¿Ñee nannuʼ ni la?

¿Xi dxiiñaʼ runi ti mayordomo ni bibani tiempu gucuá Biblia?

DXIIÑAʼ runi ti mayordomo tiempu que nga gapa lidxi o ca cosa napa sti binni.

Dxi naca José, xiiñiʼ Jacob, esclavu ndaaniʼ guidxi Egipto, biʼniʼ xpixuaanaʼ laa mayordomo ndaaniʼ lidxi. Hombre riʼ la? «bisaanabe guiráʼ ni nápabe lu náʼ José» (Gén. 39:2-6). Ne despué, laaca gupa José mayordomo ra lidxi dxi beeda gaca ti binni risaca ndaaniʼ guidxi Egipto (Gén. 44:4).

Tiempu bibani Jesús, jma nga ribeza ca hombre ricu ni napa stale layú ndaaniʼ guidxi, zitu de ca cosa sticaʼ. Nga runi rápacaʼ mayordomo para guʼyaʼ gaca dxiiñaʼ ni runi ca trabajador sticaʼ guiráʼ dxi.

¿Xi naquiiñeʼ guni tuuxa para ganda gaca ti mayordomo? Columela, ti escritor romano ni bibani lu primé siglu, bisiene naquiiñeʼ gapa ti esclavu experiencia para ganda gaca mozo o mayordomo. Naquiiñeʼ gapa cualidad galán para cadi lica gaca naduxhuʼ. Laaca guníʼ Columela sicaríʼ: «Ni ribézacabe de tuuxa ni gaca mayordomo nga cadi guiníʼ ique nanna guiráʼ cosa pa qué ganna gastiʼ, ne naquiiñeʼ guyubi guiziidiʼ ni qué ganna».

Riquiiñeʼ Stiidxaʼ Dios ejemplu stiʼ ti mayordomo para gusiene chupa chonna de ca dxiiñaʼ ni raca ndaaniʼ congregación. Guzéʼtenu ti ejemplu. Guluu apóstol Pedro gana ca xpinni Cristu para iquiiñecaʼ don bidii Dios laacaʼ pur guendanachaʼhuiʼ stiʼ para gacanecaʼ xcaadxi ne gúnicaʼ ni casi runi ti buen mayordomo (1 Ped. 4:10).

Jesús peʼ biquiiñeʼ ejemplu stiʼ ti mayordomo para bisiene parábola ni zeeda lu Lucas 16:1-8. Ne lu profecía ra riete de señal ni gusihuinni presencia stibe casi Rey, gúdxibe ca discípulo stibe zuni nombrarbe ti «mozo ni nuu xpiaaniʼ ne ni runi jneza» o ti «mayordomo ni runi jneza». Dxiiñaʼ jma risaca stiʼ mayordomo riʼ nga gudii guiráʼ información ni iquiiñeʼ ca xpinni Cristu lu ca últimu dxi riʼ para chuʼcaʼ gaxha de Dios (Mat. 24:45-47; Luc. 12:42). Rudiʼnu xquixe peʼ mayordomo ni runi jneza pur ca publicación ni runi ne ni riguiiziʼ lu guidubi Guidxilayú para gaca fe stinu naguidxi.