Biquiiñeʼ ca videu ni nápanu para usiidiluʼ
1. Ximodo biquiiñeʼ Jiobá visión ne bacaandaʼ para bisiidiʼ ca xpinni dxiqué, ne ximodo ucaneni laacabe.
1 Dxiqué guyuu ra biquiiñeʼ Jiobá visión ne bacaandaʼ para bisiidibe ca xpínnibe stale cosa ni risaca. Bietenalaʼdxiʼ dxi gupa Ezequiel visión ra bihuinni carru stiʼ Jiobá (Eze. 1:1-28). Bixuiʼlú si xi biʼniʼ sentir Daniel ora biluxe ucuaabe ti bacaandaʼ ni bisihuinni unáʼ nga ca guidxi ni chiguni mandar lu idubi naca Guidxilayú (Dan. 7:1-15, 28). Yanna, xi zanda ininu de «seña» ni ucuaa apóstol Juan, ni biluíʼ xi chiguizaaca «dxi stiʼ Señor» que yaʼ (Rev. 1:1, 10, NM). Jiobá bisiidiʼ ca xpinni ne visión casi ñaca ñuuyacabe dxandíʼ cayaca cani, ne zacá nga biaanacani ndaaniʼ íquecabe.
2. Xi zanda iquiiñenu para usíʼdinu binni ca dxandíʼ ni zeeda lu Biblia.
2 Pa qué racaláʼdxinu usiaandaʼ binni cani usiénenu laacaʼ de ca dxandíʼ ni zeeda lu Biblia la? zanda iquiiñenu ca videu ni nápanu para usíʼdinu laacabe. Lu ca videu ca zeeda adxé adxé tema ni racané binni guni cré Biblia, ne guiénecabe jneza nga modo runi xquidxi Jiobá dxiiñaʼ ne rucaacani laacabe guni crécabe racané ca conseju stiʼ Biblia ca xpinni Cristu ti ibánicaʼ jma jneza. Chidúʼyanu ximodo zanda iquiiñenu cani para usíʼdinu binni.
3. Xi zanda iquiiñenu para acanenu tuuxa ni cayúʼndanenu idxiña ndaaniʼ xquidxi Jiobá.
3 Ora rucheechenu diidxaʼ. Ñee maʼ huaníʼneluʼ ni ruundaneluʼ Biblia de ca bíʼchinu ne bizáʼnanu ni nuucaʼ lu idubi Guidxilayú la? Biluíʼ laabe videu Toda nuestra asociación de hermanos. Zanda utiiñeluʼ ni laabe ti gúʼyabe ni ante chiguundaneluʼ laabe o zanda gúʼyatu ni irópatu dxi gúʼndatu. De racá unabadiidxaʼ laabe cani zeeda lu Nuestro Ministerio del Reino stiʼ junio 2002.
4. Xi zanda iquiiñeʼ ca Testigu ni nahuiiniʼ ca para usiidicaʼ ra scuela sticaʼ.
4 Laatu cani nahuiiniʼ, zanda gábitu maestru stitu pa zaa gúʼyatu ra scuela videu ni láʼ Los testigos de Jehová se mantienen firmes ante el ataque nazi o videu Fieles ante las pruebas. Los testigos de Jehová de la Unión Soviética. Lagabi maestru stitu pa zanda inabadiidxatu ca baʼduʼ scuela ca xiixa de ni bíʼyacaʼ. Biquiiñeʼ ca endarinabadiidxaʼ ni zeeda lu Nuestro Ministerio del Reino stiʼ junio 2001 ne stiʼ febrero 2003, peru bichaa modo inabadiidxuʼ cani laacabe ti ganda icábicabe.
5. Xi zanda iquiiñeʼ cani napa xiiñiʼ ora gúʼndanecaʼ binnilídxicaʼ.
5 Ca binnilídxiluʼ ne ca xhamíguluʼ. Laatu cani napa xiiñiʼ, lainíʼ ique pabiáʼ maʼ biniisi xiiñitu dede dxi primé bíʼyatu videu Los jóvenes preguntan... ¿Cómo conseguir amigos verdaderos? Xiñee qué gúʼyatu ni ora gúʼndanetu binnilídxitu sti biaje yaʼ. Ca endarinabadiidxaʼ ni zeeda lu Nuestro Ministerio del Reino stiʼ abril 2002 zacané laatu güitu diidxaʼ galán ora uzeetetu de ni bíʼyatu lu videu ca.
6. Xi zanda gúniluʼ ora chuʼluʼ ne ca xhamíguluʼ ti ratu para acanésaatu laatu.
6 Ñee maʼ napa dxi racaláʼdxiluʼ guni invitarluʼ ca xhamíguluʼ ni ridagulisaaneluʼ ra lídxiluʼ la? Chuʼtu iratu ti huadxí para gúʼyatu videu Respetemos la autoridad de Jehová la? zacané ni laatu iniʼtu de Stiidxaʼ Dios, jmaruʼ si pa ora ilúxeni iniʼtu xi rusiidiʼ ni laatu, para nga zanda iquiiñetu cani canabadiidxaʼ Xhiiñaʼ Reinu ni Rúninu stiʼ septiembre 2004.
7. Paraaruʼ rábiluʼ zanda iquiiñenu ca videu ca yaʼ.
7 Xcaadxi lugar ra zanda iquiiñeluʼ cani. Ximódoruʼ zanda iquiiñeluʼ iráʼ 20 videu ni nápanu para usíʼdinu yaʼ. Ñee zanda acané tobi de laacani ca binni ni riuulaʼdxiʼ iziidiʼ para gánnacaʼ jma de Jiobá la? Ñee zanda chinetu cani ra rápacabe puru binnigola si la? Ñee zacané cani ca binnilídxiluʼ ni cadi Testigu, ca vecinu stiluʼ o cani runineluʼ dxiiñaʼ para gápacaʼ respetu lii la? Ca videu ca racané cani para usíʼdinu binni. Biquiiñeʼ cani para usiidiluʼ.