Cadi gusaana de gucheecheluʼ diidxaʼ
1 Zándaca nuu tiru riníʼ íquenu maʼ stale biaje gudídinu ra nuu ca binni ni nabeza ladu ra rucheechenu diidxaʼ, peru huaxiéʼ cadxélanu binni ni rapa gana guiziidiʼ. Neca guiníʼ íquenu zacá la? nápanu stale razón para gucheecherunu diidxaʼ (Mat. 28:19, 20).
2 Para ganna binni. Dxi guníʼ Jesús de «xi seña ihuinni dxi mayaca [...] iluxe guidx[i]layú ri» la? guniʼbe zaca ti dxiiñaʼ nabé risaca, «zuiʼ cabe stiidxa Dios de idubi naca guidxilayú para ganna irá xixé guidxi» (Mat. 24:3, 14). Ne zacá nga laani, purtiʼ ora ruuyaʼ binni canagucheechenu ca diidxaʼ nacubi ne galán stiʼ Reinu la? laaca cayabi nga laacabe xiixa. Ne neca qué gucaadiaga binni laanu, zándaca guiréʼsinu de ranuucaʼ o gapa si dxi riníʼrucaʼ yegánnanu laacaʼ. Qué zusaananu de gucheechenu diidxaʼ pa nánnanu xi pur cayúninu ni. Riuulaʼdxiʼ Jiobá gúninu dxiiñaʼ ca, purtiʼ maca cá lu Biblia zusíʼdinu binni de laabe ne zaguixhenanu laacaʼ (2 Tes. 1:6-9).
3 Cadi guireʼnu gana. Yanna riʼ stale cosa nga ni riuulaʼdxiʼ binni guni ne gapa, ne para nga ribeecabe stale tiempu. Nga runi, pa racaláʼdxinu guiziidicabe jma de Dios la? qué riquiiñeʼ diʼ guireʼnu gana. Guzéʼtenu ti ejemplu stiʼ caadxi Testigu, laacabe nabé gudíʼdicabe ralidxi ti gunaa guiráʼ semana dede bizaa ti iza. Gudiʼdiʼ si ti iza de riécabe zaqué, maʼ bitiidiʼ gunaa que laacabe ndaaniʼ lidxi para guiniʼnécabe laa de ni zeeda lu Biblia. Cumu nabé guyuuláʼdxibe ni gúdxicabe laabe la? oraqueruʼ bidiibe lugar guʼndanécabe laabe de Biblia. Bizulú guyebe guendaridagulisaa ne qué nindaa de ngue guniʼbe maʼ rápabe gana chúʼnisabe.
4 Cásica nabé nagueenda cuchaa tiempu riʼ la? binni laaca nabé cuchaa modo laa. Nga runi, zándaca nuu stale de cani qué niná nucaadiaga laanu dxiqué yanna maʼ rápacaʼ gana gánnacaʼ de ca cosa sicarú ni chiguni Dios para laanu. Ne neca ti binni si chuulaʼdxiʼ guiziidiʼ de stiidxaʼ Reinu la? zusihuinni nga cadi pur gana si cucheechenu diidxaʼ.
5 Guiráʼ ladu cadale binni «ni cacaalaʼdxiʼ ne cayacaná pur ca guendaquéiquiiñeʼ ni cayaca» (Eze. 9:4). Guiráʼ cani ribeendunu ora rucheechenu diidxaʼ cusihuínnicani nuu binni ni dxandíʼ racalaʼdxiʼ guiziidiʼ de Reinu stiʼ Dios (Isa. 2:2, 3). Nga runi, cadi gusaananu de gucheechenu ca «diidxaʼ nacubi ne galán stiʼ xiixa ni jma sicarú» de guidubi ladxidoʼno (Isa. 52:7; Hech. 5:42).