Guinínenu binni pabiáʼ risaca Jiobá
1. Xi zucaa laanu guinínenu binni pabiáʼ risaca Jiobá.
1 «Jiobá, lii nga stiluʼ guendanandxóʼ ne poder ne laaca guizáʼ sicaruluʼ ne risácaluʼ; purtiʼ guiráʼ ni nuu guibáʼ ne ni nuu lu guidxilayú riʼ stiluʼ cani.» (1 Cró. 29:11.) Pa nadxiinu Jiobá ne rudiʼnu xquíxepeʼ laabe pur guiráʼ ni cudiibe laanu, xi zucaa nga laanu gúninu yaʼ. Zucaani laanu gábinu binni gúʼyacaʼ pabiáʼ risaca ne «pabiáʼ nandxóʼ be pur ni runi be, purti ulee be laa[n]u de lu guelacahui ne uluu be laa[n]u lu biaani sicarú stibe» (1 Ped. 2:9). Qué zusaananu de guininu pabiáʼ nandxóʼ Dios stinu. Ne lu beeu marzo, abril ne mayo jma zanda guinínenu binni pabiáʼ risaca Jiobá.
2. Xi dxiiñaʼ maʼ bibí gaca ne tu laa zanda guni dxiiñaʼ riʼ.
2 Ti dxiiñaʼ ni bibí para guni invitarnu binni cheʼ ra chiguietenaláʼdxinu guendaguti stiʼ Jesús. Lunes 2 stiʼ abril zietenaláʼdxinu pabiáʼ risaca Jiobá para laanu lu Guendaroxhi stiʼ Señor. Lu guidubi naca guidxilayú zaca invitar binni para cheʼ ra chiguietenaláʼdxinu guendaguti stiʼ Jesús, ne zuzulunu guni invitarnu binni 17 stiʼ marzo dede 2 stiʼ abril. Rinábadu guiratu gúnitu stipa para gúnitu dxiiñaʼ riʼ. Ne cani maʼ zanda gácacaʼ ti ni rucheeche diidxaʼ ni caʼruʼ chúʼnisa la? yanna nga naquiiñeʼ guzulúcabe gucheechecabe diidxaʼ. Ne pa ruundaneluʼ tuuxa o pa nápaluʼ xiiñiluʼ ne maʼ zanda gácacaʼ ti ni rucheeche diidxaʼ ni caʼruʼ chúʼnisa la? zanda gábiluʼ ni ca binnigola ca.
3. Ximodo zanda guininu ora chiguni invitarnu binni para cheʼ ra chiguietenaláʼdxinu guendaguti stiʼ Jesús.
3 Dxiiñaʼ riʼ zeeda gácani cásica ni bíninu ante gaca guendaridagulisaa roʼ ni biree lá «¡Mayaca guilanu!». Guiráʼ ca neza binni ridagulisaa zacaacaʼ stale invitación ti ganda guicaa cada ni rucheeche diidxaʼ 50 de laani, ne ca precursor zacaacaʼ 150. Para ganda gusaanaluʼ guiʼchiʼ ca la? zanda guiniʼluʼ: «Guiráʼ iza nga runi invitardu binni checaʼ ra rietenaláʼdxidu guendaguti stiʼ Jesús, yanna riʼ nedu ti invitación para lii purtiʼ maʼ zeeda guidxiña dxi ca. Ñuuláʼdxidu ñuuyadu lii raqué. Lu guiʼchiʼ riʼ zeeda xi chigaca raqué». Pa binni ca guinabadiidxaʼ xiixa la? bicabi laabe. Ne zanda gusiéneluʼ laabe xiñee ne ximodo raca Guendaroxhi stiʼ Señor casi zeeda lu apéndice stiʼ libru Xipeʼ ndiʼ cusiidiʼ Biblia yaza 206. Ca sábadu ne ca domingu ca, zusaananenu binni invitación ca ne ca revista ni jma nacubi nápanu. Bicaa lá ca binni ni bicaadiaga lii ne bibiguetaʼ yeganna laacabe sti biaje.
4. Ximodo zanda gusaananenu binni invitación riʼ.
4 Biʼniʼ stipa pur gudiiluʼ invitación ca binni ni nabeza ndaaniʼ yoo ca. Pa huaxiéʼ lugar nápatu para gucheechetu diidxaʼ, bicaa paraa qué nidxélatu binni, ne biʼniʼ stipa pur guibiguétatu sti biaje. Ne pa guiaana stale invitación stitu la? zanda guibiguétatu semana chiguietenaláʼdxinu guendaguti stiʼ Jesús para chisaanatu invitación ca ra nuu ca binni ni qué nidxélatu dxi gudiizitu cani. Ne laaca cadi guiaandaʼ laanu gusaananenu invitación riʼ ca binni ni ribiguétanu rigánnanu laacaʼ, cani rigúʼndanenu Biblia, ca binnilídxinu, cani runinenu dxiiñaʼ, ca xpesínunu ne ca binni ni runibiaʼnu.
5. Xiñee dede ca yanna naquiiñeʼ cuaquiʼ chaahuinu tiempu stinu para gácanu precursor auxiliar.
5 Precursor auxiliar. Ñee zanda guiníʼneluʼ binni de guendanandxóʼ stiʼ Jiobá ra gácaluʼ precursor auxiliar lu beeu marzo, abril ne mayo la? Zándaca naquiiñeʼ gusaanaluʼ chupa chonna de ca cosa ni rúniluʼ para ganda gácaluʼ precursor auxiliar (Efe. 5:15-17). Dxandipeʼ nga ziuuluʼ nayecheʼ ne zaguu ndaayaʼ Jiobá lii pa guicá íqueluʼ gúniluʼ xhiiñabe jma (Pro. 10:22). Cumu maʼ zeeda guidxiña dxi guietenaláʼdxinu guendaguti stiʼ Jesús la? naquiiñeʼ guzulú cuaquiʼ chaahuinu tiempu stinu ti ganda gucheechenu diidxaʼ jma (Pro. 21:5).
6. Xi rusiidiʼ ni biʼniʼ ti Testigu de 90 iza laanu ni guca precursora auxiliar iza gudiʼdiʼ ca.
6 Iza gudiʼdiʼ ca gunda guca ti Testigu de 90 iza precursora auxiliar. Laabe guniʼbe sicaríʼ: «Neca nabé riuuladxeʼ guzuhuaa yagahuiiniʼ ne racalaʼdxeʼ guzuhuaa jma yaga la? rabeʼ nuu xcaadxi cosa jma risaca ni naquiiñeʼ guneʼ. Ne cumu racalaʼdxeʼ guneʼ xhiiñaʼ Jiobá primé lu xquendanabaneʼ la? guníʼ iqueʼ gacaʼ precursora auxiliar lu beeu marzo». Ñee gucuaabe ndaayaʼ pur stipa ni bíʼnibe que la? Laabe guniʼbe: «Gucaneni naa chuaa jma gaxha de Jiobá ne ca binni ni ridagualisaaniaʼ». Ñee zanda guidúʼyanu gunáʼ nga ni jma risaca lu xquendanabáninu ne gúninu cásica biʼniʼ Testigu riʼ para gácanu precursor auxiliar la?
7. Ñee nagana nga gaca binni precursor auxiliar la?
7 Cadi nagana nga gusaaluʼ cincuenta hora biaʼ runi ti precursor auxiliar casi zándaca riníʼ íqueluʼ. Gunabaʼ Jiobá gacané lii cuaquiʼ chaahuiluʼ tiempu stiluʼ, guníʼ ique xi chigúniluʼ guiráʼ dxi ne bicaa lu calendariu stiluʼ padxí zucheecheluʼ diidxaʼ. Lii si nga nánnaluʼ pa zanda gácaluʼ precursor auxiliar. Casi pa huaraluʼ o huaxiéʼ stipa nápaluʼ, zanda guʼnuʼ neca chupa hora ti dxi. Pa guidubi dxi rúniluʼ dxiiñaʼ o rieluʼ scuela, zanda gácaluʼ precursor auxiliar ne gucheecheluʼ diidxaʼ huaxhinni o ca sábadu ne ca domingu ca.
8. Xi gucané ti guendaxheelaʼ para gunda gúcacaʼ precursor auxiliar.
8 Stale tu huayaca precursor auxiliar ne binnilidxi. Maʼ xadxí, ti guendaxheelaʼ guníʼ íquecaʼ qué zanda gácacaʼ precursor auxiliar. Peru xi bíʼnicabe yaʼ. Laacabe guníʼcabe sicaríʼ: «Biʼniʼ orardu Jiobá para gacané laadu gúnidu ti dxiiñaʼ ni maʼ xadxí racaláʼdxidu gúnidu». Gúpacabe xidé gulaquiʼ chaahuicabe tiempu stícabe para gunda bíʼnicabe ni gucaláʼdxicabe que. Nácabe: «Guizáʼ nayecheʼ guyuʼdu. Laaca gucuaadu stale ndaayaʼ. Ni zanda gábidu laatu nga laguuyaʼ pa zanda gúnitu ni. Pa laadu bínidu ni la? laatu laaca zanda gúnitu ni.
9. Xi naquiiñeʼ guiníʼneluʼ binnilídxiluʼ ora gúʼndaneluʼ laacaʼ para gucheechetu diidxaʼ jma lu ca beeu zeeda ca.
9 Xiñee qué guiníʼneluʼ binnilídxiluʼ xi zanda gúnitu para gucheechetu diidxaʼ jma lu ca beeu zeeda ca ora gúʼndaneluʼ laacaʼ. Pa qué ganda gaca guiratu precursor auxiliar la? zanda gacanetu neca tobi de ca binnilídxitu para gácani. Ne pa nin tobi qué ganda gácani la? lagucaa ique gucheechetu diidxaʼ jma lu ca beeu ca.
10 Xiñee naquiiñeʼ gábinu stobi racaláʼdxinu gácanu precursor auxiliar ca dxi chiguietenaláʼdxinu guendaguti stiʼ Jesús.
10 Gacanesaanu. Guendanayecheʼ ca ricani. Gudxi xcaadxi racaláʼdxiluʼ gácaluʼ precursor auxiliar, purtiʼ laaca zándaca guicá íquecabe gácacabe precursor. Ne cani maʼ huayuni dxiiñaʼ riʼ zanda gacanecaʼ lii para gánnaluʼ xi zanda gúniluʼ ti gácaluʼ precursor (Pro. 15:22). Pa zanda gúniluʼ dxiiñaʼ riʼ, xiñee qué gábiluʼ sti ni rucheeche diidxaʼ ni zándaca maʼ guníʼ ique gaca precursor ti ganda gucheechetu diidxaʼ guirópatu yaʼ.
11. Ximodo zanda uguu ca binnigola gana cani rucheeche diidxaʼ para gácacaʼ precursor auxiliar lu ca beeu zeeda riʼ.
11 Stale binnigola huayúbicaʼ modo para ganda gácacaʼ precursor auxiliar (Heb. 13:7). Pa gúnicabe ni la? zaguuni gana xcaadxi gúnicaʼ ni cayúnicabe ca. Laaca zanda gucaacabe xcaadxi gácacaʼ precursor auxiliar pa guiníʼcabe xi ndaayaʼ cacaacabe. Nuu tiru uguu si ca binnigola ca gana tuuxa o gábicabe laacaʼ xi zanda gúnicaʼ para gácacaʼ precursor la? rucaani laacaʼ gúnicaʼ dxiiñaʼ riʼ. Binnigola ni ruuyaʼ ximodo rireeche diidxaʼ zándaca gúʼyabe caquiiñeʼ gaca jma guendaridagulisaa ni raca ante chigucheechecabe diidxaʼ ti ganda gucheeche cani rié scuela ne cani rié dxiiñaʼ diidxaʼ. Ne laaca naquiiñeʼ gúʼyabe paraa gucheechecabe diidxaʼ ne cadi guiaadxaʼ libru ne revista para iquiiñecabe. Guiráʼ semana naquiiñeʼ guzeetecabe paraa chiguidagulisaacabe.
12. Xi zanda gúniluʼ pa qué ganda gácaluʼ precursor auxiliar.
12 Pa qué ganda gácaluʼ precursor auxiliar la? gucané xcaadxi para ganda gácacaʼ ni ne gunabaʼ Jiobá gacané laacabe. (Pro. 25:11; Col. 4:12). Galán guiníʼ íqueluʼ gucheecheneluʼ laacabe diidxaʼ neca ti biaje lu ti semana o gucheecheluʼ diidxaʼ jma de biaʼ rúniluʼ.
13. Xi cá íquecabe gaca ndaaniʼ guidxi Méjicu ne Belice, ne ximodo zanda gacanenu para ganda gácani.
13 Cuaquiʼ íquenu chuʼ lu beeu abril 80,000 precursor auxiliar ndaaniʼ guidxi Méjicu ne 250 Belice. Lu beeu abril stiʼ iza 2000 que guyuu 61,198 precursor auxiliar ndaaniʼ guidxi Méjicu; ne Belice guyuu 210 precursor auxiliar lu iza 2006. Nga runi, nexheʼ chuʼ 80,000 precursor auxiliar ndaaniʼ guidxi Méjicu lu beeu abril ne 250 Belice. Pa ndaaniʼ cada neza binni ridagulisaa tobi de cada gadxe de cani rucheeche diidxaʼ gaca precursor auxiliar la? zanda ugaandanu biaʼ nexheʼ ca. Nánnanu ndaaniʼ stale de ca neza binni ridagulisaa ziuu stale tu laa gaca precursor auxiliar. Ndaaniʼ stale neza binni ridagulisaa qué zácapeʼ nagana para laacaʼ ugaandacaʼ ni maʼ nexheʼ riʼ. Guníʼ ique pabiáʼ nayecheʼ ziuu ca binni ridagulisaa ne pabiáʼ gacanetu binni neza ra rucheechetu diidxaʼ.
14. Xiñee galán gácanu precursor auxiliar lu beeu abril.
14 Xiñee galán gácanu precursor auxiliar lu beeu abril. Cumu ra ruzulú beeu ca nga chiguietenaláʼdxinu guendaguti stiʼ Jesús la? nápanu guidubi beeu ca para chigánnanu cani guyé. Zusaananenu binni revista peru, ora guibiguétanu chigánnanu laacabe sti biaje la? zanda gusaananu libru Xipeʼ ndiʼ cusiidiʼ Biblia ti gúʼndanenu laacabe. Nga runi, pa gúninu stipa pur gácanu precursor auxiliar lu beeu abril zanda guidxélanu stale binni ni ziuulaʼdxiʼ gúʼndanenu laa Biblia. Lu beeu riʼ jma naroʼbaʼ dxi ndaaniʼ guidxi Méjicu, ne rindaa para guiaaziʼ Gubidxa, ne cadi nandáʼ diʼ nin ca cadi nananda. Ne cumu beeu riʼ né gaayuʼ sábadu ne domingu ne zeeda ti dxi luni qué zaca dxiiñaʼ la? zanda gacané ni cani rié scuela ne cani runi dxiiñaʼ para gácacaʼ precursor.
15. Ora maʼ zeeda guidxiña dxi guietenaláʼdxinu guendaguti stiʼ Jesús, xiñee naquiiñeʼ gucheechenu diidxaʼ nagueendaca.
15 Cada guietenaláʼdxinu guendaguti stiʼ Jesús la? jma maʼ gaxha zeeda dxi guinitilú guiráʼ ca guendaquéiquiiñeʼ ni cayaca lu Guidxilayú riʼ. Maʼ huaxiéʼ tiempu nápanu para guinínenu binni de guendanandxóʼ stiʼ Jiobá (1 Cor. 7:29). Ora maʼ gudiʼdiʼ dxi guietenaláʼdxinu guendaguti stiʼ Jesús, maʼ qué zanda diʼ gusisácanu Bixhózenu ni nuu guibáʼ cásica modo chigácani lu ca beeu riʼ. Nga runi, gúninu stipa dede ca yanna ti ganda gucheechenu diidxaʼ biaʼ gándatiʼ lu beeu marzo, abril ne mayo ti ganda guinínenu binni pabiáʼ risaca Jiobá.
[Box on page 4]
Ñee zanda chuʼ 80,000 precursor auxiliar ndaaniʼ guidxi Méjicu lu beeu abril ne 250 Belice la?
◼ Gulaquiʼ chaahuiʼ tiempu stiluʼ
◼ Guniʼné binnilídxiluʼ xi naguixheʼ íquetu gúnitu
◼ Guniʼné xcaadxi ni rucheeche diidxaʼ xi cá íqueluʼ gúniluʼ