Ti dxiiñaʼ roʼ ni chigaca lu guidubi Guidxilayú para guieeteʼ Guendaridagulisaa de Chonna Gubidxa «¡Chinándanu Cristu!»
Cani rucheeche diidxaʼ zaguiizicaʼ ti invitación nabé risaca
1 Iza gudiʼdiʼ ca guca ti dxiiñaʼ roʼ lu guidubi Guidxilayú para gunna binni chigápanu ti Guendaridagulisaa de Chonna Gubidxa «¡Mayaca guilanu!». Dxiiñaʼ guca que bicaani stale binni cheʼ guendaridagulisaa que. Guiráʼ binni ni gucuaa invitación ne guyé ra guca guendaridagulisaa que biiyacaʼ pabiáʼ stale nga ni riziidiʼ ca testigu stiʼ Jiobá (Isa. 65:13). Ca binni ni guyé guendaridagulisaa que laaca guyuucaʼ nayecheʼ ra guyuunecaʼ ca xpinni Cristu tobi si (Sal. 133:1). Iza riʼ laaca zaguíʼzinu ti invitación lu guidubi Guidxilayú para guni invitarnu stale binni cheʼ Guendaridagulisaa de Chonna Gubidxa ni láʼ «¡Chinándanu Cristu!».
2 Ni bihuinni iza gudiʼdiʼ ca. Cumu udubiza biʼniʼ invitarnu binni cheʼ Guendaridagulisaa de Chonna Gubidxa «¡Mayaca guilanu!» la? stale periódicu bizeeteʼ de laacani. Ndaaniʼ stale guidxi guyuu periódicu ni guníʼ galán dxiiñaʼ ni biʼniʼ ca Testigu. Casi ndaaniʼ ti guidxi, nabé stale ni bicaa ti periódicu de dxiiñaʼ ni bíʼnicabe. Nani sicaríʼ: «Naroʼbaʼ stipa biʼniʼ ca Testigu ca para gunda biʼniʼ invitarcaʼ guiráʼ binni ni nabeza neza ra lídxicaʼ ante gápacaʼ guendaridagulisaa sticaʼ. Para gunda bíʼnicabe ni la? bicheechecabe diidxaʼ jma de biaʼ rúnicabe, guzácabe jma de biaʼ rizácabe, ne qué nutalepécabe diidxaʼ para bisaanacabe invitación ca». Ndaaniʼ sti guidxi, ca periódicu ne radiu guniʼcaʼ de dxiiñaʼ ni biʼniʼ ca Testigu ne zaqué gunna stale binni dxiiñaʼ ni bíninu. Biaʼ chonna periódicu bizeeteʼ dxiiñaʼ ni bíninu ante gápanu guendaridagulisaa que. Lu tobi de ca periódicu ni riree guiráʼ domingu ti periodista bicaa jma de chupa yaza de cani runi crenu, de xquidxi Jiobá, de invitación ni gudíʼzinu ne de guendaridagulisaa que. Ora ti ni rucheeche diidxaʼ bidii invitación riʼ ti gunaa, binni que guníʼ: «De ndipeʼ cayuundaʼ lu periódicu ca nagasi». Sti binni guníʼ: «Nagásipeʼ biindaʼ ti guiʼchiʼ ni caníʼ de laatu, yanna ¡mápeca nuutu raríʼ! Ñee ndiʼ nga invitación stinneʼ la?». De raqué guníʼrube: «Nabé galán dxiiñaʼ ni cayuni ca testigu stiʼ Jiobá».
3 Stale binni ni guyé primé biaje ra guendaridagulisaa que naazecaʼ invitación sticaʼ lu nacaʼ. Nuu de laacabe beedacabe de guidxi zitu. Ni gucané para cheʼ stale binni guendaridagulisaa que nga stipa ni bíninu para chiguni invitarnu laacaʼ. Pur dxiiñaʼ biʼniʼ ca testigu stiʼ Jiobá udubiza, ti guidxi bizeeteʼ bidale binni ni guyé guendaridagulisaa roʼ purtiʼ guyé 27% jma que ni guyé ti iza ante.
4 Ximodo zanda gusaananenu invitación riʼ guiráʼ binni nabeza neza ra rucheechenu diidxaʼ. Cani rucheeche diidxaʼ zuzulú zaguiizicaʼ invitación ca chonna semana ante gaca guendaridagulisaa de chonna gubidxa sticaʼ, ti ganda gusaananécabe ni guiráʼ binni ni nabeza neza ra rucheechecabe diidxaʼ. Ne pa xiroobaʼ ra rucheechetu diidxaʼ la? ti semana ante de guendaridagulisaa ca zanda gusaanatu ti invitación ndaaniʼ ca yoo ra qué guinni binni, peru sin guʼyaʼ binni laatu. Ca neza binni ridagulisaa zúnicaʼ stipa pur quíʼzicaʼ ca invitación ca ra nuu guiráʼ xixé binni nabeza neza ra rucheechecaʼ diidxaʼ. Pa guiaanaruʼ la? ca precursor ca zanda quiʼziʼ cani.
5 Ni zanda guiniʼluʼ. Sicaríʼ zanda guiniʼluʼ: «Cayúnidu ti dxiiñaʼ lu guidubi Guidxilayú para guni invitardu binni cheʼ ti guendaridagulisaa ni chigápadu. Ndiʼ nga invitación stiluʼ. Luni zanna chaahuiluʼ jma de ni chigaca racá». Pa qué gutálepenu diidxaʼ ora gusaananu invitación ca la? jma stale yoo ziuʼnu. Peru pa guinabadiidxaʼ binni lii xiixa la? bisiene laa ni gunabadiidxaʼ, ne pa gusihuínnibe riuuláʼdxibe la? bicaa labe ne bibiguetaʼ nagueenda yeganna laabe sti biaje.
6 ¡Galán gúninu stipa pur chinándanu Cristu! (Juan 3:36.) Lu guendaridagulisaa de chonna gubidxa ni chigápanu ca zazíʼdinu xi naquiiñeʼ gúninu para chinándanu laabe. Nanna dxíchinu dxiiñaʼ ni chigaca lu guidubi Guidxilayú para gaca invitar binni cheʼ Guendaridagulisaa de Chonna Gubidxa ni láʼ «¡Chinándanu Cristu!», zacaneni ganna binni chigápanu ti guendaridagulisaa. Nga runi, naquiiñeʼ gúnitu stipa pur guni invitartu guiráʼ binni biaʼ gándatiʼ. Rinábadu lú Jiobá guzaabi ndaayaʼ ca stipa guni cada tobi de laatu para ganda gúnitu dxiiñaʼ ni cayuni ca bíʼchitu ne ca bizáʼnatu ni nuu lu guidubi Guidxilayú riʼ.