NI RINABADIIDXAʼ CA JOVEN
¿Xi guneʼ para gapaʼ ti conciencia nayá?
¿Xi zanda guchaagaluʼ conciencia stiluʼ?
Ti GPS (o ti mapa)
Ti espeju
Ti xhamíguluʼ
Ti juez
Zanda guchaaganu ni né guidapaʼ cosa ni bizéʼtenu riʼ, ne lu artículo riʼ zuuyaluʼ xiñee.
¿Xii nga conciencia?
Conciencia nga ti voz ni rabi laanu xii nga ni jneza ne xii nga ni cadi jneza. Biblia ná zeeda gaca conciencia casi ti ley ni cá ndaaniʼ ladxidóʼ binni (Romanos 2:15). Pa nayá conciencia stiluʼ, zacaneni lii gánnaluʼ pa jneza ni bíʼniluʼ o xiixa ni cá íqueluʼ gúniluʼ.
Naca conciencia stiluʼ casi ti GPS (o ti mapa). Rábini lii xi neza naquiiñeʼ cheluʼ para cadi gacanaluʼ.
Naca conciencia stiluʼ casi ti espeju. Racaneni lii gúʼyaluʼ ximodo lii ne xi nuu ndaaniʼ ladxidoʼloʼ.
Naca conciencia stiluʼ casi ti xhamíguluʼ. Rudiini conseju ne racaneni lii guibániluʼ galán. Peru caquiiñeʼ gulábiluʼ ni.
Naca conciencia stiluʼ casi ti juez. Ora bíʼniluʼ ti cosa malu, rábini lii cadi jneza ni bíʼniluʼ.
Pa nayá conciencia stiluʼ, zacaneni lii guicaaluʼ decisión jneza.
Ni maʼ biziidiluʼ: Racané conciencia ca lii para 1) guicaaluʼ decisión jneza ne 2) guni chaahuiluʼ xiixa ni cadi jneza bíʼniluʼ.
¿Xiñee risaca gaca conciencia stiluʼ nayá?
Biblia ná: «Lagapa ti conciencia nayá» (1 Pedro 3:16). Nagana para chinándaluʼ conseju riʼ pa caʼruʼ gusiidiluʼ conciencia stiluʼ guni ni jneza.
Sicaríʼ guníʼ Jennifer: «Rusiguieeʼ bixhozeʼ ne jñaaʼ ne qué rabeʼ laacaʼ paraa riaaʼ. Nacubigá que, bichiiñaʼ conciencia stinneʼ naa peru despué guníʼ iqueʼ cadi malu peʼ ngue ni runeʼ».
Últimu la? bicaadiaga Jennifer conciencia stiʼ ne gúdxibe bixhózebe ne jñaabe xi cayúnibe purtiʼ maʼ qué racaláʼdxibe gusiguiibe laacaʼ.
Guníʼ ique ndiʼ: ¿Pora nga nuchiiñaʼ conciencia stiʼ Jennifer laa?
Matthew guníʼ: «Ora rucaachiʼ tuuxa ca cosa ni runi, qué riuu diʼ galán. Ora rúniluʼ xiixa cosa malu ne qué ruchiiñaʼ conciencia stiluʼ lii, jma nagueenda gúniluʼ xcaadxi cosa malu».
Nuu binni maʼ qué rulabi conciencia stiʼ. Biblia ná: «Maʼ qué gánnacabe xii nga ni jneza ne ni cadi jneza» (Efesios 4:19). Biblia Nueva Versión Internacional cusiéneni sicaríʼ: «Maʼ qué rituí diʼ lúcabe».
Guníʼ ique ndiʼ: ¿Ñee dxandíʼ ribani ca binni ni qué ruchiiñaʼ conciencia stiʼ nayecheʼ la? ¿Xi guendanagana ridxaagalúcabe?
Ni maʼ biziidiluʼ: Para gápaluʼ ti conciencia nayá caquiiñeluʼ guendabiaaniʼ ti guiéneluʼ «xii nga ni jneza ne ni cadi jneza» (Hebreos 5:14).
¿Xi gúniluʼ para gápaluʼ ti conciencia nayá?
Para gápaluʼ ti conciencia nayá naquiiñeʼ guiziidiluʼ gúniluʼ ni jneza. Nuu binni rinanda ni runi:
familia ne cultura stiʼ
xcaadxi joven
binni famoso
Peru jma jneza ni rusiidiʼ Biblia purtiʼ «Dios nga guníʼ xi guicá luni». Laa bizáʼ laanu ne nanna xii nga ni jma galán para laanu (2 Timoteo 3:16).
Guzéʼtenu caadxi ejemplu.
NI NÁ BIBLIA: «Racaláʼdxidu gácadu honradu lu guiráʼ cosa» (Hebreos 13:18).
¿Ximodo zanda gacané textu riʼ conciencia stiluʼ para cadi guni copiarluʼ lu examen, gusiguiiluʼ bixhózeluʼ ne jñaaluʼ o para cadi cuánaluʼ?
Pa nayá conciencia stiluʼ ne racaneni lii gúniluʼ ni jneza, ¿ximodo zacané ndiʼ lii yanna ne despué?
NI NÁ BIBLIA: «¡Laguxooñeʼ de pecadu sexual!» (1 Corintios 6:18).
¿Ximodo zanda gacané textu riʼ conciencia stiluʼ para cadi gúʼyaluʼ pornografía ne cadi gápaluʼ relación sexual ante guichaganaluʼ?
Pa nayá conciencia stiluʼ ne racaneni lii cadi guiábaluʼ lu pecadu sexual, ¿ximodo zacané ndiʼ lii yanna ne despué?
NI NÁ BIBLIA: «Ni gúnitu nga gácatu nachaʼhuiʼ né stobi, gannaxhiisaatu ne guiatu binni. Lachuu listu para guni perdonartu» (Efesios 4:32).
¿Ximodo zanda gacané textu riʼ lii ora cadi cayuuláʼdxiluʼ ni ná bíʼchiluʼ, bizáʼnaluʼ o ti xhamíguluʼ?
Pa racané conciencia stiluʼ lii para guni perdonarluʼ ne guialuʼ binni, ¿ximodo zacané ndiʼ lii yanna ne despué?
NI NÁ BIBLIA: Nanalaʼdxiʼ Jehová «tutiisi ni nadxii guendaridinde» (Salmo 11:5).
¿Ximodo zanda gacané textu riʼ lii ora cuiluʼ xi película ne xi programa de televisión gúʼyaluʼ ne xi videojuego quíteluʼ?
Pa nayá conciencia stiluʼ ne racaneni lii gucaanaluʼ entretenimientu ni napa violencia, ¿ximodo zacané ndiʼ lii yanna ne despué?
NI BIZAACA JEREMY: «Riguite ca xhamiguaʼ videojuego ni napa violencia ne naa laaca gudxiteʼ ni. Peru gudxi bixhozeʼ naa cadi quíteruaʼ ca juegu que. Ngue runi riguiteʼ ni ora si riaaʼ ra lidxi ca xhamiguaʼ ne ora rindayaʼ ra yoo la? qué rinieeʼ gastiʼ. Gunabadiidxaʼ bixhozeʼ naa xi cayacaʼ ne naa gudxeʼ laa cadi cayacaʼ gastiʼ. Ti dxi biindaʼ Salmo 11:5 ne bidieeʼ cuenta naquiiñeʼ gusaanaʼ de quiteʼ ca videojuego que, ngue runi maʼ qué niguiteruaʼ cani. Ora biʼyaʼ tobi de ca xhamiguaʼ ni bineʼ que la? laaca maʼ qué niguiterube ca videojuego que».
Guníʼ ique ndiʼ: ¿Pora gucané conciencia stiʼ Jeremy laa guni ni jneza ne pora bilábibe ni? ¿Xi riziidiluʼ de ni bizaaca Jeremy?
Ni maʼ biziidiluʼ: Pa nayá conciencia stiluʼ zacaneni lii gánnaluʼ pa cayúniluʼ ni jneza ne xii nga ni jma risaca para lii. Yanna, ¿ñee nayá conciencia stiluʼ la?