Gucaadiáganu ti guizíʼdinu
1. Xiñee nabé raca nagana para laanu gucaʼdiáganu ni rieeteʼ lu ca guendaridagulisaa roʼ.
1 Maʼ qué zandaa zuzulú ca guendaridagulisaa de chonna gubidxa ni chigaca lu iza 2013. Maʼ nexheʼ chaahuiʼ guiráʼ ni chitiidiʼ lúcani para ganda guiziidiʼ binni ni nuu lu guidubi naca Guidxilayú de Dios. Ñee maʼ gudixhe chaahuiluʼ tiempu stiluʼ para cadi guiaadxaluʼ nin ti dxi la? Lu ca guendaridagulisaa naroʼbaʼ ca nuu stale cosa ni zanda guchiiñaʼ laanu, nga runi raca nagana para laanu gucaadiaga chaahuinu. Cumu jma xadxí raca ca guendaridagulisaa roʼ ca que ca guendaridagulisaa ni rápanu ra Yoo stiʼ Reinu la? nga runi jma xadxí naquiiñeʼ gucaadiáganu ne cadi gudiʼnu lugar chuʼ xiixa ni guchiiñaʼ laanu. Dxandíʼ, nuu tiru ridxaga binni pur viaje ni runi para cheʼ cani ne pur xcaadxi cosa. Yanna, xi zacané laanu gatananu para gucaʼdiáganu ne zacá guizíʼdinu yaʼ (Deut. 31:12).
2. Xi caquiiñeʼ gúniluʼ para cuʼluʼ listu ladxidoʼloʼ ante ganda guendaridagulisaa roʼ.
2 Ante ganda guendaridagulisaa roʼ. Lu sitiu www.jw.org/es ni nápanu lu Internet zadxélaluʼ ra zeeda guiráʼ tema stiʼ ca libana ni chitiidiʼ lu guendaridagulisaa roʼ ca ne nécani tobi o chupa textu ra biree ca libana ca. Pa nápaluʼ Internet la? zanda gúʼndaluʼ dede ante cani chitiidiʼ lu guendaridagulisaa ca gueelaʼ runi adorárneluʼ binnilídxiluʼ Dios para cuʼtu listu ladxidoʼto (Esd. 7:10).
3. Xi zanda gacané lii para gucaadiaga chaahuiluʼ.
3 Ora maʼ cayaca guendaridagulisaa roʼ. Pa ganda la? guyeca bañu ante guzulú guendaridagulisaa ca. Ne bisuíʼ celular stiluʼ purtiʼ zándaca nuu tu cuidxi lii o guseendaʼ xiixa mensaje ra nuuluʼ ne zándaca uquiinde lii guseendaluʼ xiixa mensaje ora maʼ cayaca guendaridagulisaa ca. Pa naquiiñepeʼ ucaaguiluʼ ni la? gudixhe ni para cadi guchiiñaʼ ni tuuxa ora cuídxicabe lii. Ne pa iquiiñeluʼ tableta electrónica stiluʼ, biyubi modo cadi guchiiñaluʼ cani zuba gaxha de lii. Cadi goloʼ ne cadi gueluʼ gastiʼ ora maʼ cayaca guendaridagulisaa (Ecl. 3:1). Biyadxí ni cutiidiʼ libana ca ne yenanda lu Biblia stiluʼ ora maʼ cayuundacabe xiixa textu. Laaca galán gucaaluʼ caadxi de cani guieeteʼ luni.
4. Xi zanda guni binni para gacané xiiñiʼ gucaadiaga ne guiziidiʼ.
4 Laanu racaláʼdxinu gucaadiaga ca xiiñinu ne guiziidicaʼ. Sicaríʼ na Proverbios 29:15: «Hombrehuiiniʼ ni rudiicabe lugar laa guni ni gacalaʼdxiʼ la? rusituí lú jñaa». Nga runi, jma galán cuiné binni xiiñiʼ, ti gúʼyacaʼ cadi güícabe diidxaʼ ne gucaadiágacabe, ne cadi guseendacabe mensaje o sácabe ndaaniʼ ca neza huiiniʼ stiʼ lugar ra cayaca guendaridagulisaa ca. Dede né cani nahuiiniʼ zanda guiziidicaʼ cuídxicaʼ ne gatanacaʼ neca qué guiénecaʼ guiráʼ ni cayeeteʼ luni.
5. Xiñee galán guzéʼtenu ni bizíʼdinu guiluxe si guendaridagulisaa ne ximodo zanda gúninu ni.
5 Guiluxe si guendaridagulisaa. Cadi gásiluʼ maʼ huaxhinni. Biʼniʼ stipa guiziiláʼdxiluʼ. Gulee chupa chonna minutu para güíneluʼ binnilídxiluʼ ni biziiditu cada dxi, zacá qué ziaandaʼ cani laatu. Pa chineluʼ ca xhamíguluʼ ra restaurán, galán güíneluʼ laacabe tobi o chupa de ca cosa ni jma guyuuláʼdxiluʼ luni, ne zanda iquiiñeluʼ cani bicaaluʼ para gúniluʼ ni. Despué ora guni adorárneluʼ binnilídxiluʼ Dios laguuyaʼ ximodo zanda gúnitu cani biziiditu ca lu xquendanabánitu. Laaca zanda cueetu ti tiempu guiráʼ semana para gúʼndatu cani nacubi biree lu guendaridagulisaa, casi xiixa libru o folletu.
6. Xiñee cadi galán chitísinu ra cayaca ca guendaridagulisaa roʼ.
6 Gastiʼ qué zabeendunu pa guni invitárcabe laanu ti guendaró ne qué guicaa xnixenenu ni. Zacaca nga zanda guizaacanu ne guiráʼ ni maʼ nexheʼ chaahuiʼ para guizíʼdinu lu ca guendaridagulisaa roʼ ni zeeda gaca casi ti guendaró para laanu. Nga runi, galán gúninu stipa pur chuunu guionna gubidxa ca, gucaadiáganu guiráʼ ni guieeteʼ luni ne gúninu cani lu xquendanabáninu.
[Cuadru ni zeeda lu yaza 3 nene 6]
Cani naquiiñeʼ guietenaláʼdxinu ante gápanu guendaridagulisaa de chonna gubidxa stiʼ iza 2013
◼ Pora guzulú ni. Guionnaʼ gubidxa ca zuzulú ni a las 9.20. Puertaʼ stiʼ lugar ca zaxeleʼ a las 8.00. Ora guzulú xhidxi saa stiʼ Reinu guiranu maʼ naquiiñeʼ cuinu lugar stinu ti ganda guzulú ni modo naquiiñeʼ gaca ni. Viernes ne sábadu zaluxe ni a las 4.50, ne domingu zaluxe ni a las 3.35.
◼ Ra ruzuhuaa carru. Nuu tiru qué ziaxa diʼ ra guzuhuaa xcárrunu pa maca biaxa lugar ca o pa cutiiñecabe ni laanu ne ziuu tu gabi laanu paraa guzuhuaa xcárrunu. Cumu nahuiiniʼ ca lugar ra ruzuhuaa ca carru ca la? galán gúʼyatu pa zanda chetu ndaaniʼ ti carru si. Ca carru si ni zanda guzuhuaa lugar ra guleecabe para xcarru ca binni huará nga cani napa si letreru o placa stiʼ ca binni huará.
◼ Ora cueenu lugar. Zanda cueeluʼ lugar para binnilídxiluʼ, cani zineluʼ ndaaniʼ carru o para cani cayuundaneluʼ Biblia. Cumu huaxiéʼ banguʼ nuu para ca binni huaniisi ne para cani huará la? qué zanda diʼ cuiné guiráʼ binnilídxicabe laacabe. Nga runi, rinábadu laatu gusaanatu ca banguʼ ca para ca binni ni maʼ nagola, para cani huará ne para cani gapa laacabe (1 Cor. 13:5).
◼ Guendaró. Jma galán chineluʼ guendaró ti cadi guireeluʼ chisiluʼ ni galaa dxi ora riziiláʼdxinu. Zanda chineluʼ ra chuʼ guendaró stiluʼ, peru gácani nahuiiniʼ biaʼ ganda chuʼ xaʼnaʼ banguʼ. Cadi naquiiñeʼ diʼ chinenu xiixa traste naroʼbaʼ ra chuʼ guendaró lugar ra chigaca guendaridagulisaa ca, nin xiixa traste de vidriu.
◼ Bueltu ni rudiʼnu. Zanda guluinu dxandíʼ riuuláʼdxinu gaca ca guendaridagulisaa ni zeeda gaca casi ti saa para laanu, ra gudiʼnu bueltu para dxiiñaʼ raca lu guidubi Guidxilayú, zanda gudiʼnu ni ra cayaca guendaridagulisaa ca. Pa chuʼ tu gudii cheque ra cayaca guendaridagulisaa roʼ ca la? zanda guseendaʼ ni lu tobi de ca lá napa xquidxi Jiobá nezalú ley (entidad legal). Lu chupa chonna guendaridagulisaa zanda iquiiñenu tarjeta de débito ne de crédito para gudiʼnu bueltu.
◼ Medicina. Pa cayeʼluʼ medicina la? Galán chineluʼ cani, purtiʼ qué gápacabe ca medicina ni bidii doctor stiluʼ lii lugar ra ridagulisaanu ca. Pa nápaluʼ dxiña ne zaquiiñeluʼ xiixa aguxaʼ ne jeringa, cadi guiaandaʼ lii chuʼluʼ cuidadu ora gusáʼbiluʼ ni, purtiʼ zanda guninani binni. Cadi gusábiluʼ ni ndaaniʼ ca bote ra rusáʼbicabe guixi ra ridagulisaanu ne ndaaniʼ ca bote ni nuu ndaaniʼ hotel ra guiaanaluʼ.
◼ Ni guicá ñee binni. Guiráʼ iza racaná ñee stale binni pur ca zapatu rucaa ñeecaʼ, ne jmaruʼ si ora rucaa ñee binni zapatu ni nabé nasoo xtacón. Nga runi, jma galán guyubi binni zapatu o guelaguidi ni cadi guniná ñee ti ganda quibaʼ lu escalera, lu rampa ne cadi gagaʼ ñee ra nexheʼ xiixa rejahuiiniʼ.
◼ Binni ni qué runadiaga chaahuiʼ. Ziuu lugar ra zanda gucaadiágacabe guendaridagulisaa ca lu radiu (FM). Ne para ganda gucaadiaga binni ni la? naquiiñeʼ gapa ti radiu ni napa batería ne audífono.
◼ Andadera para baʼduhuiiniʼ ne banguʼ ni ridopa. Cadi naquiiñeʼ chinetu cani ra chigaca guendaridagulisaa ca. Peru zanda chiné binni banguʼ ra cuí ca baʼduhuiiniʼ ca pa zanda guiliibi ni lu ti banguʼ ni nuu cueʼcaʼ.
◼ Nisa rindáʼ naxhi. Stale lugar ra raca ca guendaridagulisaa riʼ deʼguʼ cani ne maca napa cani modo gusigaandaʼ cani binni. Cumu deʼguʼ ca lugar ca la? cadi galán diʼ guidxá xhaatanu nisa rindáʼ naxhi, purtiʼ zándaca guchiiñani cani napa xiixa guendahuará (1 Cor. 10:24).
◼ Guiʼchi ni láʼ Sírvase visitar (S-43-S). Lu guiʼchiʼ ni láʼ Sírvase visitar zanda gucaatu lá tuuxa binni ni chuulaʼdxiʼ guiziidiʼ de Stiidxaʼ Dios ora guiníʼnetu laa ra tiica nuutu. Zanda chisaanatu guiʼchiʼ ni maʼ bichatu ca ra Departamento de Publicaciones, o gudiitu ni secretariu stitu guibiguétasitu de guendaridagulisaa roʼ.
◼ Restaurán. Ora nuu tuuxa ndaaniʼ ti restaurán ne gusihuinni galán xpiaʼ la? rusisaca lá Jiobá. Nga runi, galán gácunu lari jneza casi runi ti xpinni Cristu. Pa maʼ biaacabe gusaanacabe saca nagaʼndaʼ ca lugar ca la? laguni ni.
◼ Hotel.
1) Cadi guinabuʼ stale cuartu ndaaniʼ ca hotel ca pa qué zaquiiñeluʼ guirácani ne cadi uguuluʼ jma binni de biaʼ naguíxhecabe.
2) Pa gueeda guizaacaluʼ xiixa ne maʼ qué zanda guiaanaluʼ ndaaniʼ hotel ca la? guniʼné laacabe nagueendaca ti ganda iquiiñeʼ sti binni cuartu ca (Mat. 5:37). Ne bicaa númeru ni gudiicabe lii ora guni cancelarluʼ ni. Pa guni cancelarluʼ cuartu ca chupa gubidxa ante la? maʼ qué zudxiguetaʼ diʼ hotel ca xpuéltuluʼ.
3) Bietenalaʼdxiʼ, pa iquiiñeluʼ ti tarjeta de crédito o de débito ora guicá laluʼ para guiaanaluʼ ndaaniʼ hotel ca, zándaca ziaananécabe sti ndaa xpuéltuluʼ jma que biaʼ naquiiñeʼ quíxeluʼ cuartu ca para guiaxa xiixa ni málasi gueeda guizaaca ca dxi nuuluʼ ndaaniʼ ni. Ne tiidiʼ si chupa chonna gubidxa de biseeguʼ hotel ca cuenta stiluʼ maʼ zanda gudxiguétacabe lii xpuéltuluʼ.
4) Ne ora maʼ nuu ca maleta stiuʼ listu óraca nga maʼ zanda chicaaluʼ carru huiiniʼ ra riné binni maleta stiʼ ne bidxiguetaʼ ni nagueenda para iquiiñeʼ stobi ni.
5) Bisaana saca nagaʼndaʼ stiʼ ca binni ni racané lii né ca maleta stiluʼ ne zacaca biʼniʼ né cani rusiá ndaaniʼ xcuártuluʼ guiráʼ dxi.
6) Cadi guʼnuʼ guendaró ndaaniʼ ca cuartu stini pa qué rinácabe.
7) Cadi guicaaluʼ stale guendaréʼ, café o hielu ni rudiicabe ca biuuzaʼ laga nuucaʼ ndaaniʼ hotel.
8) Bisihuinni nápaluʼ ca guenda ni rudii espíritu santu ora guiníʼneluʼ ca binni runi dxiiñaʼ ndaaniʼ hotel ca. Bietenalaʼdxiʼ, stale binni nga runi tendércabe. Nga runi, ziuuláʼdxicabe gácanu nachaʼhuiʼ, nadóʼ ne gusihuínninu nápanu paciencia.
9) Nabé risaca nga gapaʼ binni xiiñiʼ ora maʼ nuucaʼ ndaaniʼ hotel, ora iquiiñecaʼ elevador, ora chuʼcaʼ ndaaniʼ alberca, ora maʼ nuucaʼ ra ridxagalúcabe binni ndaaniʼ hotel ne ora maʼ nuucaʼ ndaaniʼ gimnasio.
10) Biaʼ cá lu guiʼchiʼ ni láʼ Lista de hoteles recomendados ca nga naquiiñeʼ quíxeluʼ cada dxi, peru aparte nga impuestu stini. Pa gábicabe lii quíxeluʼ jma de biaʼ biquiiñeluʼ la? cadi quíxeluʼ ni ne nagueendaca gudxi ni cani ruyubi ra guiaana cani cheʼ guendaridagulisaa.
11) Pa gápaluʼ xiixa guendanagana né xcuártuluʼ la? guniʼné cani ruyubi ra guiaana binni laga cayaca guendaridagulisaa ca.
◼ Para cani riuulaʼdxiʼ gacané. Guiráʼ cani racalaʼdxiʼ gacané la? naquiiñeʼ checaʼ ra ricá lá cani riuulaʼdxiʼ gacané. Cani caʼruʼ gusaa 16 iza laaca zanda gacanecaʼ, peru naquiiñeʼ guʼyaʼ bixhózecaʼ, jñaacaʼ o sti binni huaniisi laacaʼ.