Chuʼnu nayecheʼ laga cayuʼnu listu para guietenaláʼdxinu guendaguti stiʼ Cristu
1. Ximodo zanda chuʼluʼ jma nayecheʼ tiempu rietenaláʼdxinu guendaguti stiʼ Cristu.
1 Racaláʼdxiluʼ chuʼluʼ jma nayecheʼ lu beeu marzo, abril ne mayo la? Zanda chuʼluʼ zacá ora gucheecheluʼ diidxaʼ jma, ne pa ganda la? gácaluʼ precursor auxiliar. Xiñee ziuuluʼ nayecheʼ pa gúniluʼ nga yaʼ.
2. Xiñee riuʼnu jma nayecheʼ ora rucheechenu diidxaʼ jma.
2 Zanda chuʼluʼ jma nayecheʼ. Bizáʼ Jiobá laanu para guni adorarnu laa ne chuʼnu gaxha de laa, ti zacá ganda guibáninu nayecheʼ (Mat. 5:3). Laaca bizaʼbe laanu para chuʼnu nayecheʼ ora gacanenu xcaadxi binni (Hech. 20:35). Ora rucheechenu diidxaʼ rúninu guiropaʼ cosa ni maʼ bizéʼtenu ca: runi adorarnu Dios ne racanenu xcaadxi binni. Nga runi, ora jma gúninu dxiiñaʼ riʼ, jma nayecheʼ ziuʼnu. Ne ora jma gucheechenu diidxaʼ, jma jneza zúninu ni, ne nga zacané laanu cadi guidxíbinu. Laaca zanda gacaneni laanu guininenu jma binni de Dios ne guzulunu guidúʼndanenu laacaʼ Biblia. Guiráʼ cani maʼ bizéʼtenu ca racanécani laanu chuʼnu jma nayecheʼ ora gucheechenu diidxaʼ.
3. Xiñee galán gácanu precursor auxiliar lu beeu marzo ne abril.
3 Galán iquiiñenu beeu marzo ne abril para gácanu precursor auxiliar ne zanda cuinu gúninu treinta o cincuenta hora. Ne lu beeu ca zuzulunu guni invitarnu binni para checaʼ dxi rietenaláʼdxinu guendaguti stiʼ Cristu. Zuzulunu quíʼzinu invitación riʼ sábadu 22 stiʼ marzo dede lunes 14 stiʼ abril, dxi chiguietenaláʼdxinu guendaguti stiʼ Cristu. Guiráʼ ca neza binni ridagulisaa zápacaʼ stale dxiiñaʼ ca dxi ca, stale de cani rucheeche diidxaʼ zúnicaʼ dxiiñaʼ «tobi si» para guiníʼnecaʼ guiráʼ binni ni nabeza neza ra rucheechecaʼ diidxaʼ ca dxi maʼ nexheʼ gácani (Sof. 3:9).
4. Xi naquiiñeʼ gúniluʼ pa racaláʼdxiluʼ gácaluʼ precursor auxiliar.
4 Maʼ nuuluʼ listu la? Pa caʼruʼ gúniluʼ ni la? biiyaʼ pa zanda guchaaluʼ modo ruʼnuʼ dxiiñaʼ ti ganda gucheecheluʼ diidxaʼ jma tiempu lu ti beeu o jma beeu. Biʼniʼ orar Jiobá (Sant. 1:5). Gudxi ca binnilídxiluʼ ne cani ridagulisaaneluʼ ni cá íqueluʼ gúniluʼ (Prov. 15:22). Zándaca gudiiluʼ cuenta laaca zanda gácaluʼ precursor auxiliar neca huaraluʼ o rúniluʼ dxiiñaʼ guidubi dxi.
5. Xi zabeendunu pa gucheechenu diidxaʼ jma ca dxi chiguietenaláʼdxinu guendaguti stiʼ Cristu.
5 Racalaʼdxiʼ Jiobá chuʼ ca xpinni nayecheʼ (Sal. 32:11). Pa gúninu stipa pur gucheechenu diidxaʼ jma tiempu ca dxi rietenaláʼdxinu guendaguti stiʼ Cristu la? cadi ziúʼsinu jma nayecheʼ, sínuque laaca zusiéchenu ladxidóʼ Bixhózenu ni nuu guibáʼ (Prov. 23:24; 27:11).