Ucaʼnu binni usisaca ca guenda ni nabé sicarú napa Jiobá
1 Ora ucheechenu diidxaʼ la? cadi rúninu ni para si usíʼdinu binni cani zeeda lu Biblia, sínuque laaca racanenu laacabe gunibiáʼcabe ximodo nga Jiobá ne racanenu laacabe usisácacabe ca guenda nabé sicarú nápabe. Ora gunibiáʼ ca binni ni dxandíʼ nuu iziidiʼ de Dios ca ximodo laabe la? nga rucaa laacabe usaanacabe ca cosa ni qué riuulaʼdxiʼ Dios, ne zacá randa rizácabe «modo naquiiñeʼ sa ca xpinni» Jiobá (Col. 1:9, 10; 3:9, 10).
2 Ti libru cubi para usíʼdinu binni de Biblia. Dede ra bizulú libru Xipeʼ ndiʼ cusiidiʼ Biblia culuiʼni ca guenda napa Jiobá. Lu primé capítulo ca ricábini ca endarinabadiidxaʼ riʼ: Ñee dxandíʼ rizaalaʼdxiʼ Dios laanu la? Ximodo nga Dios. Ñee zanda guidxíñanu gaxha de laabe la? Laaca riniʼni pabiáʼ nayá Jiobá (párr. 10); rúnibe ni jneza ne riabe binni (párr. 11); nadxiibe binni (párr. 13); nadípabe (párr. 16); riubaláʼdxibe, nacháʼhuibe, rutiidiláʼdxibe donda, rindaa para idxiichibe ne qué rusaanabe ca xpínnibe (párr. 19). Lu párrafo 20 na sicaríʼ: «Ra jma guiziidiluʼ de laabe la? jma zuuyuʼ laabe casi ruuyuʼ ti binni, ne óraque jma zannaxhiiluʼ laabe ne zuni sentirluʼ nuuluʼ gaxha de laabe».
3 Ximodo zanda iquiiñenu libru Xipeʼ ndiʼ cusiidiʼ Biblia para ganda acanenu ni cusíʼdinu ca idxiña Jiobá yaʼ. Iduʼndanésinu laabe ti párrafo ra cuzeeteʼ tobi de ca guenda napa Jiobá la? zanda inabadiidxanu laabe: «Xi rusiidiʼ ndiʼ lii de ximodo nga Jiobá yaʼ», o «Ximodo ruluíʼ ndiʼ dxandíʼ rizaalaʼdxiʼ Dios lii yaʼ». Ora inabadiidxanu ni cadúʼndanenu ca zacá la? rusíʼdinu laabe iníʼ íquebe de ni caziidibe ne laaca zacanenu laabe usisácabe ca guenda nabé risaca napa Jiobá.
4 Biquiiñeʼ cuadru ra na ni rusiidiʼ Biblia. Ora iluxe gúʼndatu cada capítulo, unabaʼ ni cayuundaneluʼ ca icábibe ca endarinabadiidxaʼ zeeda lu cuadru ra na «Ni rusiidiʼ Biblia». Biindané laabe ca textu zeeda lu cuadru ca. Para ganda acaneluʼ binni ca cuee ni nuu ndaaniʼ ladxidóʼ la? zanda inabadiidxaluʼ laabe gatigá: «Xi riníʼ íqueluʼ de ni rusiidiʼ Biblia de ni cadúʼndanu riʼ yaʼ». Ra gúninu zacá la? cadi zábisinu laabe cani jma risaca cusiene cada capítulo, sínuque zánnanu ti cosa ni nabé risaca: zánnanu xipeʼ runi cré ni cadúʼndanenu ca. Nga zacané binni ca chuʼ galán ne Dios.