Gusiidiʼ chaahuinu binni ca diidxaʼ nacubi ne galán stiʼ Dios
1. Xii nga ca diidxaʼ nacubi ne galán ni naquiiñeʼ gunadiaga binni.
1 Cumu ndaaniʼ guidxilayú riʼ runadiáganu cayaca stale guendaquéiquiiñeʼ la? caquiiñeʼ gusiidiʼ chaahuinu binni ca diidxaʼ nacubi ne galán stiʼ Dios (Hech. 20:24). Naquiiñeʼ gábinu laacabe mayaca guiluxe ca dxi «jma nagana» nabáninu riʼ ne guilúxesini zeeda guidxilayú cubi stiʼ Jiobá ra maʼ qué ziuu guiráʼ cosa «ni uyuu chiqué» (2 Tim. 3:1-5; Apo. 21:4). Racaláʼdxinu gábinu binni maʼ qué ziuu guendahuará (Isa. 33:24); ca binnilídxinu ni maʼ guti ne nuucaʼ lu xquendabiaaniʼ Dios zareecaʼ de ndaaniʼ baʼ ne zabiguetaʼ ziuunecaʼ binnilídxicaʼ ne xhamígucaʼ (Juan 5:28, 29); guidubi naca Guidxilayú riʼ zeeda gácani ti paraísu guizáʼ sicarú (Isa. 65:21-23), ¡ne zazaacaruʼ xcaadxi cosa sicarú!
2. Xiñee zanda gúninu jma lu xhiiñaʼ Dios ca dxi mayaca guietenaláʼdxinu guendaguti stiʼ Jesús.
2 Lu beeu marzo, abril ne mayo stale lugar rindaa para guiaaziʼ Gubidxa ne cadi nandáʼ diʼ nin ca cadi nananda. Nga runi, ca beeu ca zanda chigánnanu binni para gábinu laacaʼ ca diidxaʼ nacubi ne galán stiʼ Dios ne laaca zanda gucheechenu diidxaʼ jma lu ca beeu ca. Ne lu guidubi naca guidxilayú zietenaláʼdxinu guendaguti stiʼ Jesús ne laani zácani sábadu 22 stiʼ marzo, despué de guiaaziʼ Gubidxa. Nga runi, yanna nga naquiiñeʼ chuʼnu listu para gúninu jma lu xhiiñaʼ Dios.
3. Xi zanda gacané ca familia ca para gucheechecaʼ diidxaʼ jma.
3 Precursor auxiliar. Ñee zanda cuaquiʼ chaahuiluʼ tiempu stiluʼ ti ganda gácaluʼ precursor ti beeu, guiropaʼ o guionnaʼ beeu ca la? Xiñee qué guiníʼneluʼ binnilídxiluʼ xi zanda gúnitu ora gúʼndaneluʼ laacaʼ yaʼ. Pa guiratu gacanetu, tobi o chupa chonna de laatu zanda gaca precursor (Pro. 15:22). Lagábini Jiobá lu oración stitu, ne zuuyatu zaguu ndaayabe stipa gúnitu (Pro. 16:3). Pa nin ti binnilídxiluʼ qué zanda gaca precursor la? guiratu zanda guicá íquetu gucheechetu diidxaʼ jma ca beeu ca, ti zacá gacanetu cani zanda gácani.
4. Xi zanda guni tobi para ganda gaca precursor auxiliar neca runi dxiiñaʼ guidubi dxi.
4 Pa rúniluʼ dxiiñaʼ guidubi dxi laaca zanda gácaluʼ precursor auxiliar ra cuaquiʼ chaahuiluʼ tiempu stiluʼ. Nuu tu rucheeche diidxaʼ ora maʼ cuxhirini. Zanda guinábaluʼ ti lugar gaxha de ra rúniluʼ dxiiñaʼ o de ra lídxiluʼ para gucheecheluʼ diidxaʼ ti hora ante cheluʼ dxiiñaʼ ne ora guibiguétaluʼ. Pa nápaluʼ xiixa ni gúniluʼ beeu ca ne qué risácapeʼ ni, zanda gúniluʼ ni sti beeu o laaca zanda gucheecheluʼ diidxaʼ guidubi dxi ca sábadu ne ca domingu ca. Nuu tu laa rinabaʼ ti dxi o chupa gubidxa de vacación para gucheeche diidxaʼ.
5. Ximodo zanda gacaneluʼ ti xpinni Cristu ni maʼ nagola o ni huará para gaca precursor auxiliar.
5 Ñee maʼ nagólaluʼ, huaraluʼ o huaxiéʼ stipa nápaluʼ la? Laaca zanda gácaluʼ precursor pa gucheecheluʼ diidxaʼ neca ti ratu huiiniʼ si guiráʼ dxi. Gunabaʼ Jiobá gudii lii «enda nandxóʼ», o poder stiʼ ti ganda guni huantarluʼ (2 Cor. 4:7). Ti bizáʼnanu de 106 iza gunda gúcani. Ca binnilídxibe ni naca xpinni Cristu ne xcaadxi bíʼchinu ra ridagulisaabe gucanecaʼ laabe, bicheechebe diidxaʼ de yoo pur yoo, bibiguetaʼ yegánnabe binni ni guyuulaʼdxiʼ guiziidiʼ, biindanebe binni Biblia ne bíʼnirube xcaadxi dxiiñaʼ stiʼ Jiobá. Dede bizulú biindanebe chii binni Biblia. Bizáʼnanu riʼ guníʼ: «Ora riníʼ iqueʼ pabiáʼ sicarú guyuaa dxi gucaʼ precursora auxiliar, nabé nayecheʼ riuu ladxiduáʼ ne rudiéʼ xquíxepeʼ Jiobá, Xiiñibe ne xquídxibe. Racalaʼdxeʼ gudiéʼ xquíxepeʼ Jiobá de guidubi ladxiduáʼ».
6. Ximodo zanda gaca cani nahuiiniʼ ni maʼ guyuunisa precursor auxiliar.
6 Pa maʼ guyuunísaluʼ peru rieluʼ scuela la? laaca zanda gácaluʼ precursor auxiliar. Zanda quixhe chaahuiluʼ tiempu stiluʼ casi runi ca bíʼchinu ni runi dxiiñaʼ guidubi dxi ne gucheecheluʼ diidxaʼ sábadu ne domingu, laaca zanda guireeluʼ neca ti hora ndaaniʼ semana. Ñee nuu dxi qué zápaluʼ clase la? Laaca zanda chigucheecheluʼ diidxaʼ ca dxi ca. Rinábadu lii, guiníʼneluʼ bixhózeluʼ ne jñaaluʼ pa racaláʼdxiluʼ gácaluʼ precursor auxiliar.
7. Ximodo zanda uguu ca binnigola ca gana cani rucheeche diidxaʼ ca dxi chiguietenaláʼdxinu guendaguti stiʼ Jesús.
7 Ximodo zanda uguu ca binnigola gana. Ejemplu stiʼ ca binnigola ca racaneni ca binni ridagulisaa ca para uguu ni gana laacaʼ (1 Ped. 5:2, 3). Zanda gaca xcaadxi guendaridagulisaa ni raca ante chigucheechecabe diidxaʼ para cani guiree siadóʼ guieʼruʼ o para cani chigucheeche diidxaʼ guireesicaʼ de scuela o de dxiiñaʼ. Binnigola ni ruuyaʼ modo rireeche diidxaʼ zuuyaʼ chuʼ tuuxa ni zanda guni guendaridagulisaa ca ante chigucheechecabe diidxaʼ ne guuyaʼ cadi guiaadxaʼ lugar para gucheechecabe diidxaʼ, revista ne xcaadxi guiʼchiʼ iquiiñecabe ca beeu gácacabe precursor auxiliar.
8. Xi rusiidiʼ ni biʼniʼ ti neza binni ridagulisaa laanu.
8 Ndaaniʼ ti neza binni ridagulisaa, ca binnigola de raqué bizulú guluucaʼ gana cani rucheeche diidxaʼ chupa chonna beeu ante para gácacaʼ precursor auxiliar. Guiráʼ semana ruzeetecabe panda binni chigaca precursor auxiliar. Zaqué la? ca bíʼchinu ni racalaʼdxiʼ guni jma lu xhiiñaʼ Jiobá biiyacaʼ nuu tu zacané laacaʼ. Ca binnigola que laaca bíʼnicaʼ guendaridagulisaa ni raca ante chigucheechecabe diidxaʼ siadóʼ guieʼruʼ ne huadxí. Xi guleendúcabe yaʼ. Lu beeu abril que gúpacabe 53 precursor auxiliar, biaʼ galaa de neza binni ridagulisaa que.
9. Pa tuuxa racalaʼdxiʼ gucheeche diidxaʼ, xiñee nabé galán gúnibe ni ante guietenaláʼdxinu guendaguti stiʼ Jesús.
9 Gacanenu stobi gucheeche diidxaʼ. Ora maʼ zanda gucheecheʼ cani nacubi ne xiiñiʼ ca bíʼchinu diidxaʼ la? zanda chinécabe tobi ni maʼ xadxí rucheeche diidxaʼ. Ne cumu ca dxi guietenaláʼdxinu guendaguti stiʼ Jesús ca stale tu laa zuni jma lu xhiiñaʼ Dios la? nabé galán guireecabe ca dxi ca. Ñee ruundaneluʼ tuuxa ni caniisi lu stiidxaʼ Dios ne maʼ nabani casi modo na Dios la? Ñee nabani ca xiiñibe galán ne caniisicaʼ lu Stiidxaʼ Dios peru caʼruʼ gucheechecaʼ diidxaʼ la? Pa tobi de laacabe guiníʼ rapa gana gaca ti ni rucheeche diidxaʼ ni caʼruʼ chúʼnisa ne lii ruuyaluʼ zanda gácabe ni la? guniné ti binnigola. Binnigola ni rapa guiráʼ stiʼ binni ridagulisaa zanínebe chupa binnigola para guiniʼné lii ne xiiñiluʼ o ni ruundaneluʼ ca.
10. Xi zanda guni ca binnigola para gacanecaʼ cani maʼ qué rucheeche diidxaʼ.
10 Ca beeu zeeda ca laaca zanda gacanenu cani maʼ qué rucheeche diidxaʼ ti guibiguetaʼ guninécabe ca xpinni Cristu dxiiñaʼ. Ca binnigola ni rusiidiʼ ra nuu Grupu ni Ruundaʼ Libru ne xcaadxi binnigola zúnicaʼ stipa para chigánnacaʼ ne guni invitarcaʼ laacabe para chigucheechecabe diidxaʼ. Pa tuuxa maʼ xadxí qué rucheeche diidxaʼ la? chupa binnigola zaníʼnecaʼ binni ca para guuyacaʼ pa zanda gucheecherube diidxaʼ (km-S 11/00 yaza 3).
11. Ximodo bisihuinni Dios nadxii laanu.
11 Guyuu listu para guietenaláʼdxinu guendaguti stiʼ Jesús. Dios bisihuinni nadxii laanu ra bidii xiiñiʼ gueeda gati pur laanu (Hech. 20:24). Sábadu 22 stiʼ marzo, despué de guiaaziʼ Gubidxa, zadagulisaa millón de binni lu guidubi naca guidxilayú para guietenaláʼdxicaʼ guendaguti stiʼ Jesús. Nga runi, racaláʼdxinu guni invitarnu guiráʼ xixé binni ni guiale de ladxidóʼ para guietenalaʼdxinecaʼ laanu guendarannaxhii ni bisihuinni Jiobá luguiáʼ guiráʼ xixé binni ne gacanenu laacaʼ para checaʼ.
12. Tu guiráʼ naquiiñeʼ guni invitarnu para guietenalaʼdxiné laanu guendaguti stiʼ Jesús.
12 Rinábadu lii gúniluʼ ti lista para gucaaluʼ lá ca binni ni racaláʼdxiluʼ guni invitarluʼ. Bicaa lá ca binnilídxiluʼ, xpesínuluʼ, cani runineluʼ dxiiñaʼ o cani rineluʼ scuela, cani biindaneluʼ Biblia dxiqué o cani cayuundaneluʼ yanna ne ca binni ni rigánnaluʼ gatigá. Pa tuuxa guinabadiidxaʼ xiixa de guendaguti stiʼ Jesús la? zanda iquiiñetu apéndice zeeda lu yaza 206 dede 208 stiʼ libru Xipeʼ ndiʼ cusiidiʼ Biblia ni caníʼ de Guendaroxhi stiʼ Señor. Ne zándaca guzulú gúʼndaneluʼ binni ca Biblia, purtiʼ zanda guluiʼluʼ laabe libru ni riquiiñenu para gusíʼdinu binni.
13. Ximodo guluu ndaayaʼ Jiobá stipa biʼniʼ chupa de ca ni rucheeche diidxaʼ ra biʼniʼ invitarcaʼ xcaadxi binni cheʼ ra bietenaláʼdxinu guendaguti stiʼ Jesús.
13 Ti bizáʼnanu bíʼnibe ti lista ne luni bicaabe 48 familia para guni invitarbe. Cada guni invitarbe ti familia la? ruxhiabe lá lu lista que ne rucaabe xi dxi biʼniʼ invitarbe laacaʼ. ¡Nabé nayecheʼ guyuube ora bíʼyabe guyé 26 de cani biʼniʼ invitarbe ra bietenaláʼdxinu guendaguti stiʼ Jesús que! Ti bíʼchinu biʼniʼ invitar tobi de cani runi xhiiñabeʼ, peru hombre que guca cura. Hombre que guyé ra biʼniʼ invitar bíʼchinu que laa ne despué guníʼ sicaríʼ: «Lu ti hora si biziideʼ stale de lu Biblia que treinta iza guyuáʼ ndaaniʼ yuʼduʼ católica». Despué biindanécabe laabe libru Xipeʼ ndiʼ cusiidiʼ Biblia.
14. Xi dxiiñaʼ zúninu lu guidubi naca guidxilayú 1 stiʼ marzo.
14 Ti dxiiñaʼ ni naquiiñeʼ gúninu. Sábadu 1 stiʼ marzo hasta 22 stiʼ marzo zúninu ti dxiiñaʼ lu guidubi naca guidxilayú: zuni invitarnu binni cheʼ ra chiguietenaláʼdxinu guendaguti stiʼ Jesús. Cadi dxandíʼ guiranu zúninu dxiiñaʼ ca la? Bietenalaʼdxiʼ jma galán gusaananu invitación ca lu náʼ binni, que gusaananu ni ra puertaʼ lídxicaʼ. Peru pa nápatu stale lugar ra gucheechetu diidxaʼ la? zándaca ca binnigola ca guiniʼcaʼ gusaanatu cani ra puertaʼ lidxi binni pa qué guidxélatu laacaʼ. Ca sábadu ne ca domingu ca laaca zusaananenu binni revista.
15. Ximodo zanda gusaananenu binni ti invitación para checaʼ ra chiguietenaláʼdxinu guendaguti stiʼ Jesús.
15 Cumu dxiiñaʼ riʼ qué zandaapeʼ ni la? galán iquiiñenu huaxiéʼ diidxaʼ para gudiʼnu invitación ca, peru naquiiñeʼ guinínenu laacaʼ galán ne stale gana. Zanda guiniʼluʼ sicaríʼ: «Racaláʼdxidu gudiʼdu lii ti invitación para chineluʼ binnilídxiluʼ ne cani runibiaʼluʼ ra chiguietenaláʼdxidu guendaguti stiʼ Jesús, zácani 22 stiʼ marzo. Lu guiʼchiʼ riʼ zeeda xi chigaca raqué». Ziuu binni zanabaʼ diidxaʼ laanu xiixa; xcaadxi binni zacaa invitación ca ne zaniʼcaʼ ziecaʼ. Cadi guiaandaʼ lii gucaaluʼ lá ca binni ca ne xi gunabaʼ diidxacaʼ, ne gudxi laacaʼ zabiguétaluʼ.
16. Xi bizaaca ti soldadu ni rusihuinni pabiáʼ risaca guni invitarnu binni ti checaʼ ra chiguietenaláʼdxinu guendaguti stiʼ Jesús.
16 Iza gudiʼdiʼ ca, ti soldadu bidxelaʼ ti invitación ra puertaʼ lidxi. Gudixhe íquebe chebe, peru primeru gunábabe permisu xaíque stibe. Ora biiyaʼ xaíque stibe invitación que la? qué niníʼ diʼ gastiʼ; oraqueruʼ guníʼ Testigu bixhoze ne jñaa ne dxiqué yenebe laacaʼ guendaridagulisaa. Ngue runi, bidiibe permisu soldadu que ne yenebe laa ra bietenaláʼdxinu guendaguti stiʼ Jesús.
17. Cumu guca Jiobá nachaʼhuiʼ ne laanu, xi naquiiñeʼ gúninu.
17 Gudiʼnu xquíxepeʼ Dios. Laga zeeda guidxiña dxi para guietenaláʼdxinu guendaguti stiʼ Jesús lu iza 2008 riʼ, naquiiñeʼ guietenaláʼdxinu pabiáʼ nachaʼhuiʼ Jiobá ne laanu. Apóstol Pablu bicaa: «Ne canaba du laatu usihuinni tu cadi pur gana si uca be nachaʼhui ne laatu» (2 Cor. 6:1). Cumu guca Jiobá nachaʼhuiʼ ne laanu la? naquiiñeʼ gúninu dxiiñaʼ ni maʼ bidiibe laanu. Peru, ximodo gusihuínninu ni yaʼ. Pablu bicabi sicaríʼ: «Laga irá modo racalaʼdxi du usihuinni du xhiiña Dios cayuni du» (2 Cor. 6:4). Ya, ra gucheechenu diidxaʼ ne stale gana ne ra gaca xpiaʼnu nayá rusihuínninu cudiʼnu xquíxepeʼ Jiobá pur ca guenda nachaʼhuiʼ stiʼ. Ne ca dxi ante guietenaláʼdxinu guendaguti stiʼ Jesús riʼ, zanda gusíʼdinu binni jma de ca diidxaʼ nacubi ne galán stiʼ Dios.
[Box on page 3]
Tu laa zanda gaca precursor auxiliar
◼ Lii ne binnilídxiluʼ
◼ Cani runi dxiiñaʼ guidubi dxi
◼ Cani maʼ nagola, cani huará
◼ Cani rié scuela
[Box on page 4]
Ora guiaaziʼ invitación para guietenaláʼdxinu guendaguti stiʼ Jesús:
◼ Biquiiñeʼ huaxiéʼ diidxaʼ ne bíʼnini ne stale gana
◼ Bicaa lá ca binni ni guiníʼ zié ne bibiguetaʼ ra nuucaʼ
◼ Bisaanané binni revista ca sábadu ne ca domingu ca