Ñee maʼ nuuluʼ listu para guendaridagulisaa roʼ ni chigápanu la?
1. Xi guiráʼ dxiiñaʼ nga raca ora chiguni tuuxa ti guendaró ra zie stale binni.
1 Stale dxiiñaʼ nga raca ora chiguni tuuxa ti guendaró ra zie stale binni. Primeru naquiiñeʼ guidxela guiráʼ ni gacaneni, guʼyaʼ binni ximodo gaca ni nanixe; guidxela tu guzuhuaa ni lu mexaʼ ne tu guni chaahuiʼ ca mexaʼ ra chitócabe ni ne xcaadxi cosa. Peru cani cheʼ ca laaca caquiiñeʼ chuʼcaʼ listu para laani, jmaruʼ si pa zitu ra chigácani. Stale dxiiñaʼ nga nápani, peru cadi dxandíʼ guizáʼ galán ni purtiʼ nanixe zó binni ne ziuu nayecheʼ ne ca binnilidxi ne ca xhamigu la? Laaca maʼ napa beeu de cayuni ca testigu stiʼ Jiobá ti guendaridagulisaa ni zeeda gaca casi ti guendaró para stale binni, cayácani lu guidubi Guidxilayú para guiziidicabe de Stiidxaʼ Dios. Guendaridagulisaa riʼ lani «¡Lagataná!». Dede nagasi maʼ cayaca stale dxiiñaʼ para gataʼ chaahuiʼ ni chitiidiʼ luni ne xcaadxi cosa ni zaquiiñeʼ para gácani. Peru para ganda chuunu guendaridagulisaa riʼ ne cueendunu ni galán la? cada tobi de laanu laaca caquiiñeʼ chuʼ listu para dxi gácani (Pro. 21:5).
2. Xi naquiiñeʼ gúniluʼ para ganda cheluʼ guiráʼ dxi gaca guendaridagulisaa ca ne cueenduluʼ ni galán.
2 Bicaadiaga chaahuiʼ. Ñee maʼ gudíxheluʼ xi gúniluʼ para gucaadiágaluʼ cada tobi de ca libana ni chitiidiʼ luni la? Guniʼné patrón stiluʼ para gábiluʼ laa zieluʼ guiráʼ dxi gácani, dede primé dxi stini. Ñee maʼ guníʼ íqueluʼ ximodo cheluʼ ne paraa guiaanaluʼ la? Ca binnigola ca naquiiñeʼ gúʼyacaʼ xi caquiiñeʼ cani maʼ huaniisi ne cani huará ne cadi guiaandaʼ laacabe de sti xpinni Cristu ni caquiiñeʼ gacanécabe (Jer. 23:4; Gál. 6:10).
3. Xiñee cadi naquiiñeʼ chuunu ti guendaridagulisaa ra zie caadxi guidxi roʼ pa qué ñaca invitarnu.
3 Maʼ nánnanu nuu caadxi lugar ra chigaca guendaridagulisaa ra zie caadxi guidxi roʼ, nga runi galán guietenaláʼdxitu maca gudixhe Betel panda binni cheʼ ca lugar ca ne ca hotel ra zanda guiaanacabe. Nga runi, cayábidu laatu naquiiñeʼ cheʼ ca neza binni ridagulisaa ni guca invitar si ne xcaadxi binni de sti guidxi ni guca invitar. Pa cheʼ cani qué ñaca invitar la? zándaca zie jma binni que biaʼ nexheʼ chiné cada lugar.
4. Xi zanda gúninu guiráʼ dxi ante guzulú guendaridagulisaa ca.
4 Gudixhe chaahuiʼ tiempu stiluʼ para ganda chindaluʼ tempranu ti guidxélaluʼ lugar ante guzulú guendaridagulisaa ca. Ante guzulú ni zanda gúʼyaluʼ lu guiʼchiʼ ni rudiicabe raqué para gánnaluʼ xi guiráʼ chitiidiʼ ti ganda uguuluʼ listu ladxidoʼloʼ ne gucaadiágaluʼ cani chiguieeteʼ (Esd. 7:10). Ora guzulú guiníʼ binni ni tiidiʼ primé ca maʼ chixhidxi ti saa huiiniʼ la? bicaadiaga ni ne guyuu listu para gúʼndaluʼ diidxaʼ riuundaʼ ni chixhidxi ne chuʼluʼ ora gaca oración ni guzuluné ni.
5. Ximodo zanda cueendú binnilídxiluʼ ni galán lu guendaridagulisaa.
5 Galán cuiné cani napa xiiñiʼ ca binnilídxicaʼ ti lugar si, zacá zanda gúʼyacabe pa cucaadiaga xiiñicabe ca libana ni cadiʼdiʼ raqué (Deu. 31:12). Galán chinándatu lu Biblia stitu ca textu ni cayuundaʼ ni cudii libana ca. Ne pa gucaatu cani guieeteʼ lu ca libana ca zacaneni para gucaadiaga chaahuitu ne despué guietenaláʼdxitu ni jma guyuuláʼdxitu lúcani. Biʼniʼ stipa pur cadi güiluʼ diidxaʼ ne cadi guiásaluʼ stale biaje ora maʼ cayaca guendaridagulisaa ca. Pa napuʼ celular la? biiyaʼ ximodo cadi guchiiñani lii nin xcaadxi binni. Ñee cadi jma galán nga guininu de cani guyuuláʼdxinu lu guendaridagulisaa ca ora maʼ biluxe cada dxi stini la?
6. Xii nga ti cosa galán ni zanda gúninu lu guendaridagulisaa ca, ne ximodo.
6 Lu guendaridagulisaa roʼ riʼ randa ridúʼyanu xcaadxi xpinni Cristu ne riúʼnenu laacaʼ nayecheʼ, ne huaxiéʼ si binni nga randa runi zacá yanna (Sal. 133:1-3; Mar. 10:29, 30). Gudixhe ique ugapadiúxiluʼ cani cuí gaxha de lii ne guiníʼneluʼ laacaʼ galaa dxi. Nga runi galán chineluʼ guendaró stiluʼ ne guiaanuʼ ra cayaca guendaridagulisaa ca, lugar de chisiluʼ ni sti ladu o cheluʼ ti restaurán. Biʼniʼ stipa pur guiníʼneluʼ cani cheʼ racá ti gacanésaatu laatu (Rom. 1:11, 12).
7. Xiñee caquiiñeʼ guiduʼyaʼ chaahuinu xi lari gácunu.
7 Modo gácunu lari. Dxiqué biʼniʼ mandar Jiobá ca israelita ugaandacaʼ flecu ñee xhábacaʼ ne ucaacaʼ ti listón azul lu flecu que (Núm. 15:37-41). Ngue biquiiñeʼ para gusietenalaʼdxiʼ laacabe maʼ guleechú Dios xquídxicabe para guni adorárcabe laa. Zacaca nga yanna riʼ, pa gácunu lari jneza ora chuunu guendaridagulisaa riʼ zusihuínninu cadi zinándanu binni guidxilayú, zacá zudii binni cuenta tu laanu. Nga runi, galán guiduʼyaʼ chaahuinu xi lari zanda gácunu.
8. Ximodo zanda gucheechenu diidxaʼ guidxi ra chigaca guendaridagulisaa ca.
8 Gucheechenu diidxaʼ. Pa quixhe chaahuinu cani chigúninu la? dede zanda gucheechenu diidxaʼ guidxi ra chigaca guendaridagulisaa ca. Guzéʼtenu ni biʼniʼ ti xpinni Cristu ne xheelaʼ ora guyecaʼ ndaaniʼ restaurán. Para gunda guníʼnebe meseru que la? biluiʼbe laa guiʼchiʼ ni cá ladxidoʼbe que ne gunabadiidxabe laa: «Ñee maʼ biiyaluʼ xcaadxi binni cá guiʼchiʼ riʼ ladxidoʼcaʼ la?». Gudxi meseru que laabe maʼ biiyaʼ ca binni que peru qué ganna diʼ xiñee canacaacabe ni. Guníʼnebe laa ti ratu ne biʼniʼ invitarbe laa cheʼ guendaridagulisaa que.
9. Ximodo zanda gusihuínninu rudiʼnu xquíxepeʼ Jiobá.
9 Nécapeʼ ca xpinni Cristu nga rutiidicaʼ guiráʼ ca libana ca la? Jiobá, Bixhózenu ni nuu guibáʼ nga rusiidiʼ laanu ni rieeteʼ lu ca guendaridagulisaa ca guiráʼ iza (Isa. 65:13, 14). Pa racaláʼdxinu gusihuínninu rudiʼnu xquíxepeʼ laabe la? ziuunu guiráʼ dxi gácani ne zucaadiáganu guiráʼ ni chigusiidicabe laanu racá. Yanna, ñee maʼ nuuluʼ listu para cheluʼ guendaridagulisaa roʼ riʼ la?
[Box on page 4]
Cani naquiiñeʼ guietenaláʼdxinu ante gápanu guendaridagulisaa de chonna gubidxa
◼ Pora guzulú ni. Guionnaʼ gubidxa ca zuzulú ni a las 9.20 siadóʼ. Puerta stiʼ lugar ca zaxeleʼ a las 7.00. Ora guzulú xhidxi saa stiʼ Reinu guiranu maʼ naquiiñeʼ cuinu lugar stinu ti ganda guzulú ni modo naquiiñeʼ gaca ni. Viernes ne sábadu zaluxe ni a las 4.55 huadxí, ne domingu zaluxe ni a las 4.00. Ra chigaca ca guendaridagulisaa stiʼ caadxi guidxi roʼ zuzulú ni jueves a la 1.20 huadxí ne zaluxe ni 4.45.
◼ Ra ruzuhuaa carru. Nuu biaje qué ziaxa diʼ ca lugar para guzuhuaa xcárrunu ne ziuu tu gabi laanu paraa guzuhuaʼnu ni. Cani huará si nga zanda guzuhuaa xcarru ra maca dieʼ para laacaʼ, pa nápacaʼ guiʼchiʼ ni caquiiñeʼ para chúʼcabe raqué. Cumu nahuiiniʼ ca lugar ra ruzuhuaa ca carru ca la? galán gúʼyatu pa zanda chetu ndaaniʼ ti carru si.
◼ Ora cueenu lugar. Zanda cueenu lugar para cani zinésinu ndaaniʼ carru o para ca binnilídxisinu.
◼ Guendaró. Jma galán chineluʼ guendaró ti cadi guireeluʼ chisiluʼ ni galaa dxi ora riziiláʼdxinu. Zanda chineluʼ ra chuʼ guendaró stiluʼ, peru gácani nahuiiniʼ biaʼ ganda chuʼ xaʼnaʼ banguʼ. Cadi naquiiñeʼ diʼ chinenu xiixa traste naroʼbaʼ ra chuʼ guendaró ra chigaca guendaridagulisaa ca nin xiixa de vidriu.
◼ Bueltu rudiʼnu. Cumu nabé riniti bueltu nga ora raca ti guendaridagulisaa de chonna gubidxa la? zanda guluinu dxandíʼ riuuláʼdxinu gacanenu ra gudiʼnu bueltu para dxiiñaʼ raca lu guidubi Guidxilayú, zanda gudiʼnu ni ra Yoo stiʼ Reinu o ra cayaca guendaridagulisaa ca. Pa gudiicabe cheque ra cayaca guendaridagulisaa roʼ ca riquiiñeʼ cheni lá «La Torre del Vigía A.R».
◼ Ora málasi gaca xiixa. Cani ruuyaʼ binni ora guizaaca xiixa ca nacaʼ nabé riniʼné binni laaca pur teléfono para xiixa ni cadi naxoopeʼ. Pa málasi gaca huará tuuxa ra cayaca guendaridagulisaa ca la? guniʼné tobi de cani ridxaagalú laanu ora chindanu, laabe nagueendaca zaníʼnebe cani runi dxiiñaʼ Ra Raca Tender cani Guizaaca Xiixa ne maʼ laacaʼ gúʼyacaʼ xi gúnicaʼ.
◼ Ni guicá ñee binni. Guiráʼ iza racaná ñee stale binni pur ni rucaa ñeecaʼ. Jma galán guyubi binni ti zapatu o guelaguidi ni cadi guniná ñee ne gudiini lugar laa quiibaʼ lu escalera ne saʼ lu ca neza ca.
◼ Binni ni qué runadiaga chaahuiʼ. Lu caadxi de ca guendaridagulisaa ca zanda gucaadiágacabe ni lu radiu (FM). Para ganda gucaadiágacabe ni la? naquiiñeʼ gápacabe ti radiu ni napa batería ne audífono.
◼ Grabación. Cadi naquiiñeʼ diʼ gucaʼnu nin ti clase grabadora lu biaaniʼ ni nuu raqué o ra nuu aparatu stiʼ sonidu. Zanda iquiiñenu xiixa aparatu para guni grabarnu peru cadi naquiiñeʼ guchiiñani cani cucaadiaga.
◼ Andadera para baʼduhuiiniʼ ne banguʼ ni guchiiñaʼ. Cadi naquiiñeʼ chinetu cani ra chigaca guendaridagulisaa ca. Peru zanda chinetu banguʼ ra ribí ca baʼduhuiiniʼ ni randa riliibi lu ti banguʼ cueʼ bixhózecaʼ.
◼ Perfume. Stale de ca lugar ra raca ca guendaridagulisaa riʼ deʼguʼ cani ne maca napa cani ximodo gusigaandaʼ cani binni. Cumu deʼguʼ ca lugar ca la? cadi galán diʼ guidxanu stale perfume, purtiʼ zándaca guchiiñani cani napa xiixa guendahuará (1 Cor. 10:24).
◼ Guiʼchiʼ ni láʼ Sírvase visitar. Ora chetu guendaridagulisaa roʼ riʼ la? galán chinetu tobi o chupa guiʼchiʼ ni láʼ Sírvase visitar (S-43-S) para gucaatu lá tuuxa binni ni chuulaʼdxiʼ guiziidiʼ de Stiidxaʼ Dios ora guiníʼnetu laa. Zanda gudiitu guiʼchiʼ ni maʼ bichatu ca Departamento de Publicaciones, o secretariu ni nuu ra ridagulisaatu (laguuyaʼ Xhiiñaʼ Reinu ni Rúninu stiʼ febrero 2005, yaza 6).
◼ Ra restaurán. Pa gápanu xpiaʼnu ora maʼ nuunu ra restaurán la? zusisácanu lá Jiobá. Stale lugar rusaanacabe saca nagaʼndaʼ para cani runi dxiiñaʼ raqué, zanda gusaanatu biaʼ 10 ne 15% biaʼ situ.
◼ Ra hotel. 1) Cadi guinabuʼ stale cuartu ndaaniʼ ca hotel ca pa qué zaquiiñeluʼ guirácani ne cadi uguuluʼ jma binni de biaʼ naguíxhecabe. 2) Pa maʼ qué ziaanuʼ ndaaniʼ hotel ca la? guniʼné laacabe nagueendaca. 3) Biquiiñeʼ ca carru huiiniʼ ra riné binni maleta stiʼ ora iquiiñeluʼ ni ne gudxiguétaluʼ ni nagueendaca para iquiiñeʼ stobi ni. 4) Cadi guʼnuʼ guendaró ndaaniʼ ca cuartu stini pa qué rinácabe. 5) Guiráʼ dxi bisaana saca nagaʼndaʼ stiʼ ni rusiá ndaaniʼ xcuártuluʼ. 6) Cadi guicaaluʼ stale guendaréʼ, café o hielu ni rusigáʼdecabe para iquiiñeʼ ca biuuzaʼ laga nuucaʼ ndaaniʼ hotel ca. 7) Bisihuinni nápaluʼ ca guenda ni rudii espíritu santu guiráʼ ora guiníʼneluʼ cani runi dxiiñaʼ ndaaniʼ hotel ca. Bietenalaʼdxiʼ stale binni nga runi tendércabe, nga runi ziuuláʼdxicabe gácanu nachaʼhuiʼ, nadóʼ ne gápanu paciencia. 8) Biaʼ cá lu lista que nga naquiiñeʼ quíxeluʼ pur dxi, peru aparte nga impuestu stini. Pa gábicabe lii quíxeluʼ jma de biaʼ biquiiñeluʼ la? cadi quíxeluʼ ni ne nagueendaca gudxi ni cani Ruyubi ra Guiaana binni. 9) Pa gápaluʼ xiixa guendanagana ne xcuártuluʼ la? guniʼné cani Ruyubi ra Guiaana binni laga nuuluʼ ra guendaridagulisaa ca.