Saa ni riguu gana
1 Ca diidxaʼ riuundaʼ ne ca saa stini ca la? laaca risaca cani para guni adorarnu Jiobá. Ndaaniʼ guidxi Israel de dxiqué la? Asaf ne ca biʼchiʼ biindacaʼ sicaríʼ: «¡Lagudii xquíxepeʼ Jiobá [...]! Laguundaʼ para laabe, laguni cansión para laabe, laguiníʼ ique de guiráʼ ca guendaridxagayaa ni bizaʼbe» (1 Cró. 16:8, 9). Yanna riʼ laaca rúʼndanu para Jiobá guiranu ora ridagulisaanu guiráʼ semana (Efe. 5:19). Ñee cadi ora ca nga zanda gusisácanu lá Jiobá la? (Sal. 69:30.)
2 Ucaadiáganu ca Melodías del Reino (Saa stiʼ Reinu) ni ruxhidxi orquesta ca laaca zanda acané cani guiníʼ íquenu de Jiobá. Sicaríʼ guníʼ ti bizánanu: «Ora rixidxi ca saa ca la? rietenalaʼdxeʼ xi ná cani ndaaniʼ iqueʼ. ¡Guizáʼ sicarú nga zacá para guinieʼ iqueʼ de Jiobá ne maca cucaadiagaʼ ca saa stini!» (Fili. 4:8.)
3 Ora zanda ucaadiáganu cani. Ucaadiáganu ca Melodías del Reino ca racané cani para chuʼ guendarannaxhii ra lídxinu ne guietenaláʼdxinu de Jiobá ne zacá riuu guendariuudxi ra nuunu. Sicaríʼ bicaa ti familia: «Riguíxhedu [saa] riʼ guiráʼ ora ra yoo ne ora maʼ ziuudu ndaaniʼ carru, ne qué liica rireʼdu gana cani purtiʼ sicarú nexhechaahuiʼ cani dede rindá cani ladxidoʼdo. Nabé rudii ca Melodías del Reino ca laadu guendariuudxi ni caquiiñedu ora maʼ cayuʼdu listu para chuudu ca guendaridagulisaa ca o ti guendaridagulisaa roʼ.» Ti bizánanu bizeeteʼ: «Dxandipeʼ racané cani naa stálepeʼ ora rucaadiaga cani laga cayuneʼ dxiiñaʼ ndaaniʼ yoo... ¡tu niníʼ ique de que ñuaa nayecheʼ ora maʼ cuzeechuaʼ lari ni deruʼ gudiibeʼ! Maʼ gudixhe iqueʼ ucaadiagaʼ ca saa ca ora maʼ nuaa triste. ¡Guizáʼ riguu cani stale gana! [...] Guiráʼ ca cansión stini rusiecheʼ cani naa». Ñee caníʼ íqueluʼ xi sti ora zanda ucaadiágaluʼ ca saa ni riguu gana ne ni zanda acané lii riʼ la?
4 Stale de ca saa ni nuu yanna riʼ rusihuinni cani modo riníʼ ique binni Guidxilayú. Cani napa xiiñiʼ la? zanda iquiiñecabe ca Melodías del Reino riʼ para acanécabe xiiñicabe chuláʼdxicaʼ saa sicarú ni racané guiníʼ ique binni ni galán. Stale de cani rúʼndanenu Biblia ne cani riulaʼdxiʼ iziidiʼ la? laaca ziuláʼdxicaʼ ucaadiágacaʼ ca cansión sicarú ni riguu gana ne ni rusisaca Jiobá riʼ (Sal. 47:1, 2, 6, 7).