Zazíʼdinu stale cosa de Jiobá ni zusiecheʼ laanu
1. Ximodo rudii Jiobá ni caquiiñeʼ ca xpinni.
1 Cumu nadxii Jiobá ca xpinni la? nga runi rudiibe laacaʼ guiráʼ ni caquiiñecaʼ ti ganda guni adorarcaʼ laabe. Nga runi, nánnanu ximodo nga naquiiñeʼ guni adorarnu Dios, peru xcaadxi binni qué liica ganna xi guni para chuʼ gaxha de laabe (Isa. 65:13). Ne Jiobá rusiidiʼ ca xpinni lu ca guendaridagulisaa de chonna gubidxa raca guiráʼ iza. Ñee maʼ cayuʼnu listu para chuunu guionnaʼ gubidxa stiʼ guendaridagulisaa ni láʼ «Gudiʼnu lugar gacané espíritu stiʼ Dios laanu» la? ¡Aque stale cosa sicarú nga zazíʼdinu racá xa!
2. Xi guiráʼ naquiiñeʼ gúninu para chuunu guendaridagulisaa de chonna gubidxa.
2 Laquixhe xi gúnitu dede ante. Biblia na: «Ca binni nanna guni dxiiñaʼ la? ribeenducaʼ ni galán.» (Pro. 21:5.) Nga runi, pa racaláʼdxiluʼ cheluʼ guionnaʼ gubidxa stiʼ guendaridagulisaa ca ne caquiiñeʼ guinábaluʼ permisu patrón stiluʼ la? naquiiñeʼ gábiluʼ laabe dede ca yanna. Ñee maʼ napuʼ paraa guiaanaluʼ la? Laaca galán chinenu ni guidoʼno galaa dxi ca ti ganda chúʼnenu ca bíʼchinu ni cheʼ guendaridagulisaa ca. Laaca naquiiñeʼ quixhe íqueluʼ chindaluʼ tempranu guiráʼ dxi, ti zacá gudii tiempu lii guidxélaluʼ lugar ra cuiluʼ ne ganda gúʼndaluʼ ca diidxaʼ riuundaʼ guzuluneni ne gucaadiágaluʼ oración gaca ora guzuluni.
3. Ximodo naquiiñeʼ gácunu lari ora chuunu guendaridagulisaa de chonna gubidxa.
3 Sti cosa ni nabé naquiiñeʼ gúninu dxi ca nga gácunu lari jneza ne guzuchaahuinu jneza (1 Tim. 2:9, 10). Ora raca ca guendaridagulisaa de chonna gubidxa ca zanda guiníʼ binni galán de laanu ndaaniʼ guidxi gácani. Nga runi, pa laanu gácunu lari ni gusihuinni nácanu xpinni Cristu ne zinenu guiʼchiʼ ricá ladxidóʼ cani rié guendaridagulisaa ca la? zudii binni cuenta gadxé laanu de xcaadxi binni ne zaníʼcabe galán de laanu.
4. Xi zacané laanu gucaadiaga chaahuinu ni guieeteʼ lu guendaridagulisaa ca ora zúbanu stúbinu o ne ca binnilídxinu yaʼ.
4 Gucaadiaga chaahuinu. Cadi dxandíʼ guiranu racaláʼdxinu gucaadiáganu guiráʼ libana ni chitiidiʼ lu guendaridagulisaa roʼ ca la? (Pro. 22:17, 18.) Pa guyúbinu ca textu guzeeteʼ bíʼchinu cudii libana ca ne gucaʼnu xiixa de ni caniʼbe la? nga zacané laanu gucaadiaga chaahuinu lu guendaridagulisaa ca. Ne huaxhinni ora maʼ caziiláʼdxinu zanda cueenu cani bicaʼnu para güínenu cani nuu ra nuunu. Lu ca últimu iza huadiʼdiʼ ca huayuuyacabe cani nahuiiniʼ ribicaʼ juntu ora raca ca guendaridagulisaa ca, ne ruiʼcaʼ diidxaʼ ne ruseendacaʼ mensaje ne celular sticaʼ. Pa nápanu xiiñinu la? jma jneza cuinenu laacabe juntu dede ne cani maʼ huaniisi ca para gucaadiáganu ni guieeteʼ, ti zacá cadi cuiné cani nahuiiniʼ ca xcaadxi biaʼca laacaʼ.
5. Xi zanda gúninu ti chuʼnu jma nayecheʼ ra guendaridagulisaa ca.
5 Chúʼnenu ca bíʼchinu nayecheʼ. Jma nanixe ró binni ti guendaró ora cayóneni ca xhamigu (Pro. 15:17). Zacaca nga ca guendaridagulisaa ca jma nayecheʼ ziuʼnu pa guiéʼgunu ca bíʼchinu ne bizáʼnanu nuu lugar ca. Nga runi, ¡nabé galán nga guidxíñanu cani nuu lugar ca para gunibiaʼnu laacaʼ ne zacá guiechenenu laacaʼ! Ante guzuluni ne ora maʼ bilúxeni (Sal. 133:1.) Peru ora quibaʼ bíʼchinu ca lu plataforma ne guiniʼbe maʼ zanda cuinu xlugarnu ante xidxi saa ca la? naquiiñeʼ gábinu bíʼchinu o bizáʼnanu ni caninenu diidxaʼ ca maʼ chitinu ti zacá ganda cuinu ante guzulú guendaridagulisaa ca sti biaje.
6. Bizeeteʼ xiixa ni bizaacaluʼ ni gusihuinni ximodo zanda gucheechenu diidxaʼ guidxi ra raca guendaridagulisaa de chonna gubidxa ca.
6 Chuʼnu listu para gucheechenu diidxaʼ. Ora chuunu ca guendaridagulisaa ca zanda gucheechenu diidxaʼ. Casi nuu tu ritó ra restaurán guiluxe si ca guendaridagulisaa ca, ne stale biaje ca meseru ca rinabadiidxacaʼ laacabe xiñee cá guiʼchihuiiniʼ ca ladxidóʼcabe. Ne zacá huaniʼné ca bíʼchinu laacabe diidxaʼ ne huayábicaʼ laacabe xi runi crenu. Ne stale de ca binni ca dede huayecaʼ ca guendaridagulisaa rápanu.
7. Xiñee naquiiñeʼ chuunu guendaridagulisaa de chonna gubidxa chigaca iza riʼ.
7 Para ganda gaca ca guendaridagulisaa ca la? ca bíʼchinu maʼ biquiiñecaʼ stale tiempu sticaʼ para ganda guni chaahuicaʼ ra chigácani ne gúnicaʼ xcaadxi dxiiñaʼ ne laaca ruuyacaʼ tuu nga chigutiidiʼ ca libana ca. Guiráʼ dxiiñaʼ raca ante de guendaridagulisaa ca rusihuínnini pabiáʼ nadxii Jiobá ca xpinni. ¡Guiranu chuunu ne gucaadiaga chaahuinu ca libana chitiidiʼ lu guendaridagulisaa ca! Ne ora gúninu ni la? qué ziúʼdinu casi nuu binni guidxilayú, sínuque ziuʼnu nayecheʼ purtiʼ nazaaca nuu ladxidoʼno (Isa. 65:14).
Cani naquiiñeʼ guietenaláʼdxinu ante gápanu guendaridagulisaa de chonna gubidxa
◼ Pora guzuluni. Guionna gubidxa ca zuzuluni las 9.20 siadóʼ. Puerta stiʼ lugar ca zaxeleʼ a las 7.00. Ora guzulú xhidxi saa stiʼ Reinu ca, guiranu maʼ naquiiñeʼ cuinu lugar stinu ti ganda guzuluni modo naquiiñeʼ gácani. Viernes ne sábadu zalúxeni las 4.55 huadxí, ne domingu zalúxeni las 4.00.
◼ Ra ruzuhuaa carru. Nuu biaje qué ziaxa diʼ ca lugar para guzuhuaʼnu xcárrunu ne ziuu tu gabi laanu paraa guzuhuaʼnu ni. Ca guiʼchiʼ ricá ladxidoʼno zaquiiñeʼ ni para guiuʼnu lugar ca. Cani huará si nga zanda guzuhuaa xcarru ra maca dieʼ para laacaʼ, pa nápacaʼ guiʼchiʼ ni caquiiñeʼ para chúʼcabe raqué.
◼ Ora cueenu lugar. Zanda cueenu lugar para cani zinésinu ndaaniʼ carru o para ca binnilídxisinu.
◼ Guendaró. Jma galán chineluʼ guendaró ti cadi guireeluʼ chisiluʼ ni galaa dxi ora riziiláʼdxinu. Zanda chineluʼ ra chuʼ guendaró stiluʼ, peru gácani nahuiiniʼ biaʼ ganda chuʼ xaʼnaʼ banguʼ. Qué zanda diʼ chinenu xiixa de vidriu o nisa dxuʼniʼ.
◼ Bueltu rudiʼnu. Cumu nabé riniti bueltu nga ora raca ti guendaridagulisaa de chonna gubidxa la? zanda guluinu dxandíʼ riuuláʼdxinu gacanenu ra gudiʼnu bueltu para dxiiñaʼ raca lu guidubi Guidxilayú, zanda gudiʼnu ni ra Yoo stiʼ Reinu o ra cayaca guendaridagulisaa ca. Pa gudiicabe cheque ra cayaca guendaridagulisaa roʼ ca riquiiñeʼ cheni lá «La Torre del Vigía A.R.».
◼ Ora málasi gaca xiixa. Pa málasi gaca huará tuuxa ra cayaca guendaridagulisaa ca la? guniʼné tobi de cani ridxagalú laanu ora chindanu, laabe nagueendaca zaníʼnebe cani runi dxiiñaʼ Ra Raca Tender cani Guizaaca Xiixa ne maʼ laacaʼ gúʼyacaʼ xi gúnicaʼ.
◼ Binni ni qué runadiaga chaahuiʼ. Guendaridagulisaa ca laaca zanda gucaadiágacabe ni lu radiu (FM) lugar ca. Para ganda gucaadiágacabe ni la? naquiiñeʼ gápacabe ti radiu ni napa bateria ne audífono.
◼ Cadi chinetu andadera para baʼduhuiiniʼ o xiixa banguʼ ni guchiiñaʼ. Cadi naquiiñeʼ chinetu cani ra chigaca guendaridagulisaa ca. Peru zanda chinetu casi ca banguʼ ra ribí ca baʼduhuiiniʼ ni randa riliibi lu ti banguʼ ne maca cayuuyaʼ bixhózecaʼ laacaʼ.
◼ Perfume. Stale de ca lugar ra raca ca guendaridagulisaa de chonna gubidxa deʼguʼ cani ne maca napa cani ximodo gusigaandaʼ cani binni. Cumu deʼguʼ ca lugar ca la? cadi guidxápenu nisa ni nabé rindáʼ naxhi, purtiʼ zándaca guchiiñaʼ ni cani napa xiixa guendahuará (1 Cor. 10:24).
◼ Formulariu Sírvase visitar. Formulariu Sírvase visitar (S-43-S) zaquiiñeʼ ni para gucaʼnu lá tuuxa binni ni güínenu ora maʼ ziuunu guendaridagulisaa de chonna gubidxa ca ne racalaʼdxiʼ chigánnacabe laa. Galán pa chiné cani rucheeche diidxaʼ tobi o chupa de ca formulariu riʼ ora checaʼ guendaridagulisaa. Ni rucheeche diidxaʼ ca zanda gudxiguétabe guiʼchiʼ ca o pacaa gudiibe ni secretariu ni nuu ra ridagulisaabe (laguundaʼ Xhiiñaʼ Reinu ni Rúninu stiʼ febrero 2005, yaza 6).
◼ Ra restaurán. Pa laanu gápanu xpiaanuʼ ora chuunu ra restaurán la? zusicanu lá Jiobá. Stale lugar riquiiñeʼ gusaanacabe saca nagaʼndaʼ para ni runi dxiiñaʼ raqué, zanda gusaanuʼ biaʼ 10 ne 15%, biaʼ siluʼ.
◼ Ra hotel. 1) Cadi guinabuʼ stale cuartu ndaaniʼ ca hotel ca pa qué zaquiiñeluʼ guiráʼ cani ne cadi uguuluʼ jma binni de biaʼ naguíxhecabe. 2) Pa maʼ qué ziaanuʼ ndaaniʼ ni la? guniʼné laacabe nagueendaca. 3) Biquiiñeʼ ca carru huiiniʼ ra riné binni maleta stiʼ ora si iquiiñeluʼ ni ne gudxiguétaluʼ ni nagueendaca para iquiiñeʼ stobi ni. 4) Cadi guʼnuʼ guendaró ndaaniʼ ca cuartu stini pa qué rinácabe. 5) Guiráʼ dxi bisaana saca nagaʼndaʼ stiʼ ni gusiá ndaaniʼ xcuártuluʼ. 6) Cadi guicaanu stale guendaréʼ, café o hielu ni rusigáʼdecabe para iquiiñeʼ ca biuuzaʼ laga nuucaʼ ndaaniʼ hotel ca ti guihuinni nácanu xpinni Cristu. 7) Bisihuinni nápaluʼ ca guenda ni rudii espíritu santu guiráʼ ora guiníʼneluʼ cani runi dxiiñaʼ ndaaniʼ hotel ca. 8) Biaʼ cá lu lista que nga naquiiñeʼ quíxheluʼ pur dxi, peru sin impuestu. Pa gábicabe lii quíxeluʼ jma de biaʼ biquiiñeluʼ la? cadi quíxeluʼ ni ne gúdxini cani Ruyubi ra Guiaana binni laga nuuluʼ ra guendaridagulisaa ca. 9) Pa gápaluʼ xiixa guendanagana ne xcuártuluʼ la? biiyaʼ guiníʼneluʼ cani Ruyubi ra Guiaana binni laga nuuluʼ ra guendaridagulisaa ca.