Ca guendaridagulisaa roʼ ca racanécani binni gusisaca Jiobá
1. Xi bicaa ca guendaridagulisaa ni gupa ca israelita que laacaʼ guiníʼ íquecaʼ.
1 Dxiqué bidagulisaa ca israelita chonna biaje lu ti iza para gúnicaʼ saa ra rusisácacaʼ Jiobá. Neca hombre si nga naquiiñeʼ cheʼ, peru stale biaje rinécabe binnilídxicabe Jerusalén para chúʼnecaʼ laacabe lu ca saa que (Deu. 16:15, 16). Ca guendaridagulisaa roʼ que gucanécani laacabe guiníʼ íquecabe ni huasiidiʼ Dios laacabe. Casi xi yaʼ. Casi pabiáʼ nadxii Jiobá laacabe ne rudii laacabe guiráʼ ni caquiiñecabe (Deu. 15:4, 5). Laaca zanda guni crécabe zuluíʼ Jiobá laacabe xii nga ni jma jneza gúnicabe ne zapa laacabe (Deu. 32:9, 10). Ca israelita que laaca napa xidé gusihuínnicaʼ rúnicaʼ ni jneza purtiʼ gulí Dios laacaʼ para gueeda gácacaʼ xquidxi (Deu. 7:6, 11). Lu ca guendaridagulisaa de chonna gubidxa ni raca yanna, laaca zanda gúninu zacaca.
2. Ximodo racané guendaridagulisaa roʼ laanu guiene chaahuinu cani rusiidiʼ Dios.
2 Ni ridiʼdiʼ lúcani racanécani laanu guiénenu ni rusiidiʼ Dios laanu. Nabé riuuláʼdxinu gucaadiáganu ca libana ne ca drama ni ridiʼdiʼ lu ca guendaridagulisaa de chonna gubidxa. Laaca riuuláʼdxinu guidúʼyanu ca demostración ne ora ridiʼdiʼ ca xpinni Cristu ne riniʼcaʼ ni bizaacacaʼ, purtiʼ racanécani laanu guiene chaahuinu cani rusiidiʼ Biblia laanu (Juan 17:17). Xquidxi Jiobá cayuni stale dxiiñaʼ para ganda gacanecaʼ guiráʼ binni ni nuu lu Guidxilayú riʼ ti guiziidicaʼ de Dios (Mat. 24:45-47). Ñee cadi dxandíʼ nabé riéchenu ora guiníʼ íquenu guiráʼ ni chiguizíʼdinu la?
3. Ximodo zanda cueendunu stale cosa galán lu guendaridagulisaa roʼ.
3 Ximodo zanda cueendunu stale cosa galán lu guendaridagulisaa roʼ ca yaʼ. Caquiiñeʼ chuunu guionnaʼ gubidxa ca ne gucaadiaga chaahuinu cani chiguieeteʼ luni. Cadi guiaandaʼ lii guiníʼneluʼ patrón stiluʼ dede ante, ti gudii lugar cheluʼ. Biʼniʼ stipa pur guiziiláʼdxiluʼ ti cadi gásiluʼ ora maʼ cadiʼdiʼ ca libana ca. Nuu tu laa riguixhe ique guyadxí binni ni cudii libana ca ne gucaa ni guiniʼbe. Cadi gudiiluʼ lugar xhidxi teléfono stiluʼ o xcaadxi aparatu casi laani para cadi guchiiñani lii o xcaadxi binni. Biʼniʼ stipa pur cadi güiluʼ diidxaʼ, guseendaluʼ mensaje lu celular stiluʼ, goloʼ xiixa o gueluʼ nagaʼndaʼ laga cayaca guendaridagulisaa ca.
4. Ximodo zanda gacané binni ca xiiñiʼ ti cueenducaʼ ni galán lu guendaridagulisaa roʼ.
4 Cada gadxe iza beeda gácani ti sábadu para ca israelita que, ne bidagulisaacabe para gucaadiágacabe Ley stiʼ Dios lu saa ra rucuícabe ranchuhuiiniʼ. Raqué guyé stale familia dede né «cani nahuiiniʼ» para gucaadiágacaʼ ne guiziidicaʼ de Dios (Deu. 31:12). Ca dxi stinu riʼ laaca nabé galán rihuinni ora maʼ zuba guidubi ti familia maʼ cucaadiaga ca libana ni ridiʼdiʼ lu ca guendaridagulisaa roʼ ne zaqueca ora qué rudiicabe lugar gasi ca xiiñicabe, sínuque maʼ cucaadiágacaʼ. Galán gúʼyatu cani bicaatu cada guibiguétatu ne guiniʼtu cani zanda iquiiñetu. Stiidxaʼ Dios na «guendahuati ca nuuni ndaaniʼ ladxidóʼ hombrehuiiniʼ», nga runi cadi naquiiñeʼ gudii binni lugar guni xiiñiʼ ni gacalaʼdxiʼ. Jma galán chuʼtu cuidadu laacabe, dede né ca xiiñitu ni maʼ ziniisi, ora guiluxe primé ndaa stiʼ siadóʼ ne ora maʼ nuutu ndaaniʼ hotel ra cayaanatu (Pro. 22:15; 29:15).
5. Ximodo rusisaca binni ni cazíʼdinu ora gaca xpiaʼnu galán.
5 Ora rúninu ni jneza rusisaca binni ni cazíʼdinu. Pa gaca xpiaʼnu galán ndaaniʼ guidxi ra chigápanu guendaridagulisaa roʼ, zuuyaʼ binni pabiáʼ sicarú guiráʼ ni rusiidiʼ Dios laanu (Tito 2:10). Cani runi dxiiñaʼ ndaaniʼ ca hotel ca riuuláʼdxicaʼ guni tendercaʼ binni ni qué ridxiichi nagueenda, cani nachaʼhuiʼ ne cani racané (Col. 4:6). Udubiza caadxi xpinni Cristu ni runi dxiiñaʼ ndaaniʼ tobi de ca yoo Betel biʼniʼ contratarcaʼ ti hotel ni maca biquiiñecaʼ. Gunaa ni ruuyaʼ gaca dxiiñaʼ raqué guníʼ: «Nabé riuuláʼdxidu guiaana ca testigu stiʼ Jiobá ndaaniʼ hotel stidu purtiʼ nacháʼhuicaʼ. Ne laaca runi respetárcabe ca binni ni runi dxiiñaʼ raríʼ ne rápacabe ra riaanacabe».
6. Ximodo zanda gacanenu gusisaca binni Dios lugar ra chigaca guendaridagulisaa roʼ.
6 Tarjeta ni ricá ladxidoʼno riquiiñeni para ganna xcaadxi xpinni Cristu tu laanu ne rusihuínnini paraa ziuunu, peru laaca racaneni guinínenu xcaadxi binni de Dios. Ne zudiicaʼ cuenta rácunu lari jneza ne rúninu stipa pur cadi gácunu lari ni gucaa binni guyadxí laanu o casi racu ca binni ni qué runibiáʼ Dios (1 Tim. 2:9, 10). Nga runi, naquiiñeʼ chuʼnu cuidadu modo rácunu lari ora maʼ nuunu ndaaniʼ guidxi ra cayaca guendaridagulisaa ca, dede né ora chigucaʼnu lanu para guiaananu ndaaniʼ ti hotel. Pa tuuxa gacuʼ short ne playera ora chindá hotel ra chiguiaana, qué zusisaca Jiobá. Neca gaca guendaridagulisaa ca ndaaniʼ ti estadiu ni zuxaleʼ ique naquiiñeʼ gácunu lari jneza. Pa guchaʼnu lari despué de guendaridagulisaa para chidoʼno paxaraa, cadi naquiiñeʼ guiaandaʼ laanu paraa guyuunu ne cadi naquiiñeʼ gácunu lari ni racu binni ora maʼ zizá paxaraa.
7. Ximodo zanda guidxaaganu xcaadxi xpinni Cristu lu guendaridagulisaa roʼ.
7 Lu ca saa ni gupa ca israelita que nabé biéchecaʼ ora bidagulisaacaʼ purtiʼ bidxaagacaʼ xcaadxi bíʼchicaʼ ne bizánacaʼ ni nabeza ndaaniʼ xquídxicaʼ ne cani zeeda sti ladu, ngue runi guyuucaʼ tobi si (Hech. 2:1, 5). Lu ca guendaridagulisaa de chonna gubidxa ni raca yanna ruuyaʼ binni pabiáʼ nadxiisaa ca xpinni Cristu. Nabé ridxagayaa stale binni ora guʼyaʼ modo ridxaaganu, purtiʼ casi ñaca nabézanu ndaaniʼ ti paraísu (Sal. 133:1). Ne racaneni laanu para gunibiaʼnu xcaadxi xpinni Cristu ne güínenu laacaʼ ora guidoʼno gueta lugar de guireʼnu fuera chisinu ni guidoʼno.
8. Pa zanda gacanenu lu ca guendaridagulisaa roʼ, xi razón nápanu para gúninu ni.
8 Nabé ridxagayaa stale binni ora gúʼyacaʼ pabiáʼ jneza raca ca guendaridagulisaa roʼ stinu, jmaruʼ si ora gánnacaʼ qué riaxa cani cayuni dxiiñaʼ raqué. Ñee zanda gacaneluʼ «né stale gana» lu xiixa dxiiñaʼ ni raca lu ca guendaridagulisaa ca la? (Sal. 110:3.) Stale xpinni Cristu rinábacaʼ guninecaʼ xiiñicaʼ xiixa dxiiñaʼ ti gusiidicaʼ laacabe modo gacanécabe. Pa gacaneluʼ lu xiixa dxiiñaʼ ni raca lu ca guendaridagulisaa roʼ ca zanda gacaneni lii guidxeʼluʼ tu gaca xhamíguluʼ, jmaruʼ si pa natuíluluʼ. Ti gunaa Testigu guníʼ: «Cani runebiayasiaʼ dxi guyaaʼ ti guendaridagulisaa nga ca binnilidxeʼ ne chupa chonna xhamiguaʼ. Peru despué de gunabaʼ gacaniáʼ guiá la? binebiaʼyaʼ stale xpinni Cristu. ¡Aque nayecheʼ guyuaaʼ!». Zanda gunibiaʼnu jma xpinni Cristu ni gaca xhamígunu pa guyúbinu gacanenu lu ca guendaridagulisaa roʼ (2 Cor. 6:12, 13). Pa qué huayuu dxi gacaneluʼ lu ca guendaridagulisaa roʼ, gunabadiidxaʼ ca binnigola xi caquiiñeʼ gúniluʼ para gacaneluʼ.
9. Xi zúninu para guni invitarnu xcaadxi binni cheʼ guendaridagulisaa roʼ stinu.
9 Biʼniʼ invitar xcaadxi gucaadiaga ni cazíʼdinu. Cásica huayaca xcaadxi iza, chonna semana ante gápanu guendaridagulisaa roʼ stinu zuni invitarnu binni. Ca neza binni ridagulisaa zúnicaʼ stipa pur quíʼzicaʼ invitación guiráʼ ra rucheechecaʼ diidxaʼ (biiyaʼ cuadru ra na «Ximodo zanda quíʼzinu invitación»). Ca invitación ni guiaana naquiiñeʼ chinenu cani ra chigápanu guendaridagulisaa roʼ stinu, ti iquiiñeʼ xcaadxi bíʼchinu ne bizánanu cani para gucheechecaʼ diidxaʼ ratiica checaʼ.
10. Guníʼ chupa ejemplu ni rusihuinni xi ribeendú binni ora riguiiziʼ invitación.
10 Xi ribeendunu ora runi invitarnu binni. Guzéʼtenu chupa ejemplu. Tobi de ca xpinni Cristu ni ridxaagalú laanu lu ca guendaridagulisaa roʼ ni rápanu biyúbibe chupa lugar para ti guendaxheelaʼ. Laacabe gúdxicabe laabe gucuaacabe ti invitación ne biquiinde laacabe gánnacabe xi chiguieeteʼ raqué. Gupa xidé bíʼnicabe ti viaje de 300 kilómetru lu carru stícabe para yendácabe. Sti ejemplu ni nápanu nga stiʼ ti gunaa Testigu, ora canagucheeche diidxaʼ bidii ti invitación ti hombre. Cumu gucalaʼdxiʼ hombre que ñánnaruʼ jma la? gupa xidé bisiénebe ni zeeda lu guiʼchiʼ que. Despué biiyabe hombre que lu guendaridagulisaa que ne ti xhamigu, ne zinécabe tobi de ca guiʼchiʼ nacubi biree luni.
11. Xiñee nabé risaca cadi guiáʼdxanu guionnaʼ gubidxa stiʼ guendaridagulisaa roʼ ni rápanu cada iza.
11 Ca saa ni biʼniʼ ca israelita que guca cani para gusisaca cani Jiobá ne gucanécani laacabe gúnicabe ni nabe sin gucheecabe (Jos. 24:14). Ca dxi stinu riʼ, ca guendaridagulisaa de chonna gubidxa ni rápanu racanécani laanu gusihuínninu cayúninu ni na Jiobá ne ora riuunu cani laaca rusihuínninu cayuni adorarnu laabe (3 Juan 3). Ribézadu cuʼ Jiobá ndaayaʼ cani runi stipa pur cadi guiaadxaʼ guionnaʼ gubidxa stiʼ guendaridagulisaa roʼ ni rápanu cada iza ne rúnicaʼ stipa pur quixhe íquecaʼ gucaadiágacaʼ cani guieeteʼ luni.
[Ni caníʼ yaza 4]
Rusisaca binni ni cazíʼdinu ora gaca xpiaʼnu galán ndaaniʼ guidxi ra chigápanu guendaridagulisaa roʼ
[Ni caníʼ yaza 5]
Zuni invitarnu binni chonna semana ante gápanu guendaridagulisaa roʼ stinu
[Cuadru ni zeeda lu yaza 3-6]
Cani naquiiñeʼ guietenaláʼdxinu ante gápanu guendaridagulisaa de chonna gubidxa stiʼ iza 2012
◼ Pora guzulú ni. Guionnaʼ gubidxa ca zuzulú ni a las 9.20 siadóʼ. Puertaʼ stiʼ lugar ca zaxeleʼ a las 8.00. Ora guzulú xhidxi saa stiʼ Reinu guiranu maʼ naquiiñeʼ cuinu lugar stinu ti ganda guzulú ni modo naquiiñeʼ gaca ni. Viernes ne sábadu zaluxe ni a las 4.55 huadxí, ne domingu zaluxe ni a las 3.40.
◼ Ra ruzuhuaa carru. Nuu lugar qué ziaxa diʼ ra guzuhuaa carru stinu ne ziuu tu gabi laanu paraa guzuhuaʼnu ni. Cani huará si nga zanda guzuhuaacaʼ xcárrucaʼ ra maca dieʼ para laacaʼ, pa nápacaʼ guiʼchiʼ ni caquiiñeʼ para chuʼcaʼ raqué. Cumu nahuiiniʼ ca lugar ra ruzuhuaa ca carru ca la? galán gúʼyatu pa zanda chetu ndaaniʼ ti carru si.
◼ Ora cueenu lugar. Zanda cueeluʼ lugar para ca binnilídxiluʼ, cani zineluʼ ndaaniʼ carru o para cani cayuundaneluʼ Biblia (1 Cor. 13:5).
◼ Guendaró. Jma galán chineluʼ guendaró ti cadi guireeluʼ chisiluʼ ni galaa dxi ora riziiláʼdxinu. Zanda chineluʼ ra chuʼ guendaró stiluʼ, peru gácani nahuiiniʼ biaʼ ganda chuʼ xaʼnaʼ banguʼ. Cadi naquiiñeʼ diʼ chinenu xiixa traste naroʼbaʼ ra chuʼ guendaró lugar ra chigaca guendaridagulisaa ca nin xiixa de vidriu.
◼ Bueltu rudiʼnu. Zanda guluinu dxandíʼ riuuláʼdxinu gaca ca guendaridagulisaa ni zeeda gaca casi ti saa para laanu, ra gudiʼnu bueltu para dxiiñaʼ raca lu guidubi Guidxilayú, zanda gudiʼnu ni ra cayaca guendaridagulisaa ca. Pa chuʼ tu gudii cheque ra cayaca guendaridagulisaa roʼ ca riquiiñeʼ cheni lá «La Torre del Vigía, A.R.».
◼ Ora málasi gaca xiixa. Pa málasi gaca huará tuuxa ra cayaca guendaridagulisaa ca la? guniʼné ti acomodador, laabe nagueendaca zaníʼnebe cani runi dxiiñaʼ Ra Raca Tender cani Guizaaca Xiixa ne maʼ laacaʼ gúʼyacaʼ xi gúnicaʼ.
◼ Medicina. Pa cayeʼluʼ medicina la? galán chineluʼ cani, purtiʼ qué gápacabe ca medicina ni bidii doctor stiluʼ lii, lugar ra ridagulisaanu ca.
◼ Ni guicá ñee binni. Guiráʼ iza racaná ñee stale binni pur ni rucaa ñeecaʼ. Jma galán guyubi binni zapatu o guelaguidi ni qué guniná ñee ti ganda quibaʼ lu escalera, rampa o saʼ lu ca neza ca.
◼ Binni ni qué runadiaga chaahuiʼ. Ziuu lugar ra zanda gucaadiágacabe guendaridagulisaa ca lu radiu (FM). Para nga la? naquiiñeʼ gápacabe ti radiu ni napa batería ne audífono.
◼ Andadera para baʼduhuiiniʼ ne banguʼ ni ridopa. Cadi naquiiñeʼ chinetu cani ra chigaca guendaridagulisaa ca. Peru zanda chiné binni banguʼ ra cuí ca baʼduhuiiniʼ ca pa zanda guiliibi ni lu ti banguʼ ni nuu cueʼcaʼ.
◼ Perfume. Stale de ca lugar ra raca ca guendaridagulisaa riʼ deʼguʼ cani ne maca napa cani modo gusigaandaʼ cani binni. Cumu deʼguʼ ca lugar ca la? cadi galán diʼ guidxanu stale perfume, purtiʼ zándaca guchiiñani cani napa xiixa guendahuará (1 Cor. 10:24).
◼ Guiʼchiʼ ni láʼ Sírvase visitar (S-43-S). Ora chetu guendaridagulisaa roʼ riʼ la? galán chinetu tobi o chupa guiʼchiʼ ni láʼ Sírvase visitar para gucaatu lá tuuxa binni ni chuulaʼdxiʼ guiziidiʼ de Stiidxaʼ Dios ora guiníʼnetu laa. Zanda chisaanatu guiʼchiʼ ni maʼ bichatu ca ra Departamento de Publicaciones, o gudiitu ni secretariu ni nuu ra ridagulisaatu (laguuyaʼ Xhiiñaʼ Reinu ni Rúninu stiʼ mayo 2011, yaza 3).
◼ Restaurán. Pa gápanu xpiaʼnu ora maʼ nuunu ra restaurán la? zusisácanu lá Jiobá. Pa maʼ biaacabe gusaanacabe saca nagaʼndaʼ ca lugar ca la? laguni ni.
◼ Hotel.
1) Cadi guinabuʼ stale cuartu ndaaniʼ ca hotel ca pa qué zaquiiñeluʼ guirácani ne cadi uguuluʼ jma binni de biaʼ naguíxhecabe.
2) Pa pur xiixa razón maʼ qué zanda guiaanaluʼ ndaaniʼ hotel ca la? guniʼné laacabe nagueendaca (Mat. 5:37).
3) Bietenalaʼdxiʼ, pa iquiiñeluʼ ti tarjeta de créditu o de débito ora guicá laluʼ para guiaanaluʼ ndaaniʼ hotel ca, gunna ziaanané ca binni ca ti ndaa bueltu jma que biaʼ naquiiñeʼ quíxeluʼ cuartu ca, ne guiaxa xiixa ni málasi gueeda guizaaca ca dxi nuuluʼ ndaaniʼ ni. Tiidiʼ si chupa chonna dxi ora maʼ guseeguʼ hotel ca cuenta stiluʼ maʼ zanda gudxiguétacabe lii bueltu ni guiaanacaʼ.
4) Zanda iquiiñeluʼ ca carru huiiniʼ ra riné binni maleta stiʼ ne bidxiguetaʼ ni nagueendaca para iquiiñeʼ stobi ni.
5) Bisaana saca nagaʼndaʼ stiʼ ca binni ni racané lii né ca maleta stiluʼ ne zacaca biʼniʼ né cani rusiá ndaaniʼ xcuártuluʼ guiráʼ dxi.
6) Cadi guʼnuʼ guendaró ndaaniʼ ca cuartu stini pa qué rinácabe.
7) Cadi guicaaluʼ stale guendaréʼ, café o hielu ni rudiicabe ca biuuzaʼ laga nuucaʼ ndaaniʼ hotel ca.
8) Bisihuinni nápaluʼ ca guenda ni rudii espíritu santu guiráʼ ora guiníʼneluʼ cani runi dxiiñaʼ ndaaniʼ hotel ca. Bietenalaʼdxiʼ, stale binni nga runi tendércabe, nga runi ziuuláʼdxicabe gácanu nachaʼhuiʼ, nadóʼ ne gusihuínninu nápanu paciencia.
9) Cani napa xiiñiʼ naquiiñeʼ gúʼyacaʼ xiiñicaʼ ora maʼ nuucaʼ ndaaniʼ hotel ra chiguiaanacaʼ. Zaqueca naquiiñeʼ gúnicabe ora maʼ nuucabe ra puertaʼ stiʼ hotel, ora chécabe ra alberca ne gimnasio stini.
10) Biaʼ cá lu Lista de hoteles recomendados ca nga naquiiñeʼ quíxeluʼ pur dxi, peru aparte nga impuestu stini. Pa gábicabe lii quíxeluʼ jma de biaʼ biquiiñeluʼ la? cadi quíxeluʼ ni ne nagueendaca gudxi ni Cani Ruyubi ra Guiaana binni.
11) Pa gápaluʼ xiixa guendanagana ne xcuártuluʼ la? guniʼné Cani Ruyubi ra Guiaana binni laga nuuluʼ lu guendaridagulisaa ca.
◼ Caquiiñeʼ tu gacané. Guiráʼ cani racalaʼdxiʼ gacané la? naquiiñeʼ checaʼ ra nuu cani rucaa lá ca binni ni riuulaʼdxiʼ gacané. Cani caʼruʼ gusaa 16 iza laaca zanda gacanecaʼ, peru naquiiñeʼ guʼyaʼ bixhózecaʼ, jñaacaʼ o sti binni huaniisi ni zanda gapa laacaʼ.
[Cuadru ni zeeda lu yaza 6]
Ximodo zanda quíʼzinu invitación
Para ganda quíʼzinu invitación riʼ biaʼ ra raca caber laanu gucheechenu diidxaʼ la? cadi naquiiñeʼ guindaʼnu para gúninu ni. Zanda guininu sicaríʼ: «Xi tal xa. Lu guidubi naca Guidxilayú cayaaziʼ invitación riʼ. Riuuladxeʼ gudieeʼ lii tobi. Luni zadxélaluʼ ra cusiene jma de laani». Biʼniʼ ni né stale gana. Ora quíʼziluʼ invitación riʼ ca sábadu ne ca domingu, galán gusaananeluʼ ca revista ca binni pa gúʼyaluʼ zanda gúniluʼ ni.