Ñee zanda gácaluʼ precursor auxiliar la?
1. Xiñee jma zanda gucheecheluʼ diidxaʼ ca dxi rietenaláʼdxinu guendaguti stiʼ Cristu.
1 Ora maʼ zeeda dxiña dxi guietenaláʼdxinu guendaguti stiʼ Cristu jma zanda gucheechenu diidxaʼ. Ca dxi ca nga riníʼ íquenu pabiáʼ nadxii Jiobá laanu ra bidii Xiiñiʼ para gulá laanu (Juan 3:16). Nga rucaa laanu gudiʼnu xquíxepeʼ Jiobá ne riale de ndaaniʼ ladxidoʼno guinínenu binni de laabe ne xi cayúnibe para laacaʼ (Is. 12:4, 5; Luc. 6:45). Ca dxi ca laaca zusaananenu cani runibiaʼnu ne ca binni ni nabeza neza ra rucheechenu diidxaʼ invitación para checaʼ dxi chiguietenaláʼdxinu guendaguti stiʼ Cristu. Despué zúninu stipa pur chigánnanu ca binni ni guyé dxi ca para gacanenu laacaʼ chuuláʼdxicaʼ guiziidicaʼ jma. Ñee zanda gácaluʼ precursor auxiliar lu beeu marzo, abril o mayo la?
2. Xiñee galán beeu marzo para gácaluʼ precursor.
2 Galán gácaluʼ precursor lu beeu marzo. Galán beeu marzo para gácaluʼ precursor auxiliar. Zanda cuiluʼ gucheecheluʼ diidxaʼ treinta o cincuenta hora. Pa beeu ca cheʼ binnigola ni riganna ca neza binni ridagulisaa ra nuutu la? zanda guiuu cani gaca precursor auxiliar lu guidubi guendaridagulisaa ni rapanebe ca precursor regular ne especial. Ra guiuʼnu 1 stiʼ marzo zuzulú zaguíʼzinu invitación para cheʼ binni dxi rietenaláʼdxinu guendaguti stiʼ Cristu, ni chigaca martes 26 stiʼ marzo 2013. Ne yanna riʼ jma stale dxi zápanu para quíʼzinu invitación ca que xcaadxi iza. Laaca galán gánnanu né beeu marzo gaayuʼ sábadu ne domingu. Nga runi, xiñee qué gúʼyaluʼ pa zanda gácaluʼ precursor auxiliar beeu ca.
3. Xi zanda gúniluʼ ti jma gucheecheluʼ diidxaʼ.
3 Dede yanna gudixhe chaahuiʼ tiempu stiluʼ. Yanna nga naquiiñeʼ gúʼyaluʼ tiempu stiluʼ ne cani rúniluʼ ti gánnaluʼ xi naquiiñeʼ gúniluʼ para gácaluʼ precursor. Xiñee qué guiníʼneluʼ binnilídxiluʼ ora guni adorartu Dios juntu ti gúʼyatu xi naguixhe ique cada tobi de laatu guni ne ximodo quixhe chaahuitu tiempu stitu (Prov. 15:22). Ne pa gúʼyaluʼ qué zanda gácaluʼ precursor auxiliar, cadi guizaalaʼdxuʼ. Zanda quíxheluʼ gucheecheluʼ diidxaʼ jma ca dxi maca rireeluʼ, ne laaca zanda guireeluʼ sti dxi ndaaniʼ semana.
4. Xi zabeendunu pa jma gucheechenu diidxaʼ lu beeu marzo, abril ne mayo.
4 Pa jma gucheechenu diidxaʼ beeu marzo, abril ne mayo la? jma ziuʼnu nayecheʼ purtiʼ cayúninu xhiiñaʼ Jiobá ne cayacanenu binni (Juan 4:34; Hech. 20:35). Peru ni jma risaca nga ziecheʼ Jiobá guʼyaʼ stipa gúninu (Prov. 27:11).