Chuʼnu listu para guietenaláʼdxinu guendaguti stiʼ Jesús

Cumu zinándanu Cristu la? riéchenu stale ne risaca para laanu uguʼnu listu guiráʼ ni zaquiiñeʼ gueelaʼ guietenaláʼdxinu guendaguti stiʼ Jesús (Luc. 22:19). Xii nga cani naquiiñeʼ gúninu ante guietenaláʼdxinu guendaguti stibe yaʼ.

◼ Pora ne paraa gácani. Guiráʼ cani cheʼ guendaridagulisaa ca naquiiñeʼ gánnacaʼ pora ne paraapeʼ nga chigaca ni. Galán chindanu tempranu ne guireʼnu ne cuidadu ora maʼ biluxe ni, jmaruʼ si pa jma de ti neza binni ridagulisaa zaquiiñeʼ Yoo stiʼ Reinu gueelaʼ ca, purtiʼ huaxiéʼ tiempu zápacabe para guzulúcabe. Laguuyaʼ cadi chuʼ stale binni ra puertaʼ stini, lu banqueta ne ra ruzuhuaa carru.

◼ Ca invitación ni zaquiiñenu. Ñee maʼ napa guiráʼ cani rucheeche diidxaʼ ca invitación ni chitiizicaʼ ne maʼ nánnacaʼ xidé caniʼni la? Maʼ biʼniʼ ensayarluʼ modo gusaanaluʼ invitación ca la? Tu cá íqueluʼ guni invitarluʼ. Gudixhe ique gusiraluʼ guiráʼ invitación stiluʼ.

◼ Modo cheʼ binni. Cadi guiaandaʼ lii nuu binni ni riuulaʼdxiʼ guiziidiʼ jma ne nuu xpinni Cristu ni caquiiñeʼ chuʼ tu chicaa laacaʼ lu carru o gacaneluʼ laacaʼ de sti modo. Ñee maʼ gudixhe chaahuitu ximodo gacanetu laacabe la?

◼ Pan ne vinu. Ca binnigola ca naquiiñeʼ gúʼyacaʼ tiidiʼ pan ne vinu ca guiaaziʼ si Gubidxa. Laaca zuuyacabe ximodo gudiicabe pan ne vinu ca tuuxa ni bibí ni qué zanda cheʼ pur huará. Naquiiñeʼ guidxela pan ne vinu ni zanda iquiiñeʼ (laguuyaʼ La Atalaya 15 stiʼ febrero 2003, yaza 14 ne 15, párrafo 14 ne 17).

◼ Yoo stiʼ Reinu. Dede ante naquiiñeʼ quíxhetu ximodo guiá chaahuiʼ Yoo stiʼ Reinu ra chigácani, uguutu listu ca bladuʼ ne ca copa ni zaquiiñeʼ ne guyúbitu ti mexaʼ ne ti lari galán gataʼ luni. Pa chigácani sti lugar la? naquiiñeʼ gúʼyatu chuʼ sonidu ca galán ti ganda gucaadiaga chaahuiʼ guiráʼ binni libana chitiidiʼ dxi ca. Naquiiñeʼ guyúbitu cani guidxaagalú binni ne cani chigutiidiʼ pan ne vinu ne gábitu laacabe xii nga dxiiñaʼ stícabe, gusiénetu laacabe ximodo gúnicabe ni ne xiñee naquiiñeʼ gácucabe lari jneza.

Guendaguti stiʼ Cristu nga ni jma risaca guietenaláʼdxinu guiráʼ iza, nga runi cada tobi de laanu naquiiñeʼ chuʼ listu ne gacanenu lu guiráʼ ni chiguni ca binni ridagulisaa. Nanna dxíchinu zaguu Jiobá ndaayaʼ cani gusisaca guiráʼ ni maʼ bíʼnibe para laacaʼ, pur guendaguti stiʼ Jesucristu.