Ñee nánnaluʼ xi gúniluʼ ora guizaaca xiixa desgracia la?
1. Xiñee riquiiñeʼ gánnanu xi gúninu ora gaca xiixa desgracia.
1 Guiráʼ iza, millón de binni ne zaqueca ca xpinni Cristu, cayacanacaʼ pur xu, tsunami, nisaguié, tornado ne calaahua neza ra nabézacaʼ. Cumu guiráʼ desgracia riʼ málasi rizaaca cani ne zándaca guniná cani laanu ora tiicasi la? naquiiñeʼ gánnanu xi gúninu dede ca yanna (Pro. 21:5).
2. Xiñee riquiiñeʼ gábinu ca binnigola ca pa ladu nabézanu ne gudiʼnu laacabe númeru de teléfono stinu.
2 Xi zanda gúninu ante guizaaca xiixa desgracia. Nuu tiru, binni ni runi xhiiñaʼ gobiernu rábicaʼ laanu dede ante xi naquiiñeʼ gúninu para cadi guniná xiixa desgracia laanu. Galán gucaadiáganu ni cayábicabe laanu (Pro. 22:3). Ora ganna ca binnigola ca xi chiguizaaca la? ruyúbicabe modo guiníʼnecabe ca binni ridagulisaa para gúʼyacabe ximodo zanda gacanécabe laacaʼ ante gaca xiixa desgracia. Gaca si desgracia ca la? ca binnigola ca zúnicabe stipa pur guiníʼnecabe guiráʼ ca binni ni ridagulisaanécabe para gúʼyacabe pa nuucaʼ galán ne pa caquiiñecaʼ xiixa. Zuniti ca binnigola ca stale tiempu pa qué gápacaʼ ti lista ra cá pa ladu nabeza ca binni ni ridagulisaanécabe ne xi númeru de teléfono nápacaʼ. Nga runi, pa guchaa cani rucheeche diidxaʼ de yoo o númeru de teléfono sticaʼ la? naquiiñeʼ gábicabe ni secretariu o binnigola ni rusiidiʼ ra riuundaʼ libru ra riécabe.
3. Ximodo zanda gacanenu ca binnigola ca pa nabézanu ti lugar ra nabé raca desgracia.
3 Pa guiráʼ bíʼchinu ne bizáʼnanu ni nuu ndaaniʼ ti neza binni ridagulisaa nabézacaʼ ti lugar ra nabé raca desgracia la? ca binnigola ca zanda guinábacabe cani rucheeche diidxaʼ gudiicaʼ laacabe lá tuuxa binnilídxicaʼ o tuuxa xhamígucaʼ ni cadi nabeza neza ra lídxicaʼ. Laaca naquiiñeʼ gudiicaʼ númeru de teléfono stiʼ xhamígucaʼ o binnilídxicaʼ, ra zanda guiníʼ ca binnigola ca nagueendaca pa gaca xiixa desgracia. Nga zacané ca binnigola ca guiníʼnecaʼ cani guiree ra guca desgracia ca. Ca binnigola ca naquiiñeʼ guiníʼ íquecaʼ xi riquiiñeʼ gúnicaʼ dede ante, pa málasi gaca xiixa desgracia ti ganda gacanecaʼ ca binni ridagulisaa. Zúnicabe ti lista para gucaacabe guiráʼ ni iquiiñeʼ ca binni ca ra lídxicaʼ, laaca naquiiñeʼ gúʼyacabe ximodo guiree ca binni ca nagueendaca ne ximodo zanda gacanécabe cani huará o cani maʼ nagola. Naquiiñeʼ guiranu gacanesaanu (Heb. 13:17).
4. Xi riquiiñeʼ gúninu pa gaca xiixa desgracia neza ra nabézanu.
4 Ora maʼ biluxe guca desgracia. Xi riquiiñeʼ gúniluʼ pa gaca xiixa desgracia neza ra lídxiluʼ yaʼ. Biiyaʼ gapa ca binnilídxiluʼ cani zaquiiñecaʼ. Pa ganda la? gucané stuudxi binni. Ne biyúbica ximodo guiníʼneluʼ binnigola ni rusiidiʼ ra riuundaʼ libru o sti binnigola. Neca qué ñácaluʼ gastiʼ ne cadi caquiiñeʼ gacanécabe lii la? naquiiñeʼ guiníʼneluʼ ca binnigola ca. Ne pa caquiiñeʼ gudiinácabe lii la? gunna nuu ca bíʼchiluʼ ne ca bizáʼnaluʼ para gacanecaʼ lii (1 Cor. 13:4, 7). Cadi guiaandaʼ lii nanna Jiobá xi cayácaluʼ ne biʼniʼ cré de guidubi ladxidoʼloʼ zanda gacanebe lii (Sal. 37:39; 62:8). Biyubi modo gábiluʼ binni maʼ cadi candaa diʼ zabee Jiobá guiráʼ ca desgracia ca ne biyubi modo gudiinaluʼ laacabe (2 Cor. 1:3, 4). Biiyaʼ cadi gusaanaluʼ de gucheecheluʼ diidxaʼ ne cheluʼ ca guendaridagulisaa ca (Mat. 6:33).
5. Cumu nánnanu zazaacaruʼ jma desgracia la? xi naquiiñeʼ gúninu.
5 Neca ca desgracia ca ruchibi cani guiráʼ binni, laanu ca xpinni Cristu runi crenu maʼ cadi candaa diʼ zabee Dios guiráʼ cani (Apo. 21:4). Laga cabézanu guidxiña dxi ca la? naquiiñeʼ guiníʼ íquenu xi gúninu ora guidxaagalunu xiixa desgracia ne ra cadi gusaananu de gucheechenu ca diidxaʼ nacubi ne galán stiʼ Dios.