia ni gacané laanu gúninu ni jneza. Xii nga conciencia yaʼ. Laani nga ti cosa ni nápanu ne ni rabi laanu xii nga ni jneza ne ni cadi jneza. Pa maʼ bisiidiʼ chaahuinu conciencia stinu zacané ni laanu gúninu ni jneza ne gucáʼnanu ni cadi jneza. Ra bidii Jiobá laanu conciencia stinu, bisihuínnibe nadxiibe laanu ne racaláʼdxibe chuʼnu nayecheʼ.

² Nuu binni qué ganna de ca ley stiʼ Dios peru neca zacá rúnicaʼ ni jneza ne rucanacaʼ cosa malu (biindaʼ Romanos 2:14, 15). Xiñee yaʼ. Purtiʼ conciencia stícabe rabi laacabe nuu cosa ni jneza ne nuu ni cadi jneza. Pa qué ñapa binni conciencia, jma nagana nibani binni lu Guidxilayú riʼ. Nga runi zanda gudiʼnu xquíxepeʼ Jiobá pur bidii guiráʼ binni ti conciencia.

3. Pa gusiidiʼ chaahuinu conciencia stinu, ximodo zacané ni congregación ra riuunu.

³ Stale binni qué rusiidiʼ conciencia stiʼ. Peru laanu racaláʼdxinu gusíʼdinu ni para gacané ni laanu gánnanu xii nga ni jneza ne ni cadi jneza. Para gusíʼdinu ni naquiiñeʼ guidúʼndanu Biblia ne guizíʼdinu xi nani. Peru cadi ngasi. Laaca naquiiñeʼ chuuláʼdxinu guzúʼbanu stiidxaʼ Dios ne guni crenu galán cani para laanu. Nga runi bicaa Pablu: «Cayabe lii guʼnu ni ti acanéu laacabe guia ladxidóʼ cabe, ne cadi chuʼ ni uchiiña xquenda biaani cabe, ne guni cre cabe de idubi ladxidóʼ cabe ti ganda ganaxhii saa cabe» (1 Timoteo 1:5). Pa gusiidiʼ chaahuinu conciencia stinu ne gulábinu ni gabi ni laanu, zacanenu congregación ra riuunu, purtiʼ zacanenu ca hermanu chuʼcaʼ tobi si. Ne jma zannaxhiinu Jiobá ne jma zápanu fe laabe. Ne laaca zusihuínninu jma xhamígunu laabe ne racaláʼdxinu chuʼbe nayecheʼ. Zacá zusihuínninu tu clase de binni nácanu.

4. Pa racaláʼdxinu gusíʼdinu conciencia stinu, xi naquiiñeʼ gúninu yaʼ.

⁴ Pa racaláʼdxinu gusíʼdinu conciencia stinu, cadi caquiiñeʼ si guidúʼdanu Biblia ne guizíʼdinu de memoria cani ca luni. Naquiiñeʼ guidúʼndanu ni gatigá, guiníʼ íquenu lu ni guidúʼndanu ne guinábanu Jiobá gacané laanu gúninu ni guizíʼdinu. Ora ridúʼndanu Biblia, racaláʼdxinu gunibiáʼ chaahuinu Jiobá. Racaláʼdxinu gánnanu ximodo laabe, xi riuuláʼdxibe ne xi qué riuuláʼdxibe. Ra jma gusíʼdinu conciencia stinu, jma zaníʼ íquenu casi modo riníʼ ique Dios.

5. Xi zadúʼyanu lu tema riʼ.

⁵ Zándaca guinabadiidxanu laaca laanu: «Ximodo racané conciencia stinu laanu quixhe íquenu gúninu ni jneza. Ximodo zanda gusihuínninu runi respetarnu conciencia stiʼ ca hermanu stinu. Ne ximodo racané conciencia stinu laanu gúninu ni jneza yaʼ». Lu tema riʼ zadúʼyanu ximodo zanda gacané conciencia stinu laanu lu chonna cosa pa gusiidiʼ chaahuinu laa. Primé, para chuʼnu nazaaca. Guiropa, ora cuinu xi deporte quítenu, xi guidúʼyanu ne xi gucaadiáganu para chuʼnu nayecheʼ. Ne guionna, ora rininu de cani runi crenu.

PARA CHUʼNU NAZAACA

6. Pa huaranu, xi zándaca quixhe íquenu gúninu yaʼ.

⁶ Biblia rudii conseju ni racané laanu chuʼnu nazaaca. Rabi ni laanu gucáʼnanu ca cosa ni runiná laanu ne cadi guidóʼ xhaatanu ne cadi guidéʼ xhaatanu (Proverbios 23:20; 2 Corintios 7:1). Dxandíʼ, neca chinándanu ca conseju stiʼ Biblia, zaca huarárunu ne zióxhonu. Nga runi pa huaranu, zándaca naquiiñeʼ cuinu xi tratamientu guicaanu. Ndaaniʼ chupa chonna guidxi, nuu hermanu zanda cuicaʼ xi sti clase tratamientu guicaacaʼ. Stale hermanu rucaacaʼ Betel para guinabadiidxacaʼ pa zanda guicaa ca testigu stiʼ Jiobá tratamientu ca o pa coʼ.

7. Xi zanda gacané laanu quixhe íquenu gúninu ni jneza ora chuʼ tu gacalaʼdxiʼ gucaa laanu rini.

⁷ Ca Betel ne ca binnigola ni nuu ra ridagulisaanu qué gápacaʼ derechu gábicaʼ laanu xi tratamientu guicaanu, neca guinabadiidxanu laacaʼ (Gálatas 6:5). Dxandíʼ ca binnigola ca zanda gacanecaʼ laanu quixhe íquenu xi gúninu. Ximodo yaʼ. Rúnicabe ni ora rusietenaláʼdxicabe laanu xi rabi Dios laanu lu Biblia. Zanda gusietenaláʼdxicabe laanu biʼniʼ mandar Dios ca xpinni cadi gocaʼ rini (Hechos 15:29). Pur ni biʼniʼ mandar Dios riʼ, rihuinni dxichi qué zanda guicaanu xiixa tratamientu ra gucaacabe laanu rini o tobi de ca tapa cosa ni nuu lu rini. Yanna xi zanda guininu de ca ndaa huiiniʼ ni ribeecabe lu tobi de ca tapa cosa ni nuu lu rini yaʼ. Ñee zanda guicaanu cani la? Cada hermanu naquiiñeʼ quixhe ique xi guni pur ni gabi conciencia stiʼ laa. Nuu hermanu rabi conciencia stiʼ laa zanda guicaa ni, ne nuu hermanu rabi conciencia stiʼ laa cadi guni ni.a Xi xcaadxi textu stiʼ Biblia zanda gacané laanu para quixhe íquenu xi tratamientu guicaanu yaʼ.

8. Ximodo racané Filipeses 4:5 laanu guidúʼyanu xi gúninu ora huaranu.

⁸ Ca dxi stinu riʼ nuu stale guendahuará ni qué gapa remediu. Peru nuu binni zándaca guiníʼ runibiáʼ xiixa tratamientu ni zanda gusianda xiixa guendahuará. Naquiiñeʼ gápanu cuidadu. Proverbios 14:15 na ca binni nuu xpiaaniʼ qué runi crecaʼ guiráʼ ni gabi binni laacaʼ, sínuque riníʼ ique chaahuicaʼ ante quixhe íquecaʼ xi gúnicaʼ. Peru apóstol Pablu guníʼ naquiiñeʼ gaca ca xpinni Cristu binni riuu razón (Filipenses 4:5). Pa chinándanu conseju riʼ, qué zacapeʼ íquenu guendahuará stinu. Qué racaláʼdxinu gácanu binni ni riníʼ ique puru para laa si (Filipenses 2:4). Nánnanu qué zusaana de gaca huaranu laga nácanu binni ruchee. Nga runi naquiiñeʼ ganna dxíchinu ni jma risaca lu xquendanabáninu nga gúninu ni na Jiobá (biindaʼ Filipenses 1:10).

9. 1) Ximodo racané Romanos 14:13, 19 laanu gánnanu xi gúninu ora maʼ huaranu. 2) Xi zándaca guizaaca pa qué chinándanu conseju stiʼ Pablu.

⁹ Ndaaniʼ guidxi Roma, chupa chonna xpinni Cristu guniʼcaʼ mal de xcaadxi hermanu purtiʼ qué niníʼ íquecaʼ cásica guníʼ íquecabe de xiixa guendaró ne xiixa saa. Peru ra bíʼnicabe zacá, maʼ qué ñuu congregación tobi si. Nga runi Pablu guníʼ: «Nuu tu na jma nandxóʼ ti dxi, que sti dxi, ne nuu tu na igual irá dxi. Cada tobi chi nanda ni rabi ladxidóʼ laa jneza» (biindaʼ Romanos 14:5, 13, 15, 19, 20). Ndiʼ rusiidiʼ laanu naquiiñeʼ gácanu binni riuu razón ne guni respetarnu modo riníʼ ique xcaadxi binni lugar de gacaláʼdxinu guiníʼ íquecabe casi laanu. Xi zándaca guizaaca pa qué chinándanu conseju stiʼ apóstol Pablu yaʼ. Zándaca guchiichinu ca hermanu stinu ne maʼ qué chuʼcaʼ tobi si ndaaniʼ congregación. Ndaaniʼ ti guidxi ti guendaxheelaʼ gucalaʼdxiʼ nucaa caadxi hermanu nizíʼ caadxi cosa ne ninándacaʼ ti dieta. Nuu tu biʼniʼ ni na guendaxheelaʼ riʼ, ne xcaadxi qué ñuni ni. Peru cani guzíʼ ca hermanu que ne dieta yenecaʼ qué ñacané ni laacaʼ, ngue runi stale de laacaʼ bidxiichicaʼ. Xiñee gupa ca hermanu riʼ guendanagana yaʼ. Purtiʼ guendaxheelaʼ riʼ qué ñácacaʼ binni riuu razón. Laacabe nápacabe derechu quixhe íquecabe pa zéʼcabe cani guzíʼcabe ne pa zinándacabe xiixa dieta. Peru ra bicaacabe xcaadxi hermanu guni casi bíʼnicabe la? guyuu guendanagana lade ca binni ridagulisaa.

10. Xiñee naquiiñeʼ guni respetarnu ni quixhe ique xcaadxi binni guni. (Biiyaʼ dibuju ni zeeda ra ruzulú tema riʼ.)

¹⁰ Zándaca chuʼ biaje guiníʼ íquenu cadi jneza ni gudixhe ique tuuxa hermanu guni pur guendahuará stiʼ. Peru cadi naquiiñeʼ guininu mal de laabe ne cadi galán diʼ gucaʼnu laabe guchaabe modo riníʼ íquebe. Zándaca hermanu ca caquiiñeʼ gusiidiʼ chaahuiʼ conciencia stiʼ (1 Corintios 8:11, 12). O zándaca laanu nga naquiiñeʼ gusiidiʼ chaahuinu conciencia stinu. Cada tobi de laanu naquiiñeʼ quixhe ique xi guni ne chuʼnu conforme ne intiica guizaaca.

ORA CUINU MODO CHUʼNU NAYECHEʼ

11, 12. Ximodo racané Eclesiastés 3:4 ne Gálatas 5:19-21 laanu para quixhe íquenu gúninu ni jneza ora cuinu xi deporte quítenu, xi guidúʼyanu ne xi gucaadiáganu para chuʼnu nayecheʼ.

¹¹ Guiranu caquiiñeʼ guxídxinu ne chuʼnu nayecheʼ, purtiʼ zacá bizáʼ Jiobá laanu (Eclesiastés 3:4). Peru pa racaláʼdxinu gacané cani laanu, naquiiñeʼ gápanu cuidadu ora cuinu xi deporte quítenu, xi guidúʼyanu ne xi gucaadiáganu para chuʼnu nayecheʼ ne pabiáʼ tiempu rúninu cani. Ximodo racané conciencia stinu laanu quixhe íquenu gúninu ni jneza yaʼ.

¹² Biblia cayabi laanu qué chuʼ dxi gúninu cosa malu casi chúʼnenu ni cadi xheelanu, guni adorarnu bidóʼ, gúninu ca cosa de espiritismo, tíndenu, chuunu saa ra raca guendaquéiquiiñeʼ o guidéʼ xhaatanu nisa dxuʼniʼ. Pablu guníʼ «qué ziuu cani runi irá nga ra runi mandar Dios» (Gálatas 5:19-21). Nga runi galán guinabadiidxanu laca laanu: «Ñee rudii conciencia stinneʼ lugar naa quiteʼ xiixa deporte ra ridíndecabe o ra rusisácacabe xquídxicabe jma, o ni gucaa naa guidxiicheʼ la? Ñee rudii conciencia stinneʼ lugar naa guuyaʼ película ra rihuinni nexhenécabe tuuxa, ra caxúdxicabe o ra rihuinni espiritismo casi xiixa ni jneza la?».

13. Ximodo racané 1 Timoteo 4:8 ne Proverbios 13:20 laanu quixhe íquenu gúninu ni jneza ora cuinu xi deporte quítenu, xi guidúʼyanu ne xi gucaadiáganu para chuʼnu nayecheʼ.

¹³ Guidúʼyanu xcaadxi textu stiʼ Biblia ni zanda gacané laanu quixhe íquenu gúninu ni jneza ora cuinu xi deporte quítenu, xi guidúʼyanu ne xi gucaadiáganu para chuʼnu nayecheʼ. Casi 1 Timoteo 4:8 cusiene zanda gacané ejerciciu binni. Ne dxandíʼ zanda gacané xiixa deporte laanu chuʼnu nazaaca. Peru qué riníʼ diʼ nga zanda guninenu tutiica binni ejerciciu. Proverbios 13:20 na: «Tu canazané binni nuu xpiaaniʼ la? zaca binni nuu xpiaaniʼ, peru tu ridxaaga binni ni nahuati la? qué zieni laa jneza». Rihuinni dxíchica, pa racaláʼdxinu quixhe íquenu gúninu ni jneza ora cuinu xi quítenu, naquiiñeʼ gusiidiʼ chaahuinu conciencia stinu modo na Biblia.

14. Ximodo gucané conseju ni zeeda lu Romanos 14:2-4 ti familia.

¹⁴ Guidúʼyanu ni bizaaca ti guendaxheelaʼ de Testigu ni láʼ Christian ne Daniela. Laacaʼ nápacaʼ chupa dxaapahuiiniʼ ni maʼ ziniisi. Christian na guniʼné laacabe de xi gúnicabe ora cuícabe xi deporte quítecabe, xi gúʼyacabe ne xi gucaadiágacabe para chúʼcabe nayecheʼ gueelaʼ runi adorárcabe Dios. Guníʼcabe nuu caadxi de ca cosa riʼ jneza cani ne nuu xcaadxi cadi jneza. Ne laaca guníʼcabe tuu nga cani zanda gaca xhamígucabe. Tobi de ca dxapahuiiniʼ que guníʼ nuu chupa chonna Testigu ra scuela stiʼ ni runi cosa ni qué ruuyabe jneza. Ne laaca guniʼbe bicaacabe laabe gúnibe casi rúnicaʼ. Jñaabe ne bixhózebe bisienecaʼ laabe cada binni nga iquiiñeʼ conciencia stiʼ para guuyaʼ xi guni ne tu guidxaaga (biindaʼ Romanos 14:2-4).

15. Ximodo racané Mateo 6:33 laanu para guidúʼyanu ximodo iquiiñenu tiempu stinu.

¹⁵ Xii nga ni jma risaca para lii yaʼ. Cheluʼ reunión, gucheecheluʼ diidxaʼ ne gundaluʼ Biblia la? O cuiluʼ xi deporte quíteluʼ, xi gúʼyaluʼ ne xi gucaadiágaluʼ para chuʼluʼ nayecheʼ. Jesús bidii ti conseju ni zanda gacané laanu guidúʼyanu pabiáʼ tiempu cueenu para quítenu xiixa deporte, xi guidúʼyanu ne xi gucaadiáganu para chuʼnu nayecheʼ. Laabe guniʼbe: «Cadi gusaanatu de guyúbitu primeru reinu stiʼ Dios ne gúnitu ni jneza ni rinabaʼ Dios laatu» (Mateo 6:33, TNM). Ora quixhe íquenu ximodo iquiiñenu tiempu stinu, conciencia stinu naquiiñeʼ gusietenalaʼdxiʼ laanu conseju stiʼ Jesús riʼ.

ORA RININU DE CANI RUNI CRENU

16. Xi naquiiñeʼ gucaa conciencia stinu laanu gúninu.

¹⁶ Pa maʼ bisiidiʼ chaahuinu conciencia stinu, qué zabisini laanu cadi gúninu ni cadi jneza, sínuque laaca zábini laanu gúninu ni jneza, casi gucheechenu diidxaʼ. Conciencia stinu zucaa laanu guinínenu binni de Dios, cásica de yoo pur yoo ne ra tiica si guidúʼyanu laacaʼ. Ndipeʼ nga ni bizaaca Pablu. Laabe guniʼbe qué zanda gusaana de gucheechebe diidxaʼ purtiʼ para laabe naquiiñepeʼ gúnibe ni (1 Corintios 9:16). Pa chinándanu ejemplu stibe, zúninu ni naquiiñeʼ gúninu ne zatadxí conciencia stinu. Pablu laaca guníʼ ora gucheechenu diidxaʼ, ruyúbinu modo gucaadiaga binni stiidxaʼ Dios casi ñaca nucaʼnu conciencia stícabe gucaadiaga laanu (2 Corintios 4:2).

17. Xi biʼniʼ ti dxaapahuiiniʼ ni bisiidiʼ conciencia stiʼ de Biblia.

¹⁷ Guidúʼyanu ejemplu stiʼ ti hermana ni láʼ Jacqueline. Dxi nápabe 16 iza, biindacabe de evolución ra scuela. Laabe nabé riuuláʼdxibe guicábibe lu clase, peru dxi que conciencia stibe qué nudii lugar nicábibe lu clase que. Xiñee yaʼ. Purtiʼ qué ninabe niniʼbe jneza nga guni cré binni evolución. Nga runi gudixhe íquebe gusiénebe maestru stibe ni runi crebe. Guizáʼ bidxagayaabe ora biiyabe qué nidxiichi maestru stibe ne gunabaʼ laabe guiniʼbe de modo bizáʼ Dios guiráʼ ni nuu nezalú ca xcompañérube. Cumu bisiidibe conciencia stibe ni na Biblia la? guyuube nayecheʼ purtiʼ gucané ni laabe bíʼnibe ni jneza. Ñee laaca racané conciencia stiluʼ lii zacá la?

18. Xiñee nabé risaca nga gápanu ti conciencia ni maʼ biziidiʼ chaahuiʼ.

¹⁸ Pa guidúʼndanu Biblia ne guiníʼ íquenu lu ni biziidinu, ne gúninu ni lu xquendanabáninu la? zápanu ti conciencia ni maʼ biziidiʼ chaahuiʼ. Nabé risaca ndiʼ, purtiʼ zacané ni laanu chinándanu ca ley stiʼ Dios ne gúninu guiráʼ ni rusiidiʼ Jiobá laanu lu xquendanabáninu. Cadi dxandíʼ guiranu casi xpinni Cristu racaláʼdxinu gúninu ni la?