Zusisaca binni Dios pa gaca xpiaʼnu galán
1. Xiñee stale binni rudii cuenta ora riuunu ca guendaridagulisaa roʼ stinu.
1 Stale binni rudii cuenta ora riuunu ca guendaridagulisaa roʼ stinu. Ne ndaaniʼ stale guidxi ridiʼdiʼ lu noticia nápanu guendaridagulisaa. Nabé rié ca Testigu ndaaniʼ ca hotel ne ca restaurán sti ca guidxi ca ne nabé ruuyaʼ binni laacabe ndaaniʼ ca calle stícani maʼ cá ti tarjeta ladxidóʼcabe. Yanna chiguzéʼtenu caadxi cosa ni zacané gusisaca binni Dios pur xpiaʼnu ora maʼ nuunu ndaaniʼ guidxi ra nápanu guendaridagulisaa (1 Ped. 2:12).
2. Xiñee zusisaca binni Dios pur modo rácunu lari ora maʼ nuunu ndaaniʼ guidxi ra cayaca guendaridagulisaa stinu.
2 Gácunu lari jneza. Stale biaje ridxagayaa binni laanu pur modo rácunu lari ora chuunu guendaridagulisaa roʼ. Peru cadi racá si naquiiñeʼ gúninu zacá, purtiʼ ziuu sti ora zuuyaʼ binni modo rácunu lari, casi ora chindanu ra hotel, ora chidoʼno paxaraa ne ora chisinu. Neca cadi naquiiñepeʼ gácunu lari casi ora maʼ ziuunu ti guendaridagulisaa ora chigúninu ca nga peru naquiiñeʼ gácunu lari jneza, cadi ni gucaa binni guyadxí laanu. Pa gúninu zacá, zudii binni cuenta gadxé laanu de ca binni ni cadi cayuni ni na Dios (Rom. 12:2). Ne laaca galán chinenu tarjeta ni ricá ladxidoʼno, purtiʼ zacá zacanenu ganna binni nápanu guendaridagulisaa, zanda gucheechenu diidxaʼ ne zanda gunibiáʼ xcaadxi xpinni Cristu laanu.
3. Pora zanda gusihuínninu qué ridxiichinu nagueenda ne nacháʼhuinu.
3 Cadi guidxiichinu nagueenda ne gácanu nachaʼhuiʼ. Ca dxi nabézanu riʼ stale binni nabé ruyubi para laasi ne qué rudii xquixe ora guni binni xiixa pur laa. Nga runi, pa gápanu paciencia binni ne guni respetarnu laacaʼ zeeda gácanu casi ti bi gaʼndaʼ ni gundubi ca binni nabeza ra cayaca guendaridagulisaa ca, ne jmaruʼ si para ca binni runi dxiiñaʼ ndaaniʼ ca hotel ne ca restaurán (2 Tim. 3:1-5). Laaca naquiiñeʼ guiníʼ íquenu sti binni ante cueenu lugar ra chitinu o pa chicaanu xiixa libru ni biree lu guendaridagulisaa (1 Cor. 10:23, 24). Sicaríʼ guníʼ ti hombre despué de guyé primé guendaridagulisaa stiʼ: «Qué rietenaladxediáʼ nin tobi de ca libana ni gudiʼdiʼ raqué, peru qué riaandaʼ naa xpiaʼ ca Testigu que».
4. Xiñee galán guidúʼyanu pa zanda gacanenu lu ca guendaridagulisaa stinu.
4 Biyubi gacaneluʼ. Cani dxandíʼ xpinni Cristu nabé runibiáʼ binni laacaʼ purtiʼ riuuláʼdxicaʼ gacanecaʼ (Sal. 110:3). Ñee zanda gacaneluʼ la? Dxi cayaca chaahuiʼ ti lugar ra chigaca ti guendaridagulisaa roʼ guyé biaʼ xhoopaʼ gayuaa Testigu yegacanecaʼ guiá lugar que. Ca binni runi dxiiñaʼ raqué nabé bidxagayaacaʼ ne guniʼcaʼ: «Qué huayuu dxi guidúʼyadu chuʼ tu guni zacá. Guizáʼ bidxagayaadu ora gúnnadu qué riáxacabe». Nabé maʼ racaláʼdxinu guedandá dxi guzulú ca guendaridagulisaa de chonna gubidxa ni chigaca lu iza 2013, ne qué zucaadiágasinu ne zazíʼdisinu lu cani, sínuque laaca zusisácanu Jiobá, Dios ni rusiidiʼ laanu.