Ribeendunu ni galán ora riguíʼzinu invitación

Chonna semana ante guzulú guendaridagulisaa de chonna gubidxa zaguíʼzinu invitación ra nuu ca binni ni nabeza neza ra rucheechenu diidxaʼ para guni invitarnu laacaʼ checaʼ ne nápanu stale razón para gúninu dxiiñaʼ riʼ. Ca binni ni huacaa invitación riʼ ne huayecaʼ, nabé ridxagayaacaʼ pabiáʼ galán ca libana ridiʼdiʼ lu guendaridagulisaa riʼ, pabiáʼ nexheʼ chaahuiʼ dxiiñaʼ runi cani racané luni ne pabiáʼ sicarú xpiaʼcaʼ ne nuucaʼ tobi si (Sal. 110:3; 133:1; Is. 65:13, 14). Peru ñee huabeendunu ni galán ora runi invitarnu ca binni ni nabeza zitu de lugar ra raca guendaridagulisaa stinu la?

Biluxe si guendaridagulisaa de chonna gubidxa ni guca lu iza 2011, yendá ti carta ra nuu tobi de ca yoo Betel ni biseendaʼ ti gunaa ni rucaachilú ora guʼyaʼ ca Testigu, laabe bidxélabe ti invitación ra puertaʼ lídxibe. Carta que na: «Nabe sicarú lidxeʼ ne gástiruʼ sti hombre jma nachaʼhuiʼ que xheelaʼ, zácaxaʼ napaʼ guiráʼ ni caquiiñeʼ para guibaneʼ nayecheʼ. Peru dxandipeʼ la? cadi nayecheʼ diʼ nuaaʼ. Ngue bicaa naa chaaʼ guendaridagulisaa ni guca sábadu que neca gupa xidé bisayaʼ carru 320 kilómetru». Nabé guyuuláʼdxibe guendaridagulisaa que dede guníʼnebe xheelabe qué zabiguétabe gueelaʼ que purtiʼ rápabe gana chebe ne domingu. Laabe guniʼbe: «Bicaadiagaʼ guiráʼ libana gudiʼdiʼ luni, binebiaʼyaʼ stale Testigu ne pa ñanda si qué niluxe ni». Ora bibiguétabe ralídxibe bizulú biindanécabe laabe Biblia ne gúcabe ti ni rucheeche diidxaʼ gudiʼdiʼ si tapa beeu. Laabe guniʼbe: «¡Galanpeʼ nga bidxelaʼ ti invitación ra puertaʼ lidxeʼ! Yanna nga dxandipeʼ nabaneʼ nayecheʼ».

Nánnanu zié stale de ca binni ni guicaa invitación stinu guendaridagulisaa. Nga runi, galán gúninu dxiiñaʼ riʼ né stale gana. Yené ca invitación ni guiaana stiluʼ ra cayaca guendaridagulisaa ca para gusaananeluʼ cani tuuxa binni ndaaniʼ guidxi ra nuuluʼ.

[Cuadru ni zeeda lu yaza 5]

Ximodo zanda gusaananu invitación riʼ

Pa racaláʼdxinu gusaananu invitación riʼ biaʼ ra rucheechenu diidxaʼ la? cadi naquiiñeʼ gutálenu diidxaʼ ora gusaananenu ni binni. Zanda guininu sicaríʼ: «Padiuxi. Lu guidubi naca Guidxilayú caguíʼzidu invitación riʼ, ne ñuuladxeʼ nusaananiáʼ lii tobi. Luni zadxélaluʼ ra cusiene jma de laani». Gúninu dxiiñaʼ riʼ né stale gana. Ora quíʼzinu invitación riʼ ca sábadu ne ca domingu, laaca galán gusaananenu binni xiixa revista pa guidúʼyanu zanda gúninu ni.