«Lasá jneza lade cani qué runi cre Dios»

1. Xiñee nabé risaca sanu jneza ora chuunu guendaridagulisaa de chonna gubidxa ne ra rié stale guidxi roʼ.

¹ Cumu guiráʼ iza rápanu guendaridagulisaa de chonna gubidxa la? nabé ruuyadxí binni laanu ora maʼ ziuunu cani, nga runi risaca nga gusihuínninu lu guiráʼ cani gúninu ximodo nga Dios ni cayuni adorarnu (1 Ped. 1:15, 16). Pur respetu gápanu binni ne pur modo guzuchaahuinu zudii binni cuenta dxandíʼ xpinni Cristu laanu. Ora chuunu guendaridagulisaa roʼ ne guendaridagulisaa ra rié stale guidxi roʼ, ximodo zanda sanu «jneza lade cani qué runi cre Dios» ti gusisácanu Bixhózenu ni nuu guibáʼ yaʼ (1 Ped. 2:12).

2. Pora zanda gusihuínninu xpinni Cristu laanu ca dxi gápanu guendaridagulisaa de chonna gubidxa.

² Gusihuínninu xpinni Cristu laanu. Cumu nadxiisaanu ne galán modo ridxaagalunu «cani qué runi cre» Dios la? rusihuínninu gadxé laanu de binni guidxilayú (Col. 3:10; 4:5; 2 Tim. 3:1-5). Nga runi nabé risaca gácanu nachaʼhuiʼ ne gápanu paciencia cani runi dxiiñaʼ ndaaniʼ ca hotel ne ca restaurán, dede né ora gúnicabe xiixa ni qué chuuláʼdxinu. Laaca galán gusaananu saca nagaʼndaʼ pa maʼ biaacabe gúnicabe ni.

3. Xi cadi naquiiñeʼ guiaandaʼ cani napa xiiñiʼ, ne xiñee.

³ Cani napa xiiñiʼ naquiiñeʼ gápacaʼ laacabe ora maʼ nuucabe lu guendaridagulisaa ca, ndaaniʼ restaurán ne ndaaniʼ hotel (Prov. 29:15). Sicaríʼ gudxi ti gunaa ni naca gerente ndaaniʼ ti hotel ni napa restaurán ti guendaxheelaʼ: «Guizáʼ riuuláʼdxidu gueeda ganna ca Testigu laadu. Nabé runi respetar xiiñitu binni. Guiráʼ ca binni runi dxiiñaʼ raríʼ galán ni riniʼcaʼ de laatu ne ñuuláʼdxidu ñeedatu guiráʼ sábadu ne domingu».

4. Ora maʼ nuunu ndaaniʼ guidxi cayaca guendaridagulisaa roʼ ca, ximodo naquiiñeʼ gácunu lari.

⁴ Gácunu lari jneza. Naquiiñeʼ gácunu lari jneza ora chuunu guendaridagulisaa roʼ, ne cadi chinándanu moda stiʼ binni guidxilayú (1 Tim. 2:9). Laaca cadi naquiiñeʼ gácunu lari modo tiica si casi ora zinándanu cani caree de moda ora chindanu ndaaniʼ xiixa hotel ne últimu dxi guireʼnu ndaaniʼ ni ne ora chuunu paxaraa ante ne despué de guiluxe cada dxi stiʼ guendaridagulisaa roʼ. Pa gúninu zacá la? ziéchenu sánenu tarjeta ni ricá ladxidoʼno ne qué zatuí diʼ lunu guinínenu binni de stiidxaʼ Dios ora gúʼyanu zanda gúninu ni. Pa gácunu lari jneza ne sanu jneza ora chuunu guendaridagulisaa roʼ ne ra rié stale guidxi roʼ la? qué zacanésinu binni ni nayá ladxidóʼ chuulaʼdxiʼ gucaadiaga stiidxaʼ Dios, sínuque laaca zusiéchenu Jiobá (Sof. 3: 17).

Cani naquiiñeʼ guietenaláʼdxinu ante gápanu guendaridagulisaa de chonna gubidxa stiʼ iza 2014

◼ Pora guzulú ni. Guionnaʼ gubidxa ca zuzulú ni a las 9:20 siadóʼ. Puertaʼ stiʼ lugar ca zaxeleʼ a las 8.00. Ora guzulú xhidxi saa stiʼ Reinu guiranu maʼ naquiiñeʼ cuinu lugar stinu ti ganda guzulú ni modo naquiiñeʼ gaca ni. Viernes ne sábadu zaluxe ni a las 4:55 huadxí, ne domingu zaluxe ni a las 3:50.

◼ Guendaridagulisaa stiʼ caadxi guidxi roʼ. Nuu caadxi lugar ra zaca caadxi guendaridagulisaa stiʼ caadxi guidxi roʼ. Naquiiñeʼ gánnanu maca nexheʼ gunáʼ nga ca neza binni ridagulisaa ni cheʼ ne gunáʼ nga ca binni de sti guidxi ni cheʼ, purtiʼ maʼ biiyacabe panda banguʼ nga zaquiiñeʼ, pabiáʼ lugar zaquiiñeʼ para guzuhuaa carru ne panda cuartu zaquiiñeʼ ndaaniʼ ca hotel ca. Peru pa cheʼ cani qué ñaca invitar la? ziuu stale binni ni qué zadxelaʼ lugar. Pa qué zanda cheluʼ ra raca caber lii zanda cheluʼ stiʼ guendaridagulisaa, peru cadi naquiiñeʼ diʼ cheluʼ ra chigaca ti guendaridagulisaa stiʼ caadxi guidxi roʼ.

◼ Ra ruzuhuaa carru. Nuu lugar qué ziaxa diʼ ra guzuhuaa carru stitu ne ziuu tu gabi laatu paraa guzuhuatu ni. Cumu cadi xiroobaʼ lugar ra ruzuhuaa ca carru ca la? galán gúʼyatu pa zanda chetu ndaaniʼ ti carru si. Ca carru ni napa si placa o letreru ni gusihuinni necaʼ binni huará nga cani zanda guzuhuaacabe ra maca biaana para laacani.

◼ Ora cueenu lugar. Ora guixeleʼ puertaʼ stiʼ lugar ca guiráʼ siadóʼ, cadi guxooñetu para chindeetu lugar casi ñaca nuutu guni ganartu xcaadxi. Naquiiñeʼ gusihuínninu jma rizaaláʼdxinu xcaadxi purtiʼ zacá zuuyaʼ binni dxandíʼ xpinni Cristu laanu ne zucaa nga laacaʼ gusisácacaʼ Dios (Juan 13:34, 35; 1 Cor. 13:4, 5; 1 Ped. 2:12). Zanda cueeluʼ lugar para ca binnilídxiluʼ, cani zineluʼ ndaaniʼ carru o para cani cayuundaneluʼ Biblia. Laaca ziuu caadxi lugar para cuiʼ ca binnigola ne ca binni huará. Cumu huaxiéʼ ca lugar riʼ la? cani zanda si cuiné laacabe nga cani chigapa laacabe.

◼ Guendaró. Jma galán chinetu guendaró ti cadi guireetu chisitu ni galaa dxi ora riziiláʼdxinu. Zanda chinetu ra chuʼ guendaró stitu, peru gaca ni biaʼ ganda chuʼ xaʼnaʼ banguʼ. Cadi chinetu xiixa traste naroʼbaʼ nin xiixa de vidriu.

◼ Bueltu rudiʼnu. Zanda guluinu dxandíʼ riuuláʼdxinu gaca ca guendaridagulisaa ca ra gudiʼnu bueltu para dxiiñaʼ raca lu guidubi naca Guidxilayú dxi cayaca guendaridagulisaa ca. Pa chuʼ tu gudii cheque ra cayaca guendaridagulisaa riʼ riquiiñeʼ guicá ni lu lá «La Torre del Vigía, A.R.». Laaca zanda gudiiluʼ ni ne tarjeta de crédito o débito.

◼ Medicina. Pa cayeʼluʼ medicina la? galán chineluʼ cani, purtiʼ qué gápacabe ca medicina ni bidii doctor stiluʼ lii lugar ra ridagulisaanu ca. Aguxaʼ ne jeringa ni iquiiñeʼ binni napa dxiña la? cadi naquiiñeʼ cúʼcabe cani ndaaniʼ intiica si bote guixi nuu lugar chigaca guendaridagulisaa ca nin ni nuu ndaaniʼ ca hotel ca, napa xidé gúʼyacabe paraa naquiiñeʼ cúʼcabe cani.

◼ Para cadi guizaacanu xiixa. Naquiiñeʼ gápanu laanu para cadi guirenda ñeenu o guiábanu. Guiráʼ iza racaná ñee stale binni pur ni rucaa ñeecaʼ, ne jmaruʼ si pur ca tacón soo. Nga runi, galán gucaañee binni zapatu o guelaguidi ni cadi guniná ñee ti ganda quibaʼ lu escalera, rampa o saʼ lu ca neza ra nexheʼ rejahuiini.

◼ Binni ni qué runadiaga chaahuiʼ. Zanda gucaadiágacabe guendaridagulisaa ca lu radiu (FM). Peru chinécabe ti radiu ni riquiiñeʼ bateriá ne napa audífono.

◼ Carriola ne banguʼ ni ridopa. Cadi naquiiñeʼ chinetu cani ra chigaca guendaridagulisaa ca. Peru zanda chiné binni xiixa ra cuí ca baʼduhuiiniʼ ca pa zanda guzuhuaa ni ne guiliibi ni lu ti banguʼ.

◼ Nisa rindáʼ naxhi. Stale ra raca ca guendaridagulisaa riʼ daʼguʼ cani purtiʼ nápacani modo gusigaandacani lugar ca. Cumu daʼguʼ cani la? cadi galán diʼ guidxanu stale nisa rindáʼ naxhi, purtiʼ zándaca guchiiñani cani napa xiixa guendahuará (1 Cor. 10:24).

◼ Guiʼchiʼ ni láʼ Sírvase visitar (S-43-S). Lu guiʼchiʼ ni láʼ Sírvase visitar zanda gucaatu lá tuuxa binni ni chuulaʼdxiʼ guiziidiʼ de Stiidxaʼ Dios ora guiníʼnetu laa ra tiica nuutu. Ne zanda chisaanatu ni ra Departamento de Publicaciones, o gudiitu ni secretariu stitu guibiguétasitu de guendaridagulisaa roʼ.

◼ Restaurán. Zusisácanu lá Jiobá pa gápanu xpiaʼnu ora maʼ nuunu ndaaniʼ ti restaurán. Nga runi galán gácunu lari jneza casi racu ti xpinni Cristu. Pa maʼ biaacabe gusaanacabe saca nagaʼndaʼ ca lugar ca la? laguni ni.

◼ Hotel:

Cadi guinábaluʼ cuartu ni qué zaquiiñeluʼ ndaaniʼ ca hotel ca ne cadi uguuluʼ jma binni de biaʼ naguíxhecabe chuʼ ndaaniʼ cani.
Pa gueeda guizaacaluʼ xiixa ne maʼ qué zanda guiaanaluʼ ndaaniʼ hotel ca la? guniʼné laacabe nagueendaca ti ganda iquiiñeʼ sti binni cuartu ca (Mat. 5:37). Ne bicaa númeru ni gudiicabe lii ora guni cancelarluʼ ni. Pa guni cancelarluʼ cuartu ca chupa gubidxa ante la? maʼ qué zudxiguetaʼ diʼ hotel ca xpuéltuluʼ.
Bietenalaʼdxiʼ, pa iquiiñeluʼ ti tarjeta de crédito o de débito ora guicá laluʼ para guiaanaluʼ ndaaniʼ hotel ca, zándaca ziaananécabe sti ndaa xpuéltuluʼ, jma que biaʼ naquiiñeʼ quíxeluʼ cuartu ca, para guiaxa xiixa ni málasi gueeda guizaaca ca dxi nuuluʼ ndaaniʼ ni. Ne tiidiʼ si chupa chonna gubidxa de biʼniʼ hotel ca cuenta stiluʼ maʼ zanda gudxiguétacabe xpuéltuluʼ.
Ne ora maʼ nuu ca maleta stiluʼ listu nga maʼ zanda chicaaluʼ carruhuiiniʼ ra riné binni maleta stiʼ ne bidxiguetaʼ ni nagueenda para iquiiñeʼ stobi ni.
Bisaana saca nagaʼndaʼ stiʼ ca binni ni gacané lii né ca maleta stiluʼ ne zacaca biʼniʼ né cani gusiá ndaaniʼ xcuártuluʼ.
Cadi guʼnuʼ guendaró ndaaniʼ ca cuartu stini pa qué rinácabe.
Cadi chineluʼ ra guendaridagulisaa ca cani rudiicabe ra hotel casi guendaréʼ, café o hielu ni rudiicabe ca biuuzaʼ laga nuucaʼ ndaaniʼ hotel ca.
Bisihuinni nápaluʼ ca guenda ni rudii espíritu santu guiráʼ ora guiníʼneluʼ cani runi dxiiñaʼ ndaaniʼ hotel ca. Bietenalaʼdxiʼ, stale binni nga runi tendércabe, nga runi ziuuláʼdxicabe gácanu nachaʼhuiʼ, nadóʼ ne gusihuínninu nápanu paciencia.
Nabé risaca nga gapa binni xiiñiʼ ora maʼ nuucaʼ ndaaniʼ hotel, ora iquiiñecaʼ elevador, ora chuʼcaʼ ndaaniʼ alberca, ora maʼ nuucaʼ ra ridxaagalúcabe binni ndaaniʼ hotel ne ora maʼ nuucaʼ ndaaniʼ gimnasio.
Biaʼ cá lu guiʼchiʼ ni láʼ Lista de hoteles recomendados ca nga naquiiñeʼ quíxeluʼ cada dxi, peru aparte nga impuestu stini. Peru pa gábicabe lii quíxeluʼ jma de biaʼ biree cuenta stiluʼ la? cadi quíxeluʼ ni ne nagueendaca gudxi ni Cani Ruyubi ra Guiaana Binni ni cheʼ guendaridagulisaa.
Pa gápaluʼ xiixa guendanagana né hotel ca pur cuartu stiluʼ, guniʼné Cani Ruyubi ra Guiaana Binni laga cayácaruʼ guendaridagulisaa ca.

◼ Para cani racalaʼdxiʼ gacané. Guiráʼ cani rapa gana gacané la? naquiiñeʼ checaʼ ra ricá lá cani racalaʼdxiʼ gacané. Cani caʼruʼ gusaa 16 iza laaca zanda gacanecaʼ, peru naquiiñeʼ guʼyaʼ bixhózecaʼ, jñaacaʼ o sti binni huaniisi ni guiníʼcabe zanda gapa laacaʼ.