Cadi gusaananu de guininu de guiráʼ ca guendaridxagayaa ni bizáʼ Jiobá
1. Guná ndiʼ ca guendaridxagayaa ni biʼniʼ Jiobá jma riuláʼdxiluʼ.
1 ¡Guirutiʼ nga casi Dios ni jma nandxóʼ stinu, Jiobá! Dabid bicaa sicaríʼ: «Stale cosa nga ni maʼ bíʼniluʼ, Jiobá, Dios stinneʼ, dede ca guendaridxagayaa ni bizaʼluʼ ne cani riníʼ íqueluʼ para ne laadu; guirutiʼ qué zanda guchagabiáʼ lii» (Sal. 40:5). Lade ca guendaridxagayaa ni bíʼnibe ca nuu Guibáʼ ne Guidxilayú, Reinu stiʼ Cristu, guendarucheeche diidxaʼ lu Guidxilayú riʼ ne modo huayannaxhiibe ne qué huasaanabe xquídxibe. (Sal. 17:7, 8; 139:14; Dan. 2:44; Mat. 24:14). Guendarannaxhii ni nápanu laabe nga nga rucaa laanu guininu de laabe ne zacá rudiinu xquíxepeʼ laabe pur cani maʼ bíʼnibe (Sal. 145:5-7). Lu beeu marso, abril ne mayo zanda gúninu ni jma.
2. Xi ribeendunu ora gúninu dxiiñaʼ de precursor ausiliar.
2 Dxiiñaʼ de precursor ausiliar. Ñee zanda quixhechaahuiluʼ xtiémpuluʼ ti ganda gácaluʼ precursor ausiliar lu tobi o jma de ca beeu ni bibí para gaca ni la? Dxandipeʼ, intiisi gúniluʼ pur guchaalu ca dxiiñaʼ ni rúniluʼ guiráʼ dxi la? zabeenduluʼ stale ni galán (Efe. 5:16). Stale tu maʼ biiyaʼ de que dxiiñaʼ stiʼ guendarizaniruʼ (precursor) ca racaneni laacabe gusiidicabeʼ jma jneza ora riucheechecabeʼ diidxaʼ. Ruuyacabe maʼ qué raca nagana para laacabe guiníʼnecabe binni ne jma riquiiñecabe Biblia. Ne cumu jma stale tiempu nga ridiidicabe lu dxiiñaʼ riʼ la? jma nagueenda ridxélacabe modo chulaʼdxiʼ binni gucadiaaga laacabe, ne cani qué ruundané binni Biblia dxiqué maʼ bizulú cayúnicaʼ ni purtiʼ rúnicaʼ dxiiñaʼ de sanírucaʼ. Dxiiñaʼ riʼ la? rusiécheni laanu stálepeʼ purtiʼ caquiiñenu guiráʼ stipa stinu para gacanenu binni (Hech. 20:35).
3. Ximodo huayuni caadxi bíchinu ne bizánanu para gácacaʼ precursor ausiliar neca nuucaʼ ra nagana yaʼ.
3 Cadi nagueenda ca guiníʼ íqueluʼ de que pur ca dxiiñaʼ stiluʼ qué zanda gácaluʼ precursor ausiliar. Ti binnigola (anciano) ni napa chupa xiiñihuiiniʼ ne runi dxiiñaʼ idubi dxi la? gúcabe precursor ausiliar iza gudiʼdiʼ ca. Ximodo gunda bíʼnibe ni neca nuu xiiñabe stale yaʼ. Cumu rúnibe dxiiñaʼ ndaaniʼ semana la? biyúbibe ximodo iquiiñebe biaʼ gándatiʼ xtiémpube ca sábadu ne ca domingu, ne bizulú bicheechebe diidxaʼ lu caye guiráʼ sábadu siadóʼ a la siete. Stale de ca binni ni ridagulisaanebe ni laaca nuucaʼ casi laabe gúcacaʼ precursor ausiliar, gucanésaacabe ne gulusaacabe gana laacabe. Ra nuu sti neza binni ridagulisaa la? (congregación) ti bizánanu de 99 iza gudixhe ique gaca precursor ausiliar lu beeu mayo purtiʼ xiiñidxaapabe biʼniʼ inbitar laabe gúnibe casi cayuni. Xcaadxi binni ni ridagulisaanebe gucanecaʼ laabe, para ucaanacaʼ siya de rueda stibe ora maʼ zécabe de yoo pur yoo ne ora riguundanécabe binni Biblia ralidxi. Laabe laaca bicheechebe diidxaʼ pur teléfono, pur carta ne lu caye. Nannadxíchibe qué ñanda diʼ ñúnibe ni ne stipa si stibe, sínuque bíʼnibe ni purtiʼ Jiobá gucané laabe (Isa. 40:29-31).
4. Xi naquiiñeʼ gánnaluʼ ora maʼ chitixhechaahuiluʼ xtiémpuluʼ para gácaluʼ precursor ausiliar.
4 Biyubi ximodo quixhechaahuiluʼ ti hora ni zanda chinándaluʼ. Zándaca iquiiñeluʼ modo cá ca hora ni zeeda lu guiʼchiʼ riʼ. Ruʼnuʼ dxiiñaʼ idubi dxi o rieluʼ scuela la? Zándaca jma galán para lii iquiiñeluʼ xtiémpulu jneza ca sábadu ne ca domingu para gucheecheluʼ diidxaʼ. Pa qué zanda guʼnuʼ stale hora ti dxi pur xiixa guendahuará o pur ridxágaluʼ la? zándaca jma galán quixhechaahuiluʼ xtiémpuluʼ ti guʼnuʼ caadxi guiráʼ dxi. Guniʼne xcaadxi ni rucheeche diidxaʼ (publicador) de que riuláʼdxiluʼ gácaluʼ precursor ausiliar. Zándaca laacabe laaca quixhe íquecabe gúnicabe ni racaláʼdxiluʼ gúniluʼ ca.
5. Xi zanda quixhe ique cani nahuiiniʼ gúnicaʼ lu marso, abril ne mayo.
5 Ximodo zanda gacané cani nahuiiniʼ. Jiobá riulaʼdxiʼ stale ora cani nahuiiniʼ riniʼcaʼ de guiráʼ ca guendaridxagayaa ni maʼ Bizaʼbe (Sal. 71:17; Mat. 21:16). Pa nahuiiniluʼ ne maʼ guyuunísaluʼ la? zanda gácaluʼ precursor ausiliar lu tobi de ca beeu ra gápaluʼ bacasión. Pa qué ganda saníruluʼ lu dxiiñaʼ riʼ, ñee zanda quixhe íqueluʼ ximodo guʼnuʼ jma hora lu guendarucheeche diidxaʼ ne gannuʼ gusiidiluʼ jma jneza lu ca beeu riʼ la? Ne pa maca rireenelu bixhózeluʼ ne jñaaluʼ lu dxiiñaʼ riʼ peru caʼruʼ chúʼnisalu la? yanna nga galán guʼnuʼ stipa para guʼnuʼ guiráʼ ni naquiiñeʼ ti chúʼnisaluʼ. Cadi guiníʼ íqueluʼ de que naquiiñepeʼ nga gannuʼ icábiluʼ guiráʼ ni inabadiidxacabe lii de lu Biblia o naquiiñepeʼ gannuʼ biaʼca nanna cani huaniisi ni maʼ guyuunisa. Rieʼnuʼ cani rusiidiʼ Biblia, cani jma risaca zeeda luni la? Ñee maʼ nabániluʼ ne maʼ bichaaluʼ xpiaʼluʼ casi modo ná Biblia la? Riuláʼdxiluʼ gunibiáʼcabe lii casi testigu stiʼ Jiobá la? Pa zacá ni la? guniʼne bixhózeluʼ ne jñaaluʼ. Lii ne laacabe zaníʼnetu ca binnigola para gúʼyacabe pa maʼ ruʼnuʼ cani canabaʼ Dios lii (biiyaʼ Nuestro ministerio, ca yaza 98, 99).
6. Ximodo zanda gacanenu cani cayuundaʼ Biblia ti gucheechecaʼ diidxaʼ yaʼ.
6 Gucané xcaadxi ti gucheechecaʼ diidxaʼ. Zándaca cani cayuundanetu Biblia maʼ rúnicaʼ ni caziidicaʼ ne maʼ zanda gucheechecaʼ diidxaʼ lu ca beeu ni bibí para gaca dxiiña riʼ. Pa cayuundaneluʼ tuuxa ni maʼ caniisi lu stiidxaʼ Dios la? guniʼne binnigola ni rusiidiʼ ra riuundaʼ libru (superintendente de estudio de libro) o binnigola ni ruuyaʼ modo rireeche diidxaʼ (superintendente de servicio) ti gacanecaʼ lii. Tobi de laacabe zanda chiné lii para guʼya pabiáʼ maʼ biniisibe lu stiidxaʼ Dios. Pa maʼ rúnibe cani na Dios ne racaláʼdxibe gucheechebe diidxaʼ la? binnigola ni rapa guiráʼ stiʼ binni ridagulisaa (superintendente presidente) zaniʼne xhupa binnigola para guiníʼnecabe lii ne laabe (biiyaʼ La Atalaya 15 stiʼ nobiembre 1988, yaza 17). Ora maʼ guníʼcabe de que zanda la? bizuluca bisiidiʼ laabe para gucheechebe diidxaʼ.
7. Ximodo zanda gacanenu cani maʼ qué rucheeche diidxaʼ ne cani qué riree guiráʼ beeu yaʼ.
7 Ca binnigola ni rusiidiʼ ra riuundaʼ libru la? naquiiñepeʼ nga icá íquecaʼ gacanecaʼ cani maʼ qué rucheeche diidxaʼ (inactivo) ne cani qué riree guiráʼ beeu (irregular) de grupuhuiiniʼ sticaʼ. Laapetu nga naquiiñeʼ gábitu laacabe de que guireenetu laacabe lu dxiiñaʼ riʼ. Pa nuu tuuxa ni maʼ xadxipeʼ qué rucheeche diidxaʼ la? galán guiniʼne chupa binnigola laabe primeru para gúʼyacaʼ pa zanda chigucheechebe diidxaʼ (biiyaʼ «Sección de preguntas», stiʼ Nuestro Ministerio del Reino nobiembre 2000). Zándaca guendanayecheʼ ni guniné ca binni ridagulisaa ca dxiiñaʼ lu guionnaʼ beeu ni bibí ca gucaani ca bíchinu ne bizánanu ireecaʼ guiráʼ beeu sti biaje.
8, 9. Xi zanda guni ca binnigola para uguucaʼ gana ne guendanayecheʼ lu guendarireeche diidxaʼ ca beeu ni bibí ca yaʼ.
8 Guyuu listu yanna para guʼnuʼ jma dxiiñaʼ. Binnigólacaʼ, dede yanna lauguu gana ca binni ridagulisaa ti gácacaʼ precursor ausiliar. Laatu zanda gacanetu stale ra iniʼtu galán de laani, ne pur modo gúnitu dxiiñaʼ (1 Ped. 5:3). Pabiáʼ ndiʼ jma stale precursor ausiliar gúpatu nacubigá ra ridagulisaatu yaʼ. Zanda chuʼ jma stale iza riʼ la? Ca binnigola ni rusiidiʼ ra riuundaʼ libru (superintendente de estudio de libro) ne cani racané laacabe naquiiñeʼ guyúbicabe ximodo uguucabe gana ca xpínnicabe para guireecaʼ jma lu guidxi. Ca binnigola ni ruuyaʼ modo rireeche diidxaʼ la? naquiiñeʼ quíxhecaʼ pora gaca xcaadxi guendaridagulisaa para chigucheechecabe diidxaʼ. Dede ante lagabi ca binni ridagulisaa de cani naguixhetu gaca. Naquiiñeʼ guuyachaahuitu de que ca guendaridagulisaa ca la? guzulú cani ne iluxe cani lu hora ni maca nexheʼ para laacani, ne gúʼyatu de que cani guni cani la? naquiiñeʼ gácacabe ni rucheeche diidxaʼ ni nanna gusiidiʼ jneza (biiyaʼ «Sección de preguntas», stiʼ Nuestro Ministerio del Reino septiembre 2001). Binnigola ni ruuyaʼ modo rireeche diidxaʼ la? laaca naquiiñeʼ gúʼyabe chuʼ xiroobaʼ ra gucheechecabe diidxaʼ ne chuʼ stale rebista ne libru.
9 Iza gudiʼdiʼ ca la? —dede ante ne guendanayecheʼ— ca binnigola stiʼ ti neza binni ridagulisaa bizulú uluucaʼ gana cani rucheeche diidxaʼ ti gácaca precursor ausiliar, ne caadxi de laacabe bichácabe ti guiʼchiʼ para laani. Gudíxhecabe póraruʼ zanda guidagulisaacabe para chigucheechecabe diidxaʼ: tobi siadóʼ a la 5.30 para gucheechecabe diidxaʼ lu caye, stobi ca huadxí a la 3.00 para iníʼnecabe cani caree de scuela ne stobi jma huadxí a la 6.00 para cani zeeda de dxiiñaʼ. Laaca gudíxhecabe guidagulisaacabe xhonna biaje ca sábadu ca para chigucheechecabe diidxaʼ. Guiráʼ ca ndiʼ gucané para gunda guca 66 de cani rucheeche diidxaʼ precursor ausiliar beeu abril.
10. Xi zanda guni ca binnilídxinu ti chuʼcaʼ listu para gúnicaʼ jma dxiiñaʼ yaʼ.
10 Sti biaje gúʼndanetu binnilídxitu, xiñee qué iquiiñetu ti ratuhuiiniʼ para guiniʼtu xi zanda quixhe íquetu gúnitu ca beeu zeeda riʼ yaʼ. Pa gacanésaatu ne quixhechaahuitu cani chigúnitu la? zándaca chupa chonna binnilídxitu o guiratu gácatu precursor ausiliar. Pa qué ganda la? laquixhe ximodo gúnitu jma hora lu dxiiñaʼ riʼ o ximodo guireetu stale biaje. Lainiʼne Jiobá de laani. Ne laganna dxíchicaʼ, Jiobá zaguu ndaayaʼ ca stipa stitu (1 Juan 3:22).
11. 1)Xii nga ca guendaridxagayaa guleendú guendaguti stiʼ Cristu 2) Pora ne paraa guietenaláʼdxicabe guendaguti ca neza ra nabézaluʼ.
11 Guendaridxagayaa ni jma naroʼbaʼ biʼniʼ Dios. Ra jma rihuinni guendarannaxhii sti Jiobá nga, ra bidiibe Xiiñibe para gulá laanu (1 Juan 4:9, 10). Ni biʼniʼ Jesús riʼ nga bidiibe laabe gátibe pur laanu, purtiʼ nga nga ni canabaʼ ley stiʼ Dios para ganda guilá binni de donda ne de guendaguti (Rom. 3:23, 24). Ne ra bixii rini stiʼ Jesús que nga bizulú pactu cubi que cayuni dxiiñaʼ, zacá la? binni napa donda maʼ gunda ucuaa Dios laacaʼ casi xiiñi ti guni mandarcaʼ ne Jesús lu Reinu stiʼ (Jer. 31:31-34; Mar. 14:24). Ne ni jma risaca nga, guendaruzuubaʼ diidxaʼ stiʼ Jesús que bisiani lá Jiobá (Deu. 32:4; Pro. 27:11). Domingu 4 stiʼ beeu abril despué de guiaaziʼ Gubidxa zietenaláʼdxinu Guendaguti stiʼ Cristu lu idubi naca Guidxilayú.
12. Xi zabeendú cani cheʼ ra Guendaroxhi stiʼ Señor ca yaʼ.
12 Gúninu Guendaroxhi stiʼ Señor la? rusisácani ca guendaridxagayaa biʼniʼ Jiobá. Libana ca rucaani laanu gannaxhiinu Jiobá jma pur ni biʼniʼ para gulá laanu. Cani cheʼ ca laaca zuuyacaʼ xcaadxi guendaridxagayaa stiʼ Dios. Zuuyacabe modo nuu xquidxi Dios tobi si ne zuuyacabe guendarannaxhii ni maʼ bisiidibe laacaʼ gusihuínnicaʼ (Efe. 4:16, 22-24; Sant. 3:17, 18). Chécabe guendaridagulisaa ni risaca riʼ la? zándaca gucaani laacabe guchaacabe modo riníʼ íquecabe, nga runi nápanu gana chuʼ stálepeʼ binni ora gaca ni (2 Cor. 5:14, 15).
13, 14. Tuu nga cani naquiiñeʼ guni inbitarnu ra Chiguietenaláʼdxinu Guendaguti stiʼ Jesús, ne ximodo gúninu ni.
13 Biʼniʼ inbitar xcaadxi para cheʼ. Dede yanna bizulú biʼniʼ ti lista de ca binni ni racaláʼdxiluʼ guni inbitarluʼ. Lu lista ca naquiiñeʼ icá lá ca binnilídxiluʼ, xpesínuluʼ, cani runineluʼ dxiiñaʼ o cani rineluʼ scuela, cani biindaʼ Biblia dxiqué, cani cayuundaruʼ yanna, ne guiráʼ ca binni ni rigánnaluʼ ne riuláʼdxicaʼ iziidicaʼ. Ca binnigola ni rusiidiʼ ra riuundaʼ libru la? naquiiñeʼ gucaacabe lu lista cani maʼ que rucheechecaʼ diidxaʼ.
14 Biquiiñeʼ ca inbitasión ra cá de que Chiguietenaláʼdxinu Guendaguti stiʼ Jesús ne bicaa luni letra ni guiene binni pora ne paraa chigácani. O zanda iquiiñeluʼ inbitasión ni cá lu últimu yaza stiʼ La Atalaya 15 stiʼ marso 2004, o stiʼ ¡Despertad! 22 stiʼ marso 2004. Ra maʼ zidxiñaʼ 4 stiʼ abril ca la? bisietenalaʼdxiʼ cani nápaluʼ lu lista dxi gácani ca, guniʼne laacabe liipeʼ o pur teléfono.
15. Xi naquiiñeʼ gúninu para idxagalunu binni galán dxi Guietenaláʼdxinu Guendaguti stiʼ Jesús yaʼ.
15 Dxi guietenaláʼdxinu Guendaguti stiʼ Jesús. Biʼniʼ stipa pur chindaluʼ tempranu huaxhinni chigácani ca. Ora idxagaluluʼ cani nacubi zeeda la? bisihuinni guendanayecheʼ stiluʼ (Rom. 12:13) Lii nápaluʼ ti dxiiñaʼ jma naroʼbaʼ ne ca binni biʼniʼ inbitarluʼ. Bigapadiuxi laacabe ne respetu ne yené laacabe gunibiáʼcabe xcaadxi binni ridagulisaaneluʼ. Pa ganda la? gurí gaxha de laacabe, ne pa nuu tu qué gapa Biblia nin libru stiʼ diidxaʼ riuundaʼ la? zanda gúʼndaneluʼ laabe o gúʼndanebe stobi zuba gaxha de laabe. Ora maʼ biluxe guendaridagulisaa riʼ la? guyuuca listu para icábiluʼ intiisi ni inabadiidxacabe. Pa deruʼ primé guyécabe la? gunabadiidxaʼ laacabe pa ñuláʼdxicabe niziidicabe jma de lu Stiidxaʼ Dios ne cani chiguni. Gudxi laacabe pa zanda gúʼndaneluʼ laacabe.
16. Xi naquiiñeʼ gúninu ti gacanenu cani guyé ra bietenaláʼdxinu Guendaguti stiʼ Jesús ca ti iniisicaʼ lu Stiidxaʼ Dios yaʼ.
16 Cadi gusaana de gacaneluʼ cani guyé. Tiidiʼ si dxi Guietenaláʼdxinu Guendaguti stiʼ Jesús la? galán chigánnacanu cani guyé ti gacanenu laacaʼ. Lade cani chigánnanu la? nuu cani dxiqué guyecaʼ guiráʼ ca guendaridagulisaa, peru yanna maʼ qué riépecaʼ. Ca binnigola ziuucaʼ listu para chuʼ tu chiganna laacabe nagueendaca, ne zúnicabe stipa pur guiénecabe xiñee bisaana de iziidicabe de Stiidxaʼ Dios. Lausiene laacabe de que yanna nga naquiiñeʼ gúnicabe guiráʼ ni ná Dios (1 Ped. 4:7). Lagacané laacabe guiénecabe xi zabeenducabe ra guzuubacabe diidxaʼ ni ná Biblia de guidagulisaanécabe xquidxi Dios (Heb. 10:24, 25)
17. Xiñee naquiiñeʼ guinírunu de guiráʼ ca guendaridxagayaa ni bizáʼ Jiobá.
17 Guizáʼ naroʼbaʼ nga ca guendaridxagayaa biʼniʼ Jiobá para ganda guiénenu guiráʼ xixé cani, neca nibáninu sin qué ñuu dxi ñátinu (Job 42:2, 3; Ecl. 3:11). Nga runi, qué ziaadxaʼ xi pur gusisácanu laabe. Ca dxi Guietenaláʼdxinu Guendaguti stiʼ Jesús riʼ la? zanda guluinu de que rudiinu xquíxepeʼ Jiobá pur guiráʼ ca guendaridxagayaa ni bizaʼbe, ra iquiiñenu guiráʼ stipa stinu para gúninu biaʼ gándatiʼ pur gucheechenu diidxaʼ.
[Chart on page 5]
Ñee zanda gácaluʼ precursor ausiliar pa iquiiñeluʼ tobi de ca hora riʼ la?
Marso D L* M* M* J B S Guiráʼ
stiʼ beeu
Guiráʼ dxi 2 1 1 1 1 1 5 51
Chupa gubidxa 0 5 0 5 0 0 0 50
Sábadu ne domingu 5 0 0 0 0 0 8 52
Sábadu ne domingu ne chupa
gubidxa ndaaniʼ semana 2 0 0 2 0 2 6 50
Abril
D L M M J* B* S Guiráʼ
stiʼ beeu
Guiráʼ dxi 2 1 1 1 1 1 5 50
Chupa gubidxa 0 0 0 0 5 5 0 50
Sábadu ne domingu 5 0 0 0 0 0 8 52
Sábadu ne domingu ne chupa
gubidxa ndaaniʼ semana 2 0 0 2 0 2 6 50
Mayo
D* L* M M J B S* Guiráʼ
stiʼ beeu
Guiráʼ dxi 2 1 1 1 1 1 4 51
Chupa gubidxa 0 5 0 0 0 0 5 50
Sabadu ne domingu 3 0 0 0 0 0 7 50
Sábadu ne domingu ne chupa
gubidxa ndaaniʼ semana 2 0 0 2 0 2 5 51
*Gaayuʼ lu ti beeu