Inínenu binni de «biaaniʼ ni ruzaaniʼ binni guidxilayú»
1. Xi biaaniʼ roʼ na Stiidxaʼ Dios zahuinni, ne xi uca para bihuinni biaaniʼ ca.
1 Jiobá gúdxibe tobi de cani riguixhená stibe ni láʼ Isaías, ucaa xi zahuinni: «Guidxi ni guzá lu gueelacahui que maʼ biiyacaʼ ti biaaniʼ roʼ. Ne ca binni ni nuu lu gueelacahui que laaca biaaniʼ roʼ que bizaaniʼ ra nuucaʼ» (Isa. 9:2). «Biaaniʼ roʼ» ca bihuinni ni lu cani biʼniʼ Jesucristu, Xiiñiʼ Dios. Dxiiñaʼ ni bíʼnibe lu Guidxilayú riʼ ne cani uleendú endaguti stibe ucaneni cani nuu lu elacahui. Ca binni ni nuu yanna riʼ laaca caquiiñecabe biaaniʼ queca ca dxi stinu riʼ. Guendaroxhi stiʼ Señor ca rucaani laanu inínenu binni de «biaaniʼ ni ruzaaniʼ binni guidxilayú» (Juan 8:12). Udubiza, cásica laanu millón de binni bisihuínnicaʼ fe sticaʼ ra bíʼnicaʼ ni na ca diidxaʼ ni uníʼ Jesús riʼ: «Laguni casi cayuni nu riʼ para guietenaladxi tu naa» (Luc. 22:19). Cumu mayaca guedandá dxi guietenaláʼdxinu endaguti stiʼ Cristu iza riʼ, ximodo zanda inínenu binni de biaaniʼ roʼ stiʼ Jiobá ca yaʼ (Fili. 2:15).
2. Ximodo zanda usihuínninu nabé rusisácanu ni udixe Jesús pur laanu, ne xi zucaani laanu gúninu.
2 Usihuínninu rudiʼnu xquíxepeʼ Jiobá. Ora maʼ zeeda ugaanda dxi guietenaláʼdxinu endaguti stiʼ Cristu, galán nga iníʼ íquenu pabiáʼ nadxii Jiobá laanu ne Jesús purtiʼ udixe ne endanabani stiʼ para iráʼ xixé binni (Juan 3:16; 2 Cor. 5:14, 15). Pa laanu iníʼ íquenu ni bíʼnicabe pur laanu ca la? nga zucaa laanu udiʼnu xquíxepeʼ laacabe pur dxi ni nabé risaca ca. Iráʼ ca xpinni Dios riquiiñeʼ cueecaʼ tiempu para gúʼndacaʼ ra maca nexheʼ guiuundaʼ Biblia, ni zeeda lu folletu Examinando las Escrituras diariamente, ne iníʼ íquecabe xiná ni. Ca guenda izáʼ sicarú stiʼ Jiobá ca, cani bisihuínnibe dxi udíxebe pur laanu que, rucaa cani laanu ininu laabe nga Dios stinu. Ora iníʼ íquenu ximodo racané ni udixe Jesús pur laanu, laaca rucaani laanu jma gannaxhiinu Jiobá ne Jesús ne gúninu stipa pur chinándanu ni Nabe (Gál. 2:20).
3. Ximodo zanda usihuínninu rusisácanu dxi rietenaláʼdxinu guendaguti stiʼ Cristu.
3 Pa usihuínninu nabé rusisácanu bilá Dios laanu la? endanayecheʼ ni nápanu pur guietenaláʼdxinu guendaguti stiʼ Cristu ca laaca zapa cani rúʼndanenu Biblia ni, cani rigánnanu, binnilídxinu, vecinu stinu, cani rinenu scuela, cani runinenu dxiiñaʼ ne cani guni invitarnu (Luc. 6:45). Nga runi, gúninu ti stipa naroʼbaʼ pur guni invitarnu laacabe ne udiʼnu ti guiʼchiʼ ra cá padxí chigácani ni ti cadi guiaandaʼ ni laacabe. Para cadi guiaandaʼ laanu guni invitarnu tuuxa la? nuu tu runi ti lista ra rucaa lá iráʼ cani chiguni invitar dxi guietenaláʼdxinu guendaguti stiʼ Cristu ne iráʼ iza ruuyacabe tu iraruʼ zanda cheʼ. Ra gúninu stipa pur guni invitarnu ca binni ca la? zusihuínninu cudiʼnu xquíxepeʼ Jiobá Dios purtiʼ «nin qué zanda idxela nu diidxa para iní nu pabiáʼ sicarú ni biʼni be pur laanu» (2 Cor. 9:15).
4. Xi zanda acané laanu ti jma ucheechenu diidxaʼ beeu marzo ne abril.
4 Ucheechenu diidxaʼ jma. Ñee zanda gúniluʼ jma dxiiñaʼ de endarucheeche diidxaʼ lu ca beeu marzo ne abril la? Jiobá Dios zaguu ndaayaʼ stipa ni gúniluʼ pur iníʼneluʼ xcaadxi binni «ca evangeliu ni rusihuinni enda nandxóʼ sti Cristu». De ra nuube nga riree biaaniʼ ti guiénenu Stiidxabe ca, nga runi cayábibe laanu zuzaaniʼ «biaani» ra nuu elacahui (2 Cor. 4:4-6). Ca binnigola ca zaguíxhecabe pora idagulisaatu para ireetu chiucheechetu diidxaʼ ne zúnicabe ni adxé adxé hora ne lugar ti ganda acanécabe cani racalaʼdxiʼ guni jma lu dxiiñaʼ riʼ. Zanda ucheechetu diidxaʼ lu calle siadoʼroʼ, ra nuu negocio, pur teléfono o zanda gúnitu ni huadxí. Udixhe ique panda hora racaláʼdxiluʼ gúniluʼ ne biʼniʼ stipa para ugaandaluʼ ni. Stale bíʼchinu ne bizáʼnanu rácacabe precursor auxiliar purtiʼ zacá ruuyacabe cayúnicabe xhiiñaʼ Jiobá dede biaʼ gándatiʼ (Col. 3:23, 24).
5. Xi huayuni stale biiyasicaʼ maʼ bieeteʼ lu hora ni runi ti precursor auxiliar.
5 Ñee zanda ácaluʼ precursor auxiliar la? Maʼ raca gadxe iza de bieeteʼ lu hora ni runi ti precursor auxiliar, nga runi stale bíʼchinu ne bizáʼnanu huayácacaʼ precursor ne maʼ huacaacaʼ ca ndaayaʼ redaneni. Ñee maʼ huayácaluʼ precursor auxiliar la? Nuu tu laa raca precursor iráʼ iza. Ora stale de cani rucheeche diidxaʼ stiʼ ti neza binni ridagulisaa, ácacaʼ precursor auxiliar tobi si beeu la? irácabe zudiicabe cuenta jma uca dxiiñaʼ iza ca. Ñee zanda ácaluʼ precursor auxiliar ora maʼ zeeda ganda dxi guietenaláʼdxinu guendaguti stiʼ Cristu la? Stale tu zabí beeu abril purtiʼ neni gaayuʼ sábadu ne domingu.
6. Xi xcaadxi ndaayaʼ zapa cani aca precursor auxiliar.
6 Ñee zié binnigola ni riganna ca binni ridagulisaa ra ridagulisaaluʼ lu beeu marzo o abril la? Nuu sti razón para ácaluʼ precursor. Casi maʼ bieeteʼ chigaca lu iza stiʼ dxiiñaʼ 2006, cani naca precursor auxiliar beeu tiidiʼ binnigola ni riganna ca binni ridagulisaa ca zanda chúʼcabe galaa endaridagulisaa ni rapanebe ca precursor semana ca. Ni chiguieeteʼ lu endaridagulisaa ca zacaneni laacabe gúnicabe stipa ácacabe precursor regular. Zaqueca, lu beeu marzo zanda ácanenu binni idxíñacaʼ lu biaaniʼ ni rudii Stiidxaʼ Dios ra usaananenu laacabe libru Xipeʼ ndiʼ cusiidiʼ Biblia. Xiñee qué quixhe íqueluʼ uzululuʼ gúʼndaneluʼ binni libru cubi ca yaʼ.
7, 8. 1) Xi zanda acané laanu ti usaʼnu biaʼ ora runi ti precursor auxiliar. 2) Ximodo zanda acané iráʼ binnilídxinu para gúninu ni, ne xi ribeendú irácabe.
7 Cumu nánnaluʼ cincuenta hora nga runi ca precursor auxiliar la? biiyaʼ ximodo zanda cuaqui chaahuiluʼ tiempu stiluʼ para ucheecheluʼ diidxaʼ doce hora lu ti semana. Uníʼneni cani maʼ huasaa cincuenta hora ne xcaadxi ni rucheeche diidxaʼ zándaca dede ucaani laacabe ucheechenécabe lii diidxaʼ. Stale hombrehuiiniʼ ne binni huaniisi ni maʼ uyuunisa maʼ biiyacaʼ zanda ugaandacaʼ cincuenta hora ca pa cuaqui chaahuicabe tiempu stícabe. Uniʼné Jiobá de laani. Ne oracá pa ganda la? ulaʼquiʼ chaahuiʼ cani rúniluʼ ne bicheeche diidxaʼ casi precursor auxiliar ne endanayecheʼ (Mal. 3:10).
8 Stale familia maʼ biiyacaʼ zanda aca neca tobi de laacabe precursor auxiliar pa cada tobi de laacabe quixhe chaahuiʼ ni guni. Ti familia udixhe íquecaʼ aca iráʼ cani maʼ uyuunisa ládecabe precursor. Xhupa xiiñicabe ni caʼruʼ chúʼnisa bíʼnicaʼ stipa pur jma ucheechecaʼ diidxaʼ. Xi uleendú familia riʼ pur stipa ni bíʼnicaʼ yaʼ. Sicaríʼ bicaacabe: «Nabé nayecheʼ udídidu beeu ca, ne bidúʼyadu ucaneni chuʼ binnilídxidu tobi si. ¡Rudiʼdu xquíxepeʼ Jiobá pur ndaayaʼ riʼ!».
9. Ximodo zanda udiʼnu lugar uzaaniʼ biaaniʼ stinu lu ca dxi zeeda para guietenaláʼdxinu guendaguti stiʼ Cristu.
9 Ñee zacané ni gúninu lu beeu marzo ne abril ca laanu para idxíñanu Bixhózenu Jiobá la? Zacaneni pa gúninu stipa pur gannaxhiinu Dios jma ne Xiiñibe ne pa ucheechenu diidxaʼ jma. Gúninu cásica biʼniʼ hombre ni biindaʼ Salmo riʼ: «Nabé zusicacaʼ Jiobá ne ruaaʼ, ne lade stale binni zaguaaʼ naróʼ stibe» (Sal. 109:30). Cumu nánnanu Jiobá zaguu ndaayaʼ dxiiñaʼ ni gúninu lu ca dxi zeeda para guietenaláʼdxinu guendaguti stiʼ Cristu, naquiiñeʼ udiʼnu lugar uzaaniʼ biaaniʼ ca ti zacá iree stale binni lu elacahui ne gápacabe «biaani ni rudii enda nabani» (Juan 8:12).