Guidúʼndanu dede ante ni chitiidiʼ lu Guendaridagulisaa stiʼ Dxiiñaʼ Stinu
1. Xi para raca Guendaridagulisaa stiʼ Dxiiñaʼ Stinu ne ximodo zanda cueendunu ni galán luni.
1 Guendaridagulisaa stiʼ Dxiiñaʼ Stinu ca rácani para gacaneni laanu gúninu xhiiñaʼ Reinu jma jneza. Luni rieeteʼ ximodo gucheechenu diidxaʼ, gacanenu binni gaca xpinni Cristu ne guininu maʼ cadxiña dxi cuidxi Dios cuenta binni (Mat. 28:19, 20; Mar. 13:10; 2 Ped. 3:7). Para cueendunu ni galán ora chuunu guendaridagulisaa riʼ la? caquiiñeʼ guidúʼndanu dede ante ni chitiidiʼ luni ne chuʼnu listu para guicábinu.
2. Xi gúninu dede ante para gucaadiáganu ti libana.
2 Libana. Ora tiidiʼ ti libana la? stale biaje maca cá paraa zeeda tema ni chiguiuundaʼ ca lu guiʼchiʼ ra cá ximodo tiidiʼ diʼ. Nga runi, zanda guidúʼndanu ra cá tema ca, ca textu zeeda luni ne guiníʼ íquenu ximodo iquiiñenu cani ora gucheechenu diidxaʼ.
3. Xi zanda gúniluʼ para guicábiluʼ ora guiuundaʼ ti tema ra zanabadiidxacabe.
3 Gunabadiidxaʼ ne guicábicabe. Ante guiuundaʼ tema riʼ riníʼcabe caadxi diidxaʼ ora ruzuluni ne ora rilúxeni ne rácani casi modo riuundaʼ Torre stiʼ ni rapa. Zanda guzaaluʼ raya xaʼnaʼ ca diidxaʼ ni jma risaca zeeda lu párrafo ca ne chuʼluʼ listu para guicábiluʼ, zanda guiniʼluʼ xiixa ni gacané cani cucaadiaga.
4. Xi gúninu ora chitiidiʼ ti libana ra zanda guicábinu.
4 Libana ra zanda guicábinu. Neca jma nga riníʼ ni cudii libana riʼ, peru ziuu ora zanábabe guicabi cani cucaadiaga. Nga runi, pa guzaaluʼ raya xaʼnaʼ ca diidxaʼ ni jma risaca ne guyúbiluʼ ca textu ca, zanda guicábiluʼ ora guinabadiidxabe xiixa. Ni gutiidiʼ libana ca zuyubi ximodo gacané cani cucaadiaga para guicábicaʼ ni jma risaca zeeda lu tema ca.
5. Ximodo zanda cueendunu ni galán ora tiidiʼ modo gusaananu xiixa guiʼchiʼ.
5 Ora tiidiʼ modo gusaananu xiixa guiʼchiʼ. Nuu tiru ridiʼdiʼ lu guendaridagulisaa riʼ ximodo gusaananu xiixa guiʼchiʼ ora maʼ chigucheechenu diidxaʼ, ne rinábacabe ca binnigola, cani maʼ xadxí rucheeche diidxaʼ o ca precursor para gutiidiʼ ni. Ora maʼ cadúʼndanu tema ca ralídxinu, galán guiníʼ íquenu ximodo chigutiidicabe ni. Despué, ora maʼ cadiʼdiʼ ni, galán guiníʼ íqueluʼ ximodo niniʼluʼ ni ora maʼ gucheecheluʼ diidxaʼ ra nuu gadxé gadxé binni. Cadi guiaandaʼ chineluʼ guiʼchiʼ ni chigusaananenu binni beeu ca. De racá, ora guni adorarluʼ Dios ne binnilídxiluʼ zanda gúnitu casi gudiʼdiʼ lu guendaridagulisaa ca.
6. Bizeeteʼ xiñee naquiiñeʼ guidúʼndanu dede ante cani chitiidiʼ lu Guendaridagulisaa stiʼ Dxiiñaʼ Stinu.
6 Jma ribeendunu ni galán lu Guendaridagulisaa stiʼ Dxiiñaʼ Stinu ora ridúʼndanu dede ante ni chitiidiʼ luni ne ora guiníʼ íquenu xi guiráʼ zazíʼdinu luni. Ne jma racanésaanu ora gúninu zacá (Rom. 1:11, 12). Pa cueenu tiempu para guidúʼndanu dede ante la? jma ziuʼnu listu para gúninu xhiiñanu jneza (2 Tim. 3:17).