Careeche diidxaʼ casi qué huayuu dxi huayaca

Laanu, ca testigu stiʼ Jiobá, maʼ zinenu jma de ti gayuaa iza de cucheechenu ca diidxaʼ nacubi ne galán stiʼ Dios casi modo naguíxhebe (1 Cor. 9:23). Cumu careeche diidxaʼ riʼ casi qué huayuu dxi gácani lu stale diidxaʼ la? stale binni cayunibiaʼcaʼ Jiobá ne cayácani lu jma de chupa gayuaa treinta guidxi roʼ (Mat. 24:14). Peru xiñee caquiiñeʼ gaca dxiiñaʼ riʼ yaʼ. Ximodo cayanda cayácani lu guidubi naca guidxilayú.

Videu ni láʼ Los testigos de Jehová: organizados para predicar las buenas nuevas cacabi ca guendarinabadiidxaʼ ca ne culuiʼni laanu guiráʼ dxiiñaʼ raca lu guidubi naca guidxilayú para guiziidiʼ binni de Dios. Ora gúʼyaluʼ videu ca, biʼniʼ stipa pur guicábiluʼ ca guendarinabadiidxaʼ riʼ: 1) Ximodo raca guiráʼ dxiiñaʼ stinu ne tu laa zaniruʼ luni. 2) Ximodo racané ca binni riʼ guireecheʼ diidxaʼ: 1) cani ruyubi xi guicá lu ca libru ne revista stinu, 2) cani racané ca binni ni rutiixhi sti diidxaʼ, 3) cani rutiee ne ribee foto ne 4) cani runi grabar videu ne discu. 3) Xi para runi xquidxi Dios stale libru ne revista ne panda diidxaʼ ne guidxi careeche cani (Juan 17:3). 4) Panda libru ne revista raca lu ti iza. 5) Ñee huayacané ca libru ne revista ca binni la? (Heb. 4:12.) 6) Xi cayuni ca xpinni Dios para ganda gusiidicaʼ ca binni ni qué ruuyaʼ ne cani qué runadiaga. 7) Ximodo riaxa guiráʼ dxiiñaʼ ni rúninu riʼ. 8) Ximodo racané dxiiñaʼ ni runi: 1) cani ruyubi xi hospital zanda gacané ca Testigu, 2) cani ruuyaʼ ximodo rireeche diidxaʼ ne 3) cani ruuyaʼ pabiáʼ ne paraa gaca guendaridagulisaa roʼ. 9) Pa testigu stiʼ Jiobá lii, ximodo gucané videu riʼ lii para gusisácaluʼ: 1) stipa ni cayuni xquidxi Jiobá para guireeche diidxaʼ, 2) dxiiñaʼ ni runi guiráʼ ca binni ni nuu lu jma de ti gayuaa Betel ni nuu lu guidxilayú, 3) modo cusiidiʼ xquidxi Dios ca binnigola ni riganna ca neza binni ridagulisaa ne ca misioneru, 4) gúʼndaluʼ textu guiráʼ dxi ante gúniluʼ dxiiñaʼ ne gúʼndaluʼ guiráʼ semana dede ante ni chiguiuundaʼ lu ca guendaridagulisaa ca, 5) ca guendaridagulisaa ca ne cadi guiádxaluʼ cani, 6) ora gaca Guidxilayú riʼ ti paraísu (Isa. 11:9), 7) dxiiñaʼ ni nápaluʼ para gusíʼdiluʼ binni (Juan 4:35).

Pa maʼ biluiʼluʼ videu riʼ ca binni lídxiluʼ, cani runibiaʼluʼ, cani riuulaʼdxiʼ guiziidiʼ jma ne cani ruundaneluʼ Biblia, ximodo gucaneni laacabe yaʼ. Xiñee qué guluiʼluʼ videu riʼ xcaadxi binni ca dxi riʼ ti zacá guiníʼneluʼ laacabe de ca diidxaʼ nacubi ne galán stiʼ Dios yaʼ (Mat. 28:19, 20).