«Cani zanda guiaana sin ichaganá la? cadi ichaganáʼ»
1 Ti biaje, dxi caniʼné Jesús ca discípulo stiʼ de guendaxheelaʼ, bizeeteʼ de cani zanda guiaana sin guichaganáʼ. Guidúʼyanu xi guniʼbe: «Cani zanda guiaana sin ichaganá la? cadi ichaganáʼ» (Mat. 19:10-12). Gudiʼdiʼ si caadxi iza despué, bicaa apóstol Pablu xi guiráʼ ribeendú binni ora guiaana sin guichaganáʼ ne guluube gana ca xpinni Cristu chinándacaʼ ejemplu stibe (1 Cor. 7:7, 38). Ca dxi stinu riʼ, stale tu laa maʼ gudixhe ique guiaana «sin ichaganá» ne cabeenducaʼ stale cosa galán. Xi cabeendúcabe yaʼ.
2 Gúninu ni na Dios sin «chuʼ xiixa ucueeza» laanu. Biiyaʼ Pablu jma runi tobi xhiiñaʼ Jiobá sin «chuʼ xiixa ucueeza» laa ora caʼruʼ guichaganáʼ. Ne zacaca nga rizaaca ni yanna: ti xpinni Cristu ni caʼruʼ guichaganáʼ zanda guni stipa pur cheʼ Scuela para cani rucheeche stiidxaʼ Reinu. Zaqueca zanda gácabe precursor, guiziidibe sti diidxaʼ, chindézabe sti lugar ra jma caquiiñeʼ tu gucheeche diidxaʼ, chebe Betel o guicaabe xcaadxi dxiiñaʼ ndaaniʼ xquidxi Dios. Laaca rápabe jma tiempu para gúʼndabe Stiidxaʼ Dios stúbibe ne guiníʼ íquebe de laani ne zaqueca guni orarbe Jiobá para gábibe laa xi runi sentirbe ne para gacanebe xcaadxi binni. Guiráʼ cani maʼ bizéʼtenu riʼ «para bien» stiʼ cani caʼruʼ guichaganáʼ cani (1 Cor. 7:32-35; Hech. 20:35).
3 Ora guni tuuxa xhiiñaʼ Dios sin chuʼ xiixa ni guchiiñaʼ laa, rapa stale ndaayaʼ. Ti xpinni Cristu ni guleza guidxi Kenia veintisiete iza ne qué nichaganáʼ guníʼ: «Gupaʼ stale xhamiguaʼ ne stale dxiiñaʼ. Bineniáʼ laacabe stale cosa ne yegannaʼ laacabe ne zaqueca yegánnacabe naa. [...] Huayuneʼ stale cosa ne huayaaʼ stale lugar para chigucheecheʼ diidxaʼ purtiʼ nuaaʼ stubeʼ, ne nga nabé rusiecheʼ naa. [...] Ra maʼ gudiʼdiʼ ca iza ca, runeʼ sentir jma gaxha nuaaʼ de Jiobá».
4 Gúninu jma lu xhiiñaʼ Dios laga caʼruʼ guichagananu. Jesús guníʼ pa quixhe íquenu cadi guichagananu la? naquiiñeʼ gácani pur gúninu «xhiiña Dios ni nuu ibáʼ» (Mat. 19:12). Casi xcaadxi guenda ni gápanu la? zacaca naquiiñeʼ gúninu pa caʼruʼ guichagananu, gúninu dxiiñaʼ ni gusiecheʼ laanu ne cueendunu ni galán. Stale binni ni caʼruʼ guichaganáʼ huadiicaʼ cuenta pabiáʼ risaca guiaanacaʼ zacá, purtiʼ zacá randa rúnicaʼ stale cosa risaca lu xhiiñaʼ Dios ne runi crecaʼ zudii Jiobá stipa laacaʼ para gúnicaʼ ni.