Modo naquiiñeʼ gaca ca guendaridagulisaa ca yanna
1, 2. Ximodo chigaca ca guendaridagulisaa ca lu enero 2009.
1 Lu semana 21 dede 27 stiʼ abril 2008 que bieeteʼ xiixa ni nabé bisiecheʼ guiráʼ ca Testigu ni nuu lu guidubi naca Guidxilayú, nani sicaríʼ: «Dede primé dxi stiʼ enero 2009 la? Grupu ni Ruundaʼ Libru stiʼ ca Binni Ridagulisaa, Scuela stiʼ cani Rucheeche Diidxaʼ ne Guendaridagulisaa stiʼ Dxiiñaʼ Stinu, maʼ juntu zácacani. Maʼ qué zaree ládini Grupu ni Ruundaʼ Libru stiʼ ca Binni Ridagulisaa, sínuque Guendaridagulisaa ra Riuundaʼ Biblia».
2 Maʼ juntu chigaca chonna guendaridagulisaa. Biaʼsi ti hora ne cuarenta y cinco minutu nga zácacani, maca ne diidxaʼ riuundaʼ ne oración. Zuzuluni ne diidxaʼ riuundaʼ ne oración (5 min.), de racá maʼ zaca Guendaridagulisaa ra Riuundaʼ Biblia (25 min.). Ora maʼ bilúxeni la? maʼ zuzulú Scuela stiʼ cani Rucheeche Diidxaʼ (30 min.). Óraca maʼ ziuu stiʼ diidxaʼ riuundaʼ (5 min.) para guzulú Guendaridagulisaa stiʼ Dxiiñaʼ Stinu (35 min.). Maʼ para guiluxe cani la? ziuu sti diidxaʼ riuundaʼ ne oración (5 min.). Para ganda guidúʼndanu ni chitiidiʼ lu Guendaridagulisaa ra Riuundaʼ Biblia, lu Scuela stiʼ cani Rucheeche Diidxaʼ ne lu Guendaridagulisaa stiʼ Dxiiñaʼ Stinu la? guiráʼ beeu zaree lu Xhiiñaʼ Reinu ni Rúninu xi chitiidiʼ lúcani.
3. Ximodo zaca Guendaridagulisaa ra Riuundaʼ Biblia.
3 Guendaridagulisaa ra Riuundaʼ Biblia. Zácani modo riuundaʼ Torre stiʼ ni rapa. Cadi naquiiñeʼ diʼ guzéʼtenu xiixa de ni bidúʼndanu ti semana ante, nga runi cadi stale diʼ zaníʼ ni chigutiidiʼ guendaridagulisaa ca ora guzuluni. Zacá maʼ zanda guicabi guiráʼ cani cucaadiaga. Binnigola ni rapa guiráʼ stiʼ binni ridagulisaa ca zuni ti guiʼchiʼ ra guicá lá gadxé gadxé binnigola ni gutiidiʼ guendaridagulisaa riʼ guiráʼ semana.
4. Ximodo chigaca Guendaridagulisaa stiʼ Dxiiñaʼ Stinu.
4 Guendaridagulisaa stiʼ Dxiiñaʼ Stinu. Zácani zaqueca, peru cani chiguieeteʼ stiʼ ca binni ridagulisaa maʼ zácani gaayuʼ si minutu, biaʼsi para guzeetecabe xiixa ni naquiiñeʼ ganna ca binni ridagulisaa ne guiuundaʼ chupa chonna carta ni guseendaʼ Betel. Cani maca rieeteʼ, casi pora guireeche diidxaʼ, tu gusiá Yoo stiʼ Reinu, ca guiʼchiʼ ra cá pagala nuu ne carta ni maca ruseendaʼ Betel la? maʼ qué ziuundaʼ diʼ cani nezalú cani cucaadiaga, sínuque zacá ni ra cá guiráʼ guiʼchiʼ para guʼndaʼ ca binni ridagulisaa. Cani gutiidiʼ ca libana riʼ naquiiñeʼ guʼndaʼ chaahuicaʼ dede ante ne gutiidicabe ni biaʼ tiempu nexheʼ gácani.
5. Ximodo chigaca ca guendaridagulisaa ca semana gueeda binnigola ni riganna ca binni ridagulisaa.
5 Ora gueeda binnigola ni riganna ca binni ridagulisaa. Qué zadxaa diʼ gastiʼ semana gueeda binnigola ni riganna ca binni ridagulisaa. Martes ca zaca Scuela stiʼ cani Rucheeche Diidxaʼ ne Guendaridagulisaa stiʼ Dxiiñaʼ stinu. De racá ziuu ti diidxaʼ riuundaʼ ne despué zudii binnigola ca ti libana de treinta minutu. Cásica maca rácani la? zabícabe sti dxi para gaca Guendaridagulisaa ra Riuundaʼ Biblia, de racá maʼ zudii binnigola ca ti libana. Zaluxe guendaridagulisaa ca ne diidxaʼ riuundaʼ ne oración.
6. Xi dxiiñaʼ chiguni binnigola ni guni tender ti grupu.
6 Guendaridagulisaa raca ante gucheechenu diidxaʼ Ca binnigola ca zabicaʼ ti binnigola ládecaʼ para guni tender cada grupu de ni rucheeche diidxaʼ ne chigánnacabe laacaʼ. Siervu ministerial ni guni dxiiñaʼ riʼ la? zábicabe laabe «siervu de grupu».
7. Xi zabeendunu ra maʼ bidxaa modo chigaca ca guendaridagulisaa ca yanna.
7 Casi maʼ bidúʼyanu, stale cosa galán nga zazíʼdinu dxi ca, purtiʼ zacanécani laanu para gucheechenu diidxaʼ jma jneza, gusíʼdinu jma galán ne gacanenu binni (Efe. 4:13, 14; 2 Tim. 3:17).
8. Xiñee jma stale ni zabeendunu pa guidúʼndanu dede ante.
8 Pa guidúʼndanu ni chitiidiʼ lu ca guendaridagulisaa riʼ ante chuunu la? jma nagueenda zudiʼnu cuenta gunáʼ nga cani jma risaca ni guzeetecabe lúcani. Guiranu zanda guicábinu ne ugúʼsaanu gana laanu (Rom. 1:11, 12; Heb. 10:24). Racaláʼdxinu «guʼya cabe ze dxi ziyene [n]u jma», peru para nga naquiiñeʼ gusíʼdinu Stiidxaʼ Dios jneza (1 Tim. 4:15; 2 Tim. 2:15).
9. Xi maʼ gudixhe íquenu gúninu, ne xiñee.
9 Riuuláʼdxinu modo chigaca ca guendaridagulisaa ca yanna. Nga runi, maʼ gudixhe íquenu iquiiñenu guiráʼ ni rusiidiʼ «mozo ni nuu xpiaaniʼ ne ni runi jneza» laanu ne chuʼnu gaxha de Pastor ni Nandxóʼ stinu, laabe cayacanebe laanu chuʼnu listu para guni huantarnu ora maʼ gueeda ca dxi «jma nagana» ca (Mat. 24:21, 45; Heb. 13:20, 21; Apo. 7:14).