Chinándanu ejemplu stiʼ Jesús ra gusisácanu laa
1. Xiñee naquiiñeʼ gusisácanu Jiobá lu guendaridagulisaa de chonna gubidxa riʼ.
1 Biblia na Jiobá nga ti Dios ni nandxóʼ ni bizáʼ guidubi naca guibáʼ ne Guidxilayú (Sal. 104:1). Lu guiráʼ ni guníʼ Jesús ne guiráʼ ni biʼniʼ bisihuinni rusisaca Bixhoze ne ca Ley stiʼ (Juan 17:4). Guiranu zanda gusisácanu Jiobá cásica biʼniʼ Jesús, ne zanda gúninu ni lu Guendaridagulisaa de Chonna Gubidxa ni chigápanu ni láʼ «¡Chinándanu Cristu!».
2. Ximodo rusihuínninu rusisácanu Jiobá ora guzulú guendaridagulisaa ca siadóʼ o galaa dxi.
2 Gusisácanu Jiobá ora guni adorarnu laa. Ora ribaʼquiʼ chaahuinu tiempu stinu para chiguizíʼdinu de Jiobá lu ca guendaridagulisaa ca la? rusisácanu laabe. Ñee maʼ guníʼneluʼ patrón stiluʼ ne maʼ gulaʼquiʼ chaahuiluʼ tiempu stiluʼ para cheluʼ guionnaʼ gubidxa stiʼ guendaridagulisaa ca la? Ñee cá íqueluʼ chindaluʼ tempranu ra guendaridagulisaa ca ti ganda guyúbiluʼ ti lugar cuiluʼ ne chuʼluʼ racá ora guiuundaʼ diidxaʼ riuundaʼ ne ora gaca oración ni guzuluné guendaridagulisaa ca la? Ñee maʼ guníʼ íqueluʼ chineluʼ ti guendaró huiiniʼ para góneluʼ binnilídxiluʼ lugar ca la? Ante guzulú guendaridagulisaa ca siadóʼ o galaa dxi la? zadiʼdiʼ ti binnigola ni zaníʼ maʼ zanda chitinu, purtiʼ maʼ chixhidxi saa para guzuluni. Óraca, nagueendaca riquiiñeʼ gusaananu de guininu diidxaʼ ne chuunu lugar stinu ante guzuluni.
3. Ximodo rusihuínninu rusisácanu Jiobá ora rucaadiáganu guiráʼ ni cusiidibe laanu.
3 Laaca rusisácanu Jiobá ora rucaadiáganu guiráʼ libana ridiʼdiʼ lu guendaridagulisaa ca. Biiyaʼ si ti periodista modo guca ti guendaridagulisaa roʼ la? guníʼ tutiica laa ñuuyaʼ modo cayaca guendaridagulisaa que nidxagayaa, purtiʼ «guiráʼ binni ni nuu raqué cucaadiágacaʼ ne rihuinni riuuláʼdxicabe Stiidxaʼ Dios». Ne laaca guniʼbe: «Nidxagayaatu ñuuyatu zubadxí guiráʼ ca baʼduhuiiniʼ nuu raqué ne cuyúbicaʼ ca versículo stiʼ Biblia». Ora maʼ cayaca guendaridagulisaa ca, cadi naquiiñeʼ guininu diidxaʼ, guséʼndanu mensaje lu teléfono, cadi guidoʼno, ne cadi maʼ canazanu cheríʼ chericaʼ. Cani nahuiiniʼ naquiiñeʼ cuínecaʼ bixhózecaʼ ne jñaacaʼ ti ganda gacanecaʼ laacabe (Deu. 31:12; Pro. 29:15). Pa gúninu nga la? zusihuínninu runi respetarnu cani nuu ra guendaridagulisaa ca, ne laaca zusihuínninu cudiʼnu xquíxepeʼ Jiobá pur guiráʼ ni cusiidiʼ laanu.
4. Xiñee naquiiñeʼ gácunu lari jneza ora chuunu guendaridagulisaa de chonna gubidxa ca.
4 Guzuchaahuinu jneza ti gusisácanu Jiobá. Lu guendaridagulisaa de chonna gubidxa ni guca udubiza que, stale tu laa biecheʼ ora gudiʼdiʼ ti libana ni láʼ «Gusihuínninu rusisácanu Jiobá guiráʼ ora». Lu libana que bieeteʼ naquiiñeʼ guni ca xpinni Dios stipa pur gusihuínnicaʼ rusisácacaʼ Dios pur modo ruzuchaahuicaʼ ne pur modo rácucaʼ lari. Iza riʼ laaca naquiiñeʼ gúʼyanu modo gácunu lari. Modo guzuchaahuinu zusihuínnini nadxiinu Jiobá ne laaca zusihuínnini riéchenu nácanu Testigu stibe. Naquiiñeʼ gácunu lari «casi naquiiñeʼ guni ca xpinni Dios» (1 Tim. 2:9, 10).
5. Ximodo naquiiñeʼ gusihuínninu nácanu xpinni Dios ora maʼ nuunu ndaaniʼ guidxi ra cayaca guendaridagulisaa ca.
5 Ñee ora si nuunu ra guendaridagulisaa ca nga naquiiñeʼ gácunu lari jneza la? Bietenalaʼdxiʼ, stale binni zuuyaʼ zinenu tarjeta ni ricá ladxidoʼno ora maʼ canazanu ndaaniʼ guidxi ca. Modo guzuchaahuinu naquiiñeʼ gusihuínnini gadxé laanu de xcaadxi binni. Nga runi, pa chizanu ndaaniʼ guidxi ca o chidoʼno paxaraa guiluxe si guendaridagulisaa ca la? naquiiñeʼ gácunu lari jneza casi modo naquiiñeʼ gacu ti xpinni Dios. Cadi gácunu pantalón ni riguiichiʼ binni ndaaniʼ, pantalón nachucu o sport. Pa guzuchaahuinu galán la? zaníʼ binni galán de laanu ndaaniʼ guidxi ca. Ora gácunu lari ni gusihuinni nácanu xpinni Cristu la? rusiéchenu ladxidóʼ Jiobá.
6. Xi zaníʼ binni ora gúʼyacaʼ rusisácanu Dios.
6 Zusisaca binni Jiobá pur ni gúninu. Dxi chuunu guendaridagulisaa de chonna gubidxa ca naquiiñeʼ gusihuínninu lu guiráʼ ni gúninu nácanu xpinni Cristu, ti ganda guinínenu binni de stiidxaʼ Dios ra tiica nuunu, ne guidxagayaacabe ora gúʼyacabe ximodo laanu. Ti xaíque stiʼ ca pulicia guníʼ sicaríʼ biluxe si ti guendaridagulisaa: «Qué huayuu dxi guidúʼyadu binni ni ruzuubaʼ diidxaʼ casi laatu. Nabánitu casi modo riuulaʼdxiʼ Dios guibani binni». Ora guni respetarsaanu ne gannaxhiisaanu la? rihuinni rusisácanu Jiobá (1 Ped. 2:12). Ora rusisácanu Dios rusihuínninu ridxíbinu guchéʼnenu laabe ne laaca rusihuínninu rudiʼnu xquíxepeʼ laabe purtiʼ cusiidibe laanu (Heb. 12:28). Yanna, laga cabézanu guedandá dxi gaca Guendaridagulisaa de Chonna Gubidxa ni láʼ «¡Chinándanu Cristu!» ca la? naquiiñeʼ gusihuínninu rusisácanu Jiobá.
Cani guietenaláʼdxinu para guendaridagulisaa de chonna gubidxa
◼ Pora guzuluni. Guionnaʼ gubidxa ca zuzuluni las 9.20 siadóʼ. Ca puertaʼ stiʼ lugar ca zaxéleni las 7.00. Ora guzulú xhidxi saa stiʼ Reinu, guiranu maʼ naquiiñeʼ cuinu ti ganda guzuluni modo naquiiñeʼ gácani. Viernes ne sábadu zalúxeni las 5.05 huadxí, ne domingu zalúxeni las 4.10.
◼ Ra ruzuhuaa carru. Qué ziaxa ca lugar rudiicabe para guzuhuaa carru ne ziuu tu zabi lii paraa guzuhuaaluʼ xcárruluʼ. Ca guiʼchiʼ ricá ladxidóʼcabe zaquiiñeʼ ni para guiuucabe. Cani huará si nga zanda guzuhuaacaʼ xcárrucaʼ ra maca dieʼ para laacani, pa nápacaʼ guiʼchiʼ ni caquiiñeʼ para chúʼcabe raqué. Cumu cadi stálepeʼ carru nga zanda guzuhuaa raqué la? galán cheʼ chupa chonna binni ndaaniʼ ti carru si.
◼ Ora cueenu lugar. Zanda cueenu lugar raqué para cani zinésinu ndaaniʼ carru o para ca binnilídxisinu.
◼ Guendaró. Yeneca guendaró stiluʼ ti cadi guireeluʼ chisiluʼ ni galaa dxi ora riziiláʼdxinu. Zanda chineluʼ ra chuʼ guendaró stiluʼ peru gácani nahuiiniʼ biaʼ ganda chuʼ xaʼnaʼ banguʼ. Qué zanda diʼ chinenu xiixa ni naroʼbaʼ, nin xiixa de vidriu o nisa dxuʼniʼ.
◼ Bueltu rudiʼnu. Cumu nabé riniti bueltu nga ora raca ti guendaridagulisaa de chonna gubidxa la? zanda guluinu dxandíʼ riuuláʼdxinu gacanenu ra gudiʼnu bueltu para dxiiñaʼ raca lu guidubi Guidxilayú, zanda gudiʼnu ni ra Yoo stiʼ Reinu o ra cayaca guendaridagulisaa ca. Pa gudiicabe cheque ra cayaca guendaridagulisaa roʼ ca riquiiñeʼ cheni lá «La Torre del Vigía A.R.» ni nuu Méjicu, ne para Belice la? cheni lá «Watch Tower».
◼ Ora málasi gaca xiixa. Pa málasi gaca huará tuuxa ra cayaca guendaridagulisaa ca la? guniʼné tobi de cani ridxagalú laanu ora chindanu, laabe nagueendaca zaníʼnebe cani runi dxiiñaʼ Ra Raca Tender cani Guizaaca Xiixa ne maʼ laacaʼ gúʼyacaʼ ximodo gacanecaʼ.
◼ Grabadora. Cadi naquiiñeʼ diʼ gucaʼnu nin ti clase grabadora lu biaaniʼ ni nuu raqué o ra nuu aparatu stiʼ sonidu, zanda iquiiñenu ca aparatu ca, peru guyúbinu modo cadi guchiiñani cani cucaadiaga.
◼ Perfume. Stale de ca lugar ra raca ca guendaridagulisaa de chonna gubidxa deʼguʼ cani ne maca napa cani ximodo gusigaandaʼ cani binni. Cumu deʼguʼ ca lugar ca la? cadi guidxápenu ca nisa nabé rindáʼ naxhi ca, purtiʼ zándaca guni feu ni binni napa xiixa guendahuará (1 Cor. 10:24).
◼ Formulariu Sírvase visitar. Formulariu Sírvase visitar (S-43) zaquiiñeʼ ni para gucaʼnu lá tuuxa binni ni guninenu ra guendaridagulisaa de chonna gubidxa ca ne racalaʼdxiʼ chigánnacabe laa. Cani rucheeche diidxaʼ naquiiñeʼ chinecaʼ tobi o chupa de ca formulariu riʼ ora checaʼ guendaridagulisaa. Laaca zanda guicaanu guiʼchiʼ riʼ ra rudiicabe libru ne revista ra cayaca guendaridagulisaa roʼ ca. Ni rucheeche diidxaʼ ca zanda gudxiguétabe guiʼchiʼ ca laaca ra gucuaabe ni o pacaa gudiibe ni secretariu ra ridagulisaabe ne maʼ laa guseendaʼ ni ra riquiiñeʼ cheni (laguuyaʼ Xhiiñaʼ Reinu ni Rúninu stiʼ febrero 2005, yaza 6).
◼ Ra restaurán. Stale lugar riquiiñeʼ gusaanacabe saca nagaʼndaʼ para ni runi dxiiñaʼ raqué, zanda gusaanuʼ biaʼ 10 ne 15%, biaʼ dxiiñaʼ ni gúnicabe.
◼ Ra hotel. 1) Cadi guinabuʼ stale cuartu ndaaniʼ ca hotel ca pa qué zaquiiñeluʼ guiráʼ cani ne cadi uguuluʼ jma binni de biaʼ naguíxhecabe. 2) Pa maʼ qué ziaanuʼ ndaaniʼ ni la? guniʼné laacabe nagueendaca. 3) Biquiiñeʼ ca carru huiiniʼ ra riné binni maleta stiʼ, ora si iquiiñeluʼ ni ne gudxiguétaluʼ ni nagueendaca para iquiiñeʼ stobi ni. 4) Cadi guʼnuʼ guendaró ndaaniʼ ca cuartu stini pa qué rinácabe. 5) Guiráʼ dxi bisaana saca nagaʼndaʼ stiʼ ni gusiá ndaaniʼ xcuártuluʼ. 6) Cadi guicaanu stale guendaréʼ, café o hielu ni rusigáʼdecabe para iquiiñeʼ ca biuuzaʼ laga nuucaʼ ndaaniʼ hotel ca ti guihuinni nácanu xpinni Cristu. 7) Bisihuinni guenda ni rudii espíritu santu ora guiníʼneluʼ cani runi dxiiñaʼ ndaaniʼ cani. 8) Pa gápaluʼ xiixa guendanagana ne xcuártuluʼ la? biiyaʼ guiníʼneluʼ cani Ruyubi ra Guiaana binni laga nuuluʼ ra guendaridagulisaa ca.