Cani naquiiñeʼ guietenaláʼdxinu ante gápanu asamblea regional
Pora guzulú ni. Guionnaʼ gubidxa ca zuzulú ni a las 9:20 siadóʼ. Puertaʼ stiʼ lugar ca zaxeleʼ a las 8.00. Ora guzulú xhidxi saa stiʼ Reinu guiranu maʼ naquiiñeʼ cuinu lugar stinu ti ganda guzulú ni modo naquiiñeʼ gaca ni. Viernes ne sábadu zaluxe ni biaʼ las 5:00 huadxí, ne domingu zaluxe ni biaʼ las 4:00.
Diidxaʼ riuundaʼ para gusisácanu Jiobá. Dxiqué bisisaca xquidxi Jiobá laa ne diidxaʼ riuundaʼ. Yanna riʼ laaca riquiiñeʼ xquídxibe diidxaʼ riuundaʼ para guni adorarcaʼ laabe (Sal. 28:7). Ante guzulú guiráʼ ca asamblea regional ruzulú cani né caadxi diidxaʼ riuundaʼ. Cadi intiica si diidxaʼ riuundaʼ cani; guca cani para guni adorarnu Jiobá ne guizíʼdinu jma de laabe. Nga runi, ora guiníʼ presidente stiʼ asamblea ca chixhidxi diidxaʼ riuundaʼ ca, guiranu naquiiñeʼ cuinu ne gucaʼdiáganu cani, lugar guininu diidxaʼ. Zacá zusihuínninu rusisácanu guiráʼ stipa biʼniʼ ca hermanu nuu lu orquesta stiʼ Watchtower. Chupa biaje lu ti iza riécabe Patterson (Nueva York) para guni grabárcabe ca diidxaʼ riuundaʼ sicarú rucaʼdiáganu ne laacabe riguíxecabe pasaje stícabe. Despué de gucaʼdiáganu diidxaʼ riuundaʼ ca, zusisácanu Jiobá ora guidúʼndanu caadxi diidxaʼ riuundaʼ stiʼ Reinu.
Ra ruzuhuaa carru. Nuu lugar qué ziaxa diʼ ra guzuhuaa carru stitu ne ziuu tu gabi laatu paraa guzuhuatu ni. Cumu cadi xiroobaʼ lugar ra ruzuhuaa ca carru ca la? galán gúʼyatu pa zanda chetu ndaaniʼ ti carru si. Ca carru ni napa si placa o letreru ni gusihuinni necaʼ binni huará nga cani zanda guzuhuaacabe ra maca biaana para laacani.
Ora cueenu lugar. Ora guixeleʼ puertaʼ stiʼ lugar ca guiráʼ siadóʼ, cadi guxooñetu para chindeetu lugar casi ñaca nuutu guni ganartu xcaadxi. Naquiiñeʼ gusihuínninu jma rizaaláʼdxinu xcaadxi purtiʼ zacá zuuyaʼ binni dxandíʼ xpinni Cristu laanu ne zucaa nga laacaʼ gusisácacaʼ Dios (Juan 13:34, 35; 1 Cor. 13:5; 1 Ped. 2:12). Zanda cueeluʼ lugar para ca binnilídxiluʼ, cani zineluʼ ndaaniʼ carru o para cani cayuundaneluʼ Biblia. Laaca ziuu caadxi lugar para cuiʼ ca binnigola ne ca binni huará. Cadi quíxheluʼ xiixa lu ca banguʼ ca pa qué zaquiiñeluʼ cani. Zacá jma nagueenda zanna binni xi banguʼ zanda iquiiñecaʼ. Maca nuu paraa cuíʼ cani maʼ nagola ne cani huará. Cumu cadi stale diʼ lugar nuu la? cadi guiráʼ diʼ biaje zanda cuiné binnilídxicabe laacabe. Rinábadu laatu, gusaanatu ca lugar ca para cani maʼ nagola ne cani maʼ huará ne cani cayapa laacabe.
Gácunu lari jneza. Naquiiñeʼ gácunu lari jneza ora chuunu asamblea, ne cadi chinándanu moda stiʼ binni guidxilayú (1 Tim. 2:9). Laaca cadi naquiiñeʼ gácunu lari modo tiica si casi ora zinándanu cani caree de moda ora chindanu ndaaniʼ xiixa hotel ne últimu dxi guireʼnu ndaaniʼ ni ne ora chuunu paxaraa ante ne despué de guiluxe cada dxi stiʼ guendaridagulisaa roʼ. Pa gúninu zacá la? ziéchenu sánenu tarjeta ni ricá ladxidoʼno ne qué zatuí diʼ lunu guinínenu binni de stiidxaʼ Dios ora gúʼyanu zanda gúninu ni. Pa gácunu lari jneza ne sanu jneza ca dxi chigápanu asamblea regional la? qué zacanésinu binni ni nayá ladxidóʼ chuulaʼdxiʼ gucaadiaga stiidxaʼ Dios, sínuque laaca zusiéchenu Jiobá (Sof. 3: 17).
Modo iquiiñeluʼ celular ne tableta. Pa cá íqueluʼ chineluʼ ti celular o ti tableta la? galán quíxheluʼ ni modo cadi guchiiñaʼ ni sti binni. Pa chiguiquiiñeluʼ ti cámara para cueeluʼ foto, guni grabarluʼ videu, iquiiñeluʼ ti tableta o sti equipu, galán gúniluʼ cadi guchiiñaluʼ cani cucaadiaga o guchiiluʼ lúcabe ora cayuuyacabe lu plataforma. Pa cadi caquiiñepeʼ guseenduʼ mensaje de textu o correu electrónicu la? cadi gúniluʼ ni, zacá zusihuínniluʼ runi respetarluʼ cani zuba gaxha de lii.
Guendaró. Jma galán chinetu guendaró ti cadi guireetu chisitu ni galaa dxi ora riziiláʼdxinu. Zanda chinetu ra chuʼ guendaró stitu, peru gaca ni biaʼ ganda chuʼ xaʼnaʼ banguʼ. Cadi chinetu xiixa traste naroʼbaʼ nin xiixa de vidriu.
Bueltu rudiʼnu. Zanda guluinu dxandíʼ riuuláʼdxinu gaca ca guendaridagulisaa ca ra gudiʼnu bueltu para dxiiñaʼ raca lu guidubi naca Guidxilayú dxi cayaca guendaridagulisaa ca. Pa chuʼ tu gudii cheque ra cayaca guendaridagulisaa riʼ riquiiñeʼ guicá ni lu lá «La Torre del Vigía, A.R.». Nuu lugar zanda gudiiluʼ ni ne tarjeta de crédito o débito.
Medicina. Pa cayeʼluʼ medicina la? galán chineluʼ cani, purtiʼ qué gápacabe ca medicina ni bidii doctor stiluʼ lii lugar ra ridagulisaanu ca. Aguxaʼ ne jeringa ni iquiiñeʼ binni napa dxiña la? cadi naquiiñeʼ cúʼcabe cani ndaaniʼ intiica si bote guixi nuu lugar chigaca guendaridagulisaa ca nin ni nuu ndaaniʼ ca hotel ca, napa xidé gúʼyacabe paraa naquiiñeʼ cúʼcabe cani.
Para cadi guizaacanu xiixa. Naquiiñeʼ gápanu laanu para cadi guirenda ñeenu o guiábanu. Guiráʼ iza racaná ñee stale binni pur ni rucaa ñeecaʼ, ne jmaruʼ si pur ca tacón soo. Nga runi, galán gucaañee binni zapatu o guelaguidi ni cadi guniná ñee ti ganda quibaʼ lu escalera, rampa o saʼ lu ca neza ra nexheʼ rejahuiini.
Binni ni qué runadiaga chaahuiʼ. Nuu lugar zanda gucaadiágacabe guendaridagulisaa ca lu radiu (FM). Peru chinécabe ti radiu ni riquiiñeʼ bateriá ne napa audífono.
Carriola ne banguʼ ni ridopa. Cadi naquiiñeʼ chinetu cani ra chigaca guendaridagulisaa ca. Peru zanda chiné binni xiixa ra cuí ca baʼduhuiiniʼ ca pa zanda guzuhuaa ni ne guiliibi ni lu ti banguʼ.
Nisa rindáʼ naxhi. Stale ra raca ca guendaridagulisaa riʼ daʼguʼ cani purtiʼ nápacani modo gusigaandacani lugar ca. Cumu daʼguʼ cani la? cadi galán diʼ guidxanu stale nisa rindáʼ naxhi, purtiʼ zándaca guchiiñani cani napa xiixa guendahuará (1 Cor. 10:24).
Restaurán. Zusisácanu lá Jiobá pa gápanu xpiaʼnu ora maʼ nuunu ndaaniʼ ti restaurán. Nga runi galán gácunu lari jneza casi racu ti xpinni Cristu. Pa maʼ biaacabe gusaanacabe saca nagaʼndaʼ ca lugar ca la? laguni ni.
Hotel:
Cadi guinábaluʼ cuartu ni qué zaquiiñeluʼ ndaaniʼ ca hotel ca ne cadi uguuluʼ jma binni de biaʼ naguíxhecabe chuʼ ndaaniʼ cani.
Pa gueeda guizaacaluʼ xiixa ne maʼ qué zanda guiaanaluʼ ndaaniʼ hotel ca la? guniʼné laacabe nagueendaca ti ganda iquiiñeʼ sti binni cuartu ca (Mat. 5:37). Ne bicaa númeru ni gudiicabe lii ora guni cancelarluʼ ni. Pa guni cancelarluʼ cuartu ca chupa gubidxa ante la? maʼ qué zudxiguetaʼ diʼ hotel ca xpuéltuluʼ.
Bietenalaʼdxiʼ, pa iquiiñeluʼ ti tarjeta de crédito o de débito ora guicá laluʼ para guiaanaluʼ ndaaniʼ hotel ca, zándaca ziaananécabe sti ndaa xpuéltuluʼ, jma que biaʼ naquiiñeʼ quíxeluʼ cuartu ca, para guiaxa xiixa ni málasi gueeda guizaaca ca dxi nuuluʼ ndaaniʼ ni. Ne tiidiʼ si chupa chonna gubidxa de biʼniʼ hotel ca cuenta stiluʼ maʼ zanda gudxiguétacabe xpuéltuluʼ.
Ne ora maʼ nuu ca maleta stiluʼ listu nga maʼ zanda chicaaluʼ carruhuiiniʼ ra riné binni maleta stiʼ ne bidxiguetaʼ ni nagueenda para iquiiñeʼ stobi ni.
Bisaana saca nagaʼndaʼ stiʼ ca binni ni gacané lii né ca maleta stiluʼ ne zacaca biʼniʼ né cani gusiá ndaaniʼ xcuártuluʼ.
Cadi guʼnuʼ guendaró ndaaniʼ ca cuartu stini pa qué rinácabe.
Cadi chineluʼ ra guendaridagulisaa ca cani rudiicabe ra hotel casi guendaréʼ, café o hielu ni rudiicabe ca biuuzaʼ laga nuucaʼ ndaaniʼ hotel ca.
Bisihuinni nápaluʼ ca guenda ni rudii espíritu santu guiráʼ ora guiníʼneluʼ cani runi dxiiñaʼ ndaaniʼ hotel ca. Bietenalaʼdxiʼ, stale binni nga runi tendércabe, nga runi ziuuláʼdxicabe gácanu nachaʼhuiʼ, nadóʼ ne gusihuínninu nápanu paciencia.
Nabé risaca nga gapa binni xiiñiʼ ora maʼ nuucaʼ ndaaniʼ hotel, ora iquiiñecaʼ elevador, ora chuʼcaʼ ndaaniʼ alberca, ora maʼ nuucaʼ ra ridxaagalúcabe binni ndaaniʼ hotel ne ora maʼ nuucaʼ ndaaniʼ gimnasio.
Biaʼ cá lu guiʼchiʼ ni láʼ Lista de hoteles recomendados ca nga naquiiñeʼ quíxeluʼ cada dxi, peru aparte nga impuestu stini. Peru pa gábicabe lii quíxeluʼ jma de biaʼ biree cuenta stiluʼ la? cadi quíxeluʼ ni ne nagueendaca gudxi ni Cani Ruyubi ra Guiaana Binni ni cheʼ guendaridagulisaa.
Pa gápaluʼ xiixa guendanagana né hotel ca pur cuartu stiluʼ, guniʼné Cani Ruyubi ra Guiaana Binni laga cayácaruʼ guendaridagulisaa ca.
Para cani racalaʼdxiʼ gacané. Guiráʼ cani rapa gana gacané la? naquiiñeʼ checaʼ ra ricá lá cani racalaʼdxiʼ gacané. Cani caʼruʼ gusaa 16 iza laaca zanda gacanecaʼ, peru naquiiñeʼ guʼyaʼ bixhózecaʼ, jñaacaʼ o sti binni huaniisi ni guiníʼcabe zanda gapa laacaʼ.