Ziuʼnu nayecheʼ ora guni adorarnu Jiobá lu ca guendaridagulisaa de chonna gubidxa ca
1. Ximodo nga cásica ca saa gupa Israel dxiqué zacaca nga ca guendaridagulisaa de chonna gubidxa ni rápanu yanna.
1 José, María, ca xiiñiʼ ne xcaadxi binni ni biʼniʼ ni na Dios dxiqué nabé guyecaʼ Jerusalén guiráʼ iza para gápacaʼ saa sticaʼ. Ca dxi raca ca saa riʼ qué riguu xaíquecabe ca cosa rúnicabe guiráʼ dxi ne jma ricá íquecabe guiziidicabe de Dios, purtiʼ ngue nga ni jma risaca lu xquendanabánicabe. Lu ca saa que gúpacabe tiempu para guiníʼ íquecabe ne guzeetecabe pabiáʼ nachaʼhuiʼ Jiobá ne laacabe ne para gúʼndacabe Ley stibe. Ngaca nga ni zanda gúninu lu guendaridagulisaa de chonna gubidxa ni zeeda ca, racá zanda gusisácanu Jiobá ne stale guendanayecheʼ.
2. Xi naquiiñeʼ gúninu ante ganda dxi gaca guendaridagulisaa de chonna gubidxa.
2 Naquiiñeʼ chuʼnu listu. Ora rié ca binnilidxi Jesús ca saa que la? rizácabe biaʼ 200 kilómetru para chécabe ne gueedacabe Nazaret. Nécapeʼ qué gánnanu panda biʼchiʼ ne bizaʼnaʼ Jesús la? zanda guininu gudixhe chaahuiʼ José ne María guiráʼ dxiiñaʼ sticaʼ ne bíʼnicaʼ stale stipa para gunda guyecaʼ. Ñee maʼ gudixhe chaahuiluʼ guiráʼ ni naquiiñeʼ guʼnuʼ para cheluʼ guionnaʼ gubidxa stiʼ guendaridagulisaa roʼ ca la? Zándaca naquiiñeʼ guinábaluʼ vacación ra dxiiñaʼ o guiníʼneluʼ patrón stiluʼ o maestru stiʼ ca xiiñiluʼ para gudiicaʼ permisu laacabe. Pa chiguiaanuʼ ndaaniʼ hotel, ñee maʼ guniʼluʼ para guinabuʼ cuartu stiluʼ la? Ñee zanda quixhe íqueluʼ gacaneluʼ tuuxa binni ridagulisaa ni caquiiñeʼ gacanécabe laa para cheʼ guendaridagulisaa ca la? (1 Juan 3:17, 18.)
3. Ximodo gucané ca saa ni biʼniʼ ca israelita que para gunda bidxaagacaʼ xcaadxi binni.
3 Riuʼnu nayecheʼ ne xcaadxi xpinni Cristu. Lu ca saa ni biʼniʼ ca judíu que gunda bidxaagacaʼ xcaadxi xpinni Jiobá ne guluusaacaʼ gana laacaʼ. Ne nánnanu nabé guyuulaʼdxiʼ familia stiʼ Jesús cheʼ ca saa que purtiʼ raqué nga ridagulisaanécabe ca binni ni maʼ xadxí de xhamígucabe. Ne laaca zanda guidxélacabe xcaadxi binni ni gaca xhamígucabe lade ca judíu ne lade cani cadi judíu ni gúʼyacabe Jerusalén o cani guidxaagacabe ora maʼ zécabe ne ora maʼ zeedacabe.
4. Ximodo zanda gusihuínninu risaca para laanu guidxaaganu guiráʼ ca xpinni Cristu.
4 Mozo ni nuu xpiaaniʼ ne ni runi jneza rudii guiráʼ ni caquiiñenu para ganda guidagulisaanu ne gucaadiáganu ca libana ca, lugar de nucaacabe guiráʼ ni lu guiʼchiʼ para guidúʼndanu. Xiñee yaʼ. Tobi de ca razón ca nga para cuʼsaanu gana laanu (Heb. 10:24, 25). Nga runi, gudixhe chaahuiʼ cani chigunuʼ para ganda chindaluʼ tempranu guiráʼ dxi ne ganda guiníʼneluʼ ca xpinni Cristu ante guiníʼ binni ni tiidiʼ primé ca maʼ chixhidxi ti saa huiiniʼ ne maʼ ora cuinu. Lugar de guireetu galaa dxi para chisitu xiixa ni goto la? jma galán chinetu ti guendaró huiiniʼ si ne guiaanatu ra cayaca guendaridagulisaa ca para ganda guiníʼnetu xcaadxi binni ni cheʼ. Naquiiñeʼ gusisácanu guiráʼ ca xpinni Cristu purtiʼ zeeda gácacabe casi xiixa ni rusigaʼdeʼ Jiobá laanu (Miq. 2:12).
5. Xi zanda gúninu para cueendunu stale cosa de cani tiidiʼ lu guendaridagulisaa ca.
5 Ti lugar ra zanda guizíʼdinu. Dede dxi jma nahuiiniʼ Jesús nabé guyuulaʼdxiʼ cheʼ ca saa biʼniʼ ca judíu para guiziidiʼ jma de Bixhoze ni nuu guibáʼ (Luc. 2:41-49). Xi zanda gúninu ne guni ca binnilídxinu para cueendunu stale cosa lu guendaridagulisaa ca yaʼ. Galán gúnitu cadi guiásatu ne cadi güitu diidxaʼ ora maʼ cayácani pa cadi caquiiñeʼ gúnitu ni. Cadi gudiitu lugar xhidxi teléfono stitu o xcaadxi aparatu casi laani para cadi guchiiñani lii o xcaadxi binni. Biiyadxí binni ni cudii libana ca ne bicaa xiixa de ni caniʼbe. Cani napa xiiñiʼ la? naquiiñeʼ cuínecaʼ laacabe, zacá zanda gúʼyacaʼ pa cucaadiaga ca xiiñicaʼ. Ne galán cueetu ti tiempu huiiniʼ cada gueelaʼ para guiniʼtu de cani jma guyuuláʼdxitu.
6. Xi naquiiñeʼ gánnanu de modo rácunu lari ne modo ruzuchaahuinu.
6 Modo gácunu lari ne modo guzuchaahuinu. Ca binni de sti guidxi ni biʼniʼ viaje para gutoo, nagueendaca binibiáʼcabe familia stiʼ Jesús ne xcaadxi judíu ni runi adorar Dios ora maʼ zecaʼ ne ora maʼ zeedacaʼ de ca saa sticaʼ. Xiñee yaʼ. Pur ca flecu ni cá ñee xhaba ca judíu que ne listón azul ni ricá luguiáʼ si de ca flecu que (Núm. 15:37-41). Laanu, ca xpinni Cristu, qué gápadinu ti lari ni gácunu para ora si chuunu ca guendaridagulisaa ca, peru runibiáʼ binni laanu purtiʼ rácunu lari jneza ne riuunu nayá ne galán modo ruzuchaahuinu. Ne jma naquiiñeʼ chuʼnu cuidadu modo rácunu lari ora maʼ ziuunu ne ora maʼ ziúpanu de guendaridagulisaa ca o laga nuunu ndaaniʼ guidxi ra cayaca ni. Ne pa guchaʼnu de lari guiluxe si guendaridagulisaa ca la? naquiiñeruʼ gácunu lari jneza ne chinenu tarjeta ni ricá ladxidoʼno. Zacá zánnacabe nácanu Testigu ne zaníʼ binni galán de laanu purtiʼ gadxé laanu de xcaadxi binni.
7. Xiñee galán quixhe íquenu gacanenu ora gaca ca guendaridagulisaa ca.
7 Caquiiñeʼ tu gacané. Para ganda gaca guendaridagulisaa ca jma galán la? riquiiñeʼ stale tu guni dxiiñaʼ. Ñee zanda gacaneluʼ la? (Sal. 110:3.) Laaca rusihuínninu runi adorarnu Dios ora rúninu ca dxiiñaʼ ni caquiiñeʼ para gaca ca guendaridagulisaa ca ne racanécani para gusisaca binni Dios. Gerente stiʼ ti lugar ra guca ti guendaridagulisaa nabé bidxagayaa modo bisiá ca Testigu lugar que, dede guníʼ: «Rapaʼ gana gudieeʼ xquíxepeʼ laatu pur guendaridagulisaa ni bíʼnitu, purtiʼ laani nga ni jma galán huayuuyaʼ lu xquendanabaneʼ. Nabé huayábicabe naa naca ca testigu stiʼ Jiobá binni nachaʼhuiʼ, ne riníʼ ca binni ni nuu lu grupu stidu guizáʼ nayá rusaanacabe lugar riʼ jma que ora ricaacabe ni. Pur laatu ne pur modo riguíxhetu gaca ca dxiiñaʼ ca huayacanécani para chuulaʼdxiʼ binni lugar ra raca ca guendaridagulisaa ca, ne qué huayuu dxi gunebiaʼyaʼ binni jma nachaʼhuiʼ que cani reeda gusiá raríʼ».
8. Ximodo zanda gucheechenu diidxaʼ guidxi ra cayaca guendaridagulisaa ca.
8 Zanda gucheechenu diidxaʼ. Stale de ca binni ni nabeza ndaaniʼ guidxi ra chigaca guendaridagulisaa ca zuuyacaʼ jma binni ni zuchaahuiʼ, nácucaʼ lari jneza ne cá tarjeta ladxidoʼcaʼ. Zándaca gucaa nga laacabe guinabadiidxacabe laanu xiixa ne zacá gábinu laacabe xi cazíʼdinu lu guendaridagulisaa ca. Ti hombrehuiiniʼ de tapa iza gucuaa ti guiʼchiʼ ni nacubi biree lu ti guendaridagulisaa ne yenebe ni ndaaniʼ ti restaurán ne biluiʼbe ni tobi de ca gunaa ni runi dxiiñaʼ raqué, zaqué gunda biʼniʼ invitar bixhózebe ne jñaabe gunaa que para cheʼ guendaridagulisaa que.
9. Ximodo zanda gusihuínninu rusisácanu cani rudii Jiobá laanu cásica biʼniʼ familia stiʼ Jesús ni.
9 Ca judíu ni riuulaʼdxiʼ guiziidiʼ de Dios la? nabé nayecheʼ riuucaʼ ora mayaca guidxiña dxi gaca ca saa que (Deu. 16:15). Familia stiʼ Jesús nabé guyuu nayecheʼ pur guiráʼ stipa bíʼnicaʼ para checaʼ ca saa que ne cueenducaʼ stale cosa galán. Yanna laaca nabé rusisácanu ca guendaridagulisaa de chonna gubidxa ca, purtiʼ ridúʼyanu cani casi xiixa ni bisigaʼdeʼ Bixhózenu ni nuu guibáʼ ni nadxii laanu (Sant. 1:17). ¡Guyuu listu dede nagasi para cheluʼ guendaridagulisaa ra zuni adorarnu Jiobá ne stale guendanayecheʼ!
Cani naquiiñeʼ guietenaláʼdxinu ante gápanu guendaridagulisaa de chonna gubidxa
◼ Pora guzulú ni. Guionnaʼ gubidxa ca zuzulú ni a las 9.20 siadóʼ. Puertaʼ stiʼ lugar ca zaxeleʼ a las 7.00. Ora guzulú xhidxi saa stiʼ Reinu guiranu maʼ naquiiñeʼ cuinu lugar stinu ti ganda guzulú ni modo naquiiñeʼ gaca ni. Viernes ne sábadu zaluxe ni a las 4.55 huadxí, ne domingu zaluxe ni a las 3.40.
◼ Ra ruzuhuaa carru. Nuu lugar qué ziaxa diʼ ra guzuhuaa carru stinu ne ziuu tu gabi laanu paraa guzuhuaʼnu ni. Cani huará si nga zanda guzuhuaa xcarru ra maca dieʼ para laacaʼ, pa nápacaʼ guiʼchiʼ ni caquiiñeʼ para chuʼcaʼ raqué. Cumu nahuiiniʼ ca lugar ra ruzuhuaa ca carru ca la? galán gúʼyatu pa zanda chetu ndaaniʼ ti carru si.
◼ Ora cueenu lugar. Zanda cueeluʼ lugar para cani zineluʼ ndaaniʼ carru o para si ca binnilídxiluʼ, ne para cani cayuundaneluʼ Biblia (1 Cor. 13:5).
◼ Guendaró. Jma galán chineluʼ guendaró ti cadi guireeluʼ chisiluʼ ni galaa dxi ora riziiláʼdxinu. Zanda chineluʼ ra chuʼ guendaró stiluʼ, peru gácani nahuiiniʼ biaʼ ganda chuʼ xaʼnaʼ banguʼ. Cadi naquiiñeʼ diʼ chinenu xiixa traste naroʼbaʼ ra chuʼ guendaró lugar ra chigaca guendaridagulisaa ca nin xiixa de vidriu.
◼ Bueltu rudiʼnu. Zanda guluinu dxandíʼ riuuláʼdxinu gaca ca guendaridagulisaa ca ra gudiʼnu bueltu para dxiiñaʼ raca lu guidubi Guidxilayú, zanda gudiʼnu ni ra Yoo stiʼ Reinu o ra cayaca guendaridagulisaa ca. Pa chuʼ tu gudii cheque ra cayaca guendaridagulisaa roʼ ca riquiiñeʼ cheni lá «La Torre del Vigía A.R.».
◼ Ora málasi gaca xiixa. Pa málasi gaca huará tuuxa ra cayaca guendaridagulisaa ca la? guniʼné tobi de cani ridxaagalú laanu ora chindanu, laabe nagueendaca zaníʼnebe cani runi dxiiñaʼ Ra Raca Tender cani Guizaaca Xiixa ne maʼ laacaʼ gúʼyacaʼ xi gúnicaʼ.
◼ Ni guicá ñee binni. Guiráʼ iza racaná ñee stale binni pur ni rucaa ñeecaʼ. Jma galán guyubi binni zapatu o guelaguidi ni qué guniná ñee ne gudiini lugar laa quibaʼ lu escalera ne saʼ lu ca neza ca.
◼ Binni ni qué runadiaga chaahuiʼ. Ziuu lugar ra zanda gucaadiágacabe guendaridagulisaa ca lu radiu (FM). Para ganda gucaadiágacabe ni la? naquiiñeʼ gápacabe ti radiu ni napa batería ne audífono.
◼ Grabación. Cadi naquiiñeʼ diʼ gucaaluʼ nin ti clase grabadora lu biaaniʼ ni nuu raqué o ra nuu aparatu stiʼ sonidu. Zanda iquiiñenu xiixa aparatu para guni grabarnu peru cadi naquiiñeʼ guchiiñani cani cucaadiaga.
◼ Andadera para baʼduhuiiniʼ ne banguʼ ni ridopa. Cadi naquiiñeʼ chinetu cani ra chigaca guendaridagulisaa ca. Peru zanda chiné binni banguʼ ra cuí ca baʼduhuiiniʼ ca pa zanda guiliibi ni lu ti banguʼ cueʼ bixhózecaʼ o jñaacaʼ.
◼ Perfume. Stale de ca lugar ra raca ca guendaridagulisaa riʼ deʼguʼ cani ne maca napa cani ximodo gusigaandaʼ cani binni. Cumu deʼguʼ ca lugar ca la? cadi galán diʼ guidxanu stale perfume, purtiʼ zándaca guchiiñani cani napa xiixa guendahuará (1 Cor. 10:24).
◼ Guiʼchiʼ ni láʼ Sírvase visitar. Ora chetu guendaridagulisaa roʼ riʼ la? galán chinetu tobi o chupa guiʼchiʼ ni láʼ Sírvase visitar (S-43-S) para gucaatu lá tuuxa binni ni chuulaʼdxiʼ guiziidiʼ de Stiidxaʼ Dios ora guiníʼnetu laa. Zanda gudiitu guiʼchiʼ ni maʼ bichatu ca Departamento de Publicaciones, o secretariu ni nuu ra ridagulisaatu (laguuyaʼ Xhiiñaʼ Reinu ni Rúninu stiʼ noviembre 2009, yaza 4).
◼ Ra restaurán. Pa gápanu xpiaʼnu ora maʼ nuunu ra restaurán la? zusisácanu lá Jiobá. Stale lugar rusaanacabe saca nagaʼndaʼ para cani runi dxiiñaʼ raqué, zanda gusaanatu biaʼ 10 ne 15% biaʼ situ.
◼ Ra hotel. 1) Cadi guinabuʼ stale cuartu ndaaniʼ ca hotel ca pa qué zaquiiñeluʼ guirácani ne cadi uguuluʼ jma binni de biaʼ naguíxhecabe. 2) Pa maʼ qué ziaanuʼ ndaaniʼ hotel ca la? guniʼné laacabe nagueendaca. 3) Zanda iquiiñeluʼ ca carru huiiniʼ ra riné binni maleta stiʼ ne bidxiguetaʼ ni nagueendaca para iquiiñeʼ stobi ni. 4) Cadi guʼnuʼ guendaró ndaaniʼ ca cuartu stini pa qué rinácabe. 5) Guiráʼ dxi bisaana saca nagaʼndaʼ stiʼ ni rusiá ndaaniʼ xcuártuluʼ. 6) Cadi guicaaluʼ stale guendaréʼ, café o hielu ni rudiicabe ca biuuzaʼ laga nuucaʼ ndaaniʼ hotel ca. 7) Bisihuinni nápaluʼ ca guenda ni rudii espíritu santu guiráʼ ora guiníʼneluʼ cani runi dxiiñaʼ ndaaniʼ hotel ca. Bietenalaʼdxiʼ stale binni nga runi tendércabe, nga runi ziuuláʼdxicabe gácanu nachaʼhuiʼ, nadóʼ ne gápanu paciencia. 8) Biaʼ cá lu Lista de hoteles recomendados ca nga naquiiñeʼ quíxeluʼ pur dxi, peru aparte nga impuestu stini. Pa gábicabe lii quíxeluʼ jma de biaʼ biquiiñeluʼ la? cadi quíxeluʼ ni ne nagueendaca gudxi ni cani Ruyubi ra Guiaana binni. 9) Pa gápaluʼ xiixa guendanagana ne xcuártuluʼ la? guniʼné cani Ruyubi ra Guiaana binni laga nuuluʼ ra guendaridagulisaa ca.
◼ Caquiiñeʼ tu gacané. Jma ziuuluʼ nayecheʼ ora cheluʼ ti guendaridagulisaa pa gacaneluʼ lu ca dxiiñaʼ ni raca luni ti gácani jma galán (Hech. 20:35). Guiráʼ cani racalaʼdxiʼ gacané la? naquiiñeʼ checaʼ ra nuu cani rucaa lá ca binni ni riuulaʼdxiʼ gacané. Cani caʼruʼ gusaa 16 iza laaca zanda gacanecaʼ, peru naquiiñeʼ guʼyaʼ bixhózecaʼ, jñaacaʼ o sti binni huaniisi ni zanda gapa laacaʼ.