8 ndaa: Acanenu cani cayúʼndanenu chuʼcaʼ ndaaniʼ xquidxi Jiobá
Gúʼndanenu binni modo ganda iniisi jma lu Stiidxaʼ Dios
1. Xiñee galán nga usíʼdinu binni ni cayúʼndanenu caadxi de ni raca ndaaniʼ xquidxi Jiobá iráʼ semana.
1 Ora rigúʼndanenu binni Biblia la? cadi para usíʼdisinu laacabe de laani, ni racaláʼdxinu nga chúʼcabe ndaaniʼ xquidxi Jiobá (Zac. 8:23). Zanda iquiiñenu folletu Los testigos de Jehová: ¿quiénes son y qué creen? para acané laanu. Bidii ti folletu riʼ cani nacubi caziidiʼ de Dios ne gudxi laacabe gúʼndacabe ni. Ulee ti tiempu huiiniʼ para usiidiluʼ laacabe caadxi de ni raca ndaaniʼ xquidxi Jiobá.
2. Ximodo zanda uguʼnu gana cani rúʼndanenu Biblia para checaʼ ca endaridagulisaa rápanu.
2 Ca endaridagulisaa: Para ganda usisaca binni ni cayúʼndanenu ca xquidxi Jiobá la? naquiiñeʼ chinenu laacabe ca endaridagulisaa ca (1 Cor. 14:24, 25). Nga runi, zanda uzulú gábinu laacabe ximodo raca iráʼ ca endaridagulisaa rápanu ndaaniʼ ti semana. Bizeeteʼ xi láʼ libana ni chitiidiʼ sti domingu ca. Biluíʼ laacabe xi chiguiuuda lu La Atalaya ne xi chiguiuunda ra rié Grupuhuiiniʼ ni Ruundaʼ Libru stiʼ ca Binni Ridagulisaa. Bisiene ximodo raca Scuela stiʼ cani Rucheeche Diidxaʼ ne Guendaridagulisaa stiʼ Dxiiñaʼ Stinu. Zanda gúʼndaneluʼ laabe libana ni chigutidiiluʼ ra Scuela stiʼ cani Rucheeche Diidxaʼ. Uniʼné laabe de cani jma naquiiñeʼ iziidibe ni bieeteʼ ra ridagulisaanu. Biquiiñeʼ ca dibuju ni cá lu ca libru o lu ca revista ca ti gánnabe ximodo raca cani. Biʼniʼ invitar laabe chebe ca endaridagulisaa stinu primé ca biaje chigannuʼ laabe.
3. Xi chupa chonna cosa raca ndaaniʼ xquidxi Jiobá zanda ininu.
3 Ora maʼ zeeda idxiña dxi guietenaláʼdxinu guendaguti stiʼ Jesús, gueeda binnigola ni riganna ca binni ridagulisaa o chigaca ti guendaridagulisaa roʼ la? ulee chupa chonna minutu para usiéneluʼ laacabe xii nga cada tobi de laaca ni ne uluu gana laacabe para chécabe. Bisiene laacabe chaahuiʼ chaahuiʼ ca endarinabadiidxaʼ riʼ: Xiñee lanu testigu stiʼ Jiobá. Xiñee rábinu ra ridagulisaanu Yoo stiʼ Reinu. Xi dxiiñaʼ runi ca binnigola ne ca siervu ministerial. Xi raca ante para chigucheechenu diidxaʼ ne ximodo riguíxhecabe paraa chuunu. Ximodo raca ca libru ne ca revista stinu. Ximodo reeda bueltu ni riquiiñeʼ ndaaniʼ xquidxi Jiobá. Ximodo racané Betel ne Grupu ni Zaniruʼ lu iráʼ ca dxiiñaʼ ni cayúninu riʼ.
4, 5. Ximodo zanda acané ca videu ca binni ni cayúʼndanenu ganaxhiicaʼ xquidxi Jiobá.
4 Videu ni rusiidiʼ: Sti modo zanda iziidiʼ cani cayúʼndanenu Biblia para gunibiaʼcaʼ pabiáʼ sicarú xquidxi Jiobá nga ne ca videu ca. Zanda gunibiáʼcabe sti ladu ne videu Hasta los cabos de la Tierra, ne zanda gunibiáʼcabe iráʼ ca bíchinu ne ca bizánanu ne videu Toda nuestra asociación de hermanos, ne para uluinu laacabe ximodo nuunu tobi si la? zanda iquiiñenu videu Unidos gracias a la enseñanza divina. Ti gunaa ni napa gaayuʼ iza de ricaa ca revista stinu ne stuudxi libru biinabe de tantu cayéchebe ora bíʼyabe videu Los testigos de Jehová... la organización tras el nombre. Huayuni crebe ca testigu riganna laabe, peru despué de biiyabe videu riʼ la? biʼniʼ sentirbe zanda guni crebe de idubi ladxidoʼbe xquidxi Jiobá. Bizulú biindanécabe laabe, ne sti semana queca uyebe endaridagulisaa raca ndaaniʼ Yoo stiʼ Reinu.
5 Pa iráʼ semana cueenu ti ratuhuiiniʼ para inínenu cani cayúʼndanenu Biblia de xquidxi Jiobá, ne iquiiñenu cani nápanu la? zanda acanenu ca binni ca chuʼcaʼ ndaaniʼ guidxi ni caquiiñeʼ Jiobá yanna riʼ.