Guendaró espiritual órapeʼ caquiiñeʼ
1. Ximodo cayaca ni na Ezequiel 36:29 yanna riʼ.
1 «Zabidxeʼ biidxiʼ ne zutale cani, ne qué zaguíxhediaʼ guendarindaana luguiatu», na Jiobá (Eze. 36:29). Ca diidxaʼ riʼ laaca para xquidxi Dios ni yanna. Zacá nga cutale Jiobá biidxiʼ ca stálepeʼ para acané xquidxi. Ne ti modo rúnibe ni nga ra cudiibe laanu guendaró espiritual órapeʼ caquiiñeʼ lu ca guendaridagulisaa roʼ ca.
2. Ximodo huaquiiñeʼ Jiobá ca guendaridagulisaa de chonna gubidxa ca para gudii guendaró espiritual laanu órapeʼ caquiiñenu yaʼ.
2 Lu guendaridagulisaa roʼ ni guca iza 1931 ndaaniʼ guidxi Columbus (Ohio, EE.UU.) que, Jiobá bisiene ca xpinni para ucuaacaʼ ti lá nacubi: testigu stiʼ Jiobá (Isa. 43:10-12). Lu iza 1935 binibiáʼcabe tupeʼ nga guiráʼ binni ni rieeteʼ lu Apocalipsis 7:9-17. Ne iza 1942 que, bíchinu Knorr bidii ti libana ni biree lá «Guendariuudxi, ñee zandaani la?». Libana que nabé bicaani ca Testigu que gucheechecaʼ diidxaʼ lu guidubi naca Guidxilayú ne pur nga guyuu ti Scuela para Misioneru (Escuela Bíblica de Galaad de la Watchtower). Nécaxa nuu guendaridagulisaa roʼ qué liica rusiaandanu la? lu guiráʼ cani nga huayuu ti mexaʼ dxaʼ guendaró espiritual ni gacané laanu órapeʼ caquiiñenu (Sal. 23:5; Mat. 24:45).
3. Xi naquiiñeʼ gúninu ti cueendunu ni galán lu guiráʼ ni cusiidiʼ Jiobá lu ca guendaridagulisaa de chonna gubidxa ca yaʼ.
3 Ñee rochaahuiluʼ la? Nuu tu laa dxá guendaró ra nuu peru qué ziuu nazaaca pa qué ucaa ique go (Pro. 26:15). Zacaca nga ne cani cudii Jiobá laanu. Lu caadxi guendaridagulisaa roʼ, huahuinni de que stale bíchinu o bizánanu maʼ canazacaʼ o pacaa maʼ cayuiʼcaʼ diidxaʼ nécaxa cadi caquiiñepeʼ gúnicabe ni órapeʼ cadiʼdiʼ ca libana ca. Nécaxa risaca nga idxaaganu xcaadxi Testigu para uguusaanu gana laanu la? lu ca guendaridagulisaa ca naquiiñeʼ gúninu ni ante guzulú ne guiluxe si cada neza stini (Ecl. 3:1, 7). Pa cadi zúbanu lugar stinu para ucaadiáganu la? zunítinu cani jma naquiiñeʼ gánnanu. Ca binnigola ne xcaadxi bíchinu ni cayúnicaʼ dxiiñaʼ lu guendaridagulisaa ca, zándaca nuu xiixa ni guiníʼcabe de xhiiñacabe órapeʼ cadiʼdiʼ ca libana ca. Peru pa cadi pur nga ni la? naquiiñeʼ laapecabe nga cuícabe ne ucaadiágacabe cani cayeeteʼ. Nin tóbinu cadi gudiʼnu lugar gunítinu nin ti ndaa de ni cusiidiʼ Jiobá laanu (1 Cor. 10:12; Fili. 2:12).
4. Ximodo zanda guluinu de que rudiʼnu xquíxepeʼ Jiobá pur guiráʼ cani cudiibe laanu yaʼ.
4 ¡Guizáʼ nga rusiecheʼ laanu ca dxandíʼ ni rusiidiʼ Jiobá ne ni racané laanu ca, ne maʼ gadxepeʼ cani que cani rusiidiʼ ca relijión ni cadi dxandíʼ ca ne qué liica racané cani binni! (Isa. 65:13, 14.) Ti modo zanda gudiʼnu xquíxepeʼ Jiobá nga gúʼyanu ca guendaridagulisaa ca casi ra rusiidibe laanu (Col. 3:15). Ucaadiagachaahuinu cani cayeeteʼ lu ca libana ca ne gúʼyanu cani casi ni zeeda de Jiobá, cadi de ni cudii libana ca (Isa. 30:20, 21; 54:13). Ucaadiagachaahuinu, ucaanu cani jma zaquiiñeʼ ne ora ibiguétanu gúʼndanu cani jma bieeteʼ. De racá la? gúninu cani bizíʼdinu.
5. Xi pur ndiʼ rusiecheʼ ca guendaridagulisaa de chonna gubidxa ca laanu.
5 Guiráʼ ca guendaridagulisaa roʼ ni gúninu ante gueeda Armajedón —pa nácani ra nucaachilúcabe, ra cadinde guidxi, o ra nuudxícabe ne nuu stale binni— la? laacani culuíʼ cani de que cayuni ganarnu Binidxabaʼ. Cumu guiranu nuunu tobi si la? nga runi nabé risaca para laanu chuunu guiráʼ ca guendaridagulisaa de chonna gubidxa ca (Eze. 36:38). Nannadxíchinu de que, pur guendarannaxhii stiʼ Jiobá la? zudiibe ni «go [...] [no] xhiora» (Luc. 12:42).
[Box on page 4]
Guluinu de que rusisácanu mexaʼ stiʼ Jiobá
◼ Ucaadiagachaahuinu
◼ Ucaʼnu cani jma zaquiiñeʼ
◼ Gúʼndanu ora ibiguétanu cani jma bieeteʼ
◼ Gúninu cani bizíʼdinu