Usihuínninu cabézanu dxi stiʼ Jiobá
1. Xi láʼ endaridagulisaa ni chigápanu, ne xiñee jnézapeʼ iree lani zacá.
1 Isaías bicaa sicaríʼ: «Jiobá nga ti Dios ni nanna guni juzgar. Guiráʼ cani cabeza laabe ziuucaʼ nayecheʼ.» (Isa. 30:18b). Lu Biblia cá stale historia ni cuzeeteʼ modo biʼniʼ juzgar Jiobá ca xhenemigu ne laaca ruzeeteni modo uleebe ca xpínnibe ni bizuubaʼ stiidxabe ra uyuucaʼ de esclavu. Xi rusiidiʼ ca historia riʼ ca xpinni Dios de yanna yaʼ. Xi zanda gúninu yanna para ihuinni dxandíʼ cabézanu «dxi stiʼ Jiobá, naroʼbaʼ ne ni ruchibi ca» yaʼ (Joel 2:31, 32). Endaridagulisaa de chonna gubidxa «¡Mayaca guilanu!» zucaani laanu iníʼ íquenu de ca endarinabadiidxaʼ ni bizeetenu riʼ ne zucaani laanu idúʼyanu ximodo nuunu. Zacaneni laanu usihuínninu cabézanu dxi stiʼ Jiobá.
2. Ximodo zanda usihuínninu rudiʼnu xquíxepeʼ pur endaridagulisaa de chonna gubidxa chigápanu riʼ.
2 Ñee maʼ udixhe íqueluʼ cheluʼ guionnaʼ gubidxa stiʼ endaridagulisaa riʼ la? Maʼ uníʼneluʼ patrón stiluʼ para inabuʼ permisu stiʼ ca dxi chiguiaadxaluʼ ca la? Cadi iníʼ íqueluʼ zacasi zanda ácani sin guʼnuʼ gastiʼ. Biʼniʼ orar Jiobá ne unabaʼ laabe acanebe lii (Neh. 2:4, 5). Cadi cuézanu dede últimu uyúbinu carru chiné laanu o uyúbinu ra guiaananu o gúninu xcaadxi cosa ni naquiiñeʼ gúninu. Ora dede ante quixhe chaahuinu ni caquiiñeʼ gúninu para chuunu endaridagulisaa ca, rusihuínninu rudiʼnu xquíxepeʼ Jiobá pur iráʼ ni maʼ bíʼnibe para usiidibe laanu iráʼ ni caquiiñeʼ gánnanu para chuʼnu galán ne laabe. Ca binnigola naquiiñeʼ gúnicaʼ stipa pur gacanecaʼ ca bíchinu ne ca bizánanu ni caquiiñeʼ chuʼ tu acané laacaʼ ti ganda checaʼ endaridagulisaa ca, ne ni jma naquiiñeʼ acanécabe nga cani jma nagola nuu ra ridagulisaacabe (Gál. 6:10).
3. Unáʼ ndiʼ ca guenda naquiiñeʼ usihuinni xquidxi Jiobá ra raca ca endaridagulisaa ca.
3 Rusisácanu Jiobá pur modo laanu. Ora maʼ nuunu ra cayaca ti endaridagulisaa naroʼbaʼ casi ca guendaridagulisaa de chonna gubidxa, racaneni binni nabeza gaxha de ra cayaca ni ca uguu naroʼ stiʼ Jiobá ora gúʼyacaʼ modo laanu. Xi rinabaʼ ndiʼ de laanu yaʼ. Ca binni ni inínenu ndaaniʼ ca hotel, ca restaurán ne xcaadxi lugar ra ridoo ni nuu gaxha de ra rápanu endaridagulisaa naquiiñeʼ gatadxí ladxidóʼcabe pur ca guenda ni nápanu casi xpinni cristu ne caadxi de laacani nga: endaquéridxiichi nagueenda, endanadóʼ ne endarapa xpiáʼ ne pur nácanu binni riuu razón (Gál. 5:22, 23; Fili. 4:5). Iranu naquiiñeʼ usihuínninu nadxiinu binni ne qué rininu xiixa ni guniná sti binni, qué ruyúbinu para laasinu ne cadi gastiʼ si gúnicabe laanu maca cadxiichinu. Ne neca chuʼ xiixa endanagana, zuyúbinu gúninu iráʼ cosa para «usisaca [nu] Dios» (1 Cor. 10:31; 13:5).
4. Cani napa xiiñiʼ, ximodo zanda acanécabe xiiñicabe gúnicaʼ ni jneza ne nga ucaa binni usisaca Jiobá.
4 Ora biluxe ti endaridagulisaa, ti gerente stiʼ ti hotel izáʼ bidxagayaabe pur modo stiʼ ca hombrehuiiniʼ ne ca dxaapahuiiniʼ Testigu ne pur modo nácucaʼ lari, ngue bicaa laabe iniʼbe nezalú binni riuuláʼdxibe «gápabe ca testigu stiʼ Jiobá de biuuzaʼ». ¡Izáʼ nga riéchenu ora iníʼ binni zacá! Riníʼ binni zacá purtiʼ maʼ huayuuyacabe stipa ni runi ca xpinni Cristu pur usiniisicaʼ xiiñicaʼ jneza ne gápacaʼ laacabe. Bixhoze ca baʼduʼ ca cadi naquiiñeʼ usaanacaʼ laacabe stúbicabe ndaaniʼ ti hotel. Naquiiñeʼ ti ni huaniisi nga gapa ca baʼduʼ ca (Pro. 29:15). Ribézadu pur modo laatu ca usisácani Jiobá ne usiécheni ladxidoʼbe (Pro. 27:11).
5. Ximodo zanda usisácanu Jiobá pur modo gácunu lari ne uzuchaahuinu.
5 Modo ácunu lari ne uzuchaahuinu jneza. Cada tóbinu zanda acanenu para iníʼ binni galán raca ca endaridagulisaa ca, pa iranu ácunu lari ni cadi usihuinni zinándanu ca moda stiʼ binni guidxilayú. Zanda gúninu cani maʼ bieeteʼ riʼ ora maʼ ziuunu ne ora ibiguétanu de ca endaridagulisaa ca, ne laaca naquiiñeʼ gúninu ni ora racanenu acachaahuiʼ ra chigaca ca endaridagulisaa ca ne ora nuunu ra cayaca cani. Ni jma risaca para ca xpinni Jiobá nga labe ne iníʼ binni galán de laabe ne cadi gúnicabe ni racalaʼdxisícabe. Ni naquiiñeʼ guni cani napa xiiñiʼ nga gúʼyacaʼ gacu ca xiiñicaʼ lari jneza ra tiica nuucaʼ (1 Tim. 2:9).
6. Xiñee naquiiñeʼ ácunu lari jneza ora maʼ ziuunu paxaraa cásica ora maʼ nuunu ra endaridagulisaa.
6 Laaca galán nga uzuchaahuinu jneza ora nuunu ndaaniʼ ca hotel, ne ndaaniʼ ca tienda ca, ne ca restaurán ora maʼ canazásinu. Jma jneza pa ireenenu laca lari ni yenenu endaridagulisaa ca ora chidóʼxhinu. Ne pa chinenu guiʼchiʼ ricá ladxidoʼno ca la? jma nagueenda zanínenu binni de ca diidxaʼ nacubi ne galán ca (2 Cor. 6:3, 4).
7. Ximodo zanda acanenu para aca ca endaridagulisaa ca jneza ne ácani ti dxi nayecheʼ yaʼ. (Laguuyaʼ cuadru ra na «Ni guietenaláʼdxinu para guendaridagulisaa de chonna gubidxa».)
7 Isaías uníʼ: «Jiobá cabeza gueedandá dxi acané laatu, nga runi ziásabe para guiuubaláʼdxibe de laatu» (Isa. 30:18a). Cumu riuubalaʼdxiʼ Jiobá binni ne nachaʼhuiʼ ne laanu la? nga naquiiñeʼ ucaa laanu udiʼnu xquíxepeʼ laabe ne usisácanu laabe pur modo nácanu ne pur modo uzuchaahuinu ora maʼ ziuunu ca endaridagulisaa de chonna gubidxa. Ribézadu uguu Guendaridagulisaa de Chonna Gubidxa «¡Mayaca guilanu!» ca endanaróʼ stiʼ Jiobá ne acané cani laanu usihuínninu dxandíʼ cabézanu dxi stibe.
Ni guietenaláʼdxinu para guendaridagulisaa de chonna gubidxa
◼ Pora uzuluni. Zuzuluni a las 9.30 siadóʼ guionnaʼ gubidxa ca. Ca puertaʼ stini zaxaleʼ a las 7.00. Chupa chonna minutu ante uzuluni, bíchinu ni chiguiníʼ tuu ndiʼ cani chigudii ca libana ca zabibe lu plataforma laga caxidxi saa stiʼ Reinu para uzuluni. Óraca la? iranu maʼ riquiiñeʼ cuinu lu banguʼ stinu ti ganda uzuluni modo naquiiñeʼ ácani. Viernes zaluxe ni a las 5.15 huadxí, ne sábadu a las 5.05 ne domingu zaluxe ni a las 4.10.
◼ Ra ruzuhuaa carru. Qué ziaxa ca lugar rudiicabe para uzuhuaa carru ne ziuu tu zabi lii paraa uzuhuaaluʼ xcárruluʼ. Ca guiʼchiʼ ricá ladxidóʼcabe zaquiiñeʼ ni para guiuucabe. Cani huará si nga zanda uzuhuaa xcárrucaʼ ra maca dieʼ para laacani, pa nápacaʼ guiʼchiʼ ni caquiiñeʼ para chúʼcabe raqué. Cumu cadi stálepeʼ carru nga zanda uzuhuaa raqué la? galán cheʼ chupa chonna binni ndaaniʼ ti carru si, ne cadi cheʼ tobi o chupa si ndaaniʼ cada carru.
◼ Ora cueenu lugar. Zanda cueenu lugar raqué para cani zinésinu ndaaniʼ carru o para ca binnilídxisinu.
◼ Endaró. Yené ca endaró stiluʼ ti cadi ireeluʼ chisiluʼ ni galaa dxi ora riziiláʼdxinu. Zanda chineluʼ ra chuʼ endaró stiluʼ peru ácani nahuiiniʼ biaʼ ganda chuʼ xaʼnaʼ banguʼ. Qué zanda diʼ chinenu xiixa ni naroʼbaʼ, nin xiixa de vidriu o nisa dxuʼniʼ.
◼ Bueltu rudiʼnu. Cumu nabé riniti bueltu nga ora raca ti endaridagulisaa de chonna gubidxa la? zanda uluinu dxandíʼ riuuláʼdxinu acanenu ra udiʼnu bueltu para dxiiñaʼ raca lu idubi Guidxilayú, zanda udiʼnu ni ra Yoo stiʼ Reinu o ra cayaca endaridagulisaa ca. Pa udiicabe cheque ra cayaca endaridagulisaa roʼ ca riquiiñeʼ cheni lá «La Torre del Vigía A.R.» ni nuu Méjicu, ne para Belice la? cheni lá «Watch Tower».
◼ Ora málasi aca xiixa. Pa málasi aca huará tuuxa ra cayaca endaridagulisaa ca la? uniʼné ti bíchinu ni ridxagalú laanu, laabe nagueendaca zaníʼnebe cani runi dxiiñaʼ Ra Raca Tender cani Izaaca Xiixa ne maʼ laacaʼ gúʼyacaʼ ximodo acanecaʼ.
◼ Grabadora. Cadi naquiiñeʼ diʼ ucaʼnu nin ti clase grabadora lu biaaniʼ ni nuu raqué o ra nuu aparatu stiʼ sonidu, zanda iquiiñenu cani, peru uyúbinu modo cadi uchiiñani cani cucaadiaga.
◼ Foto. Pa racaláʼdxiluʼ cueeluʼ foto ora cadiʼdiʼ ca libana ca la? uleeni peru sin biaaniʼ.
◼ Aparatu ni ruyubi binni ne teléfono celular. Naquiiñeʼ uyúbitu modo iquiiñeʼ cani, ti cadi uchiiñaʼ cani binni cucaadiaga.
◼ Perfume. Stale de ca lugar ra raca ca endaridagulisaa de chonna gubidxa deʼguʼ cani ne maca napa cani ximodo usigaandaʼ cani binni.Cumu deʼguʼ ca lugar ca la? cadi idxápenu ca nisa nabé rindaʼ naxhi, purtiʼ zándaca guni feu ni binni napa xiixa endahuará (1 Cor. 10:24).
◼ Formulariu Sírvase visitar. Formulariu Sírvase visitar (S-43) zaquiiñeʼ ni para ucaʼnu lá binni ni chuulaʼdxiʼ ucaadiaga ora inínenu laa de Stiidxaʼ Dios ra endaridagulisaa de chonna gubidxa ca. Cani rucheeche diidxaʼ naquiiñeʼ chinecaʼ tobi o chupa de ca formulariu riʼ ora checaʼ endaridagulisaa. Laaca zanda icaanu formulariu riʼ ra rudiicabe libru ne revista ra cayaca endaridagulisaa roʼ ca. Ni rucheeche diidxaʼ ca zanda udiibe guiʼchiʼ ca ra endaridagulisaa roʼ ca o pacaa udiibeni secretariu ra ridagulisaabe ne maʼ laa useenda ni ra riquiiñeʼ cheni (laguuyaʼ Xhiiñaʼ Reinu ni Rúninu stiʼ febrero 2005, yaza 6).
◼ Ra restaurán. Stale lugar riquiiñeʼ usaanacabe saca nagaʼndaʼ biaʼ 10 ne 15%, biaʼ dxiiñaʼ ni gúnicabe.
◼ Ra hotel. 1) Cadi inabuʼ stale cuartu ndaaniʼ ca hotel ca pa qué zaquiiñeluʼ iráʼ cani ne cadi uguuluʼ jma binni de biaʼ naguíxhecabe. 2) Pa maʼ qué ziaanuʼ ndaaniʼ ni la? uniʼné laacabe nagueendaca. 3) Biquiiñeʼ ca carruhuiiniʼ ra riné binni maleta stiʼ, ora si iquiiñeluʼ ni. 4) Cadi guʼnuʼ endaró ndaaniʼ ca cuartu stini pa qué rinácabe. 5) Iráʼ dxi bisaana saca nagaʼndaʼ stiʼ ni cayuni dxiiñaʼ ndaaniʼ xcuártuluʼ. 6) Cadi icaanu stale endaréʼ, café o hielu ni rusigáʼdecabe para iquiiñeʼ ca biuuzaʼ laga nuucaʼ ndaaniʼ hotel ca ti ihuinni nácanu xpinni Cristu. 7) Bisihuinni guenda ni rudii espíritu santu ora iníʼneluʼ cani runi dxiiñaʼ ndaaniʼ cani, jmaruʼ si ora nápacabe stale dxiiñaʼ casi ora maʼ cucaacabe lá cani chiguiuu o cani chiguiree ndaaniʼ hotel ca.