Ñee cayuni binnilídxiluʼ ni naquiiñeʼ guni para ganda guilá la?

¹ Ca diidxaʼ riguixhená zeeda lu Biblia cusihuinni mayaca guinitilú guiráʼ ca cosa malu nuu yanna. Ca dxi nagana nabáninu yanna riʼ zeeda gácani cásica tiempu ni guyuu ante guiaba Nisaguié Naroʼbaʼ que (Mat. 24:37-39). Gunda bilá Noé dxi binitilú guidxilayú que purtiʼ «guzane[be] Dios ni dxandíʼ» (Gén. 6:9). Ne laaca gucanebe binnilídxibe para biʼniʼ cásica bíʼnibe, purtiʼ bilá guiracaʼ. Ximodo zanda chinándanu ejemplu stiʼ Noé, ne ximodo zanda gacanenu binnilídxinu para guilá ora guinitilú ca cosa malu nuu yanna riʼ.

² Gúdxibe binni ñuni ni jneza. Noé qué liica nusaanaʼ de nucheeche diidxaʼ, ne biaʼ cuarenta o cincuenta iza nga gúdxibe ca binni que «nusaana ca irá enda ruchee sticaʼ» (2 Ped. 2:5). Biʼniʼ burla ca xpesínube laabe ora bicheechebe diidxaʼ, ne zándaca bicaa ca ángel malu que laacaʼ gúnicaʼ ni o zándaca de laasicaʼ bíʼnicaʼ ni. Yanna riʼ, laaca nuu binni ni qué riná gucaadiaga laanu ne runi búrlacaʼ laanu, ne nga cusihuinni mayaca guinitilú guiráʼ ca cosa malu nuu yanna (2 Ped. 3:3, 4). Peru gadxé si de ni guca ca dxi stiʼ Noé que, yanna riʼ stale binni cucaadiaga laanu ne maʼ cayuni adorarcaʼ Jiobá (Isa. 2:2). Para guilanu ne para guilá cani cucaadiaga laanu la? naquiiñeʼ gucheecherunu diidxaʼ (1 Tim. 4:16). Nga runi, naquiiñeʼ gusiiditu ca xiiñitu gudiicaʼ cuenta pabiáʼ risaca gucheechenu diidxaʼ, cadi gábisitu ni laacabe sínuque naquiiñeʼ quíxhetu ejemplu nezalúcabe (2 Tim. 4:2).

³ «Bíʼnibe zaqué zaquepeʼ.» Para gunda bilá Noé ne binnilidxi la? gupa xidé bíʼnicaʼ guiráʼ xixé ni gudxi Jiobá laacaʼ (Gén. 6:22). Laanu laaca riquiiñeʼ guzúʼbanu diidxaʼ yanna ne gúninu guiráʼ ni rusiidiʼ Biblia ne ni rabi mozo ni nuu xpiaaniʼ laanu (Sant. 3:17). Ca xiiñiʼ ti Testigu ni maʼ huaniisi rietenaláʼdxicaʼ ximodo biʼniʼ bixhózecaʼ guirá ni rusiidiʼ xquidxi Jiobá. Biindané bixhózecabe laacabe Biblia guiráʼ semana ne bicheechené laacabe diidxaʼ guiráʼ sábadu ne domingu. Ne bíʼnibe stipa para gucheechebe diidxaʼ ne gadxé gadxé xiiñibe guiráʼ biaje guireecabe. Cumu qué nusaana de ñúnibe «zaqué zaquepeʼ» la? bidii ca xiiñibe cuenta pabiáʼ risaca gucheechecaʼ diidxaʼ, yanna guiráʼ xhoopaʼ xiiñibe rúnicaʼ ni na Jiobá.

⁴ Málasi nga guidxiña dxi guinitilú guiráʼ cosa malu nuu yanna riʼ (Luc. 12:40). Pa gúninu cásica biʼniʼ Noé ne gápanu fe la? zalanu ne zalá binnilídxinu (Heb. 11:7).