Gaca xpiaʼnu nayaguieʼ lu guiráʼ ni gúninu
1. Xiñee nga risaca gaca xpiaʼnu nayaguieʼ lu guiráʼ ni rúninu.
1 Laanu, ca xpinni Jiobá, Dios ni nayá ca la? rúninu stipa pur gácanu nayaguieʼ lu guiráʼ cani rúninu (1 Ped. 1:15, 16). Ndiʼ riníʼ de que rúninu stipa pur guzuubanu stiidxaʼ Jiobá lu guiráʼ ni gúninu. Lu guendaridagulisaa de chonna gubidxa ni chigaca iza riʼ, zanda guluinu de que nayá xpiaʼnu.
2. Ximodo zanda guluinu de que galán xpiaʼnu ndaaniʼ ca hotel ca yaʼ.
2 Ndaaniʼ hotel. Ti hombre ni runi tender ndaaniʼ ti hotel ra biaana caadxi ni guyé guendaridagulisaa roʼ udubiza guníʼ sicaríʼ: «Nayéchepeʼ nga nuudu biaana ca testigu stiʼ Jiobá raríʼ [...]. Binni zacá nga riuuláʼdxidu guiaanacaʼ raríʼ». Ni zanda gacané laanu gaca xpiaʼnu nayaguieʼ nga guietenaláʼdxinu cani zeeda raríʼ: 1) Cadi inábanu stale cuartu ndaaniʼ ca hotel ca pa qué zaquiiñenu guiráʼ cani ne cadi uguunu jma binni biaʼ maʼ naguíxhecabe; 2) pa maʼ qué ziaananu ndaaniʼ ni la? gábinu laacabe dede ante; 3) iquiiñenu ca carruhuiiniʼ ra riné binni maleta stiʼ biaʼ hora si caquiiñenu ni; 4) cadi gúninu guendaró ndaaniʼ ca cuartu stini pa zacá nácabe; 5) guiráʼ dxi gusaananu saca nagaʼndaʼ stiʼ ni cayuni dxiiñaʼ ra nuunu; 6) cadi icaanu stale endaréʼ, café o hielu ni rusigáʼdecabe para iquiiñeʼ ca biuuzaʼ laga nuuca ndaaniʼ hotel ca, 7) ne gusihuínninu ca guenda ni rudii espiritu santu (frutos del espíritu santo) ora inínenu cani runi dxiiñaʼ ndaaniʼ cani, ne jmaruʼ si ora nápacabe stale dxiiñaʼ casi ora maʼ cucaacabe (x)lá cani chiguiuu o cani chiguiree ndaaniʼ ca hotel ca (Gal. 5:22, 23).
3. Xi zaníʼ binni de ca Testigu ni nahuiiniʼ ca pa gaca xpiaʼcaʼ nayá.
3 Zaníʼcabe galán de laanu pa gápanu respetu binni. Iza gudiʼdiʼ ca, ti hombrehuiiniʼ Testigu gunábabe caadxi guiʼchiʼ para carta ti baʼdudxaapaʼ ni ridxagalú binni ndaaniʼ ti hotel, bíʼnibe ni ne stale respetu ne óraque bidiibe xquíxepeʼ laa. Bidxagayaa baʼdudxaapaʼ que ni bíʼnibe ne bicaani laa guníʼ sicaríʼ: «Maʼ qué rihuínnipeʼ hombrehuiiniʼ nachaʼhuiʼ [casi laabe]». Peru nuu lugar huayuuyacabe maʼ canaxuubaʼ cani nahuiiniʼ ca ne iruti tu cayapa laacaʼ, maʼ canachítecaʼ ndaaniʼ elebador, maʼ caniʼcaʼ nadipaʼ o maʼ canaguxooñecaʼ ra ridiʼdiʼ binni. Bixhózecabe ne jñácabe qué riquiiñeʼ diʼ gudiicaʼ lugar chécabe guiráʼ ladu, sínuque laacaʼ nga naquiiñeʼ gápacaʼ laacabe ti guisaca Jiobá pur modo xpiáʼcabe (Pro. 29:15).
4. Ximodo zanda guluinu de que runi respetarnu binni ora chuunu ndaaniʼ ti restaurán.
4 Ndaaniʼ ca restaurán ca. Ti hombre ni runi dxiiñaʼ ndaaniʼ ti restaurán ni nuu gaxha de ra guca tobi de ca guendaridagulisaa roʼ stinu guníʼ: «Ca Testigu ca nabé gadxé laacaʼ. Runi respetárcabe binni». Zuluinu de que galán xpiaʼnu pa cadi uxídxinu nadipaʼ purtiʼ zándaca uchiichinu binni. Laaca naquiiñeʼ guietenaláʼdxinu de que nuu lugar napa xidé guiaana saca nagaʼndaʼ biaʼ 10% o 15%, biaʼ dxiiñaʼ ni gúnicabe. Neca ora cayoʼno o cayeʼnu la? rúninu cani para usisácanu Dios (1 Cor. 10:31).
5. Ximodo zuluinu galán xpiaʼnu ra guendaridagulisaa roʼ ca yaʼ.
5 Ra guendaridagulisaa roʼ. Jma nga riquiiñeʼ guluinu de que galán xpiaʼnu ra cayaca guendaridagulisaa roʼ ca. Guzuubanu stiidxaʼ ca bíchinu ni nuucaʼ para idxagalucaʼ laanu (acomodador) cásica ra chitinu ne zaqueca ra ruzuhuaa carru (Heb. 13:17). Naquiiñeʼ cuínenu binnilídxinu, ne cadi gudiʼnu lugar ca xiiñinu chitínecaʼ xcaadxi biaʼca laacaʼ neca maʼ huanisihuiinicabe. Qué zanda diʼ gucaanu nin ti clase grabadora lu biaaniʼ ni nuu raqué o ra nuu aparatu stiʼ sonidu, peru zanda iquiiñenu cani pa guyúbinu modo cadi uchiiñanu cani cucaadiaga. Pa nuuluʼ cueeluʼ foto la? cadi iquiiñeluʼ cámara ni ribee biaaniʼ. Dede ante naquiiñeʼ guyúbitu ximodo iquiiñeʼ ca aparatu ra riníʼnecabe binni ne ca selular ca, ti cadi guchiiñaʼ cani stuudxi. Pa guʼyatu tuuxa izaaca xiixa ra guendaaridagulisaa roʼ ca, cadi iniʼtu ra hospital, sínuque lagabi ni ti bíchinu ni ridxagalú laanu o laché Ra Raca Tender cani Izaaca Xiixa (Departamento de Primeros Auxilios).
6. Ximodo rusisaca xpiaʼnu Dios lu ca guendaridagulisaa roʼ ca yaʼ.
6 Gaca xpiaʼnu galán la? runi ni laanu gadxepeʼ de binni guidxilayú ne rusisácani Dios (1 Ped. 2:12). Guiráʼ xixé ni rúninu ra guendaridagulisaa roʼ ca ruuyaʼ binni cani. Nga runi, quixhe íquenu gaca xpiaʼnu nayaguieʼ lu guiráʼ ni gúninu.
[Box on page 5]
Gusihuínninu nayaguieʼ xpiaʼnu
◼ Gúninu guiráʼ ni maʼ nexheʼ gaca ndaaniʼ ti hotel
◼ Gápanu ca xiiñinu
◼ Guni respetarnu binni