Ndaa ra rinabadiidxaʼ

◼ Ximodo jma jneza useendanu bueltu para ca bíchinu ne ca bizánanu ni caquiiñecaʼ ni sti guidxi.

Nuu biaje ránnanu de ca bíchinu ne ca bizánanu de sti guidxi ni caquiiñecaʼ acanenu laacaʼ purtiʼ nuu tu canazananda laacaʼ, purtiʼ bininá nisaguié laacaʼ o uca xu ra nuucaʼ o pur xcaadxi endanagana ni cadíʼdicaʼ. Nuu cani rucheeche diidxaʼ huaseendacaʼ bueltu Betel stiʼ ca guidxi ca, ne zándaca riníʼcabe tu laapeʼ nga iquiiñeʼ ni o para ti neza binni ridagulisaa o para xiixa yoo ni cabí (2 Cor. 8:1-4).

Galán nga chuʼnu xizaa pur ca bíchinu ne ca bizánanu Testigu, peru nuu biaje jma nga caquiiñeʼ acanécabe sti ladu que ra caníʼ ique ni cudii bueltu ca. Ne nuu biaje mápeca uca tender ra canábacabe iquiiñeʼ bueltu ni biseendacabe ca. Ora ruseendanu bueltu Betel para dxiiñaʼ raca idubi Guidxilayú, Bueltu para ca Yoo stiʼ Reinu o para acanécabe ra bizaaca xiixa la? naquiiñeʼ gánnanu de que bueltu ca zaquiiñeʼ ni para ni biseendanu ni.

Cani nuu Betel maca nánnacaʼ xi gúnicaʼ para acanecaʼ nagueendaca ora málasi izaaca xiixa ni zándaca guniná ca bíchinu ne ca bizánanu, ne intiica si aca maca ziyábicabe ni Grupu ni Zaniruʼ. Pa caquiiñeruʼ acanécabe la? Grupu ni Zaniruʼ ca rábicabe sti Betel ni nuu gaxha acané o Betel ra nuu Grupu ni Zaniruʼ ca ruseendaʼ bueltu ni caquiiñeʼ (2 Cor. 8:14, 15).

Nga runi, pa tuuxa racalaʼdxiʼ udii bueltu para dxiiñaʼ raca idubi Guidxilayú, para cuí xiixa yoo sti guidxi o para acanécabe ra bizaaca xiixa la? jma jneza nga useendabe ni Betel ni nuu xquídxibe o pacaa useendabe ni ora cheʼ bueltu stiʼ ca binni ridagulisaa. Zacá la? «mozo ni nuu xpiaaniʼ ne ni runi jneza» ca zúnicabe cani casi maca udixhe Grupu ni Zaniruʼ ca aca cani, ti ganda aca tender ca bíchinu ne ca bizánanu ni nuu lu idubi Guidxilayú jma jneza (Mat. 24:45-47; 1 Cor. 14:33, 40).