Gúninu jma lu xhiiñaʼ Dios tiempu chiguietenaláʼdxinu guendaguti stiʼ Cristu
1. Xi razón nápanu para quixhe íquenu gucheechenu diidxaʼ jma lu beeu marzo, abril ne mayo.
1 Ñee zanda gucheecheluʼ diidxaʼ jma lu beeu marzo, abril ne mayo la? Stale lugar nabé galán tiempu riʼ, purtiʼ rindaa para guiaaziʼ Gubidxa ne cadi nandáʼ diʼ ninca cadi nananda ne zándaca zacaca riuu neza ralídxiluʼ. Caadxi de cani rucheeche diidxaʼ rudiicabe laacaʼ vacación ra rúnicaʼ dxiiñaʼ o ra scuela, ne zanda iquiiñecaʼ tiempu riʼ para gucheechecaʼ diidxaʼ jma. Ra guiuʼnu 2 stiʼ abril, zaguíʼzinu ti invitación para cheʼ binni dxi chiguietenaláʼdxinu guendaguti stiʼ Cristu, ne chigácani 17 stiʼ abril. Tiidiʼ si dxi riʼ, zúninu stipa pur gacanenu ca binni ni cheʼ dxi guietenaláʼdxinu guendaguti stiʼ Cristu ne guni invitarnu laacaʼ chigucaadiágacaʼ libana ni bibí ni chitiidiʼ semana 25 stiʼ abril. Nápanu stale razón para quixhe íquenu gucheechenu diidxaʼ jma tiempu rietenaláʼdxinu guendaguti stiʼ Cristu.
2. Gunáʼ nga tobi de ca cosa ni naquiiñeʼ gúninu para ganda gucheechenu diidxaʼ jma.
2 Gácanu precursor auxiliar. Ti modo para gúninu jma lu xhiiñaʼ Dios nga quixhe íquenu gácanu precursor auxiliar. Cumu guiranu nabé riuu xhiiñanu la? naquiiñeʼ quixhe chaahuinu tiempu stinu ne guchaʼnu hora rúninu xcaadxi cosa (Pro. 21:5). Zándaca maʼ naguíxheluʼ xi chigúniluʼ lu ca beeu ca. Peru pa cadi risácapeʼ cani chigúniluʼ, ñee ñanda ñúniluʼ cani despué la? (Fili. 1:9-11.) Galán gábiluʼ xcaadxi de cani rucheecheʼ diidxaʼ ni ridagulisaaneluʼ rápaluʼ gana gácaluʼ precursor auxiliar. Pa gúniluʼ zacá la? zándaca né laacabe gácacabe precursor.
3. Ximodo zanda quixhe chaahuiʼ ca familia ca tiempu sticaʼ para gúnicaʼ jma lu xhiiñaʼ Dios.
3 Sti biaje guni adorartu Dios né binnilídxitu, galán guiniʼtu ximodo zanda gúnitu jma lu xhiiñaʼ Dios (Pro. 15:22). Pa gacanésaatu la? zanda gaca tobi o jma de ca binnilídxitu precursor auxiliar ti beeu o biaʼ ganda. Peru pa gúʼyatu qué zanda gúnitu ni la? galán guyúbitu ximodo gúnitu jma lu xhiiñaʼ Jiobá, casi gucheechetu diidxaʼ ca huadxí ca o ca sábadu ne ca domingu ca.
4. Xi zabeendunu pa gucheechenu diidxaʼ jma tiempu chiguietenaláʼdxinu guendaguti stiʼ Cristu.
4 Jiobá ruuyaʼ guiráʼ ni rúninu lu xhiiñaʼ ne rusisácabe cani (Heb. 6:10). Ni rusiecheʼ laanu nga gúninu xhiiñaʼ Jiobá ne gacanenu xcaadxi binni (1 Cró. 29: 9; Hech. 20:35). Ñee zanda gúniluʼ jma lu xhiiñaʼ Jiobá tiempu chiguietenaláʼdxinu guendaguti stiʼ Cristu la? Pa gúniluʼ ni ziuuluʼ jma nayecheʼ ne zabeenduluʼ stale cosa galán.