Chonna gubidxa para guicaanu ndaayaʼ stiʼ Jiobá
1. Ximodo zanda gacané guendaridagulisaa de chonna gubidxa stiʼ iza riʼ laanu.
1 Ndaaniʼ guidxilayú stiʼ Binidxabaʼ riʼ stale binni nuu zitu de Dios, peru Jiobá cadi cusaana de gusiidiʼ ca xpinni. Ne ni rusiidibe ca zeeda gácani casi nisa ziáʼ ne nagaʼndaʼ (Isa. 58:11). Tobi de ca modo rusiidibe laanu nga lu ca guendaridagulisaa de chonna gubidxa ni raca ti biaje lu ti iza. Laga cabézanu guedandá dxi gaca guendaridagulisaa ni chigápanu iza riʼ, dede yanna nga naquiiñeʼ chuʼnu listu para gacanenu xcaadxi binni chuʼcaʼ gaxha de Dios ne zaqueca gacanecaʼ laanu. Ximodo zanda gaca nga yaʼ (Pro. 21:5).
2. Xi guiráʼ nga naquiiñeʼ quixhe chaahuinu para chuunu guendaridagulisaa ca.
2 Pa caʼruʼ gúniluʼ ni la? Guníʼ ique ximodo zanda quixhe chaahuiluʼ tiempu stiluʼ ne xhiiñaluʼ para ganda cheluʼ guionnaʼ gubidxa ca. Ñee maʼ gudixhe chaahuiluʼ cani chigúniluʼ para ganda chindaluʼ tempranu ne guidxélaluʼ ra cuiluʼ ante guzulú guendaridagulisaa ca la? Cumu maʼ gudixhe chaahuiʼ Jiobá xi guiráʼ chigusiidiʼ laanu ca dxi ca la? nga runi qué racaláʼdxinu guiáʼdxanu nin ti dxi (Isa. 65:13, 14). Ñee maʼ nánnaluʼ paraa guiaanaluʼ ne ximodo cheluʼ guendaridagulisaa ca la?
3. Xi zanda gúninu ne xi zanda guni familia stinu para cueendunu ni galán de guendaridagulisaa ca.
3 Xi zanda gúninu para cadi guiníʼ íquenu xcaadxi cosa laga cayaca guendaridagulisaa ca. Pa ganda la? gusi tempranu para chindaluʼ tempranu, biiyaʼ lu binni ni cudii libana ca, biyubi ca textu ni guzeetebe, bicaa xiixa de ni caniʼbe. Galán guni ca familia ca cuicaʼ juntu ti ganda gacanecaʼ ca xiiñicaʼ para gucaadiágacaʼ (Pro. 29:15). Zanda güitu diidxaʼ ca huaxhinni ca ne guzeetetu chupa chonna de ca cosa ni bieeteʼ lu guendaridagulisaa ca. Ne para gacané guendaridagulisaa riʼ laatu neca maʼ biluxe ni la? galán cueetu ti tiempu huiiniʼ ora maʼ cayuni adorartu Dios né binnilídxitu para guzeetetu xiixa ni jma guyuuláʼdxitu ne rábitu zaquiiñetu.
4. Xi zanda gúninu para gacanenu xcaadxi binni cueendú ni galán.
4 Ximodo zanda gacanenu xcaadxi binni. Laaca racaláʼdxinu gacanenu xcaadxi binni para cueenducaʼ ni galán. Maʼ guníʼ íqueluʼ ximodo zanda cheʼ ca binni ni maʼ nagola ne cani raca nagana para laacaʼ checaʼ guendaridagulisaa riʼ la? Pa nuu tuuxa lade ca binni ni ridagulisaaneluʼ, ñee zanda gacaneluʼ laabe la? (1 Juan 3:17, 18.) Ca binnigola ni runi tender grupu, laacaʼ nga cani jma naquiiñeʼ gúʼyacaʼ ximodo zanda cheʼ cani rucheeche diidxaʼ ni caquiiñeʼ gacanécabe.
5. Ximodo zanda quíʼzinu invitación. (Biiyaʼ cuadru ca).
5 Cásica huayúninu xcaadxi iza la? chonna semana ante, zuzulú zaguíʼzinu invitación para cheʼ binni guendaridagulisaa ni chigápanu iza riʼ. Cada neza binni ridagulisaa naquiiñeʼ quixhe ique gusirá invitación stiʼ ne gudiini guiráʼ binni ni nabeza neza ra rucheeche diidxaʼ. Peru pa maʼ gunda dxi nusirá familia stiluʼ ca invitación ni gucuaatu ne biaanaruʼ stale la? yenécani lugar ra chigaca guendaridagulisaa ca para guni invitartu ca binni ni guidxaagatu. Viernes ca zábicabe laatu ximodo zanda gúnitu ni. Cani maʼ qué zanda quíʼzitu la? lagudii cani ti acomodador ora chindatu ra chigaca guendaridagulisaa ca. Cadi guiaandaʼ laatu guiaananetu tobi de laacani, purtiʼ zaquiiñetu ni lu últimu libana ni tiidiʼ domingu ca.
6. Xi zanda gúninu para gusihuínninu galán xpiaʼnu.
6 Zaguʼnu gana xcaadxi binni pa galán xpiaʼnu. Ca dxi nabáninu riʼ nabé nuu binni ni ruyubi «para laa si», ne qué liica rulábicaʼ xcaadxi binni. ¡Guizáʼ galán runi sentirnu purtiʼ nuunu lade ca xpinni Cristu ni ruyúbicaʼ gaca xpiaʼcaʼ galán! (2 Tim. 3:2.) Ximodo zanda gusihuínninu galán xpiaʼnu yaʼ. Ti modo zanda gúninu ni nga cadi chuʼ lúgunu ne cadi gucáʼnanu binni ora guixeleʼ puertaʼ stiʼ lugar ra chiguidagulisaanu ca, puertaʼ ca zaxeleʼ ni a las ocho. Sti cosa ni zanda gúnitu nga cueetu lugar para si ca binnilídxitu, cani zinetu ndaaniʼ carru o cani cayuundanetu Biblia. Sti modo zanda gusihuínninu galán xpiaʼnu nga cuinu lugar stinu ne gucaadiáganu saa ni rixidxi ante guzulú guendaridagulisaa ca ne naquiiñeʼ gúninu ni ora guinabaʼ binni ni chiguzulú ndaa stiʼ dxi ca ni laanu. Dede ante naquiiñeʼ gúʼyatu xi zanda gúnitu para cadi guchiiñaʼ celular stitu ne xcaadxi aparatu casi laani ca binni ni cucaadiaga. Ora galán xpiaʼ binni la? runi stipa pur cadi güíʼ diidxaʼ, guseendaʼ mensaje lu celular, gó o saʼ ndaaniʼ ca neza huiiniʼ stiʼ lugar ca laga cayaca guendaridagulisaa ca.
7. Ximodo zanda gacanenu xcaadxi xpinni Cristu ora guidxaaganu laacaʼ ne ximodo zanda gacanécabe laanu.
7 Zadxélanu binni ni zanda gaca xhamígunu. Lu ca guendaridagulisaa ca nga jma randa riuʼnu tobi si né xcaadxi xpinni Cristu (Sal. 133:1-3). Xiñee qué quixhe íqueluʼ gápaluʼ jma xhamíguluʼ ne gunibiaʼluʼ xcaadxi xpinni Cristu de sti neza binni ridagulisaa (2 Cor. 6:13). Zanda quixhe íqueluʼ gunibiaʼluʼ neca ti binni o ti familia cada dxi. Galán iquiiñeluʼ galaa dxi ni ricaanu ora guidoʼno gueta para gúniluʼ ni. Nga runi galán chineluʼ ti guendaró huiiniʼ ne guiaanaluʼ ra cayaca guendaridagulisaa ca. Lugar de chisiluʼ guendaró o chitoloʼ ndaaniʼ ti restaurán ni riaana gaxha de raqué la? jma galán guiaanaluʼ ra cayaca guendaridagulisaa ca ne zacá chuʼluʼ gaxha de xcaadxi xpinni Cristu. Zándaca gápaluʼ ndaayaʼ de guidxélaluʼ xcaadxi xhamíguluʼ ne dede qué ziuu dxi gusaana de gaca xhamígutu.
8. Bizeeteʼ xiñee galán nga chuʼnu listu para gúninu dxiiñaʼ lugar ra ridagulisaanu ne paraa zanda gacanenu.
8 Guizáʼ galán nga guninenu ca xpinni Cristu xhiiñaʼ Dios. Ti modo zanda gúninu ni nga chuʼnu listu para gúninu xiixa dxiiñaʼ ni caquiiñeʼ gaca o gacanenu ca binni ridagulisaanenu para guiá raqué (Sal. 110:3). Pa caʼruʼ gábicabe lii paraa zanda gúniluʼ dxiiñaʼ la? zanda cheluʼ ra nuu cani rucaa lá ca binni ni riuulaʼdxiʼ gacané. Ora stale tu gacané la? jma nagueenda raca ca dxiiñaʼ ca ne jma nayecheʼ riuucabe ora gúnicabe ni.
9. Xiñee naquiiñeʼ gápanu xpiaʼnu ne gácunu lari jneza ca dxi chigápanu guendaridagulisaa ca.
9 Zaníʼ binni galán de laanu ora gúʼyacaʼ xpiaʼnu. Cadi ora si cayaca guendaridagulisaa ca nga naquiiñeʼ gápanu xpiaʼnu, sínuque guidubi dxi stiʼ guionnaʼ gubidxa ca. Pur cani bizéʼtenu ca, naquiiñeʼ gusihuínninu maʼ gadxé laanu de xcaadxi binni, ne cani nabeza ndaaniʼ guidxi ra cayaca guendaridagulisaa ca zudiicaʼ cuenta de laani (1 Ped. 2:12). Nga runi, pa nuunu ra cayaca guendaridagulisaa ca, ra cayaananu o ndaaniʼ ti restaurán la? galán gusisácanu Jiobá ra gácunu lari jneza ne guzuchaahuinu (1 Tim. 2:9, 10). Pa gucaʼnu tarjeta stiʼ guendaridagulisaa ca ladxidoʼno la? zanna binni testigu stiʼ Jiobá laanu ne dede zándaca gacaneni laanu para guinínenu laacabe de guendaridagulisaa ca ne de xiixa tema ni zeeda lu Biblia.
10. Xi zanda gúninu para guiníʼ ca binni ni runi dxiiñaʼ ndaaniʼ hotel o restaurán ra chuunu galán de guendaridagulisaa ca.
10 Xi zanda guininu de modo naquiiñeʼ guʼyaʼ ca binni ni runi dxiiñaʼ ndaaniʼ hotel o restaurán laanu yaʼ. Cadi naquiiñeʼ guinábanu jma cuartu pa qué zaquiiñenu cani, purtiʼ zaca nagana para xcaadxi xpinni Cristu guidxélacaʼ ra guiaanacaʼ, ne laaca zareeguniti hotel ca. Pa nuu stale binni ni cabeza guicá lá ora chigucaʼnu lanu para guiaananu ndaaniʼ hotel ca o maʼ chigusaananu ni la? cadi guidxiichinu nagueendaca ne guininu né respetu (Col. 4:6). Laaca galán gudiʼnu saca nagaʼndaʼ stiʼ ca binni ni guni tender laanu ndaaniʼ restaurán. Zacaca naquiiñeʼ gúninu né ca binni ni runi dxiiñaʼ ndaaniʼ hotel, casi cani racané laanu né ca maleta stinu, cani rusiá cuartu ra cayaananu o cani runi xiixa dxiiñaʼ pur laanu.
11. Bizeeteʼ xiixa ni bizaaca ra rihuinni galán gápanu xpiaʼnu.
11 Xi riníʼ ique binni de laanu ora gúʼyacaʼ xpiaʼnu ca dxi rápanu guendaridagulisaa. Ti periódicu bicaa ca diidxaʼ ni guníʼ ti gerente stiʼ lugar ra guca ti guendaridagulisaa, hombre riʼ guníʼ: «Nácacabe binni ni nabé runi respetar xcaadxi. Nabé riéchedu gueedacabe raríʼ guiráʼ iza». Iza gudiʼdiʼ ca, ti binni ni cadi naca Testigu biniti cartera stiʼ ndaaniʼ ti hotel ra nuu stale binni ni guyé ti guendaridagulisaa. Ora bidxiguétacabe cartera que laabe né guirá ni nuu ndaaniʼ ni la? gerente stiʼ hotel que gudxi laabe: «Galán nga gupa ca testigu stiʼ Jiobá ti guendaridagulisaa gaxha de raríʼ, ne stale de laacaʼ biaanacaʼ ndaaniʼ hotel riʼ. Pa ñaca cadi pur laacabe la? nagana de nidxélaluʼ cartera stiluʼ».
12. Xi naquiiñeʼ quixhe íquenu gúninu yanna ra mayaca gápanu guendaridagulisaa stinu ne xiñee.
12 Mayaca gápanu guendaridagulisaa de chonna gubidxa stiʼ iza riʼ. Stale tiempu maʼ biquiiñeʼ ne stale dxiiñaʼ maʼ guca para ganda guizíʼdinu ne chuʼnu gana lu guendaridagulisaa riʼ. Gudixhe ique cheluʼ guionnaʼ gubidxa chigaca guendaridagulisaa riʼ ne guyuu listu para guicaaluʼ cani cudii Jiobá ne xquidxi lii. Bicaa ique cuʼluʼ gana binni ora gúʼyacaʼ galán xpiaʼluʼ ne nácaluʼ ti binni nayecheʼ. Ne zacá zanda guni sentirnu cásica biʼniʼ sentir tobi de ca binni ni guyé guendaridagulisaa ni gúpanu udubiza, laabe bicaabe: «¡Qué huayuu sti cosa ni jma gusiecheʼ naa, que guendaridagulisaa riʼ!».
[Blurb on page 4]
Cásica huayúninu xcaadxi iza la? chonna semana ante, zuzulú zaguíʼzinu invitación para cheʼ binni guendaridagulisaa ni chigápanu iza riʼ
[Blurb on page 6]
Pa nuunu ra cayaca guendaridagulisaa ca, ra riaananu o ndaaniʼ ti restaurán la? galán gusisácanu Jiobá ra gácunu lari jneza ne guzuchaahuinu
[Blurb on page 7]
Bicaa ique cuʼluʼ gana binni ora gúʼyacaʼ galán xpiaʼluʼ ne nácaluʼ ti binni nayecheʼ
[Blurb on page 4]
Cani naquiiñeʼ guietenaláʼdxinu ante gápanu guendaridagulisaa de chonna gubidxa stiʼ iza 2011
◼ Pora guzulú ni. Guionnaʼ gubidxa ca zuzulú ni a las 9.20 siadóʼ. Puertaʼ stiʼ lugar ca zaxeleʼ a las 8.00. Ora guzulú xhidxi saa stiʼ Reinu guiranu maʼ naquiiñeʼ cuinu lugar stinu ti ganda guzulú ni modo naquiiñeʼ gaca ni. Viernes ne sábadu zaluxe ni a las 4.55 huadxí, ne domingu zaluxe ni a las 3.40.
◼ Ra ruzuhuaa carru. Nuu lugar qué ziaxa diʼ ra guzuhuaa carrucaʼ stinu ne ziuu tu gabi laanu paraa guzuhuaʼnu ni. Cani huará si nga zanda guzuhuaa xcárrucaʼ ra maca dieʼ para laacaʼ, pa nápacaʼ guiʼchiʼ ni caquiiñeʼ para chuʼcaʼ raqué. Cumu nahuiiniʼ ca lugar ra ruzuhuaa ca carru ca la? galán gúʼyatu pa zanda chetu ndaaniʼ ti carru si.
◼ Ora cueenu lugar. Zanda cueeluʼ lugar para ca binnilídxiluʼ, cani zineluʼ ndaaniʼ carru o para cani cayuundaneluʼ Biblia (1 Cor. 13:5).
◼ Guendaró. Jma galán chineluʼ guendaró ti cadi guireeluʼ chisiluʼ ni galaa dxi ora riziiláʼdxinu. Zanda chineluʼ ra chuʼ guendaró stiluʼ, peru gácani nahuiiniʼ biaʼ ganda chuʼ xaʼnaʼ banguʼ. Cadi naquiiñeʼ diʼ chinenu xiixa traste naroʼbaʼ ra chuʼ guendaró lugar ra chigaca guendaridagulisaa ca nin xiixa de vidriu.
◼ Bueltu rudiʼnu. Zanda guluinu dxandíʼ riuuláʼdxinu gaca ca guendaridagulisaa ni zeeda gaca casi ti saa para laanu, ra gudiʼnu bueltu para dxiiñaʼ raca lu guidubi Guidxilayú, zanda gudiʼnu ni ra cayaca guendaridagulisaa ca. Pa chuʼ tu gudii cheque ra cayaca guendaridagulisaa roʼ ca riquiiñeʼ cheni lá «La Torre del Vigía, A.R.».
◼ Ora málasi gaca xiixa. Pa málasi gaca huará tuuxa ra cayaca guendaridagulisaa ca la? guniʼné ti acomodador, laabe nagueendaca zaníʼnebe cani runi dxiiñaʼ Ra Raca Tender cani Guizaaca Xiixa ne maʼ laacaʼ gúʼyacaʼ xi gúnicaʼ.
◼ Medicina. Pa cayeʼluʼ medicina la? Galán chineluʼ cani, purtiʼ qué gápacabe ca medicina ni bidii doctor stiluʼ lii, lugar ra ridagulisaanu ca.
◼ Ni guicá ñee binni. Guiráʼ iza racaná ñee stale binni pur ni rucaa ñeecaʼ. Jma galán guyubi binni zapatu o guelaguidi ni qué guniná ñee ti ganda quibaʼ lu escalera, rampa o saʼ lu ca neza ca.
◼ Binni ni qué runadiaga chaahuiʼ. Ziuu lugar ra zanda gucaadiágacabe guendaridagulisaa ca lu radiu (FM). Para nga la? naquiiñeʼ gápacabe ti radiu ni napa batería ne audífono.
◼ Andadera para baʼduhuiiniʼ ne banguʼ ni ridopa. Cadi naquiiñeʼ chinetu cani ra chigaca guendaridagulisaa ca. Peru zanda chiné binni banguʼ ra cuí ca baʼduhuiiniʼ ca pa zanda guiliibi ni lu ti banguʼ ni nuu cueʼcaʼ.
◼ Perfume. Stale de ca lugar ra raca ca guendaridagulisaa riʼ deʼguʼ cani ne maca napa cani modo gusigaandaʼ cani binni. Cumu deʼguʼ ca lugar ca la? cadi galán diʼ guidxanu stale perfume, purtiʼ zándaca guchiiñani cani napa xiixa guendahuará (1 Cor. 10:24).
◼ Guiʼchiʼ ni láʼ Sírvase visitar (S-43-S). Ora chetu guendaridagulisaa roʼ riʼ la? galán chinetu tobi o chupa guiʼchiʼ ni láʼ Sírvase visitar para gucaatu lá tuuxa binni ni chuulaʼdxiʼ guiziidiʼ de Stiidxaʼ Dios ora guiníʼnetu laa. Zanda chisaanatu guiʼchiʼ ni maʼ bichatu ca ra Departamento de Publicaciones, o gudiitu ni secretariu ni nuu ra ridagulisaatu (laguuyaʼ Xhiiñaʼ Reinu ni Rúninu stiʼ noviembre 2009, yaza 4).
◼ Restaurán. Pa gápanu xpiaʼnu ora maʼ nuunu ra restaurán la? zusisácanu lá Jiobá. Pa maʼ biaacabe gusaanacabe saca nagaʼndaʼ ca lugar ca la? laguni ni.
◼ Hotel.
1) Cadi guinabuʼ stale cuartu ndaaniʼ ca hotel ca pa qué zaquiiñeluʼ guirácani ne cadi uguuluʼ jma binni de biaʼ naguíxhecabe.
2) Pa pur xiixa razón maʼ qué zanda guiaanaluʼ ndaaniʼ hotel ca la? guniʼné laacabe nagueendaca (Mat. 5:37).
3) Zanda iquiiñeluʼ ca carru huiiniʼ ra riné binni maleta stiʼ ne bidxiguetaʼ ni nagueendaca para iquiiñeʼ stobi ni.
4) Cadi guʼnuʼ guendaró ndaaniʼ ca cuartu stini pa qué rinácabe.
5) Bisaana saca nagaʼndaʼ stiʼ ca binni ni racané lii né ca maleta stiluʼ ne zacaca biʼniʼ ni né cani rusiá ndaaniʼ xcuártuluʼ guiráʼ dxi.
6) Cadi guicaaluʼ stale guendaréʼ, café o hielu ni rudiicabe ca biuuzaʼ laga nuucaʼ ndaaniʼ hotel ca.
7) Bisihuinni nápaluʼ ca guenda ni rudii espíritu santu guiráʼ ora guiníʼneluʼ cani runi dxiiñaʼ ndaaniʼ hotel ca. Bietenalaʼdxiʼ, stale binni nga runi tendércabe, nga runi ziuuláʼdxicabe gácanu nachaʼhuiʼ, nadóʼ ne gusihuínninu nápanu paciencia.
8) Biaʼ cá lu Lista de hoteles recomendados ca nga naquiiñeʼ quíxeluʼ pur dxi, peru aparte nga impuestu stini. Pa gábicabe lii quíxeluʼ jma de biaʼ biquiiñeluʼ la? cadi quíxeluʼ ni ne nagueendaca gudxi ni cani Ruyubi ra Guiaana binni.
9) Pa gápaluʼ xiixa guendanagana ne xcuártuluʼ la? guniʼné cani Ruyubi ra Guiaana binni laga nuuluʼ lu guendaridagulisaa ca.
10) Bietenalaʼdxiʼ, pa iquiiñeluʼ ti tarjeta de créditu o de débito ora guicá laluʼ para guiaanaluʼ ndaaniʼ hotel ca. Ca binni ca ziaananecaʼ sti ndaa bueltu jma que biaʼ naquiiñeʼ quíxeluʼ cuartu ca, ne guiaxa xiixa ni málasi gueeda guizaaca ca dxi nuuluʼ ndaaniʼ ni. Tiidiʼ si chupa chonna dxi ora maʼ guseeguʼ hotel ca cuenta stiluʼ maʼ zanda gudxiguétacabe lii bueltu ni guiaanacaʼ.
◼ Caquiiñeʼ tu gacané. Jma ziuuluʼ nayecheʼ ora cheluʼ ti guendaridagulisaa pa gacaneluʼ lu ca dxiiñaʼ ni raca luni ti gácani jma galán (Hech. 20:35). Guiráʼ cani racalaʼdxiʼ gacané la? naquiiñeʼ checaʼ ra nuu cani rucaa lá ca binni ni riuulaʼdxiʼ gacané. Cani caʼruʼ gusaa 16 iza laaca zanda gacanecaʼ, peru naquiiñeʼ guʼyaʼ bixhózecaʼ, jñaacaʼ o sti binni huaniisi ni zanda gapa laacaʼ.
[Box on page 5]
Ximodo zanda quíʼzinu invitación
Para ganda quíʼzinu invitación riʼ biaʼ ra raca caber laanu gucheechenu diidxaʼ la? cadi naquiiñeʼ guindaʼnu para gúninu ni. Zanda guininu sicaríʼ: «Xi tal xa. Lu guidubi naca Guidxilayú cayaaziʼ invitación riʼ. Riuuladxeʼ gudieeʼ lii tobi. Luni zadxélaluʼ ra cusiene jma de laani». Primé yaza stini zeeda caadxi diidxaʼ ni zucaa binni chuulaʼdxiʼ guʼndaʼ ni, nga runi ora gudiiluʼ ni laabe la? biyubi modo ganda gúʼyabe ni cá lu primé yaza stini. Biʼniʼ ni né stale gana. Ora quíʼziluʼ invitación riʼ ca sábadu ne ca domingu ca, galán gusaananeluʼ ca revista ca binni pa gúʼyaluʼ zanda gúniluʼ ni.