Ora nápaluʼ ti guendahuará malu

Linda, ti gunaa ni napa 71 iza guníʼ: «Ora gúdxicabe naa napaʼ cáncer de pulmón ne de colon, bineʼ sentir casi ora ñábicabe naa maʼ chigateʼ. Peru, ora yendayaʼ ra lidxeʼ, guníʼ iqueʼ: “Cadi ngue diʼ nga cabezaʼ gábicabe naa, peru napaʼ xidé guidxelaʼ modo gudxieeluáʼ guendahuará riʼ”».

Elise, ti gunaa de 49 iza guníʼ: «Napaʼ ti guendahuará ne nabé rusiuubani ca nerviu napaʼ galaa luaʼ. Nuu biaje nabé naná yuubaʼ ca dede racaʼ deprimir. Stale biaje huayuneʼ sentir stubeʼ ne dede huaníʼ iqueʼ guuteʼ laca naa».

Zuba ti hombre ni huará lu silla de rueda ne zuhuaa familia stiʼ cueʼ

PA MAʼ gúdxicabe lii nápaluʼ ti guendahuará malu o tuuxa familiar stiluʼ la? maʼ nánnaluʼ pabiáʼ riuu binni xizaa ora rábicabe nga laa. Cadi guendahuará si ca rudxiiluluʼ, laaca rudxiiluluʼ estrés emocional ni redané ni. Zándaca guidxíbiluʼ ne chuʼ xhaataluʼ xizaa ora guiníʼ íqueluʼ napa xidé chindeeluʼ cita ra nuu doctor, gaca nagana para lii guidxélaluʼ o quíxeluʼ xiixa tratamientu ne ca efectu ni gapa ca medicina gudiicabe lii lu cuerpu stiluʼ. Ora napa tuuxa ti guendahuará malu zándaca guizáʼ zusidxaga ni o zabee ni gana laa.

¿Xi zanda gacané lii ora guizaacaluʼ nga yaʼ? Ni huayacané stale binni para gatadxí ladxidóʼ nga oración ne gúʼndacaʼ textu zeeda lu Biblia ni guni animar laacaʼ. Sti cosa ni zacané lii gatadxí ladxidoʼloʼ nga ora gacané ne gannaxhii familia ne ca xhamíguluʼ lii.

NI HUAYUNI CAADXI BINNI

Robert, ti hombre de 58 iza guníʼ: «Para gudxiiluluʼ guendahuará stiluʼ la? gupa confianza Dios, ne laa zacané lii gudxiiluluʼ guendahuará stiluʼ. Biʼniʼ orar Jiobá ne gudxi laa ximodo cayuni sentirluʼ. Gunabaʼ laabe espíritu santu stibe ne gunabaʼ laabe gudxiiluluʼ guendahuará stiluʼ né stale gana pur familia stiluʼ».

Robert laaca bizeeteʼ: «Nabé risaca chuʼ familia stiluʼ gaxha de lii ne gacanecaʼ lii en sentidu emocional. Guiráʼ dxi, runi marcar tobi de laacabe naa pur teléfono para guinabadiidxaʼ ximodo nuaaʼ. Laaca racané ca xhamiguaʼ ni nabeza sti ladu naa. Nga racané naa guneʼ sentir galán ne cadi guireeʼ gana».

¿Ñee nápaluʼ ti xhamíguluʼ ni huará ne cá íqueluʼ chigánnaluʼ laa la? Biiyaʼ xi guníʼ Linda: «Racalaʼdxiʼ ti binni ni huará guibani cásica nabani ti binni nazaaca ne qué racalaʼdxiʼ guiníʼ de guendahuará stiʼ guiráʼ si ora. Nga runi, guniʼné laabe de ca cosa ni rizaaca guiráʼ dxi».

Stipa rudii Dios, modo riguixhedxí Biblia ladxidoʼloʼ ne cariñu stiʼ familia stiluʼ ne ca xhamíguluʼ zanda gacané cani lii gudiiluʼ cuenta risácaruʼ xquendanabániluʼ neca nápaluʼ ti guendahuará malu.

Textu zeeda lu Biblia ni zanda gacané lii

Bidii lugar gacané Dios lii

«Gunabadiidxaʼ Jiobá, ne laabe bicábibe naa, ne bilabe naa de guiráʼ ni ruchibi naa. Ni cayacaná riʼ bicaa ridxi, ne Jiobá peʼ bicaadiaga laa» (Salmo 34:4, 6).

Sicaríʼ guníʼ Linda: «Qué rinabaʼ Dios gusianda naa. Rinabaʼ laabe gacanebe naa gacaʼ nadipaʼ ne gudxieeluáʼ guendahuará stinneʼ».

Biindaʼ Biblia para chuʼluʼ gana

«Guirutiʼ tu cueza racá zaníʼ: “Huaraʼyaʼ”» (Isaías 33:24).

Biʼniʼ meditar ni cayuni prometer Dios chiguni despué. Nga zuquidxi esperanza stiluʼ ne zacané lii guni huantarluʼ.

Biyubi gacané familia ne ca xhamíguluʼ lii

«Ni dxandíʼ xhamígunu la? guiráʼ ora nadxii laanu, ne zácabe ti bíchinu o ti bizánanu ora nápanu xiixa guendananá» (Proverbios 17:17).

Sicaríʼ guníʼ Elise: «Cadi guixéleluʼ, bidii lugar gacané ca xhamíguluʼ lii. Nuu biaje zuni sentirluʼ stúbiluʼ ne zaníʼ íqueluʼ qué rucaadiaga Dios lii, peru qué chuʼ dxi guixéleluʼ de laacabe».