Galán quixhe íquenu gácanu precursor auxiliar ra guzulú iza dxiiñaʼ 2008
1. Xi naquiiñeʼ quixhe íquenu gúninu ra guzulú iza dxiiñaʼ 2008.
1 Pa racaláʼdxinu guiniisinu jma lu stiidxaʼ Dios la? naquiiñeʼ quixhe íquenu gúninu xiixa dxiiñaʼ ndaaniʼ xquidxi Dios. Ñee maʼ gudixhe íquenu gúninu xiixa ra guzulú iza dxiiñaʼ 2008 la? Tobi de cani zanda quixhe íquenu gúninu nga gácanu precursor auxiliar ti beeu o chupa chonna beeu. Yanna nga naquiiñeʼ quixhe chaahuinu tiempu stinu para ganda gácanu precursor. Peru, xiñee naquiiñeʼ quixhe íquenu gácanu precursor auxiliar yaʼ.
2. Xiñee galán gácanu precursor auxiliar.
2 Xiñee galán gácanu precursor auxiliar. Ora rácanu precursor, racaneni laanu gucheechenu diidxaʼ jma ne rusihuínninu cayúninu jma lu xhiiñaʼ Jiobá (1 Tes. 4:1). Ora guiníʼ íquenu guiráʼ ni maʼ biʼniʼ Jiobá pur laanu rucaacani laanu guininu de laabe (Sal. 34:1, 2). Ne nanna dxíchinu ruuyaʼ Jiobá guiráʼ stipa cayúninu para gácanu precursor ne nga rusiecheʼ ladxidoʼbe (Heb. 6:10). ¡Laaca nabé riéchenu ora gánnanu rusiecheʼ dxiiñaʼ nadipaʼ ni cayúninu ca Jiobá! (1 Cró. 29:9.)
3, 4. Xi zabeendunu ra gácanu precursor auxiliar.
3 Dxandíʼ, pa gatigá gúninu ti cosa la? qué zandaa ziuuláʼdxinu gúninu ni ne maʼ qué zaca diʼ nagana para laanu gúninu ni. Nga runi, pa gúninu stipa pur gucheechenu diidxaʼ jma, qué zadxíbinu ora chuunu ra lidxi binni, zuyúbinu guinínenu jma binni, ne zaquiiñenu Biblia jneza. Pa jma guininu de cani runi crenu la? jma zaguidxi fe stinu. Ne pa qué rúʼndanenu tuuxa binni Biblia, zándaca ra gácanu precursor ca guidxélanu tuuxa cásica huayuni xcaadxi ni rucheeche diidxaʼ.
4 Laaca zacaneni laanu gúninu jma dxiiñaʼ ndaaniʼ xquidxi Dios. Ti xpinni Cristu ni guca precursor regular bidii cuenta puru si xhiiñaʼ runi, ngue runi gudixhe ique gaca precursor auxiliar. Laabe guniʼbe: «Que guiráʼ guidxagayaa pa ti beeu casi gacané naa chuaa naguidxi ndaaniʼ xquidxi Dios. Gudixheʼ chaahueʼ tiempu stinneʼ para cadi gusaanaʼ de gacaʼ precursor auxiliar, ne qué nindaa de ngue gunda gucaʼ precursor regular».
5. Xi zacané laanu para gusaananu de guiníʼ íquenu qué zanda gácanu precursor.
5 Gudxíʼlunu ca guendanagana ni guidxaagalunu. Nuu tu laa ridxibi guinabaʼ gaca precursor purtiʼ riníʼ ique huaxiéʼ nanna gucheeche diidxaʼ. Pa riníʼ íquenu zacá la? naquiiñeʼ guietenaláʼdxinu Jiobá zanda gacané laanu cásica gucanebe Jeremías (Jer. 1:6-10). Zaqueca gucanebe Moisés neca guca ti hombre ni nanene riníʼ ne nanaa ludxi (Éxo. 4:10-12). Nga runi, pa riníʼ íquenu qué zanda gácanu precursor la? guinábanu Jiobá gacané laanu gácanu nadxibalú para ganda gácanu ni.
6. Xi zacané laanu para ganda gácanu precursor auxiliar neca huaranu ne nápanu stale dxiiñaʼ.
6 Ñee qué rinanu gácanu precursor purtiʼ raca huaranu o huaxiéʼ tiempu nápanu la? Pa huaranu zanda quíxhenu pabiáʼ gúninu ti dxi ne gusaʼnu ora stinu. Zacaca nga naquiiñeʼ gúninu pa nápanu stale dxiiñaʼ, zanda gusaananu cani huaxiéʼ caquiiñeʼ gúninu para sti beeu. Nuu de cani runi dxiiñaʼ guidubi dxi rinábacaʼ ti dxi o chupa gubidxa de vacación para gusaacaʼ biaʼ runi ti precursor auxiliar (Col. 4:5).
7. Xiñee galán guzéʼtenu lu oración stinu racaláʼdxinu gácanu precursor.
7 Ximodo zanda gúninu ni. Ora guni orarnu Jiobá, naquiiñeʼ gábinu laabe racaláʼdxinu gúninu jma lu xhiiñabe ne guinábanu laabe cuʼbe ndaayaʼ stipa ni cayúninu (Rom. 12:11, 12). Laabe zacanebe laanu ora maʼ caguixhe chaahuinu tiempu stinu (Sant. 1:5). Ne pa rireʼnu gana ora chigucheechenu diidxaʼ la? guinábanu laabe gacanebe laanu ti chuuláʼdxinu gúninu ni (Luc. 10:1, 17).
8. Ximodo zanda gacané conseju stiʼ Proverbios 15:22 laanu para gácanu precursor auxiliar.
8 Guinínenu binnilídxinu para guidúʼyanu pa nuu tu zanda gaca precursor auxiliar (Pro. 15:22). Pa gacanesaanu la? zanda gaca neca tobi de ca binnilídxinu precursor auxiliar. Laaca galán gábinu xcaadxi de ca xpinni Cristu ni ridagulisaanenu ni cadiʼdiʼ laaca ra cadídinu xi cá íquenu gúninu. Zándaca nga gacané lii chuuláʼdxiluʼ gácaluʼ precursor.
9. Xi beeu zanda cuinu para gácanu precursor auxiliar.
9 Naquiiñeʼ guidúʼyanu lu calendariu stinu padxí zanda gucheechenu diidxaʼ ti gánnanu xi beeu zanda gácanu precursor auxiliar. Pa rúninu dxiiñaʼ guidubi dxi o riuunu scuela la? zanda gácanu precursor lu ca beeu ni né gaayuʼ sábadu ne domingu o lu ca beeu ni né dxi ni qué raca dxiiñaʼ. Casi septiembre, diciembre, marzo ne agosto nécani gaayuʼ sábadu ne gaayuʼ domingu. Beeu mayo né gaayuʼ sábadu ne junio né gaayuʼ domingu. Para cadi gaca huaranu ora guchaa tiempu la? galán guidúʼyanu xi beeu zanda gácanu precursor. Laaca zanda gácanu precursor beeu cheʼ binnigola ni riganna ca neza binni ridagulisaa laanu. Zacá zanda chuʼnu media hora lu guendaridagulisaa ni rapané binnigola ca precursor regular. Ne cumu 22 stiʼ marzo nga chiguietenaláʼdxinu guendaguti stiʼ Jesús sti iza ca la? laaca zanda gácanu precursor lu ca beeu marzo, abril ne mayo. Ora maʼ bidúʼyanu xi beeu zanda gácanu precursor, galán quíxhenu ximodo gusaʼnu hora stinu.
10. Xi zanda gúninu pa qué ganda gácanu precursor.
10 Pa qué ganda gácanu precursor auxiliar ra guzulú iza dxiiñaʼ 2008 la? cadi gusaananu de gusihuínninu riuuláʼdxinu gácanu precursor. Naquiiñeʼ gúnirunu stipa pur gucheechenu diidxaʼ, purtiʼ nánnanu ziechené Jiobá laanu ora gúninu stipa pur gúninu ni na de guidubi ladxidoʼno (Gál. 6:4). Naquiiñeʼ cuʼnu gana cani zanda gaca precursor auxiliar ne gacanenu laacaʼ. Laaca galán quixhe chaahuinu tiempu stinu para ganda cueenu ti dxi lu ti semana para gucheechenenu ca precursor diidxaʼ.
11. Xiñee naquiiñeʼ gucheechenu diidxaʼ nagueendaca.
11 Nánnanu mayaca guinitilú ca cosa malu riʼ, nga runi naquiiñeʼ gúninu nagueendaca ni bisaanané Jiobá laanu: gucheechenu ca diidxaʼ nacubi ne galán. Maʼ huaxiéʼ tiempu nápanu ne pa qué gúninu ni la? zándaca gueeda gati binni (1 Cor. 7:29-31). Pa nadxiinu Dios ne nadxiinu binni, nga zucaa laanu gucheechenu diidxaʼ biaʼ gándatiʼ. Para ganda gácanu precursor neca ti beeu lu iza dxiiñaʼ 2008 la? caquiiñeʼ gúninu stipa ne quixhe chaahuinu tiempu stinu.